Ŋakit. 29:1 - Ebaibul

¹ Ituŋanan ŋini erubakinit isyaana tari kelimokin atemar toesik akisyaanu, ewana akoloŋit apei todaun tari epite ŋolokitaŋaleunet.

Ŋakit. 29:1 Iomraidhean Croise

1 Ŋirw. 17:1

Tema Eliya Etisibait ŋolo alo Gilead neni ka Aab, “Ikwaŋinapei eyarya Ekapolon Akuj a Ŋisirael, ŋina arae ayoŋ eketiyan keŋ, emamukaun ŋakopi, kori akiru ŋikaru ŋulu eponito, mati kalimu ayoŋ.”

1 Ŋirw. 18:18

Toboŋoki Eliya tema, “Mam ŋican ayau ayoŋ Isirael, nai iyoŋ ke ekal a papa kon iyaut ŋican Isirael, anerae imyekis iyes ŋakiciketa ŋuna ke Ekapolon, ido iwuap ŋuna a ŋakujo a ŋuna enyaritae ata Baal.

1 Ŋirw. 20:42

Tolimok ekadwaran ŋol erwosit tema, “Ebala Ekapolon ‘Idau iyoŋ akimyekin Ben-Adad ŋolo acamit ayoŋ totwana. Aŋun, itwani iyoŋ kilunyokin lorot keŋ.’”

1 Ŋirw. 22:28

Tolimok Mikaia iŋes tema, “Ani kire kiboŋu iyoŋ alojie emam ŋace, iŋes atemar nyirworo Ekapolon neni kon aneni kaŋ.” Toropak iŋes erwor keŋ tema, “Kiirasi ŋituŋa daadaŋ ŋakiro ŋuna adau ayoŋ alimun!”

2 Ŋakiro a ŋirwa 25:16

Nai ani eriŋa ekadwaran ŋol irworo, kiŋit Amasia iŋes tema, “Ori mono ikituruworere isua iyoŋ ŋolo iŋarakinit erwosit akipuka ejok? Tojoŋo erwor! Kaanukiro icamitor iyoŋ ikiari?” Aŋun, abu ekadwaran ŋol tojoŋo erwor, nai abu tema, “Ayeni ayoŋ atemar atubu Akuj akiar iyoŋ, anerae idau iyoŋ akilip neni a ŋakujo ka iŋer akiirar ŋakiro kaŋ.”

2 Ŋakiro a ŋirwa 33:10

Abu Ekapolon kirwor neni a Manase ka ŋituŋa keŋ, nai apotu ikes nyecamut ŋuna erworo Ekapolon.

2 Ŋakiro a ŋirwa 36:13

Abu daŋ Sedekia toŋer Nebukadinesar ŋolo sek abu kisikoŋ alokiro ka Akuj atemar iwuapi ŋakiro a Nabukadinesar; abu iŋes kitogogoŋ akou keŋ ka kitininik ŋatameta keŋ towou akiwuap ŋuna a Ekapolon Akuj a Ŋisirael.

Neem. 9:29

Ibu iyoŋ tolimok ikes akimyekin akitiya ŋuna aronok, ikotere toboŋut ikes akiwuap ŋikisila kon, nai apotu ikes kiturokinos toŋero ŋakiciketa kon, toŋero akiwuap ŋuna itubunit iyoŋ ŋuna ani kiwuap ituŋanan eyari. Apotu ikes kisyaaketa, kitogogoŋo ŋakyes kec towout jik akiwuap ŋakiro kon.

Yob 9:4

Eos Akuj nooi ka erae agogoŋu keŋ ŋina etiron, ŋae mono abu kitiji Akuj, ido kilou?

Awos. 9:7

Kiŋitiŋit Parao ŋituŋa ketwakito ŋibaren a Ŋisirael daŋ, nai abu toryamu atemar mam ipei daŋ alobaren a Ŋisirael kebu totwana. Kikote neni daŋ, abu Parao torubak itogogoŋit akou keŋ, abu nyecamak Ŋisirael toloto.

Ŋakit. 28:14

Elakara a ŋinapaki ituŋanan ŋini itopoloorit Ekapolon, nai ituŋanan ŋini itogogoŋit akou keŋ, elomari locan.

Ŋakit. 28:18

Eiuna bon ituŋanan ŋini elosi anakiyookino, nai elomari locan ituŋanan ŋini iwuapit ŋipitesyo ŋulu aronok.

Ŋakit. 28:28

Ani keryamu ituŋanan ŋini aronon apolou, eemete ŋituŋa akiŋop a iwace, nai ani emunyar ŋituŋa ŋulu aronok, epitunete ŋulu iyookino.

Ŋakit. 6:15

Ituŋanan ŋini itiyae ŋun, eryamuni ŋican atipei, inyasun nooi nyepedoryo nabo akisirworiun.

Isa. 28:22

Aŋun tokona, nyijamuwasi ŋakiro ŋuna adau ayoŋ alimun, ani kijamuwasi iyes ŋakiro kaŋ, etyokioto ŋakiro aŋuna kus, anerae eira ayoŋ atubunet a Ekapolon Akuj ŋina a ŋajoresyo, atubunet ŋina ka amunyar akwap daadaŋ.

Isa. 48:4

Aŋuna ayenia ayoŋ atemar irubakinito iyes isyaaka ka egogoŋ ŋakyes kus ka ilerito ŋireetin kus ikwa eburonis,

Yer. 14:19

Okoe Ekapolon, iŋer iyoŋ ŋituŋa a Yudaya jik a? Aluŋ mono etau kon Sion a? Kaanukiro ikisicania iyoŋ isua nooi adaunor epite ŋolo ikitaŋaleunere isua? Iitanitae isua ekisil, nai mam ajokis aryamun, iitanitae isua akitaŋaleuno, nai eryamunitae anyunyura akilo ekisil.

Yer. 17:23

Nai apotu ikes nyiwuapa ŋakiro kaŋ, kori topupokis ŋuna erworo ayoŋ, apotu ikes kitogogoŋo ŋakyes kec, towout akiirar ka acamun ŋuna etatami ayoŋ ikes.’

Yer. 36:31

Tosodi, esicani ayoŋ iŋes kaapei ka ŋiletok keŋ ta ŋiketiyak keŋ aŋuna ka asecit kec. Ayauni ayoŋ neni kec ka neni a ŋituŋa a Yerusalem ŋican daadaŋ ŋulu abu ayoŋ olimu atemar ayauni, nai apotu ikes nyiirasi ŋakiro kaŋ.”

Abak. 2:7

Nyepedorete mono ŋulu ideniyorito ŋiboro kus akitac atipei pa iyenete iyes a? Nyetakanunete mono ŋituŋa ŋulu egogoŋ ŋulu ikitubulete iyes a? Ikiŋatarete ikes iyes.

Yoa. 13:18

Nyerworo ayoŋ aŋuna kus a daadaŋ, ayeni ŋulu adau ayoŋ aseun; nai ikotere kiyookinotor ŋuna igiritae Nakigireta ebe, ‘Abu ituŋanan ŋini ikimori ka ayoŋ okoluki ayoŋ.’

Yoa. 13:26

Tolimok Yesu iŋes tema, “Ekile ŋol, iŋes ŋolo ainakini ayoŋ amugati kelumok loboka.” Kedau Yesu akilumokin, inak Yuda, lokoku a Simoni Isikariot.

Ŋitic. 1:18

(Togyel iŋes emanikor a eropit a ŋolo ka aronis a ŋina abu iŋes kitiya. Alomanikor a ŋol, toramakin iŋes, tobwaŋa akook, kiyesunos ŋiboro ŋulu ka akook daadaŋ kiŋa.

Ŋitic. 1:25

Itemokino iŋes kitiya etic ŋolo ke Ekiyakia, kilunyokin lotic ŋolo aesikini Yuda ŋolo abu tolot neni etemokino iŋes toyai.”

1 Ŋites. 5:3

Erae apaki ŋina etemaryata ŋituŋa ebe, “Eyai ekisil ka emam awasya,” iŋes atipei eŋesunor akinyasuno neni kec! Eŋesun iŋes lopite ŋolo eŋesunor aryebo neni ka aberu a ŋina eapi akidoun, ka emam ŋituŋa ebucarosi.

1 Sam. 2:25

Ani kesec ituŋanan ipei neni a ŋinice, epedori ituŋanan ice akirwor neni ke Ekapolon aŋuna a ekasecan a ŋol. Nai ani kesec ituŋanan aneni ke Ekapolon, ŋae epedori akirwor aŋuna keŋ?” Nai apotu ŋidwe ke Eli ŋul nyiirasi ŋuna alimokini papa kec, anerae arae acamit ŋina ke Ekapolon atemar totwaka ikes.

1 Sam. 2:34

Ŋakiro ŋuna itiyakin neni a ŋidwe kon a ŋulusapa a lu: Opini ka Pineas, ikes eruwor akitoodikinet neni kon. Irotarosi ikes, etwakete daadaŋ akoloŋit apei.