1 Tɛsalɔnikɛ 2:4 - Fana Ngbangɔ 1987

⁴ Kanda ngoi zu ko, e ndopa ndo tɛnɛ nga ma se mɛ bɛ Nzapa aye. Ta sanga ma, lo hũ ya e abɛta azi, la lo zia Nzɔ̃ Pa tɛ lo na yamba ti e ya, e pa ni. E tɛnɛ ndo tɛnɛ so dengɔ na bɛ Nzapa mɛ ahĩnga dangɔ bɛ tɛ e, kanda ta e tɛnɛ ndo ni so dengɔ na be azi ma.

1 Tɛsalɔnikɛ 2:4 Iomraidhean Croise

Luka 12:42

Gbia Yezo agbinya ya: “Nzɔ̃ wa kwa mɛ lo nga wa kɔdɛ adu na? Adu wa kwa ko la gbia tɛ lo na ziangɔ lo ya, lo bata da, ko lo hɛ̃ nga tɛ hɛ̃ awa kwa mɛ ndɛ̃ na ngoi mɛ alengbi.

Luka 16:11

Se ta ĩ li nwa ti lɛ sese na seni ma ko, ta zo ahɛ̃ ĩ gbanda bɛta nwa ya ĩ bata ma.

Yoanɛ 21:17

So pɛni, Yezo ahũnda lo ti fani ta ya: “Simɔ nyi Yoanɛ, mɔ ye mbi?” Petro ĩ hũ ya, Yezo ahũnda ni ti fani ta ya: “Mɔ ye mbi?” ko, vundu agbɔ̃ lo, ko lo gbinya hɛ̃ lo ya: “Gbia, mɔ hĩnga ye zu, mɔ hĩnga ya mbi ye mɔ!” Yezo apa hɛ̃ lo ya: “Bata azi tɛ mbi nzɔ̃ni!

Roma 8:27

Ko Nzapa ndohĩnga lo mɛ ka ya bɛ azi. Lo ndohĩnga nga lo mɛ Tɔrɔ Santo aye, ta sanga ma, Tɔrɔ Santo ndosambela Nzapa na lo tɛ azi tɛ Nzapa, nga ma se mɛ Nzapa aye na ni.

1 Kɔrinto 7:25

Na olo ko, mbi na gbinyangɔ tɛnɛ ko ndo ĩ hũnda na mbi na lo tɛ amɔdo. Tɛnɛ mɛ mbi na gbinyangɔ hɛ̃ ĩ ko, ta adu Nzapa la ahɛ̃ nyɔ ni ko ma, kanda adu dangɔ bɛ tɛ mbi nvɛni. Ko ale ĩ ye lo dangɔ bɛ ni, ta sanga ma, mbi du zo mɛ ĩ lengbi ti kpãngɔ bɛ ĩ ndo mbi, na lo mɛ ya, Gbia Yezo ama vundu tɛ mbi.

1 Kɔrinto 9:17

Se adu ya, mbi nvɛni ndo la mbi ye lingɔ kwa olo ko, ale mbi ndokpã bɛ mbi na ndo luangɔ faranga. Kanda nga ma la Nzapa ahɛ̃ mbi nyɔ ya, mbi li kwa ni ko, ale mbi li bo kwa ni.

2 Kɔrinto 2:17

Ambanga azi ma ya ma amu tɛnɛ tɛ Nzapa ndode na buze so luangɔ na faranga, ko ta e tɛ e nga ma la ma. Kanda e du awa pangɔ kwa tɛ Yezo Kristo, Nzapa la ato e, e ndopa nga tɛnɛ tɛ lo na bɛ e kɔi, ko lo ndohũ e.

2 Kɔrinto 4:2

Na ya kwa mɛ e ndoli ko, e kɛ̃ lingɔ aye ti kamɛnɛ nga na aye ti gbe mbingo. Ta e ndoli ye na poroso ma, ta e ndogbinya tɛnɛ tɛ Nzapa ati ndɛ̃ ma. Kanda e ndopa bɛta tɛnɛ tɛ Nzapa yango, ko lo ndohũ e. E ndoli so ya, azi zu ahĩnga ya, e abɛta azi.

2 Kɔrinto 5:11

Na lo ni ko, e hĩnga nda mɛ e ndokpɛ Gbia Yezo, ko e ndogi kɔdɛ ya, e pa hɛ̃ azi ya, ala ye lo tɛ lo. Nzapa ahĩnga e nzɔ̃ni sĩ, ko mbi da bɛ mbi ya, ka ya bɛ ĩ nvɛni ko, ĩ hĩnga nga e nzɔ̃ni.

2 Kɔrinto 5:16

Na lo ni, ato na olo ko, ta e ti ndohĩnga zo na lege ti sé du tɛ lo mɛ e ndohũ na lɛ e ma. Ndo uzu ko, se mɛ ndo e ndohũ na Kristo la, kanda na olo ko, ta se mɛ e ndohũ na lo la ma.

Galatia 1:10

Oko afa ya, mbi ndogi ya, azi agonda mbi? Ipɔ, mbi ndosepara tɛ mbi ya, adu bo Nzapa wa agonda mbi. Ko mbi ndogi nga kɔdɛ ya, mbi li ye mɛ ndode bɛ azi? Ipɔ. Se adu ya, mbi ti ndogi kɔdɛ ya, mbi li ye mɛ ndode bɛ azi ko, ale ta mbi du wa kwa tɛ Yezo Kristo ma.

Galatia 2:7

Kanda ala hũ ya, se ko la Nzapa ahɛ̃ Petro kwa ya, lo pa Nzɔ̃ Pa hɛ̃ Ayuda ko, se mɛ nga Nzapa ahɛ̃ mbi kwa ya, mbi pa Nzɔ̃ Pa hɛ̃ azi mɛ ta Ayuda ma la.

Efɛzɛ 3:8

Mbi ndangba tɛ azi tɛ Nzapa zu. Bɛ se mbi du ndangba tɛ la zu ko, lo hɛ̃ mbi lege ya, tɛnɛ ti ngbondo nwa mɛ alo ka yamba ti Yezo Kristo ko, mbi pa ni hɛ̃ azi mɛ ta Ayuda ma. Ko ta zo alengbi ti hĩngangɔ se mɛ nwa ni akɔnɔ na ni ma.

Efɛzɛ 6:6

Ta ĩ li kwa ni na bɛ ĩ kɔi bo na ngoi ko la lɛ la na tɛrɛ ĩ, ya bɛ la ade ma. Ĩ hĩnga ya, ĩ ambɛ tɛ Yezo Kristo, ko ye mɛ bɛ Nzapa aye ko, ĩ li na bɛ ĩ kɔi.

Kɔlɔsɛ 3:22

Ĩ ambɛ, na ya alo zu ko, ale ĩ ma nyɔ ato gbia ĩ mɛ ge lɛ sese. Ta ĩ ma nyɔ la so dengɔ na bɛ la bo na ngoi mɛ lɛ la tɛrɛ ĩ ma, kanda ale ĩ ma nyɔ la na bɛ ĩ kɔi, na lo ti kpɛngɔ mɛ ĩ ndokpe na Gbia.

1 Timɔte 6:20

Ee Timɔte, ló mɛ Nzapa azia na yamba ti mɔ ko, bata ni nzɔ̃ni. Gɛgɛrɛ tɛnɛ, na tɛnɛ mɛ ta ndode bɛ Nzapa ma ko, ta mɔ dɔ nyɔ mɔ ya ni ma. Ta mɔ dɔ nga nyɔ mɔ na ya lo ti nvɛnɛ mɛ azi ndoha ma. Ala ndoili lo ni ko ya, adu hĩngangɔ ndo. Kanda ta adu bɛta hĩngangɔ ndo ma.

2 Timɔte 1:14

Nzɔ̃ Pa mɛ ndo Nzapa azia na yamba ti mɔ ko, bata ni na nguru tɛ Tɔrɔ Santo ko la na ya tɛrɛ e na mɔ.

2 Timɔte 2:2

Tɛnɛ mɛ ndo mbi tɛnɛ hɛ̃ azi ma wo ma, ala aye lo ni ko, mu bo tɛnɛ ni ko, mɔ ha na abɛta azi mɛ ala lengbi ti hangɔ na azi mɛ ndɛ̃.

Tito 1:3

Ko ngoi mɛ ndo bi mɛ lo ko ĩ lengbi ko, lo fa e na lege ti luangɔ du ti kaka ni na ya tɛnɛ tɛ lo mɛ lo zia na yamba ti mbi, ya mbi pa hɛ̃ azi. Ko adu nyɔ mɛ Nzapa mɛ Wa songɔ e ahɛ̃ mbi la.

Aebreo 4:13

Ta ye kɔi mɛ zo alengbi ti hɔndɛngɔ na Nzapa da ma. Aye zu mɛ Nzapa ali ndosi ka lɛ lo yango ngbɛ̃. Ko e kambisa gbanda hɛ̃ lo aye zu mɛ e ndoli.

1 Petro 4:11

Ale zo ko la na nguru kwa ti pangɔ tɛnɛ tɛ Nzapa, apa bo tɛnɛ ni hɛ̃ azi. Ale zo ko la na nguru ti lingɔ kwa hɛ̃ azi, ali kwa na nguru mɛ Nzapa ahɛ̃ lo. Ĩ li nga so, wadila na ya lo zu ko, azi agonda Nzapa ti ndo Yezo Kristo. Ndima na nguru adu na lo tɛ lo buru na buru. Seni la.

Suma 2:23

So pɛni ko, ni kpɔ aya lo, wa se mɛ awa Eklezia ahĩnga ya, ni du zo mɛ ni hĩnga dangɔ bɛ tɛ azi, ni hĩnga nga ye mɛ ala na gwɛ̃ ni la. Ni futa gbanda zo kɔi kɔi na se kwa mɛ lo li.