1 Tɛsalɔnikɛ 4:4 - Fana Ngbangɔ 1987

⁴ Ale zo kɔi kɔi na popo tɛ ĩ adu na wali, ko lo ngbã ndoni kɔi na wali ni, nga ma se mɛ bɛ Nzapa ndode na lo ni, ko se azi ahũ ko, ahĩnga ya, dungbingɔ tɛ la adu nzɔ̃ni.

1 Tɛsalɔnikɛ 4:4 Iomraidhean Croise

Awa Pangɔ Kwa 9:15

La Gbia apa hɛ̃ Ananiasi ya: “Nɔ bo nɔngɔ, ta sanga ma, mbi sara zo olo, ko mbi na kpãngɔ lo ya, lo pa lo tɛ mbi hɛ̃ Ayuda, na azi ti sese mɛ ndɛ̃, nga na agbia tɛ la ya, ala hĩnga mbi.

Roma 1:24

Nda mɛ Nzapa azia azi ni ko ya, ala li siɔ ye na se siɔ gwɛ̃ ti bɛ la la. Na lo ni la ala ndoli ye ti kamɛnɛ tɛrɛ afɔ̃ la.

Roma 12:1

Aya bua, nga ma la Nzapa ama vundu tɛ e sĩ ko, mbi gbɔ̃ gɛrɛ ĩ ya, ĩ du bo azi tɛ Nzapa, ĩ ka tɛrɛ ĩ zu hɛ̃ lo, nga ma sa mɛ ahɛ̃ ya, aho alu na lo, kanda tɛ ĩ ko, ĩ ngbã le ĩ ngɛ̃. Se ĩ ka tɛrɛ ĩ hɛ̃ lo nga so, wa bɛ lo ade na lo ni. Ĩ ba se beta vɔrɔngɔ Nzapa mɛ ale ĩ ndovɔrɔ na lo la.

Roma 6:19

Mbi ndotɛnɛ tɛnɛ hɛ̃ ĩ, nga ma se mɛ azi ndotɛnɛ na tɛnɛ, na lo mɛ ya, kɔdɛ tɛ ĩ adu woni. Ndo uzu ko, ĩ hɛ̃ ndo tɛrɛ ĩ zu nga ma ambɛ ti lingɔ ye ti kamɛnɛ, nga so lingɔ siɔ ye, ko ĩ ndodu ndo yenge yenge. Ko se mɛ nga na olo, ale ĩ hɛ̃ tɛrɛ ĩ zu nga ma ambɛ ti lingɔ abɛta kwa ya, du tɛ ĩ adu nga bɛrɛni la.

1 Kɔrinto 6:15

Ĩ hĩnga ya, tɛrɛ ĩ adu apɛnzɛ tɛrɛ Yezo Kristo. Ko ta mbi lengbi bɛ fani kɔi ya, mbi mu tɛrɛ mbi mɛ adu pɛnzɛ tɛrɛ Yezo Kristo, ko mbi na wali mɛ ngbabo e li na siɔ ye ti kamɛnɛ ma!

1 Kɔrinto 7:2

Kanda na lo ti kpɛngɔ ya, ta zo ali siɔ ye ti kamɛnɛ ma ko, nzɔ̃ni ale kɔli kɔi kɔi adu na ya lo nvɛni da, ko wali kɔi kɔi adu nga na kɔ lo nvɛni da.

1 Kɔrinto 7:9

Wa se ala ha gbengɔ bɛ la na lo gwɛ̃ ti tɛrɛ la gba ko, ale ala du na kɔli bere na wali. Ta sanga ma, se zo adu na kɔli bere adu na wali ko, adu nzɔ̃ni aɔ omɛ lo ngbã mɔdo, ko lo ngbã na kota gwɛ̃ kɔli bere gwɛ̃ wali.

2 Kɔrinto 4:7

Nzɔ̃ lo ni ko adu nga ma ngbondo nwa mɛ Nzapa ahɛ̃ e, ko e azi mɛ e lua ngbondo nwa ni, e du nga ma ta mɛ asɔ̃ na kpondo. Adu so, so fangɔ na azi ya, kota nguru mɛ e na ni ti lingɔ na kwa tɛ Nzapa ko, ta nguru ni alo ge tɛ e ma, kanda alo ka tɛ Nzapa.

Filipɛ 4:8

Aya bua, mbi ye kɔngɔ nda tɛnɛ tɛ mbi so mɛ: ĩ da bɛ ĩ na anzɔ̃ ye mɛ azi alengbi ti gondangɔ ni. Anzɔ̃ ye ni lo mɛ: abɛta ye zu mɛ e ndotɔndɔ, aye mɛ mbiri mbiri, aye mɛ vuruni, aye mɛ bɛ azi ndode na lo ni, nga na aye ti ndima.

Aebreo 13:4

Ale azi zu ndotɔndɔ tɛnɛ mɛ Nzapa atɛnɛ na lo ti dungbingɔ tɛ kɔli na wali. Ale ta kɔli mɛ ya lo da, bere wali mɛ kɔ lo da, ati kɔmbɛ ma. Nzapa afa gbanda ngbanga tɛ azi mɛ ndoli siɔ ye ti kamɛnɛ. Lo fa nga gbanda ngbanga tɛ awa tingɔ kɔmbɛ.

1 Petro 3:7

Ĩ akɔli mɛ ĩ du na wali, ale ĩ du na awe ĩ nzɔ̃ni, na lo mɛ ya, ĩ hĩnga ya, ala du azi mɛ woni. Ĩ tɔndɔ la, ta sanga ma, bɛta du mɛ gbanda Nzapa ahɛ̃ ĩ ko, lo hɛ̃ nga gbanda hɛ̃ la. Ale ĩ li nga so, wadila ta ye kɔi agbanzi sambela tɛ ĩ ma.