Ŋigal. 2:20 - Ebaibul

²⁰ Aŋun nai, nyarubakinit ayoŋ arae ŋolo ayari, nai Kristo eyari alotooma kaŋ. Akiyar kaŋ ŋina anakwap a na, ayari ananupit Lokoku ka Akuj, ŋolo abu okominak ayoŋ ka tojal akiyar keŋ aŋuna kaŋ.

Ŋigal. 2:20 Iomraidhean Croise

Eete a Ŋie. 7:10

Arae ayoŋ ŋina a ŋolominat kaŋ ka ekeitanit iŋes ayoŋ.

Mat. 20:28

Ikwaŋinapei, pa abunit Lokoku a Ituŋanan akitiyanakino, nai abunit akitiyanakin ka akijal akeekiyar tolakunere ŋulu alalak.”

Mat. 4:3

Bu eketemon neni keŋ tema, “Ani kirae iyoŋ Lokoku ka Akuj, kituluwo ŋamoru nu toruworos akimuj.”

Yoa. 1:49

Toboŋok Nasaniel tema, “Eketataman, irae iyoŋ Lokoku ka Akuj ka irae Erwosit ŋolo a Isirael.”

Yoa. 10:11

“Arae Ayoŋ ekeyokon ŋolo ajokan. Ejali ekeyokon ŋolo ajokan akeekiyar aŋuna a ŋamesekin keŋ.

Yoa. 15:13

Emam amina ŋina epol akilo ŋina ejalya ituŋanan akeekiyar aŋuna a ŋikonei keŋ.

Yoa. 17:21

Elipit ayoŋ atemar toruworos ikes daadaŋ ŋipei. “Papa! [Ikwaŋinapei iyakar iyoŋ tooma kaŋ, ka ayoŋ daŋ tooma kon,] pena ikes tooma yok, ikotere enupi akwap atemar, ikiyakuunit iyoŋ ayoŋ.

Yoa. 3:16

Kire, abu Akuj tomina akwap nooi, tojal tari Lokoku keŋ ŋolo donupei, ikotere ŋini enupi iŋes nyebukori, nai toryamu akiyar ŋina nyedaun.

Yoa. 3:35

Emina Akuj Papa Lokoku keŋ ka ewuak ŋiboro daadaŋ nakan keŋ.

Yoa. 6:57

Ikwaŋinapei ekeyakuunia ayoŋ Papa ŋolo eyari, nabo ayoŋ daŋ oyari aŋuna a Papa, ikwaŋinapei, ŋini ekemuji ayoŋ, eyari aŋuna kaŋ.

Yoa. 6:69

Ikinup ka ikiyenu daŋ atemar irae iyoŋ ŋolo donupei, ŋolo ka Akuj.”

Ŋitic. 8:36

Ani elosete ikes alorot, todolo neni ayakasi ŋakipi, ido tolimok ekapolon ŋol Pilipo tema, “Kiŋolik, ŋakipi nu! Nyo ekeretakini ayoŋ akibatisao?” [

Ŋitic. 9:20

Kisyak iŋes atipei alimonokin alosinagogae ŋakiro a Yesu ebala, “Erae Yesu Lokoku ka Akuj.”

Ŋirom. 1:17

Anerae isileereunito Ŋakiro ŋuna Ajokak epite ŋolo ituruworya Akuj ŋituŋa ŋulu iyookino alokiŋaren keŋ: erae alotooma anupit, ameun anakisyakinet tari nasalunet, ikwapei igiritere atemar, “Iŋes ŋini iyookino a ŋuna enupitor neni ka Akuj, eyari.”

Ŋirom. 14:7

Emam iwon ŋini eyari aŋuna keŋ bon, emam iwon ŋini etwani aŋuna keŋ bon.

Ŋirom. 3:22

Akiyookino na, ŋina ka Akuj, ebunit alotooma anupit Yesu Kristo, neni a daadaŋ a ŋulu enupito. Emam atyeketait,

Ŋirom. 4:25

Aponi kipotoroe iŋes totwan aŋuna a ŋasecisya yok ka aponi kiteyarunae aŋuna ka akituruwor iwon ŋulu ikiyookino alokiŋaren Akuj.

Ŋirom. 5:2

Aŋuna a Yesu Kristo, ikiyakar iwon apedor ŋinamoret ajokis na ŋina ka Akuj ka ikilelyani daŋ, anerae ikigeno atemar ikiruki moi ka Akuj anapolou keŋ.

Ŋirom. 5:6

Anerae ani eriŋa iwon ikipalag aŋuna ikipukator asecit iwon, abu Kristo totwan aŋuna yok a ŋikasecak apaki ŋina aseunit Akuj.

Ŋirom. 5:8

Nai ikitoodik Akuj iwon etyae ŋolo ikiminar iŋes iwon, anerae abu Kristo totwan aŋuna yok eriŋa iwon ikirae ŋikasecak.

Ŋirom. 6:13

Nyijalakis ediokineri kus neni ka asecit, ikotere nyisitiyae ikwa ibore ŋini ejiyere alowae a ŋolo ka aronis. Nai inakisi ŋakusiwat neni ka Akuj ikwa ŋuna eteyarun alokatwak nakiyar ŋina kitete. Tojalakisi ŋinerin kus daadaŋ neni ka Akuj, ikotere kisitiya ikwa ŋiboro ŋulu ejiyere alowae a ŋolo ka akiyookino.

Ŋirom. 6:8

Nai ani kikitwakit sek iwon kaapei ka Kristo, ikinupit daŋ atemar ikiponi akiyar kaapei ka iŋes.

Ŋirom. 8:10

Nai ani kiboi Kristo alotooma kus, ikiteyari iyes Etau ŋolo ka Akuj, tari kelosete ŋawat kus atwakare a ŋuna ka asecit; anerae ikituruwor iyes ŋulu iyookino aneni ka Akuj.

Ŋirom. 8:37

Nai alotooma ŋakiro ŋun daadaŋ, ikiloit iwon tari ŋikelounak aŋuna a ŋolo abu ikiminak iwon.

1 Ŋikor. 6:17

Nai ituŋanan ŋini imorikinosi ka Ekapolon, eruworosi epeitau ka iŋes.

2 Ŋikor. 1:24

Nyikicamit isua akitiŋakin iyes ŋuna itemokino tonupa; ikiyeni isua atemar icasito iyes ananupit kus. Akilo ŋun, ikitiyae isua kaapei ka iyes aŋuna ka alakara kus.

2 Ŋikor. 10:3

Kire, ikiboi isua anakwap a na, nai nyikiji alopite a ŋolo ka akwap a na.

2 Ŋikor. 11:10

Aŋuna a Kristo a ŋolo erae kire, a ŋolo alimonokini ayoŋ, eikinit ayoŋ atemar emam ituŋanan anakwap ka Akaia daadaŋ epedori akiretakin ayoŋ anakituro kaŋ.

2 Ŋikor. 13:3

Ipote iyes ayenun kire atemar irworo Kristo aneni kaŋ. Nyepalag Kristo ŋina itiyaa aneni kus, nai itiyae apedor keŋ alotooma kus.

2 Ŋikor. 13:5

Toripiripas make toanyut kirubakinito ananupit kus. Torotas iyes make. Nyeanyuna mono iyes atemar eyai Yesu Kristo tooma kus a? Ani kemam, iŋes atemar kikipiyosi iyes ŋakikatanakineta.

2 Ŋikor. 5:14

Amina ŋina a Kristo iŋes ikipukat isua, anerae ikiyeni isua atemar abu ituŋanan ipei totwan aŋuna a daadaŋ, iŋes atemar emorete daadaŋ atwanare keŋ.

2 Ŋikor. 5:15

Abu iŋes totwan aŋuna a daadaŋ, ikotere ŋulu eyarete tojoŋoto akiyar aŋuna kec make, nai toyara aŋuna a ŋolo atwani ka kiteyarunae aŋuna kec.

2 Ŋikor. 5:7

Anerae ikiyari iwon ananupit, meere aŋuna ikiŋolyanakini.

Ŋigal. 1:4

Abu Kristo tojal akiyar keŋ, ikotere isyoniyo ŋasecisya yok, ido itolacak iwon anakwap a na a ŋina ipukat ŋolo Aronon. Arae ŋin acamit ŋina ka Akuj Papa yok.

Ŋigal. 2:16

oyenete bo isua atemar elimori Akuj atemar iyookino ituŋanan alokiŋaren keŋ aŋuna ka anupit Yesu Kristo bon, meere aŋuna itiyaa ŋuna ecamito Ŋikisila. Isua daŋ, ikinupit Yesu Kristo, ikotere elimori Akuj atemar ikiyookino isua alokiŋaren keŋ aŋuna ka anupit kosi Yesu Kristo, meere aŋuna ka akitiya ŋuna ecamito Ŋikisila. Anerae emam ituŋanan elimoryo atemar iyookino alokiŋaren Akuj aŋuna itiyaa ŋuna ecamito Ŋikisila.

Ŋigal. 3:11

Ileere nai atemar, nyelimori Akuj atemar iyookino ituŋanan alokiŋaren keŋ aŋuna iricitor Ŋikisila, anerae ebasi Ŋakigireta ebe, “Ituŋanan bon ŋini elimori Akuj atemar iyookino alokiŋaren keŋ aŋuna ka anupit keŋ, iŋes eyari”.

Ŋigal. 5:24

Adaut ikes ŋulu erae ŋulu a Kristo akitotwakiar aseconu ŋina alotooma kec ka ekibure keŋ alomusalaba a Kristo.

Ŋigal. 6:14

Nai aneni kaŋ, nyacamit jik akiturokin aŋuna a ŋacekiro, mati ŋuna ke emusalaba bon a ŋolo ke Ekapolon yok Yesu Kristo; anerae aŋuna ka atwanare keŋ alomusalaba, etwanit akwap alokiŋaren kaŋ ka atwanit ayoŋ alokiŋaren akwap.

Ŋiep. 3:17

ka elipenene ayoŋ Akuj kituruwo ŋitai kus neni iboiyo Kristo aŋuna ka anupit kus. Elipi ayoŋ atemar ibore daadaŋ ŋini itiyaete iyes, torae ŋini ebunit alotooma amina,

Ŋiep. 5:2

Itemokino iyes kiboiyete alotooma amina lopite ŋolopei abunio Kristo itominakinia iwon, ido tojal akiyar keŋ aŋuna yok erae amuronot ŋina akukunyon, ŋina ecamuna ka ŋina italakarit Akuj.

Ŋiep. 5:25

Ŋikilyok, tominas ŋaberu kus, ikwaŋina aminar Kristo Ŋikristo, ido tojal akiyar keŋ aŋuna kec.

Ŋipil. 1:21

Anerae aneni kaŋ, Kristo iŋes erae akiyar, ido atwanare eyauni epoida.

Ŋipil. 4:13

Apedori ayoŋ akitiya ŋiboro daadaŋ alotooma Kristo ŋolo akainanakini ayoŋ agogoŋu.

Ŋikol. 1:27

Abu Akuj tocamu akisileerekin ikes alalau ka apolou ŋina a ŋakiro a ŋuna imunono a ŋun, ŋuna erae aŋuna a ŋituŋa a daadaŋ. Ŋakiro ŋuna imunono ikes Kristo alotooma kus, ŋolo erae akigeno ŋina ikiponia iwon akimor apolou ŋina ka Akuj.

1 Ŋites. 1:10

nabo, irworosi epite ŋolo idaritotor iyes Lokoku keŋ bu anakuj--Yesu ŋolo abu iŋes kiteyaru alokatwak ŋolo ikiuni iwon ananyunyura a ŋina ebunit aneni ka Akuj.

1 Ŋites. 5:10

Abu iŋes totwan aŋuna yok, ikotere nai kikiyari kori kikitwakit apaki ŋina eboŋunio iŋes, eboiyoto ka iŋes.

Tito 2:14

Abu iŋes tojal akiyar keŋ aŋuna yok, aiun iwon anaronis a daadaŋ ka akituruwor iwon ŋituŋa ŋulu asegak ŋulu erae ŋulu keŋ make, ŋulu imuit nooi akitiya ŋuna ajokak.

Ŋibur. 8:3

Eseununuyo ŋisacaradotin ŋulu Apolok nooi, ikotere einanakinete Akuj ŋainakineta ka ŋamuronisya. Ikwaŋinapei, itemokino Yesu daŋ Esacaradoti yok ŋolo Apolon nooi toyakar idiobore ŋini einakini.

1 Pet. 1:8

Iminasi iyes iŋes tari pa kianyunito; inupito iyes iŋes tari pa kiteete iŋes. Ilelyanete iyes ka alelyan a ŋina apolon nooi a ŋina nyepedoryo alimun;

1 Yoa. 1:7

Nai ani kikiboi iwon anakica, ikwapei eyakar iŋes nakica, ikiyakar iwon akimorikina ka ŋuluce ka ikitesegunete iwon ŋaokot a Yesu a Lokoku keŋ anasecit a daadaŋ.

1 Yoa. 4:14

Ikianyu ka ikiteyenik daŋ atemar eyaku Akuj Papa Lokoku keŋ aruwor Ekaiunan ŋolo ka akwap.

1 Yoa. 5:20

Ikiyeni daŋ iwon atemar, adau Lokoku ka Akuj abunore ka ikiinak iwon ayenut, ikotere oyenuniata ŋolo a kire. Ikiyari iwon anakimorikina ka Akuj ŋina erae ŋina a kire ka anakimorikina ka Lokoku keŋ Yesu Kristo. Kristo iŋes Akuj ŋina a kire, iŋes akiyar ŋina nyedaun.

Akis. 1:5

ta aneni a Yesu Kristo ŋolo erae esuuda ŋolo ikinyomitae, ŋolo esyaunan ayarun alokatwak, torae daŋ ekepukan ŋolo a ŋirwosi a ŋulu ka akwap. Ikimina iŋes iwon, ka aŋuna ka atwanare keŋ abu itolacak iwon anasecisya yok.

Akis. 3:20

Kiira! Awuoi ayoŋ alokek, ekoŋikoŋi. Ani kiira ituŋanan etoil kaŋ, ido toŋaa ekek, alomuni ayoŋ neni keŋ, emuja ka iŋes ka ikimuji iŋes ka ayoŋ.