Esek. 21:27 - Ebaibul

²⁷ Ibore koŋin! Ibore koŋin! Eturuwori ayoŋ iŋes ibore koŋin! (Nyituruworyo iŋes ŋinapei ibore koŋin,) akitodol ŋina ebunio ŋini aseu ayoŋ akisican iŋes; neni a ŋin iŋes epotokini ayoŋ etaun ŋol.’ ”

Esek. 21:27 Iomraidhean Croise

Akisy. 49:10

Mam ŋini elemari apukan aneni a Yuda, ipukaete ŋiletok keŋ jik, elemianakinete iŋes ŋituŋa a ŋakwapin ocur, ka itopoloorete ŋituŋa a ŋakwapin iŋes.

Ŋikiru. 2:6

“Ewuak ayoŋ erwosit kaŋ Sion, lomukura kaŋ ŋolo asegan.”

Yer. 30:21

Ebuni erwosit kec alotuŋa kec pei, ebuni ekepukan kec alotuŋa kec pei. Ebuni iŋes neni kaŋ apaki ŋina anyaraa ayoŋ iŋes, anerae mam ituŋanan ebuni neni kaŋ pa kenyaritae.

Yer. 32:24

Kiŋolik, ŋakititisyo ŋuna edukunitoe kidiama, ŋuna irikaunitere etaun ecamitae akikamar. Kiŋolik etaun neni ikoni, aapiki ŋituŋa a etaun ejie, akoro ka edeke, aapuu etaun akipotokin napedor a Ŋibabiloniyae a ŋulu itijiete iŋes. Eyookin ŋakiro ŋuna ibu iyoŋ tolimu lopite ŋolo iteo iyoŋ alope.

Yer. 33:21

iŋes nai edaunor acamunet kaŋ ka eketiyan kaŋ Daudi, ikotere nai iŋes emamukaunor ikoku ŋinisapat ŋini ilunyokin lokicoloŋ keŋ kipuka, iŋes daŋ edaunor acamunet kaŋ ka ŋituŋa a Lepi ŋisacaradotin ŋulu itiyaete alokiŋaren kaŋ.

Yer. 33:26

Ikwaŋinapei, nyaŋeri ayoŋ acamunet kaŋ ka ŋiletok a Yakob ka ŋiletok a eketiyan kaŋ a Daudi, ido aseuni ayoŋ epei a ŋiletok a Daudi kipuka ŋiletok ka Aburaam, Isaka ka Yakob, anerae enyakakini ayoŋ ikes ŋarereŋisyo kec ka esyoni ayoŋ ikes.”

Yer. 52:4

Tosodi alokaru a ŋolo a ŋikanikaomwon, elap ŋolo a ŋitomon, ŋirwa ke elap ŋitomon ipukat Sedekia, abu erwosit a Babilon ŋolo anyaritae Nebukadinesar toloto ka ŋasigarya keŋ daadaŋ akirem Yerusalem kirikaut iŋes. Apotu ikes torekinos kiŋa etaun, toduko ŋadoketa kisiryama kiŋa etaun.

Esek. 21:13

Ekatakini ayoŋ ŋituŋa kaŋ, kaanukiro ijamuwaryata iyes ekepukan? Nyitiyakin ŋakiro ŋun daadaŋ.’

Esek. 34:23

“Ewuakini ayoŋ ekeyokon epei kiyok ikes, ekeyokon ŋol iŋes Daudi eketiyan kaŋ, itani iŋes ŋamesekin kaŋ, iyokiuni ejok erae ekeyokon kec.

Esek. 34:24

Ayoŋ Ekapolon aruwor Akuj kec, eketiyan kaŋ Daudi iŋes eruwor ekepukan kec. Ayoŋ Ekapolon adau alimun ŋun.

Esek. 4:2

Kisitiya ŋitorubei lu akitoodiunia akirikauno a Yerusalem: Kiwuak ibore ŋini irikaunit amatapal ŋin, kiwuak akititis ŋina edokarit narwatata ke etaun, totukono ŋiboorei ŋulu esibit ŋituŋa ŋulu eurumikinito etaun ŋol ka kiwuanak nawaetin a etaun a ŋol daadaŋ ŋiboorei ŋulubwaŋabwaŋaet arwatata keŋ.

Dan. 2:44

Alorwa a ŋirwosi a ŋul, iwuakini Akuj ŋina anakuj apukan ŋina nyepedoryo alemar, kori nyeinakinio apukan ŋin neni a ŋituŋa a ŋice. Emunyari apukan ŋin ŋapukasinei ŋunace daadaŋ kitasalu, ido erubakini iŋes ŋikaru ka ŋikaru.

Dan. 9:25

Aŋun, toyenu atemar ameun anapaki a ŋina alimorere atemar emaikina kinyakunae Yerusalem ka todukoe nabo, akitodol apaki ŋina ebunio ekarikon ŋolo eseunit Akuj, eyakaun ŋikaru ŋatomoniomwon ka ŋikanikaomwon ka alotooma ŋikaru ŋamiae ŋaomwon ka ŋatomonikanikapei ka ŋiomwon, edukokinio Yerusalem nabo toyakaun ŋirotin ŋulu ke etaun ka ŋarwatatain ŋuna erae ŋatabab ewuatere etaun, nai itiyao ŋun anapaki a ŋina a ŋican.

Osea 3:5

Ekaku, eboŋunete Ŋisirael, kiwara Ekapolon Akuj kec ka Daudi erwosit kec; epote ikes anakuryanu neni ke Ekapolon ka epote ikes najokis keŋ ŋirwa ŋulu esidyok.

Mika 5:2

Abu Ekapolon tema, “Betelem, etaun ŋolo eyai Epurata, tari kerae iyoŋ idit nooi alotaunio a ŋulu ka ateker a Yuda, alemuni ayoŋ ekepukan aneni kon, ekepukan ŋolo ebuni akipuka Isirael, ekepukan ŋolo eponito ŋakiro keŋ ananyameta a ŋuna a koloŋ.”

Agai 2:7

Eiŋiiŋakini ayoŋ ŋakwapin daadaŋ, ikotere ebari a ŋakwapin a daadaŋ ebuni, ido elelebik ayoŋ akibuses Kai na.

Sakar 9:9

“Tolelyana nooi iyes ŋituŋa a Sion! Tocelutu nooi aŋuna ka alelyanu, iyes ŋituŋa a Yerusalem! Kiŋolikisi ebunit erwosit kus neni kus; Erae iŋes ŋolo iyookino ka ŋolo adau akiloun, erae iŋes ŋolo itiditeuna ka edokit isigirya, itaok ŋini ka asigirya.”

Mal. 3:1

Ebala Ekapolon ŋolo Etiron ebe, “Kiirasi, eyakuuni ayoŋ ekiyakia kaŋ akitemonokin erot eriŋa ayoŋ nyebuno, ido nai bu pa iyenete iyes Kai keŋ, Ekapolon ŋolo iwarito iyes. Ebuni ekiyakia ŋolo icamito iyes aanyun, ido iserae iŋes ŋakiro ŋuna ka Acamunet kaŋ.

Mal. 4:2

Nai iyes ŋulu itopoloorito ekiro kaŋ, elomuni apedor kaŋ ŋina aiunan ikoni akoloŋ, ido bu apedor neni kus ikoni ŋikoi ŋulu ka akoloŋ, ikitaŋaleun iyes. Iruworosi iyes ŋulu ilacakina, ŋulu ilakara ikwa ŋimanaŋ ŋulu elacakinitae, ŋulu eŋaaritae ananok.

Ekim. 24:19

Ipukae ipei a ŋidwe a Yakob, tomunya ŋipiya a Ir.”

Mat. 28:18

Toapiya Yesu diyete kec tolimok ikes tema, “Akainakin ayoŋ apedor daadaŋ ŋina anakuj ka ŋina alokwap.

Luk. 1:32

Erwoniar iŋes ka enyarao Lokoku ka Akuj a ŋina alokidiama nooi. Isiboikini Akuj iŋes lokicoloŋ a papa keŋ Daudi.

Luk. 1:69

Ikiinak iwon Ekaiunan ŋolo etiron anateker a Daudi eketiyan keŋ.

Luk. 2:11

Anerae nakuwar na, edoun Ekaiunan kus alotaun a Daudi--Kristo ŋolo erae Ekapolon!

Yoa. 1:4

Ayai akiyar daadaŋ neni keŋ, arae akiyar ŋin akica aŋuna a ŋituŋa.

Yoa. 1:9

Akirot iŋes arae akica ŋina a kire, ŋina abuni nakwap acaikin ŋituŋa daadaŋ.

1 Pet. 3:22

Abu iŋes tolot nakuj ka eyai lowae ŋolo aloteten Akuj, ipukat ŋimalaikan daadaŋ ka ŋikapolok ŋulu eyakatar ŋapedorosyo anakuj.