Ta sanga ma, Nzapa tɛ e na dede bɛ, lo nga na vundu sĩ. Lo na tongɔ hɛ̃ e zo mɛ na longɔ ka ndozu, Ko zo ni na vurungɔ na ndo hɛ̃ e, Nga ma se tɛ lá mɛ asi ka tɔ ndovuru na ndo.
Ko Nzapa ahĩnga ya, tɛnɛ mɛ mbi ndotɛnɛ ko, adu biani. Lo hĩnga ya, na ngoi zu mɛ mbi ndosambela ni ko, mbi ndoda bɛ mbi na ĩ. Mbi ndohũnda lo ya, se bɛ lo aye ko, lo hɛ̃ mbi lege ho lo mɛ, mbi m ka tɛ ĩ. Lo la Nzapa mɛ mbi ndoli kwa ti pangɔ Nzɔ̃ Pa tɛ Nyi lo na bɛ mbi kɔi.
Tɛnɛ mɛ mbi na tɛnɛngɔ hɛ̃ ĩ ko, adu beta tɛnɛ, na lo mɛ ya, mbi zo tɛ Kristo, ko ta tɛnɛ tɛ mbi adu nvɛnɛ ma. Kɔdɛ tɛ mbi mɛ Tɔrɔ Santo gbia ni ndofa nga na mbi ya, tɛnɛ ni adu beta tɛnɛ.
Aya bua ti kpɔ̃ bɛ mbi, wa ĩ ba se mɛ ale ĩ ndongbã bo na yengɔ lo tɛ Gbia la. Akwa mbi, mbi ndosepara ma ya ma ya, mbi diri mbi ga mbi ba ĩ. Ĩ ndohɛ̃ mbi dengɔ bɛ ma ya ma, ko na lo tɛ ĩ la mbi ndolɛndɛrɛ mbana gɛrɛ mɛ Nzapa na hɛ̃ngɔ mbi.
Ĩ awa Kristo ti Kɔlɔsɛ, na ĩ azi ti kɔdɔrɔ ti Laodisea, nga na ĩ azi zu mɛ ta ĩ dɛ ĩ hĩnga mbi ma ko, mbi ye ya ale ĩ zu ĩ hĩnga ya, kwa mɛ mbi ndoli na lo tɛ ĩ ko, adu kpengbani nvɛni.
Ĩ du nga ava Nzapa, Nzapa ndoye ĩ, lo sara nga ĩ lo kpa azi tɛ lo. Na lo ni ko, ale ĩ ma vundu tɛ afɔ̃ ĩ, ĩ du na nzɔ̃ bɛ, ĩ ngara tɛrɛ ĩ, í du adede azi, ĩ du nga na yɔngɔrɔ bɛ.
Ĩ hĩnga nzɔ̃ni ya, ta e tɛnɛ ndo nzɔ̃ tɛnɛ fani kɔi ya, e kara na ĩ lɛkpɛ lɛkpɛ ma, ta e tɛnɛ ndo nga tɛnɛ kɔi ya, ĩ hɛ̃ e ye na lo ni ma. Nzapa nvɛni ahĩnga ya, tɛnɛ tɛ e adu na seni.
Wa so fangɔ ya, bɛ e aye ndo ĩ sĩ ko, ta e ye ndo bo pangɔ Nzɔ̃ Pa tɛ Nzapa hɛ̃ ĩ ma, kanda e ye ndo nga ya, e ka tɛrɛ e na lo tɛ ĩ. Ta sanga ma, ĩ ti ndo nga ma afɔ̃ e ti kpɔ̃ bɛ e!
Nyi bua, ti biani, mbi gbɔ̃ gɛrɛ mɔ ya, mɔ li hɛ̃ mbi nzɔ̃ ye na lo tɛ Gbia Yezo Kristo, wa Onezimɛ adiri ka tɛ mɔ. Zu nga na bɛ mbi na lo tɛ Yezo Kristo.