Ŋibur. 13:15 - Ebaibul

¹⁵ Aŋun, oinakisi nai akipuro neni ka Akuj jwi jwi erae amuronot yok alotooma Yesu, ainakinet ŋina erae akituk irworo, itopoloorit Yesu erae Ekapolon.

Ŋibur. 13:15 Iomraidhean Croise

2 Ŋakiro a ŋirwa 29:31

Tema nai Esekia, “Idaut tokona iyes akitaleun ŋawat kus aneni ke Ekapolon; toapuutu nai ne, yautu ŋamuronisya ka ŋainakineta ŋuna ka alakara Kai ke Ekapolon.” Yaut nai ŋituŋa ŋamuronisya kec ka ŋainakineta ŋuna ka alakara, ido apotu ŋituŋa daadaŋ ŋulu acamunito alotai kec yaut ŋainakineta ŋuna epeyo.

2 Ŋakiro a ŋirwa 33:16

Abu daŋ iŋes todukok nabo Namuroet ŋina ke Ekapolon, inak a nen Akuj ŋamuronisya ŋuna a ekisil ka ŋainakineta ŋuna ka alakar neni ke Ekapolon. Tolimok ŋituŋa a Yudaya akitiyanakin Ekapolon Akuj a Ŋisirael.

2 Ŋakiro a ŋirwa 7:6

Towua ŋisacaradotin anakiboisyo kec; towua ŋilepi daŋ etiŋito ŋiboro ŋulu eeore neni ke Ekapolon, ŋiboro ŋulu sek kebu erwosit Daudi kitiyau aŋuna ka akipuror Ekapolon ka ŋulu esitiyae iŋes apaki ŋina elakaror neni ke Ekapolon ebala, “Anerae erubakinit amina keŋ eyai ŋikaru ka ŋikaru.” Ebakito ŋisacaradotin ka ŋilepi, tokusete ŋisacaradotin ŋarupepe, ido awuasi Ŋisirael ŋuluce daadaŋ.

Esir 3:11

Aeosi ikes eboŋonokin ipurosi ka elakara neni a Ekapolon ebasi, “Ejok Ekapolon, erae amina keŋ ŋina nyiryaŋiryaŋa ŋina a ŋikaru ka ŋikaru aneni a Ŋisirael.” Aboŋonokinete ŋituŋa ŋuluce a ecelet a ŋolo apolon, apaki ŋina epurotor ikes Ekapolon, anerae aponi todukokinae akisyakinet ŋina ka Akai ke Ekapolon.

Neem. 12:40

Aŋun, apotu ŋatuketa ŋunaarei daadaŋ ŋuna alakar neni ka Akuj, towua alo Kai ka Akuj, ayai ayoŋ daŋ nen kaapei ka atutubet apei ŋina a ŋikapolokinitok a ŋituŋa

Neem. 12:43

Apotu ikes inakis akoloŋit ŋin ŋamuronisya ŋuna alalak alelyanu, anerae abu Akuj inak ikes alelyanu ŋina apolon, apotu ŋaberu ka ŋidwe daŋ tolelyana. Apedori ituŋanan akiirar aneni alwanan ecelet ŋolo ka alyelyanu a ŋituŋa a Yerusalem.

Ŋikiru. 118:19

Toŋakinae ayoŋ ŋikekya ŋulu ka akiyookino, ikotere alomari tooma, ido olakar neni ke Ekapolon.

Ŋikiru. 119:108

Tocamu, okoe Ekapolon akipuro kaŋ ŋina ekepuror ayoŋ iyoŋ ka acamit, kitatamae ayoŋ ŋakiro ŋuna itubunit iyoŋ.

Ŋikiru. 18:49

Aŋun, eserae ayoŋ ŋuna ka ajokis kon neni a ŋulu nyerae Ŋiyudayan, ido aeikini ayoŋ ŋieosyo epur ekiro kon.

Ŋikiru. 50:14

Inakisi Akuj ŋamuronisya ŋuna ka alakara neni keŋ, ido kisiyookisi ŋuna ipotu iyes kikoŋo neni ka Akuj a ŋina alokidiama nooi.

Ŋikiru. 50:23

Eketopoloorito ayoŋ ŋituŋa ŋulu eponeneete alakara neni kaŋ ituruworito alakara kec amuronot neni kaŋ; ikes ŋulu iwuapito ŋakiro ŋuna ka akiyookino, etoodikini ayoŋ ikes aiuno kaŋ.”

Isa. 57:19

Eyakaun ekisil neni a ŋulu eapiyete ka ŋulu elwaka, etaŋaleuni ayoŋ ikes.

Yer. 33:11

etoil ŋolo ka alelyanu ka ŋolo ka alakara, etoil a eteran ka etoil a ateran, ŋitoilon a ŋituŋa a ŋulu eosi eyaunete ŋainakineta ŋuna ka alakara Kai a Ekapolon ebasi, ‘Tolakaros neni ke Ekapolon a ŋolo a ŋajoresyo, anerae ejok iŋes, erae amina keŋ ŋina nyiryaŋiryaŋa ŋikaru ka ŋikaru!’ Enyakakini ayoŋ ŋarereŋisyo nakwap na lopite ŋolo sek ayakatar ekiŋaren.

Yer. 33:18

nyicanakinosi ŋisacaradotin ŋulu a ekabila a Lepi ituŋanan ŋini ewoi alokiŋaren kaŋ ainakin ŋainakineta ŋuna epeyo, ŋainakineta ŋuna a ŋikinyom ka ainanakin ŋamuronisya ŋirwa daadaŋ.”

Osea 14:2

Okoe Ŋisirael, toboŋutu neni ke Ekapolon, a ŋakiro kus aŋuna ka akiki tolimokisi Ekapolon ebe, “Tolema ekaile ŋolo ka asecit daadaŋ, tocamu ŋinibore ejok daadaŋ, ido ikiinakini isua iyoŋ ŋainakineta ŋuna ikiikinio iyoŋ.

Ŋilep. 7:12

Ani keyau ituŋanan ainakinet aŋuna ka alakar keŋ neni ke Ekapolon, emaikina yau kaapei ka ŋamugati ŋuna emam ŋakinyalet, ŋuna iguritoe ka akimyet, ŋabisikotyo ŋuna emam ŋakinyalet ŋuna iositae akimyet, ŋimugati ŋulu cicik ŋulu ipounitoe anakirya a ŋuna ajokak a ŋuna itilorit akimyet.

Ekim. 7:62

abakuli ŋina etiyaunitae a egolid ŋina aapiyarit apotis keŋ atutubet apei a akilo, elelebikinitae ekinyate nabakuli ŋin

Mat. 11:25

Apaki ŋin, kirwor Yesu tema, “Alakara ayoŋ neni kon Papa, Ekapolon ŋolo anakuj ka nakwap, anerae ibu iyoŋ kiwua ŋakiro ŋun aneni a ŋikaosok ka ŋipiiryanotin, nai kisileereu neni a ŋidwe a ŋulu cicik.

Luk. 10:21

Esaa ŋolopei kilelebun Etau ŋolo Asegan neni a Yesu, tolelyan iŋes nooi, tolimu tema, “Alakara ayoŋ neni kon, Papa, Ekapolon ŋolo anakuj ka nakwap, anerae ibu iyoŋ kiwua ŋakiro nu aneni a ŋikaosok ka ŋipiiryanotin; nai kisileereu neni a ŋidwe a ŋulu cicik. Ee, Papa, itiyak iyoŋ ŋun daadaŋ ikwaŋina icamitor iyoŋ elope.

Yoa. 10:9

Arae Ayoŋ epuke; ituŋanan ŋini elomuni kitoru neni kaŋ, eiun iŋes; elomuni iŋes tooma ka elomari kiŋa, toryamu akimuj.

Yoa. 14:6

Tolimok Yesu Tomas tema, “Arae Ayoŋ erot, Arae ŋuna a kire ka Arae akiyar; nyepedori ituŋanan abunore neni a Papa, mati kitoru neni kaŋ.

Ŋirom. 12:1

Aŋun nai, ŋikaitotoi kaŋ, aŋuna ka akisyon a ŋina apolon a ŋina ka Akuj neni yok, ekemaimai ayoŋ iyes: kituruwosi ŋawat kus amuronot ŋina eyari aŋuna ka Akuj, ŋina einakinitae neni keŋ ka ŋina italakarit iŋes. Erae ŋol epite ŋolo itemokino iyes kilipyata.

Ŋirom. 6:19

(Erworo ayoŋ alopite a ŋolo irworotor ŋituŋa ikotere epataniar iyes ayenun ŋakiro kaŋ, anerae ipalag iyes anatameta.) Koloŋ sek ipotu iyes tojala ŋawat kus toruworos ŋipi ŋulu a ŋuna nyesegak ka ŋuna aronok aŋuna ka akitiya ŋuna nyiyookino alokiŋaren Akuj. Ikwaŋinapei, itemokino tokona iyes tojala ŋawat kus toruworos ŋipi ŋulu ka akiyookino, kitiyata ŋuna ka akiyookino alokiŋaren Akuj.

Ŋiep. 2:18

Erae aŋuna a Kristo aponere iwon daadaŋ Ŋiyudayan ka ŋulu nyerae Ŋiyudayan, topedorere aponare neni ka Akuj a Papa alotooma Etau ŋolo ka Akuj epei.

Ŋikol. 1:12

Tolakanaros neni ka Akuj Papa, ŋolo ikitemok iyes aryamun atyaketait a ŋarereŋisyo a ŋuna iŋadakinit Akuj aŋuna a ŋituŋa keŋ a Napukan keŋ a ŋina ka akica.

Ŋibur. 12:28

Aŋun, itemokino iwon olakara, anerae Apukan ŋina eryamunio iwon erae ŋina nyepedoryo akitamaranikin. Itemokino iwon olakaros elipa Akuj alopite a ŋolo italakari iŋes, alotooma akitiditeuna ka akerit,

Ŋibur. 7:25

Aŋun nai, epedori iŋes jik tokona ka jwi jwi aiun ŋulu daadaŋ epote neni ka Akuj itorunito neni keŋ, anerae eyari iŋes jik, ilipenene Akuj aŋuna a ŋituŋa a ŋul.

1 Pet. 2:5

Kimyekisi Akuj ikidukyo iyes ikwa ŋamoru ŋuna eyarete Akai keŋ ŋina ke etau, neni itiyaata iyes iraakasi ŋisacaradotin keŋ, ŋulu iinanakinete ŋamuronisya ŋuna eyaunit Etau, ŋuna ecamit Akuj alotooma Yesu Kristo.

1 Pet. 4:11

Ituŋanan ŋini itatami, itemokino kitatam ŋakiro ŋuna ka Akuj; ituŋanan ŋini itiyae etic, itemokino iŋes kitiya ka agogoŋu a ŋina einanakini Akuj iŋes, ikotere ipuroe Akuj aloboro a daadaŋ, alotooma Yesu Kristo, ŋolo eyakar apolou ka apedor ŋina a ŋikaru ka ŋikaru. Amen.