Isa. 5:17 - Ebaibul

¹⁷ Epote nai ŋikaalei ŋulumesekin adaka lopite ŋolo edakatar neni sek emaikina edakasi ka edakasi ŋikaalei ŋulu itumitae ka ŋulumee loreŋoroto.

Isa. 5:17 Iomraidhean Croise

Neem. 9:37

Ŋirwosi ŋulu iwuak iyoŋ akipuka isua aŋuna a ŋasecisya kosi, ikes enyamete ŋaraito a akwap a na ŋuna alalak, ikipukato ikes isua ka isitiyaete ŋibaren ikwa ŋina ecamitotor, ido ikiya isua locan.”

Ŋikiru. 119:70

Egogoŋ ŋakyes kec ka nyenomonorete ŋakiro, nai alakara ayoŋ alokisila kon.

Ŋikiru. 17:10

Emam akisyon alotai kec; iturosi ikes irworosi.

Ŋikiru. 17:14

Okoe Ekapolon, toiunae ayoŋ a akan kon alotuŋa a ŋulu ikote lu; alotuŋa a ŋulu ka akwap a na a ŋulu erae eropit kec ibore ŋini eryamunete ikes anakiyar a na. Kisican ikes a ŋican a ŋulu itemokinit iyoŋ aŋuna kec, elipi toryamut ŋidwe kec ŋican ŋulu alalak nooi, ŋulu eryamunete tari ŋipapae kec.

Ŋikiru. 73:7

Ebukunun aronis alotai kec, eyeete ikes a ŋinapaki akitiya ŋuna aronok.

Isa. 1:7

Aruwor akwap kus ekasile, anomiya akim ŋitaunio kus, aŋatasi ŋituŋa ŋulugelae akwap kus iteete iyes, aruwor akwap kus ekasile, anomiya akim ŋitaunio kus.

Isa. 10:16

Aŋun, ebuni Ekapolon ŋolo etiron, Ekapolon ŋolo a ŋajoresyo akiyakikin erogo neni a ŋikajiok keŋ a ŋulu atumak, anapolou keŋ, emwakunete ŋawat kec lopite ŋolo emwanunia ibore inokakinio akim.

Isa. 17:2

Eesikinete ŋituŋa ŋitaunio keŋ ŋikaru ka ŋikaru; eruwor ŋitaunio ŋul neni eya ŋisipanin a ŋamesekin, eruwor nen neni euryaniata ikes ka emam ituŋanan esurusurui ikes.

Isa. 32:14

Imyekinete ŋituŋa akiboi anakais a ŋuna ka apukan, eesikinio etaun ŋolo sek ileleba ŋituŋa; eruworosi ekamukumukut ka aduketait ŋina kirereet akwap ŋaduyon ŋuna a ŋikaru ka ŋikaru, eruwor neni elelyaniata ŋisigirya, eruwor neni edakasi ŋamesekin,

Isa. 40:11

Ebuni iŋes akitan ŋituŋa keŋ lopite ŋolo itania ekeyokon ŋamesekin keŋ; edaki iŋes ŋikaalei ŋulucicik anakan keŋ, kiwuak ikes natorobu keŋ; ido tomea iyaparit atatoto a ŋikaalei a ŋul.

Isa. 65:10

Eruwor Saron neni edakasi ŋamesekin ka eruwor akadipaalat ka Acor neni euryaketa ŋisipanin a ŋaatuk, anerae apotu ŋituŋa kaŋ ekewara ayoŋ.

Isa. 7:25

Ŋikamukumukui daadaŋ ŋulu sek etao ŋikinyom, nyipedorete iyes alosit nen, anerae ikuryaketa iyes aŋuna a ŋikukwa ka ŋamon a ŋikukwa, nai eruwor nen neni imyekinitae edakasi ŋaatuk ka ŋamesekin.”

Yer. 5:28

atuma ikes ka amalimal ŋawat kec, itiyaete ikes aronis jik; nyetubete ikes ŋakiro a ŋikokyok anakiyookino, ikotere kilout ŋikokyok ŋini isitakinit ikes ka nyiŋarakinito ikes ŋituŋa ŋulu a ŋican toiun.

Aum. 5:2

Aruwor akwap kosi ŋina a ŋigelaanotin, aruwor ŋirerya kosi ŋulu a ŋituŋa a ŋakwapin a ŋace.

Osea 4:16

Isyaana Isirael lopite ŋolo isyaania ataok. Epedori tokona Ekapolon akitan ikes lopite ŋolo iyokiyere ikale ŋinimesek a neni elolom, neni eya ŋinya.

Osea 8:7

Eeyanakinete ŋituŋa a Isirael ekuwuam ŋolo ekusi iwadio lomanikorin kec, aŋun, elemunete ekuwuam ŋolo ekusi nooi kipiripiri, nyesuronorete ŋikinyom alomanikorin kec, emam akimuj eryamunio alomanikorin kec, ani kerae toraunito, keponito ŋituŋa ŋuluce alemar.

Mika 2:12

“Okoe iyes ŋituŋa a Yakob, kire jik, akacunakini ayoŋ iyes daadaŋ iwapei, acunakini ayoŋ ŋipiya a Ŋisirael; acunakini ayoŋ ikes kaapei ikwa iudere ŋamesekin nanok, acununi ayoŋ ikes ikwa ecunere esipan a ŋamesekin anadakar; ilelebun ŋituŋa nakibois kus nooi.

Sepan. 2:14

Eruwor nen neni euryaniata ŋaatuk, eruwor nen akibois a ŋityaŋ a ŋulu ka ariet; akibois ŋina iboiyoto ŋitulae ka ŋikurukwa a nakyes a ŋipirin keŋ; eruwor lodirisae keŋ erwotor ŋitulae, eruwor nalosin keŋ erwotor ŋikurukwa; anerae ielaryo ŋakito ŋuna a Cedar ŋuna sek eya kidiama ŋakais keŋ.

Sepan. 2:6

Okoe iyes Ŋikerisi ŋulu iboiyete alodiyete anam, eruwor akwap kus ŋina a ŋikeyokok, ŋina ilelebun ŋauyoi a ŋamesekin.

Luk. 21:24

Earyo ikes ŋice ka atum, ŋice eruworosi ŋirikon nakwapin ŋunace; ipudaete ŋituŋa ŋulu nyerae Ŋiyudayan Yerusalem, akitodol ŋirwa ŋulu esalunia apukan a ŋituŋa a ŋulu nyerae Ŋiyudayan.

Ŋikis. 28:33

Enyamete ŋituŋa ŋulu nyiyenete iyes ŋaraito a akwap kus ka ibore daadaŋ ŋini itiyaunito iyes a ŋakan kus, erubakinio ikijamuwaritae ka ikisicanitae iyes,

Ŋikis. 32:15

Apotu ŋituŋa a Yakob kimuja kimwoko, totum Yesurum tobolyak, ipotu iyes totuma, tomalimala ka toburyoto. Apotu Ŋisirael toŋero Akuj kec ŋina asubuni ikes. tojamuwasi akaiunan kec ŋina etiron.