Esek. 14:8 - Ebaibul

⁸ Etoroniyari ayoŋ ituŋanan ŋini itiyae ŋun. Eturuwori ayoŋ ituŋanan ŋini itiyae ŋun akitoodikinet, ibore ŋinicaryoit ka alemari ayoŋ iŋes alotuŋa kaŋ; ido iyenunete iyes atemar arae ayoŋ Ekapolon.

Esek. 14:8 Iomraidhean Croise

Ŋikiru. 34:16

Eremokino Ekapolon ŋulu itiyaete ŋuna aronok; ecamit alemar ikes anakwap, tojoŋoi atamunit.

Ŋikiru. 34:17

Ani kikaloikis ŋulu iyookino Ekapolon aŋuna ka akiŋarakino; iirari Ekapolon akigworo kec, ido eiuni ikes alocan kec a daadaŋ.

Ŋikiru. 37:22

anerae ikes ŋulu iterereŋit Ekapolon, eruwor akwap ŋina kec. nai ikes ŋulu icenen aneni ke Ekapolon, emunyaryo aneni a ŋuluce.

Isa. 65:15

Imyekinete iyes ŋirorwa kus aneni a ŋuluseuna kaŋ erae ŋulu ilamare; ido ikimunyari Ekapolon Akuj iyes; nai einakini iŋes ŋiketiyak keŋ ekiro ŋolo egelaana.

Yer. 21:10

Aŋoik ayoŋ ŋituŋa a etaun a lo aŋuna ka aronis, meere aŋuna ka ajokis. Einakinio iŋes napedor a erwosit a Babilon, ido icunyari iŋes etaun lo a akim.’ ”

Yer. 24:9

Eturuwori ayoŋ ikes ŋulu inyasuna, ibore ŋini aronon alotuŋa a ŋakwapin a daadaŋ, ŋulu nyejokak, ŋulu irworore, ŋulu eŋoito ka ŋulu icenen anakiboisyo a daadaŋ a ŋuna eritari ayoŋ ikes,

Yer. 29:22

Tosodi aŋuna kec, elimunete ŋituŋa ŋulu aponi torikoroe alo Yerusalem tari Babilon ŋilam lu ebe, ‘Elipi ikisican Ekapolon iyes lopite ŋolo esicania Sedekia ka Aab ŋulu abu erwosit a Babilon tope anakim eyarete,’

Yer. 44:11

“Aŋun, alimu Ekapolon ŋolo a ŋajoresyo, Akuj a Ŋisirael ebe, ‘Emukekinit ayoŋ akisican iyes, akitoŋopiyar ŋituŋa a Yudaya daadaŋ.

Esek. 13:23

eketuruwori ayoŋ iyes ŋulu nyiŋolikinete nabo ŋakitoodyanakineta ŋuna ka alyokonu kus, kori ŋulu nyidwarete ŋakiro ŋadi. Aiuni ayoŋ ŋituŋa kaŋ anapedor kus, toyenut nai iyes atemar arae ayoŋ Ekapolon.’ ”

Esek. 15:7

Etekini ayoŋ ikes etoroniyarit. Tari daŋ keiuna ikes alomoe a ŋulu ke ekiŋaren, emunyarete ŋimoe ikes, ido iyenunete iyes atemar arae ayoŋ Ekapolon apaki ŋina etekinio ayoŋ ikes etoroniyarit.

Esek. 5:15

Apaki ŋina akaŋoikinia ka akaryenyanikinia ayoŋ iyes, eketuruwo akitocoikinet a ŋuluce, ebuli ŋakwapin daadaŋ ŋuna idunyatar iyes. Ikiŋolikinete ikes iyes ikimenito ka ikijamuwarito.

Esek. 6:7

Earakinio ŋituŋa kus kidiŋ kus; ŋun nai ikiteyenunete iyes atemar arae ayoŋ Ekapolon.

Ŋilep. 17:10

“‘Ani kenyam Esiraelit edio ŋaokot kori igelaanot ŋini iboiyete ka ikes, etoroniyari ayoŋ ituŋanan ŋin eŋolikini, ido eritari iŋes alotuŋa kaŋ;

Ŋilep. 22:3

Tolimok ikes ebe, ‘Ananyameta a daadaŋ a ŋuna eponito, ani pa kitaleuno idio alopapae kon, ido toapu nainakineta ŋuna asegak ŋuna italeikinito Ŋisirael Ekapolon, emaikina ituŋanan ŋin totyakarae tojoŋo atakanu aneni kaŋ. Arae ayoŋ Ekapolon.

Ŋilep. 26:17

Akaŋoikini ayoŋ iyes, ido ikireunete iyes ŋimoe kus; ikipukaete iyes ŋituŋa ŋulu imanito iyes, ido ibwaŋasi iyes tari kemam ŋini ikirisit.

Ekim. 16:38

anerae aruworosi ŋisipiryae a ŋikasecak a ŋul ŋulu asegak aŋuna atwakyata ikes. Tolemu ŋisipiryae ŋul, kityeku ŋababati ŋunadapal ŋuna erapanakinio namuroet, anerae ainakinito ikes neni ke Ekapolon, ido aruworosi ŋuna esegak. Aŋun eruworosi akitoodikinet aneni a Ŋisirael.”

Ekim. 19:20

Ituŋanan daadaŋ ŋini itoroniyaritae, ido nyitaleun, emaikina ituŋanan ŋin totyakarae anatukot aŋuna amunaarya iŋes eema ŋolo ke Ekapolon, anerae nyewuatakina iŋes ŋakipi ŋuna italeere ŋituŋa, aŋun, itoroniyaritae iŋes.

Ekim. 26:10

Apotu ikes kiyuuwaar tooma nalup, tolomasi ikes daadaŋ nalup kaapei ka Kora ŋolo apotu ŋirukitos keŋ totwaka apaki ŋina anomiyarya akim ŋikilyok ŋulu arae ekimar kec ŋamiae ŋaarei ka ŋatomonikan; apotu ŋun toruworos akitoodikinet aneni a Ŋisirael.

Ŋirom. 11:22

Anakiro a ŋun ikiyenuni epite ŋolo erimaania Akuj ka epite ŋolo ededeŋia. Ededeŋ iŋes aneni a ŋulu adaut atwakiar, nai erimaana aneni kus--erae kirubakis iyes iyakasi narimaanut keŋ. Nai ani pa kirubakis, ikibilaryo iyes daŋ.

1 Ŋikor. 10:11

Apotu ŋakiro ŋun daadaŋ kitiyakinos neni kec, erae akitaanyikinet aneni a ŋuluce ka aponi kigirae erae akiciket neni yok a ŋulu ikiboi anapakio a ŋuna eapiya Akoloŋit ŋina esidyon.

Ŋikis. 28:37

Iruworosi iyes ŋulu ikijamuwaritae, ŋulu isiilyaka ka ŋulu ikirworore alotuŋa a daadaŋ a ŋakwapin a ŋuna ikiyai iyes Ekapolon.

Ŋikis. 28:46

Idoŋete ŋilam ŋul eyakasi neni kus ka neni a ŋiletok kus erae ŋakitoodyanakineta ka ŋaumonokineta aneni kus ŋikaru ka ŋikaru.

Ŋikis. 29:19

Ŋulu daadaŋ iirarete ŋakiro a akikoŋiet a na, ido kitojokas make etamete alotai kec ebe, ‘Mam ŋace apote neni yok, tari kikiwuapit iwon ŋipitesyo yok ŋulu aronok.’ (Eyaunete ŋul ŋican neni a ŋulu iyookino ka ŋulu nyiyookino),