Dan. 2:11 - Ebaibul

¹¹ Etyoko nooi ŋakiro ŋuna iŋita erwosit, mam ituŋanan epedori akisileereun neni a erwosit mati ŋakujo bon ŋuna nyiboiyete ka ŋituŋa.”

Dan. 2:11 Iomraidhean Croise

Akisy. 41:39

Aŋun, tema Parao neni a Yosepu, “Ikwapei ikitoodikinia Akuj iyoŋ ŋakiro nu daadaŋ, mam ituŋanan ice ŋini epatana ayenun ŋakiro, ŋini eos ikwa iyoŋ.

Akisy. 41:8

Nyeyakaun etau a Parao ejok taparacu; aŋun, abu iŋes kiyaki ŋituŋa anyarare ŋikekukujak ŋulu aya Ijipit ka ŋikaosok keŋ daadaŋ. Tolimok Parao ikes ŋakirujaeta keŋ, nai mam ipei daŋ ŋini abu topedo akisileerekin Parao apolou a ŋakiro a ŋuna abu iŋes kiruja.

1 Ŋirw. 8:27

“Nai ipedori mono kire iyoŋ Akuj akiboi alokwap ka ŋituŋa a? Ŋina nyelolomya tari nakuj daadaŋ akiboiyo iyoŋ, ikokini nai Akai ka Akuj ŋina aduku ayoŋ epedori akitemokin iyoŋ akiboiyo ai?

2 Ŋakiro a ŋirwa 6:18

“Nai ipedori mono kire iyoŋ Akuj akiboi alokwap ka ŋituŋa a? Nyelolom tari nakuj daadaŋ akiboiyo iyoŋ. Aŋun, ikokini nai Akai ka Akuj na ŋina aduku ayoŋ epedori akitemokin iyoŋ akiboiyo ai?

Ŋikiru. 132:14

Atema, “Ne iŋes eboiyo ayoŋ ŋikaru ka ŋikaru; ne iŋes adau ayoŋ acamun akiboiyo.

Ŋikiru. 68:18

Ani ŋinibore idokarya iyoŋ Akuj kidiama, ibu iya ŋulu ekamitae alojiesyo; ibu toryamu ŋainakineta alotuŋa, tari aneni a ŋulu aŋerito atemar kiboi iyoŋ a nen, okoe Ekapolon Akuj.

Awos. 29:45

Ayakaun ayoŋ neni eyakasi Ŋisirael, oruwor Akuj kec.

Awos. 8:19

Temasi ŋikekukujak neni a Parao, “Akuj etiya ŋakiro nu a akan keŋ!” Nai abu Parao torubak itogogoŋit akou keŋ, abu nyepupok ŋakiro ata Moses ka abu kitiya lopite ŋolo sek alimunitor Ekapolon.

Isa. 47:12

“Torubakisi ikinyomito neni a ŋimurok a ŋulu enyaraununeete ŋimuno ka neni a ŋikekukujak, a ŋulu ipotu iyes inakinos neni kec ŋinapei eriŋa iyes irae ŋisorok; acepaki itiyaete ejok anakiyar kus, acepaki ipedorete akitubul ŋimoe kus.

Isa. 57:15

Alimu Ekapolon ŋolo iboi alokidiama nooi, ŋolo iboi ŋikaru ka ŋikaru ŋolo erae ekiro keŋ ŋolo asegan ebe, “Eboi ayoŋ alokidiama ka anakibois a ŋina asegan, kaapei ka ŋituŋa ŋulu itiditeuna ka iapara alotai kec, ikotere ainakini ikes nabo ŋitai ŋulu itiditeuna ka oinak ikes nabo ŋitai ŋulu iapara.

Isa. 8:18

Kiŋolikinae ayoŋ lo ka ŋidwe ŋulu abu Ekapolon okoinak ayoŋ, ikirae akitoodikinet ka aumokinet alo Isirael aneni ke Ekapolon a ŋolo a ŋajoresyo a ŋolo iboi alomokura Sion.

Dan. 4:4

“Eboi ayoŋ emam ŋace alore kaŋ ka aryamunit ibore daadaŋ alokai kaŋ a ŋina ka apukan.

Dan. 5:11

Eyai nakwap ŋina ipukat iyoŋ, ituŋanan ŋini eyakar etau ŋolo a ŋakujo a ŋuna asegak. Alorwa a ŋulu epukator papa kon akwap na, aponi toryamunae aneni a ekile a ŋol apiiryanut, ayenut ka aosou ŋina ikwaan ka ŋina a ŋakujo. Abu papa kon Nebukadinesar kituruwo iŋes ekapolokiniton ŋikekukujak, ŋimurok ŋulu enyaraununeete ŋimuno, Ŋibabiloniyae ka ŋimurok.

Yoel 3:21

Ŋaokot ŋun ŋuna apotu ikes tobukosi, nyenyaŋari ayoŋ, esyoni ayoŋ ikes.” Iboikin Ekapolon Sion!

Ekim. 35:34

Nyinyasa akwap ŋina iboiyoto iyes, neni eboiyo ayoŋ daŋ, anerae ayoŋ Ekapolon ikiboi kaapei ka Ŋisirael.”

Mat. 19:26

Kitek Yesu ikes tema, “Alotuŋa nyepedorosi, nai aneni ka Akuj epedorosi ŋiboro daadaŋ.”

Yoa. 1:14

Bu Akirot toruwor ituŋanan, oruko ka isua. Aanyun isua apolou keŋ, apolou ŋina aryamuni iŋes aneni ka Akuj Papa ikwapei Lokoku keŋ ŋolo donupei ka eleleba neni keŋ ajokis ka ŋuna a kire.

Yoa. 14:17

Erae iŋes Etau ŋolo irworo ŋuna a kire ŋuna ka Akuj. Nyepedori akwap akijaun iŋes, anerae nyite akwap iŋes, kori nyeyeni iŋes. Iyenete iyes iŋes, anerae iboiyuni iŋes neni kus ka eyakaun iŋes tooma kus.

Yoa. 14:23

Toboŋok Yesu iŋes tema, “Ŋinituŋanan akamina ayoŋ, iricakini ŋakiro kaŋ. Eminakini Papa kaŋ iŋes ka ikiponi isua neni keŋ, eboiyoto ka iŋes.

2 Ŋikor. 6:16

Ikokinete ŋakujo ŋace elomarete Kai ka Akuj ai? Anerae ikirae iwon Akai ka Akuj a ŋina eyari! Ikwaŋina elimunitor Akuj ebe, “Abuni akiboi alotuŋa kaŋ, ido oruko ka ikes; oruwor ayoŋ Akuj kec ka eruworosi ikes ŋituŋa kaŋ.”

Akis. 21:3

Abu eira etoil ŋolo apolon irworo alokicoloŋ a ŋolo ka apolou ebala, “Kiŋolik! Ameun tokona erukito Akuj ka ŋituŋa keŋ! Erukete iŋes ka ikes, eruworosi ikes ŋituŋa keŋ. Erukete Akuj alope ka ikes, eruwor iŋes Akuj kec.