Filipɛ 1:6 - Fana Ngbangɔ 1987

⁶ Mbi hĩnga biani ya, Nzapa mɛ ato nda lingɔ nzɔ̃ kwa olo na ya bɛ ĩ ko, ta lo na ziangɔ ni ma. Kanda lo na lingɔ ni ngbĩi nga ka lá ko gbanda Yezo Kristo adiri aga, ko kwa ni awɛ.

Filipɛ 1:6 Iomraidhean Croise

Yoanɛ 6:29

Yezo agbinya hɛ̃ la ya: “Ĩ ba kwa mɛ bɛ Nzapa aye ya ĩ li lo mɛ: ale ĩ ye lo tɛ mbi mɛ lo to mbi.”

Awa Pangɔ Kwa 11:18

Ala ĩ ma tɛnɛ ni wɛ ko, bɛ la azu, la ala gonda Nzapa ya: “Biani, Nzapa ahɛ̃ nga lege hɛ̃ azi mɛ ta Ayuda ma ya, ala gbinya bɛ la, wa ala lua bɛta du.”

Awa Pangɔ Kwa 16:14

Mbanga wali kɔi so popo tɛ la, ili lo la Lidia. Lo lo ndo ka kɔdɔrɔ mɛ ili ni la Tiatirɛ, la lo ga. Lo wa kangɔ bengba bɔngɔ mɛ ndoti ngere ma wo ma, ko lo ndovɔrɔ nga ndo Nzapa. Lo ndoma ndo e, la Gbia Nzapa azi kɔdɛ li lo ya, lo zi ma lo, wa lo ma tɛnɛ mɛ Polo ndotɛnɛ.

1 Kɔrinto 1:8

Gbia tɛ e Yezo Kristo gbanda la ali ya, ĩ kpengba na ya lo yengɔ tɛ ĩ ngbĩi ĩ si ka ndani gbɔ, so gbanda abela ĩ, na lá ti diringɔ tɛ lo.

2 Kɔrinto 1:15

Mbi hĩnga alo ni ko zu nzɔ̃ni, ko na lo ni la mbi separa ndo ya, mbi ɔ ti ndo ĩ, wa mbi gwe ka sese ti Masedoanɛ. Na longɔ mbi kai diringɔ ko, mbi diri nga ti ndo ĩ, mbi ba ĩ. Adu nga ma mbi na zangɔ ĩ fani sɛ, ko ĩ lengbi nga ti zangɔ mbi na ye, ya mbi gwe na ni fɔnɔ tɛ mbi ka Yudea.

2 Kɔrinto 2:3

Ĩ ba nda mɛ ndo mbi su hɛ̃ ĩ mbɛti mɛ ndɛ̃ na se lɛ gangɔ kai-la. Ĩ du azi mɛ ale ĩ la ĩ lengbi ti dengɔ na bɛ mbi, ko ta mbi ye ya, mbi si ka tɛ ĩ ma, so ĩ sa vundu bɛ mbi. Mbi hĩnga nzɔ̃ni ya, na ngoi ko la mbi du na dengɔ bɛ ko, ĩ zu ĩ du nga na dengɔ bɛ.

2 Kɔrinto 7:16

Bɛ mbi ndode sĩ, na lo mɛ ya, na ya alo zu ko, mbi lengbi ti kpãngɔ bɛ mbi ndo ĩ.

2 Kɔrinto 9:4

Ta so ma, se mbi na azi ti Masedoanɛ e bombi e ga, wa se ta ala tã ĩ, ĩ lɛkɛ tɛrɛ ĩ, ĩ sɔrɔ faranga ma ko, kamɛnɛ na gbɔ̃ngɔ mbi sĩ, na lo mɛ ya, mbi hĩnga biani ya, ĩ sɔrɔ faranga ni wɛ. Ko kamɛnɛ nga na gbɔ̃ngɔ ĩ na gbɛlɛ e na la.

Galatia 5:10

Wa oko e ndokpã bɛ e na ndo ĩ na lo tɛ Gbia Yezo ko, mbi hĩnga ya, ta dangɔ bɛ tɛ ĩ na tɛ mbi na ɔngbingɔ ma. Kanda zo ko la ndogia ya li ĩ, abɛ lo du na ko, Nzapa ahɛ̃ gbanda etumbu hɛ̃ lo.

Efɛzɛ 4:12

Lo hɛ̃ ndo azi nguru kwa ni ya, ala za awa Kristo na lingɔ kwa tɛ Nzapa, wadila awa Kristo amai na ya lo yengɔ tɛ la.

Filipɛ 1:10

wadila ĩ sara anzɔ̃ ye, ko ĩ dɔ asiɔ ye ĩ zia. Se ĩ li nga so ko, na lá ko gbanda Kristo adiri aga ko, bɛ ĩ adu vuruni pa pa pa, ko ta Nzapa abela nga ĩ ma.

Filipɛ 1:29

Ta sanga ma, Nzapa ahɛ̃ ĩ lege ya, ĩ ti azi tɛ Yezo Kristo. Ta lo hɛ̃ ĩ lege ya, ĩ ye bo lo tɛ Yezo Kristo kɔi ma, kanda lo hɛ̃ nga ĩ lege ya, ĩ hũ apɛnɔ na lo tɛ lo.

Filipɛ 2:12

Akwa mbi ti kpɔ̃ bɛ mbi, ngoi mɛ ndo mbi dɛ ka tɛ ĩ ko, ĩ ndoma ndo nyɔ mbi ngoi zu. Nga ma ta mbi ka tɔ̃nda ĩ na olo mɛ ma ko, adu nzɔ̃ni buai ya, ĩ ti ma nga nyɔ mbi nga ma se ti uzu. Ĩ mu lege ti songɔ kwá, ko ale ĩ li kwa hɛ̃ Nzapa na mbɛtɔ,

Filipɛ 2:13

ta sanga ma, Nzapa ndoli kwa ka ya bɛ ĩ ngoi zu ya, ĩ ye aye mɛ bɛ ni ndode na lo ni, ko ĩ li nga aye ni ko.

Filipɛ 2:16

Ko ale du tɛ ĩ adu nga so, wa ĩ pa hɛ̃ la tɛnɛ mɛ ndohɛ̃ azi bɛta du. Se ĩ li nga so, wa ada gbanda na la ko Yezo Kristo adiri aga ko, mbi saba gbɛlɛ lo kela kela na lo tɛ ĩ. Ta sanga ma, ye ko ĩ li ko, afa ya, ta kpengba kwa mɛ ndo mbi li adu gɛgɛrɛ ma.

Kɔlɔsɛ 2:12

Ngoi mɛ ndo ahɛ̃ ĩ batisimɔ ko, adu nga ma ahɔ ndo ĩ na Yezo Kristo kɔi, ko Nzapa aso nga ĩ na lo kɔi, na lo mɛ ya, ĩ ye lo ti nguru mɛ Nzapa aso na Yezo Kristo na pɛ kwa.

1 Tɛsalɔnikɛ 1:3

Ngoi mɛ e ndosambela To e Nzapa ko, e ndoda bɛ e ngoi zu na se mɛ ĩ ndoli na kwa, na lo mɛ ya, ĩ ye lo tɛ lo. E ndoda bɛ e na se mɛ ĩ ndoli na kpengba kwa hɛ̃ lo, ta sanga ma, bɛ ĩ aye lo. E ndoda nga bɛ e na se mɛ ĩ ndolɛndɛrɛ na Gbia tɛ e Yezo Kristo kpengbani.

2 Tɛsalɔnikɛ 1:11

Ĩ ba nda mɛ e ndosambela Nzapa ngoi zu na lo tɛ ĩ la. E ndohũnda lo ya, lo li ya, ĩ ti azi mɛ ĩ lengbi ti dungɔ nzɔ̃ du mɛ ndo lo ili ĩ na lo ni. E ndohũnda nga lo ya, lo za ĩ na nguru tɛ lo, ko ĩ li anzɔ̃ kwa zu mɛ ĩ ye lingɔ ni, na lo mɛ ya, ĩ ye lo tɛ lo.

2 Tɛsalɔnikɛ 3:4

Ko na lo tɛ Gbia ko, e ndokpã bɛ e ndo ĩ: e hĩnga ya, ĩ ndoli tɛnɛ mɛ e ndopa hɛ̃ ĩ na seni, ko ĩ nga na lingɔ ni ngoi zu na seni.

Filemɔ 1:21

Na ngoi mɛ mbi su na mbeti olo ko, mbi hĩnga nzɔ̃ni ya, mɔ na lingɔ ye mɛ mbi gbɔ̃ gɛrɛ mɔ na lo ni. Ko mbi hĩnga nga ya, mɔ na lingɔ ni ɔngɔ ndoni.

Aebreo 10:35

Na lo ni ko, ĩ ngbã bo na kpãngɔ bɛ ĩ na ndo Nzapa, na lo mɛ ya, ĩ na luangɔ kota mbana gɛrɛ ĩ mɛ lo bata hɛ̃ ĩ.

Aebreo 12:2

Ale e ndoba bo Yezo, lo la lo li ya, e ye lo tɛ ni, ko lo ndoli nga ya, e ngbã bo na yengɔ lo tɛ ni ngbĩi e si ka ndani gbɔ. Ngoi mɛ ndo aye hongɔ lo ka ndo krusi ko, lo gbe ndo bɛ lo, ta kamɛnɛ agbɔ̃ ndo nga lo na lo ti gi tɛrɛ kwá ni ko ma, na lo mɛ ya, lo hĩnga ndo ya, ni na luangɔ dengɔ bɛ ka tɛ Nzapa. Na olo mɛ ko, lo du na ndo kɔti ti Nzapa, ka ndo mɛ Nzapa ndole gbia tɛ lo da.

1 Petro 5:10

Ĩ ndohũ pɛnɔ, kanda na pɛ ngoi yakere ko, Nzapa mɛ ndoli kota nzɔ̃ bɛ hɛ̃ e, lo nvɛni na lɛkɛngɔ ĩ, kpengbangɔ na bɛ ĩ, hɛ̃ngɔ ĩ nguru. Lo la lo ili ĩ ya, ĩ lua ndima ti kaka ka tɛ ni, na lo mɛ ya, ĩ na Kristo ĩ ti bo kɔi.

2 Petro 3:10

Lá ti gangɔ tɛ Gbia abuta gbanda azi nga ma se tɛ wa nzĩ mɛ ta zo kɔi ndohĩnga gangɔ tɛ lo ma. Na lá ko gbanda ko, ndozu amina gbanda, ko azi ama kota gigi ni. Wá agbiri gbanda aye mɛ ka lɛ ndozu, ko sese nvɛni na aye zu mɛ so lɛ ni amina nga.