1 Timɔte 5:5 - Fana Ngbangɔ 1987

⁵ Wali mɛ we muã nvɛni, ko ta zo ti zangɔ lo da ma ko, lo ndolɛndɛrɛ Nzapa, ta lo ndonzɛ̃ na vɔrɔngɔ Nzapa, nga na hũndangɔ lo bi na lá ya, lo za ni ma.

1 Timɔte 5:5 Iomraidhean Croise

Luka 18:1

So pɛni, Yezo ato matɔ so fangɔ na la ya, ale ala ndosambela ngoi zu, ale ta ala ndonzɛ̃ nga bɛ gbɔ ma.

Luka 18:7

Azi mɛ Nzapa asara la akpa azi tɛ lo, ko bi na la, ala ndodɛrɛ kɔngɔ hɛ̃ lo ko, lo fa gbanda ngbanga tɛ la. Ta lo ndanga nga gbanda tɛrɛ lo na zangɔ la ma.

Luka 2:37

Kɔ lo akpi ti lo, ko lo la so pɛ kwá tɛ kɔ lo ngbĩi lo ti na buru sui miambe ndoni siɔ. Lo ndonɔ ndo lá kwɛ lá kwɛ ka ya kota da Nzapa. Ko lo ndovɔrɔ ndo Nzapa bi na lá, lo ndokɛ̃ ndo tɛ so vɔrɔngɔ Nzapa.

Awa Pangɔ Kwa 26:7

Ale tɛ azi tɛ e ti Izrayɛlɛ sui kɔi ndoni se ndokpã bɛ la ndo kapa ni ya, ati na Seni na ngoi mɛ ani dɛ lɛ ani ngɛ̃, ko ala ndoli kwa kpuru kpuru hɛ̃ Nzapa bi na lá. Ae gbia! Adu na lo ti bɛ mbi mɛ mbi ndokpã na ndo kapa ko la Ayuda avɔ̃ to tɛrɛ mbi!”

Awa Pangɔ Kwa 6:1

Na ngoi ko ndo ko, awa yengɔ lo tɛ Yezo ndobu gi bungɔ, la Ayuda mɛ ndotɛnɛ yanga tɛ azi ti Grɛsɛ, adema tɛrɛ la hɛ̃ Ayuda mɛ anvɛ̃ kɔdɔrɔ. Ala pa ya, lá kwɛ lá kwɛ, na ngoi ti kangbingɔ tɛ ko, ta andohɛ̃ tɛ hɛ̃ awe muã tɛ ani na seni ma.

Awa Pangɔ Kwa 9:39

Ala ĩ si kai, ĩ pa kwa ni hɛ̃ Petro ko, Petro na awa pangɔ kwa ko agwe bo na ngoi ni ko. Lo ĩ si kai ko, agwe na lo ka ya da mɛ ka ndozu. Awe muã ai tɛrɛ la ka tɔ̃nda lo, ala so ndoto to. Ala fa lo na andozu bɔngɔ, na akota bɔngɔ mɛ ndo Dɔrkasi alɛkɛ na ngoi mɛ ndo lo dɛ lɛ lo ngɛ̃.

Awa Pangɔ Kwa 9:41

Petro agbɔ̃ ti lo, aza lo, la lo lo ndozu. Petro aili awa yengɔ lo tɛ Yezo, na awe muã, lo fa la na Tabita mɛ aso na pɛ kwá.

Roma 1:12

Mbi separa pangɔ ya, mbi na singɔ ka tɛ ĩ, wadila e sangbi nguru bɛ e. Ĩ sa nguru bɛ mbi na lo ti lo yengɔ tɛ ĩ, ko mbi sa nga nguru bɛ ĩ na lo ti lo yengɔ tɛ mbi.

Roma 1:5

Na lo tɛ Yezo Kristo la Nzapa ali nzɔ̃ bɛ hɛ̃ mbi, akpã mbi wa pangɔ kwa tɛ Yezo Kristo, akpã nga mbi ya, mbi pa kwa ni hɛ̃ azi ti lɛ sese zu, wadila ala ye lo tɛ Yezo, ala ma nga nyɔ lo, wa se mɛ Yezo Kristo alua ndima la.

1 Kɔrinto 7:32

Mbi separa ya, ta ĩ kpã bɛ ĩ ngbũ ma. Kɔli ko la mɔdo ko, lo ndokpã be lo na ndo alo tɛ Gbia Yezo, lo ndogi kɔdɛ ya, ni li ye so dengɔ na bɛ Gbia Yezo.

1 Kɔrinto 7:34

Na lo ni ko, bɛ lo ndodu sɛ sɛ: kɔi na ndo ya lo, omɛ ndɛ̃ na ndo Gbia Yezo. Se mɛ nga wali mɛ mɔdo, bere mɔsia ndokpã na bɛ lo na ndo alo tɛ Gbia Yezo la, ta sanga ma, lo ndosepara hɛ̃ngɔ tɛrɛ lo nga na bɛ lo zu hɛ̃ Yezo. Kanda wali ko la adu na kɔli ndokpã tɛ lo bɛ lo na ndo alo ti lɛ sese. Lo ndogi kɔdɛ ya, ni li ye so dengɔ na bɛ kɔ ni.

Efɛzɛ 6:18

Ĩ li aye olo zu na sambelangɔ Nzapa, ko ĩ hũnda lo ya, lo za ĩ. Ale ĩ sambela Nzapa ngoi zu, nga ma se mɛ Tɔrɔ Santo afa na ĩ. Na lo ni ko, ĩ du na kpengba lɛ, ta ĩ nzɛ̃ nga bɛ fani kɔi ma. Ale ĩ sambela hɛ̃ azi tɛ Nzapa zu.

Filipɛ 4:6

Ta be ĩ angbã ngbũ na lo ye kɔi ma, kanda na ya alo zu mɛ asi na ĩ ko, ĩ hũnda Nzapa ya, lo hɛ̃ ĩ ye mɛ ĩ na gwɛ̃ ni, ko ĩ hũnda lo na ya sambela tɛ ĩ, ĩ hũnda nga lo na hɛ̃ngɔ lo sia kɔli.

1 Timɔte 2:1

Tɛnɛ ti uzu mɛ mbi na wangɔ na ĩ awa Kristo lo mɛ: ĩ sambela Nzapa na lo tɛ azi zu, ĩ vɔrɔ tɛrɛ ĩ hɛ̃ lo na lo tɛ la ya, lo za la, ĩ́ hɛ̃ nga lo sia kɔli na lo tɛ la.

1 Timɔte 5:16

Wa se wa Kristo ti wali adu na asongo lo mɛ awe muã ko, ale ta lo zia la ya, azi ti Eklezia aza la ma. Kanda ale lo nvɛni lo za la, wadila azi ti Eklezia aza tɛ la awe muã mɛ ta zo ti zangɔ la da ma.

1 Timɔte 5:3

Tɔndɔ awe muã mɛ ta zo ti la kɔi ma.

2 Timɔte 1:3

Mbi ndohɛ̃ sia kɔli hɛ̃ Nzapa mɛ mbi ndoli kwa hɛ̃ lo na vuru bɛ, nga ma se ko ndo akotara mbi ali nga na kwa hɛ̃ lo. Ngoi zu mɛ mbi ndovɔrɔ Nzapa ko, mbi ndoda bɛ mbi na mɔ bi na lá.

1 Petro 3:5

Ndo gã ko, se mɛ ndo awe mɛ ahɛ̃ tɛrɛ la so vɔrɔngɔ Nzapa, ndolɛndɛrɛ nga lo, ndoli ya ani dɛ̃ la. Ala ndobi ndo tɛrɛ la hɛ̃ akɔ la.