Ŋigal. 2:8 - Ebaibul

⁸ Anerae ikwapei abunio Akuj kituruworya Petero ekiyakia neni a Ŋiyudayan, abu eketuruwo ayoŋ daŋ ekiyakia neni a ŋituŋa a ŋulu nyerae Ŋiyudayan.

Ŋigal. 2:8 Iomraidhean Croise

Ŋitic. 1:25

Itemokino iŋes kitiya etic ŋolo ke Ekiyakia, kilunyokin lotic ŋolo aesikini Yuda ŋolo abu tolot neni etemokino iŋes toyai.”

Ŋitic. 1:8

Nai iryamunete iyes apedor apaki ŋina ebunio Etau ŋolo Asegan neni kus; iruworosi iyes ŋisuudae kaŋ alo Yerusalem, alo Yudaya daadaŋ ka Samaria tari neni isalya akwap.”

Ŋitic. 15:12

Kililiŋa ŋituŋa ŋulu ka atukot daadaŋ, topupokis daŋ Baranaba ka Paulo elimonorete ŋuna a ŋaumonokineta ka ŋakujuwuanisya daadaŋ ŋuna kitiyat Akuj aneni kec alokidiŋ ŋituŋa ŋulu pa arae Ŋiyudayan.

Ŋitic. 19:26

Iteete ka iirasi iyes ŋilopeyek Paulo lo. Ebala iŋes ebe nyerae ŋakujo ŋuna itiyaunito ŋituŋa ŋakujo tari iwadio ka etunup ŋituŋa daadaŋ a ne alo Epeso ka akwap ŋina ka Asia daadaŋ.

Ŋitic. 21:19

Kimala Paulo ikes, ido kitatamik ereunit a ŋapeipei ŋakiro daadaŋ ŋuna aris Akuj kitiya alotic keŋ lotuŋa ŋulu pa arae Ŋiyudayan.

Ŋitic. 22:21

Tema Ekapolon neni kaŋ, ‘Tolot, anerae ekeyakiyari ayoŋ iyoŋ neni elwana nooi, lotuŋa ŋulu nyerae Ŋiyudayan!’ ”

Ŋitic. 4:4

Nai apotu ŋituŋa ŋulu alalak, ŋulu apotu kiirasi ŋakiro a Ŋikiyakia tonupa; toapik ekimar a ŋikilyok ŋalipyo ŋakan.

Ŋitic. 8:17

Kidokokis nai Petero ka Yoana ŋakan kec neni a ŋikanupak, ido toryamut ikes Etau ŋolo Asegan.

Ŋitic. 9:15

Nai tolimok Ekapolon Anania tema, “Tolot, anerae erae iŋes eketiyan kaŋ ŋoloseuna, ŋolo iteyenuni ekiro kaŋ lobukui ŋulu nyerae Ŋiyudayan ka lorwosi kec ta lotuŋa ŋulu a Isirael.

1 Ŋikor. 15:10

Nai aŋuna ka ajokis a ŋina ka Akuj, arae ayoŋ tokona ekiyakia ka nyeruworo ajokis ŋina abu iŋes okoinak ayoŋ akoŋinait. Akilo, etiya ayoŋ nooi adepar Ŋikiyakia ŋuluce daadaŋ, tari pa kerae agogoŋu kaŋ a elope etiyae, nai ajokis ŋina ka Akuj ŋina eyai neni kaŋ.

1 Ŋikor. 9:2

Tari pa keketeete ŋice ayoŋ atemar arae ekiyakia, kire icamunito iyes atemar arae ayoŋ. Aŋuna ka akiyar kus anakimorikina ke Ekapolon, iyes ŋilopeyek itoodiunito araakau kaŋ ekiyakia.

Ŋigal. 3:5

Ikiinakinit mono Akuj iyes Etau keŋ ka akitiya ŋakujuwuanisya alokidiŋ kus, aŋuna itiyaata iyes ŋuna ecamito Ŋikisila kori aŋuna iiranaryata Ŋakiro ŋuna Ajokak, ido tonupa?

Ŋikol. 1:29

Aŋakiro a ŋun, etiyae ayoŋ ka agogoŋu ka aŋirikinit alotooma apedor ŋina akainakinit Kristo ŋina eketepedorit ayoŋ akitiya ŋun.

1 Ŋites. 2:13

Ikilakanar nabo isua jwi jwi neni ka Akuj, anerae ŋina iponiata iyes kiiraryata ŋakiro ŋuna ka Akuj aneni kosi, ipotu iyes tocamut pa erae ŋakiro ŋuna a ituŋanan, nai erae ŋuna ka Akuj ka erae kire ŋakiro keŋ ŋuna tokona itiyaete alotooma kus a ŋulu inupito.