Suma 3:10 - Fana Ngbangɔ 1987

¹⁰ Wa oko la ĩ ma ndo nyɔ mɛ ni hɛ̃ ya, ĩ gbe bɛ ĩ na ya apɛnɔ, la ĩ gbe be ĩ ko, ni na batangɔ ĩ na ngoi mɛ gbanda apɛnɔ ati ndo azi ti lɛ sese zu so tarangɔ bɛ la.

Suma 3:10 Iomraidhean Croise

Matie 24:14

Apa gbanda Nzɔ̃ Pa ti lo Lɛngɔ Gbia tɛ Nzapa na lɛ sese zu ya, azi zu ama tɛnɛ ni uzu, wadila sese awɛ.”

Matie 26:41

Ale ĩ du lɛ ĩ ngɛ̃, ĩ sambela Nzapa, so Satana atara bɛ ĩ, ko ĩ ti. Bɛ zo ndoye lingɔ nzɔ̃ ye, kanda tɛrɛ lo adu woni.”

Matie 6:13

Ta mɔ ye ya Satana atara bɛ e ma, Wa hã e ka gbɛ ti lo mɔ zi. [Ta sanga ma, lɛngɔ gbia, na nguru, nga na ndima adu na lo tɛ mɔ buru na buru! Seni la.]’

Marko 14:9

Mbi pa hɛ̃ ĩ ti beta tɛnɛ ya, na ndo kwe zu mɛ gbanda azi apa Nzɔ̃ Pa tɛ Nzapa da ge le sese ko, apa nga gbanda pa ti ye mɛ zo wali olo ali, ko ta bɛ azi ali nga gbanda na lo ma.”

Luka 2:1

Na ngoi ko ndo ko, Ogustɛ mɛ kota gbia ti Roma ahɛ̃ nyɔ ya, adikɔ azi zu mɛ na lɛ sese tɛ ni.

Yoanɛ 17:6

“Mɔ hã ambanga azi ti lɛ sese na popo tɛ afɔ̃ la, mɔ hɛ̃ mbi, ko mbi fa mɔ na la, ala hĩnga mɔ. Ala azi tɛ mɔ, la mɔ hɛ̃ la hɛ̃ mbi, ala tɔndɔ tɛnɛ tɛ mɔ.

Roma 1:8

Uzu ti tongɔ nda tɛnɛ tɛ mbi ko, mbi hɛ̃ sia kɔli ti ndo Yezo Kristo hɛ̃ To mbi Nzapa na lo tɛ ĩ zu. Ta sanga ma, na lɛ sese zu ko, azi ndopa lo ti lo yengɔ tɛ ĩ.

1 Kɔrinto 10:13

Tarangɔ bɛ ko la Satana ndotara na bɛ ĩ ko, se mɛ nga lo ndotara na bɛ azi zu la. Wa ta Nzapa ndoweza kapa mɛ Ĩo ndoko ma, ta lo ndoye nga ya, Satana atara bɛ ĩ, ko tarangɔ bɛ ni aɔ ndo nguru tɛ ĩ ma. Kanda na ngoi ko la se Satana atara bɛ ĩ ko, Nzapa asa nguru bɛ ĩ ya, ĩ gbe bɛ ĩ, wadila ĩ si na ya ni.

Efɛzɛ 6:13

Na lo ni ko, ĩ lɔ aye ti to zu mɛ Nzapa ahɛ̃ ĩ ya, na ngoi ko la siɔ bi asi na ĩ, wa tiringɔ ĩ na to atiri ĩ ko, ĩ lengbi ti tiringɔ lo na to, ko ta ĩ kpɛ lo ma. Wa ngoi ko la ĩ tiri to ni ngbĩi ĩ si ka nda ni gbɔ ko, ĩ siɔ gɛrɛ ĩ kpa.

2 Timɔte 2:12

Se e gbe bɛ e ko, gbanda ko e na lo e lɛ nga gbia kɔi. Se e kɛ̃ lo ko, gbanda ko lo kɛ̃ nga e.

Zaki 3:12

Aya bua, ta burungu ndole na li nza ma, ko ta ndimɔ ndole nga na li mburu ma. Se mɛ nga ta bɛta ngu alengbi ti singɔ na do li ngu mɛ na hĩngɔ ya ni ma la.

1 Petro 4:12

Aya bua, ta ĩ́ bema na lo kota pɛnɔ mɛ ĩ ndohũ ma, adu apɛnɔ mɛ ndotara lo yengɔ tɛ ĩ. Ta ĩ mu ni nga ma bere adu aye ti kpɛnɛ ma.

2 Petro 2:9

Oko afa ya, Gbia Nzapa ahĩnga se mɛ lo lengbi ti songɔ na azi mɛ ndoli ye mɛ ndode bɛ lo. Lo hĩnga nga se mɛ lo lengbi ti batangɔ na asiɔ azi ya, gbanda na lá ti fangɔ ngbanga ko, ni hɛ̃ la etumbu.

Suma 1:9

Mbi Yoanɛ nyita ĩ, mbi mɛ mbi na ĩ, nga na Yezo Kristo e ti bo kɔi ko, mbi ndohũ pɛnɔ mɛ ĩ ndohũ nga. Mbi na ĩ e ndogbe be e na ya pɛnɔ ni. Mbi na ĩ e du azi ti Kɔdɔrɔ Gbia tɛ lo. Agbɔ̃ ndo mbi ato ka ya zúa ti Patimɔsi, na lo mɛ ya, mbi pa tɛnɛ tɛ Nzapa mɛ Yezo Kristo temwɛ ni.

Suma 11:10

Bɛ azi ti lɛ sese na dengɔ na lo kwá mɛ azi ko sɛ akpili. Ala na sabangɔ, ala nga na tongɔ gburu hɛ̃ afɔ̃ la, afɔ̃ la ato nga gburu hɛ̃ la. Ala na lingɔ so, na lo mɛ ya, awa pangɔ nyɔ Nzapa ko sɛ agia ndo ya li azi ma wo ma mɛ na lɛ sese na lo tɛnɛ tɛ Nzapa.

Suma 13:10

Zo ko la Nzapa anɛ ya, abi gbanda lo bɔlɔkɔ ko, abi nga bo gbanda lo bɔlɔkɔ biani. Zo ko la Nzapa anɛ ya, aho gbanda lo na zabe ko, aho nga bo lo na zabe. Ĩ ba nda mɛ ale azi tɛ Nzapa ndogbe bɛ la, ko ala ngba bo na yengɔ lo tɛ Nzapa la.”

Suma 13:14

Ahɛ̃ lo lege ya, lo li aye ti kpɛnɛ na gbɛlɛ sa ti kɔi, lo handa azi ti lɛ sese, ko ala ti na siɔ ye. Lo pa hɛ̃ azi ti lɛ sese ya, ala lɛkɛ ngbilondo, ko ala gonda na sa mɛ ndo ade li lo na zabe, la ta lo kpi ma.

Suma 13:8

Azi ti le sese zu na vɔrɔngɔ lo, wenge bo azi mɛ asuru ili la ka ya buku mɛ asuru na ili azi ko la alua du ti kaka. Asuru ndo ili azi ni ka ya buku uzu ti Nzapa lingɔ sese. Buku ni adu tɛ Nyi Ngasã Ngbaga mɛ ndo aho lo.

Suma 14:12

Ĩ ba nda mɛ ale azi tɛ Nzapa mɛ ndotɔndɔ ndia tɛ lo, ndoye nga lo tɛ Yezo na bɛ la kɔi, alengbi ti gbengɔ bɛ la na ya pɛnɔ mɛ ala ndohũ la.

Suma 14:6

Mbi hũ angelo mɛ ndɛ̃ so ndoɔ ka lɛ ndozu yanga yenge. Lo ndoɔ so pangɔ hɛ̃ azi ti lɛ sese Nzɔ̃ Pa mɛ ndongbã kaka. Lo ndoɔ so pangɔ Nzɔ̃ Pa ni hɛ̃ azi ti lɛ sese zu, ti ale zu, nga na ti yanga kɔdɔrɔ zu.

Suma 16:14

Adu asiɔ tɔrɔ tɛ Zabulu mɛ ndoli aye ti kpɛnɛ. Asiɔ tɔrɔ ni anɔ ka tɛ agbia ti lɛ sese zu so bombingɔ la ndoni kɔi ya, na la ko gbanda Nzapa mɛ lombe aga ko, ani na lo ani tiri to.

Suma 17:2

Agbia ti lɛ sese ana ngbabo ni ali ndo aye ti kamɛnɛ. Azi ti lɛ sese ali ndo aye ti kamɛnɛ so ya kɔdɔrɔ ni, ko ye ti kamɛnɛ ni agbɔ̃nɔ ndo la nga ma kana.”

Suma 17:8

Wa ma nda ni lo mɛ: sa ko mɔ hũ ko, ndo gã ko, lo ndo lɛ lo ngɛ̃, kanda na olo mɛ ko, ta lo ti dɛ lɛ lo ngɛ̃ ma. Wa angbã yakere ko, lo lo ka ya du mɛ lipi lipi, lo si. Ngoi mɛ lo na singɔ ko, Nzapa na bingɔ lo ka lifɛlo. Azi ti lɛ sese mɛ ndo ta asu ili la ka ya Buku mɛ asuru na ili azi mɛ alua du ti kaka, na ngoi mɛ ndo Nzapa ato nda lingɔ sese ma ko, ala na hũngɔ lo. Ala nga na bemangɔ, na lo mɛ ya, sa ni ko ndo uzu lɛ lo ngɛ̃, kanda na olo mɛ ko, ta lo ti dɛ lɛ lo ngɛ̃ ma, lo na singɔ fani mɛ ndɛ̃.

Suma 2:10

Ta ĩ du na mbɛtɔ na lo pɛnɔ mɛ ĩ na hũngɔ ma. Wa í ma la: Satana na sangɔ ambanga azi na popo tɛ ĩ bɔlɔkɔ so tarangɔ bɛ ĩ, ĩ na hũngɔ pɛnɔ bi sui kɔi. Ko ĩ ye bo lo tɛ ni bɛ ĩ kɔi nga ka ĩ kpili. Ni hɛ̃ ĩ gbanda mbana gɛrɛ ĩ, mbana gɛrɛ ni adu du ti kaka.

Suma 3:8

Zo ni ko apa ya, ni hĩnga ye zu mɛ ĩ ndoli, ni hĩnga nga ya nguru tɛ ĩ adu bo yakere, kanda ĩ ndoma nyɔ ni, ko ta ĩ bɛre nga lo tɛ ni ma. Ni zi nyɔ ngise ya ĩ li ka ya da, ko ta zo kɔi alengbi ti vĩngɔ ni ma.

Suma 6:10

Atɔrɔ tɛrɛ azi ni ko so ndodɛrɛ kɔngɔ kpengbani ya: “Gbia, mɔ mɛ santo, mɔ mɛ bɛta Nzapa, mɔ fa gbanda ngbanga tɛ azi ti lɛ sese mɛ ndo akpɔ e lá wa? Mɔ hɛ̃ nga gbanda etumbu hɛ̃ la lá wa?”

Suma 8:13

Mbi ti ba ndo, ko mbi hũ ngwalo aɔ ka lɛ ndozu yanga yenge. Mbi ma lo so ndodɛrɛ kɔngɔ ya: “Oo siɔ lo ee! Oo siɔ lo ee! Na ngoi mɛ se atanga aangelo ota na ulungɔ na mbana tɛ la ko, kota siɔ lo na tingɔ na azi ti lɛ sese.”