Ekal. 7:2 - Ebaibul

² Ejok alosit kai ŋina igworore akilo alosit kai ŋina itiyaere ŋasuban, anerae erae atwanare ŋina a ŋituŋa a daadaŋ emaikina ŋituŋa ŋulu eriŋa eyarete kirica ŋakiro ŋun alotai kec.

Ekal. 7:2 Iomraidhean Croise

Ŋikiru. 90:12

Aŋun, kitatamae isua oyenete atemar euruwuana akiyar kosi, ikotere ikiyakaunor aosou kon anakiyar kosi.

Ekal. 2:14

Epedorete ŋikaosok akiŋolikin neni elosete ikes, nai nyepedorete ŋibaŋaanotin akiŋolikin neni elosete ikes. Nai abu ayoŋ otamak atemar eryamunete ŋikaosok ka ŋibaŋaanotin ŋican kaapei.

Ekal. 2:16

Erae ŋun aŋuna nyerubakinere jik etamunitae ekaoson, kori imuryakin ŋuluarei ŋul daadaŋ. Lopite ŋolopei etwania ebaŋaanot, etwani ekaoson daŋ.

Ekal. 3:19

Ikwaan ŋuna itiyakin neni a ŋituŋa ka ŋuna itiyakin neni a ŋityaŋ, lopite ŋolopei etwakyata ŋituŋa daŋ, etwakete ŋityaŋ daŋ. Kieŋasi ŋituŋa lopite ŋolo ieŋatar ŋityaŋ, mam ibore ejokyata ŋituŋa akilo ŋityaŋ, anerae eruwor ŋul daadaŋ ŋikoŋinae.

Ekal. 3:20

Elomarete daadaŋ nakibois apei, elomunete daadaŋ analup ka eboŋorete daadaŋ nalup.

Ekal. 6:6

Tari daŋ kiboi ituŋanan ŋikaru ŋalipyo ŋaarei, ido nyeryamu alakara anakwap keŋ, nyelosete mono ŋituŋa daadaŋ nakibois apei ekaku ka akiyar a na a?

Ekal. 9:2

Etakanununete ŋuna aronok neni a daadaŋ: Neni a ŋulu iyookino ka neni a ŋulu nyiyookino, neni a ŋulu ajokak, neni a ŋulu aronok, neni a ŋulu nyitoroniyaritae ka neni a ŋulu itoroniyaritae neni a ŋulu eayeneneete ŋamuronisya ka neni a ŋulu nyeayeneneete ŋamuronisya ŋuna etakanikinete neni a ŋituŋa a ŋulu ajokak, etakanununete neni a ŋikasecak daŋ; ŋuna etakanunete neni a ŋulu ikoŋeneneete, etakanununete neni a ŋulu ekerito akikoŋ.

Ekal. 9:3

Eroko ŋakiro ŋun ŋuna etakanunete neni a ŋinituŋanan ŋun, ikwaan aronis kec ka aronis ŋina etakanunui neni a ŋinibore anakwap a na. Apaki daadaŋ ŋina iboiyoto ŋituŋa anakwap a na, ileleba aronis natameta kec ka imasimasit ikes, ido elemari atwanare ikes atipei pa eyenete.

Ekal. 9:5

Eyenete ŋituŋa ŋulu eyarete atemar ikitwaki, nai nyeyenete ŋulu atwaka idiobore, emam nabo ibore eryamunete ikes, nyeriŋa nabo etamunitae ikes jik.

Isa. 47:7

Ibu iyoŋ tema, ‘Aruwor ayoŋ arwosit ŋikaru ka ŋikaru.’ ido ibu nyitamu ŋakiro ŋun, kori nyitamatam ŋuna itiyakin anakiro a ŋun ekaku.

Yer. 16:8

Nyilot kai ŋina itiyaere ŋasuban kiboikinos kaapei ka ikes kimuja ka tomata,

Agai 1:5

Aŋun nai tokona, ŋuna alimu Ekapolon ŋolo Etiron ikes nu ebe, “Totamatamata mono iyes ejok nooi epite ŋolo iyakatar iyes.

Mal. 2:2

Ani pa kiwuapa iyes iŋes ka ani pa kikitopoloosi iyes ayoŋ alotai kus, eyakuuni ayoŋ ŋicen neni kus, ido alemari ayoŋ ŋarereŋisyo ŋuna iryamunete iyes, toryamut ŋicen nabo daŋ adau ayoŋ alemar ŋarereŋisyo ŋun, anerae nyikitopoloorito iyes ayoŋ alotai kus.

Ekim. 23:10

Ŋae epedori akimar ŋiletok a Isirael ŋulu alalak ŋul? Ŋae epedori akimar ŋiletok a Yakob ŋulu alalak ŋul? kimyekinae ayoŋ otwan arae ituŋanan ŋini eyookino kimyekinae ayoŋ otwan lopite ŋolo atwania iŋes!”

Mat. 5:4

Erereŋ ŋulu iyaloloŋete; ebuni Akuj akisirworiun ikes.

Ŋikis. 32:29

Ani kerae toosok ikes, keyenunito ŋakiro ŋun, keyenunito ŋuna itiyakinosi neni kec ekaku.

Ŋikis. 32:46

tolimok ikes tema, “Kirica alotai kus ŋakiro daadaŋ ŋuna akalimok ayoŋ iyes nakoloŋit na akisuuda ŋakiro kus; tolimokisi ikes erae akiciket neni a ŋidwe kus ikotere iwuapyata ikes ejok ŋakiro daadaŋ ŋuna a ŋikisila.

Ŋipil. 3:19

Inyasunio ikes, anerae ekibure ŋolo a ŋawat kec iŋes erae akuj kec; iturosi ikes kan ibore ŋini itemokino kirumyata ŋileec ikes, ka eyakasi ŋatameta kec loboro ŋulu ka akwap a na bon.

Ŋibur. 9:27

Etwani ituŋanan daadaŋ atwanet apei, ido ekaku totubok Akuj iŋes.