1 Timɔte 1:5 - Fana Ngbangɔ 1987

⁵ Mbi pa hɛ̃ mɔ ya, mɔ gbanzi la, wadila ala ye afɔ̃ la. Ti nɛngɔ ya, ala ye afɔ̃ la ko, ale bɛ la adu vuruni, ale ala li ye mɛ ala hĩnga ya adu nzɔ̃ni, ale ala ye nga lo tɛ Nzapa na bɛ la kɔi.

1 Timɔte 1:5 Iomraidhean Croise

Matie 12:35

Nzɔ̃ zo ndoli nzɔ̃ lo mɛ ka bɛ lo. Siɔ zo ndoli nga siɔ lo mɛ ka bɛ lo.

Matie 5:8

“Dengɔ bɛ ati na azi ko la bɛ la vuruni, Ta sanga ma, ala hũ gbanda Nzapa na lɛ la!

Awa Pangɔ Kwa 15:9

E na azi ko zu ka lɛ Nzapa bo kwɛ kɔi. Nzapa akpo bɛ la ati vuruni na lo mɛ ya, ala ye lo tɛ lo.

Awa Pangɔ Kwa 23:1

Polo aba awa fangɔ ngbanga toka toka, apa hɛ̃ la ya: “Aya bua, mbi ndodu ndo na vuru bɛ ngoi zu ka gbɛlɛ Nzapa, ko vuru bɛ ni ade bo na lá olo kpɔ.”

Awa Pangɔ Kwa 24:16

Nda mɛ mbi ndoli kpengbani ya, ale mbi du na vuru bɛ ngoi zu ka gbɛlɛ Nzapa, nga ka gbɛlɛ azi la.

Roma 10:4

Mbi pa so, ta sanga ma, Yezo Kristo aho nguru ti ndia tɛ Mɔizɛ ya, Nzapa amu azi zu mɛ aye lo tɛ Yezo Kristo ya, ala abɛta azi.

Roma 12:9

Ale ĩ ye afɔ̃ ĩ na bɛ ĩ kɔi, ĩ kɛ̃ ye mɛ siɔni, ĩ ye ye mɛ nzɔ̃ni.

Roma 14:15

Se mɔ gia bɛ ayata mɔ awa Kristo na lo ti tɛ mɛ mɔ ndotɛ ko, afa ya, ta mɔ ti ndoye la ma. Yezo Kristo akpi ndo so la, ko ale ta mɔ li ya, ala yu ndo bo na lo ti tɛ mɛ mɔ ndotɛ ma!

Roma 9:1

Tɛnɛ mɛ mbi na tɛnɛngɔ hɛ̃ ĩ ko, adu beta tɛnɛ, na lo mɛ ya, mbi zo tɛ Kristo, ko ta tɛnɛ tɛ mbi adu nvɛnɛ ma. Kɔdɛ tɛ mbi mɛ Tɔrɔ Santo gbia ni ndofa nga na mbi ya, tɛnɛ ni adu beta tɛnɛ.

1 Kɔrinto 13:1

Bɛ se mbi hĩnga tɛnɛngɔ yanga zu mɛ azi ti lɛ sese ndotɛnɛ, nga na yanga mɛ aangelo ndotɛnɛ, wa se ta mbi ye afɔ̃ mbi ma ko, mbi nga ma ngɔ̃ mɛ ndovũ dú dú dú, bere mbi nga ma ngbonga ti nwa mɛ ndokpale ngbaoo ngbaoo ngbaoo!

2 Kɔrinto 1:12

Ĩ ba ye mɛ e lengbi ti gondangɔ tɛrɛ e na lo ni lo mɛ: e hĩnga nzɔ̃ni ge ya bɛ e ya, na ya du tɛ e ge lɛ sese, mai bo du mɛ e du ka popo tɛ ĩ ko, du ni adu bɛtani, adu nga mbiri mbiri. Ko Nzapa la ali ya, du ni ko adu so. Wa ta du tɛ e adu so, na lo ti ndara tɛ azi ti lɛ sese ma, kanda adu na lo ti nzɔ̃ bɛ tɛ Nzapa.

Galatia 5:22

Kanda tɛ Tɔrɔ Santo ko, lo ndoli ya, azi ayengbi, adu na dengɔ bɛ, adu na bɛ pii, adu na yɔngɔrɔ bɛ, ali nzɔ̃ ye na tɛrɛ afɔ̃ la, adu nga na nzɔ̃ bɛ, ali ye na seni,

Galatia 5:6

Ta sanga ma, se zo ana Yezo Kristo ati bo kɔi, abɛ afa zo ni ko ganza, abɛ zo ni ko adu wa popo ko, ta ali ye ma. Kanda ye mɛ ngbondoni la, ale zo aye lo tɛ Yezo Kristo, wadila lo ye afɔ̃ lo.

1 Timɔte 1:18

Timɔte nyi mbi, mbi zia atɛnɛ ko mbi tɛnɛ na yamba ti mɔ, ya mɔ pa ni hɛ̃ azi nga ma se ko ndo awa pangɔ nyɔ Nzapa apa na ni uzu na lo tɛ mɔ. Da bɛ mɔ na atɛnɛ ni, wa mɔ tiri nzɔ̃ to.

1 Timɔte 1:19

Ngbã bo na yengɔ lo tɛ Yezo Kristo, ngbã nga na vuru bɛ. Ambanga azi akɛ̃ ndo batangɔ bɛ la vuruni, ko na lo ni ko, lo yengɔ tɛ la akpi kpɔɔ.

1 Timɔte 3:9

Ko bɛta tɛnɛ mɛ Nzapa afa ko, ale ala ngba na yengɔ lo ni na vuru bɛ.

2 Timɔte 1:3

Mbi ndohɛ̃ sia kɔli hɛ̃ Nzapa mɛ mbi ndoli kwa hɛ̃ lo na vuru bɛ, nga ma se ko ndo akotara mbi ali nga na kwa hɛ̃ lo. Ngoi zu mɛ mbi ndovɔrɔ Nzapa ko, mbi ndoda bɛ mbi na mɔ bi na lá.

2 Timɔte 1:5

Mbi ndoda bɛ mbi na mɔ na lo tɛ Yezo mɛ ndo mɔ ye bɛ mɔ kɔi. Lo tɛ Yezo mɛ ndo tara mɔ Loisi mɛ wa dúngɔ ta mɔ, nga na Enisɛ mɛ ta mɔ aye uzu tɛ mɔ. Ko mbi hĩnga biani ya, mɔ ye nga lo tɛ Yezo.

2 Timɔte 2:22

Timɔte, ta mɔ li ye na se gwɛ̃ ti tɛrɛ nga ma tɛ ambanga apandara ma. Li kpengbani mɔ li ye mɛ mbiri mbiri, mɔ ye lo tɛ Yezo na bɛ mɔ kɔi, mɔ ye azi, mɔ du na mangbingɔ na popo tɛ mɔ na azi mɛ bɛ la vuruni, azi mɛ ndoili Gbia Nzapa ya, lo za ani.

Tito 1:15

Azi ko la bɛ la vuruni ko, ye kwɛ adu nga vuruni na lo tɛ la. Kanda azi ko la ta bɛ la vuruni ma, ta ala nga awa Kristo ma ko, ta ye kɔi adu nga vuruni na lo tɛ la ma. Ta sanga ma, kɔdɛ tɛ la nga na dangɔ bɛ tɛ la siɔni.

Aebreo 10:22

Asiɔ ye zu mɛ e li, ko andokpã bɛ e ngbũ ko, mɛnɛ tɛrɛ lo akpo ni azi. Lo kpo nga tɛrɛ e na ngu mɛ lɛ ni ngio ngio. Na lo ni ko, ale e i tɛrɛ e ka tɛ Nzapa na bɛ e kɔi, é ye nga lo tɛ lo na bɛ e kɔi.

Aebreo 13:18

Ĩ ngbã bo na sambelangɔ Nzapa hɛ̃ e. E hĩnga nzɔ̃ni ya, bɛ e vuruni. Ta sanga ma, e ndosepara ya, e li nzɔ̃ ye ngoi zu.

Aebreo 9:14

Singa na mɛnɛ tɛrɛ asa mɛ aonzi lo na tɛrɛ azi, o singa na mɛnɛ tɛrɛ Kristo mɛ aɔ mɛnɛ tɛrɛ asa na nguru ma! Kristo ndo nga ma nyi ngasã ngbaga mɛ ta ye ti siɔni kɔi na tɛrɛ lo ma. Lo ka ndo tɛrɛ lo nvɛni na nguru tɛ Tɔrɔ Santo mɛ kaka, lo lu na Nzapa. Mɛnɛ tɛrɛ lo na kpongɔ bɛ e ya, ta e li agɛgɛrɛ ye ma, wadila e li kwa hɛ̃ Nzapa mɛ le lo ngɛ̃.

Zaki 4:8

Ĩ fɔ̃ tɛrɛ ĩ na Nzapa, wa Nzapa afɔ̃ nga tɛrɛ lo na ĩ. Ĩ awa lingɔ siɔ ye, ta ĩ ti li siɔ ye ma. Ĩ azi mɛ nyɔ ĩ se se, ĩ lɛkɛ bɛ ĩ!

1 Petro 1:22

Ĩ ndotɔndɔ bɛta lo tɛ Nzapa, la bɛ ĩ ati vuruni ya, ĩ ye ayata ĩ awa Kristo na bɛ ĩ kɔi. Wa ale ĩ yengbi sĩ nvɛni na bɛ ĩ kɔi.

1 Petro 3:16

Ale ĩ kambisa nda ni hɛ̃ la na dede bɛ, ĩ tɔndɔ nga la. Ale ĩ du na vuru bɛ ya, se azi avɔ̃ to tɛrɛ ĩ ko, kamɛnɛ agbɔ̃ la nvɛni na ndo tɛnɛ tɛ la. Ta sanga ma, ala ndodi ĩ siɔni na lo ti nzɔ̃ se li ye tɛ ĩ mɛ ĩ na ni, na lo mɛ ya, ĩ na Yezo Kristo ĩ ti bo kɔi.

1 Petro 3:21

Ngu ni ndofa batisimɔ mɛ ndoso ĩ na olo mɛ. Batisimɔ mɛ ĩ ndomu ko, ta adu na lo ti kpongɔ bi ka tɛrɛ zo zingɔ ma, kanda adu na lo ti hũndangɔ Nzapa ya, lo kpo siɔ ye ka bɛ zo. Batisimɔ aso ĩ, na lo mɛ ya, Yezo Kristo aso ndo na pɛ kwa.

1 Petro 4:8

Ye mɛ aɔ aye zu la, ale ĩ yengbi sĩ nvɛni, ta sanga ma, se ĩ yengbi, wadila ĩ ka lɛ ĩ ndo asiɔ ye ma wo ma mɛ afɔ̃ ĩ ndoli tɛrɛ ĩ.

2 Petro 1:7

Na ndo dungɔ du mɛ ndode bɛ Nzapa ko, ĩ yengbi, nga ma se tɛ zo na nyita lo, na ndo yengbingɔ tɛ ĩ ko, ĩ ye nga azi zu.

1 Yoanɛ 3:10

Ĩ ba se mɛ andohĩnga na aya Nzapa, na aya Satana lo mɛ: zo ko la ta ndoli ye na seni, bere ndoye ayata lo awa Kristo ma ko, ta lo nyi Nzapa ma.

1 Yoanɛ 3:23

Ĩ ba ndia mɛ lo lu hɛ̃ e lo mɛ: ale e ye lo tɛ Nyi lo Yezo Kristo, ko e yengbi nga ma se mɛ ndo Kristo apa na ni hɛ̃ e.

1 Yoanɛ 3:3

Zo ko ndolɛndɛrɛ Kristo nga so ko, lo ndobata tɛrɛ lo ya, ni du bɛta zo, nga ma se ko Yezo nga bɛta zo.