Dan. 8:27 - Ebaibul

²⁷ Aŋun, abu ayoŋ Daniel eyaloloŋ nooi, odyakakin oper ŋirwa ŋulu alalak; ekaku abu ayoŋ onyou, olot akitiya ŋiticisyo a erwosit. Nai abu akisileerekinet anakiruja a ŋin okoinak ayoŋ akitakadakinet, ido pa apedorit ayoŋ ayenun apolou keŋ.

Dan. 8:27 Iomraidhean Croise

Dan. 10:16

Tosodi a nen, abu emalaika ŋolo esibit ituŋanan okotap ayoŋ ŋipon, ido abu ayoŋ oŋaa akituk kaŋ ikotere erworikini, olimok nai ayoŋ ŋolo awoi alodiyete kaŋ otema, “Ekapolon kaŋ, ekeilosi ayoŋ ŋakiro ŋuna ka akisileerekinet a ŋina abu ayoŋ eŋolik, ido adaun agogoŋ aneni kaŋ.

Dan. 10:8

Aŋun, abu ayoŋ edoŋ bon, ikotere eŋolikini akisileerekinet ŋina etubulon ŋin. Abu agogoŋu todaun aneni kaŋ, kilocokin etakane kaŋ, tolilimiyo akuwan kaŋ.

Dan. 4:19

Abu nai Daniel ŋolo arae ekiro keŋ ece Belitesasar tosiliyo adiouriyen ebulit nooi, apotu ŋatameta keŋ kitubulo iŋes. Tema nai erwosit neni keŋ, “Belitesasar, nyimyek ŋakiro ŋuna ka akiruja a ŋin, kori apolou kec ikitubulo iyoŋ.” Toboŋok Belitesasar tema, “Ekapolon kaŋ, kerae ca topedonor, keruwor ŋakiro ŋuna irujat iyoŋ ŋuna a ŋulu ikimanito iyoŋ ka keruwor apolou kec ŋina a ŋimoe kon.”

Dan. 5:14

Adau ayoŋ akiirar atemar eyai etau a ŋakujo neni kon ka atemar iyakar iyoŋ apiiryanut, ayenut ka aosou ŋina apolon nooi.

Dan. 7:28

Ŋakiro daadaŋ ikes ŋun ŋuna aponi okolimokin ayoŋ apolou kec. Ani eruwor ayoŋ Daniel, apotu ŋatameta kaŋ eketubulo ayoŋ nooi, ido abu ereet kaŋ kilocokin, nai abu ayoŋ eric ŋakiro daadaŋ alotau kaŋ.

Dan. 8:17

Aŋun, abu Gabriel toapu neni awoya ayoŋ, ani ebuni iŋes, abu okobul ayoŋ nooi, oper ka akook alokwap. Nai abu iŋes tema neni kaŋ, “Okoe lokoku a ituŋanan, toyenu atemar erae akisileerekinet ŋin ŋina a ŋakiro a ŋuna ka asalunet a akwap.”

Dan. 8:2

Anakisileerekinet a ŋina ete ayoŋ anakiruja, abu ayoŋ eŋolik ayai Susa lotaun ŋolo apolon ŋolo ayai Elam natyakatait a akwap a Babilon, awoi ayoŋ alodiyete aŋolol ŋina enyaritae Ulai.

Dan. 8:7

Abu ayoŋ eŋolik iŋes eapiyari lomesek. Anyunyura ekoroe nooi ka abu tonaŋ emesek, tobila ŋamomwar keŋ ŋunaarei; todaun emesek agogoŋu ŋinakitijikinet ekoroe. Abu ekoroe tonaŋ emesek tocakak kwap kicak alokwap, mam idio ŋini abu topedo aiun emesek anagogoŋu a ekoroe.

Abak. 3:16

Apupi ayoŋ ŋakiro ŋun daadaŋ, ido amarani; emaranete ŋipon kaŋ aŋuna a ekabule a ŋakiro a ŋun. alilimiyosi ŋakoyo anakuwan kaŋ, amarani ayoŋ aneni awuar, edaruni ayoŋ ekililiŋat apaki bu, apaki ŋina isicania Akuj ŋituŋa ŋul ŋulu eketijiete ayoŋ.

1 Sam. 3:15

Toper Samuel nen akitodol taparacu; tonyou nai toŋaa ŋikekya ŋulu ka Akai ke Ekapolon. Apaki ŋin, akuryanit Samuel alimokin Eli ŋakiro ŋuna ka atakanikinet a ŋina abu toyakaun neni keŋ.