1 Tɛsalɔnikɛ 2:2 - Fana Ngbangɔ 1987

² Ĩ hĩnga ya, uzu ti e singɔ ka tɛ ĩ ko, aguru ndo e, agia ndo nga e ka kɔdɔrɔ ti Filipɛ. Abɛ ambanga azi akɛ̃ ndo e ka ka ka ko, Nzapa ahɛ̃ ndo e nguru ya, e pa Nzɔ̃ Pa tɛ ni hɛ̃ ĩ.

1 Tɛsalɔnikɛ 2:2 Iomraidhean Croise

Awa Pangɔ Kwa 14:3

Polo na Barnabasi ala ndo so Ikɔniɔmɛ bi gba. Ala ndopa ndo tɛnɛ tɛ Gbia Yezo na kpengba bɛ, ko ala ndokpã ndo nga bɛ la ndo lo sĩ. Gbia Yezo afa ndo na azi ya, tɛnɛ mɛ Polo na Barnabasi ndotɛnɛ na lo ti nzɔ̃ bɛ tɛ ni ko, adu biani. Lo fa ndo ni na ngoi mɛ lo hɛ̃ la nguru, la ala li na akukuna ye, nga na aye ti kpɛnɛ.

Awa Pangɔ Kwa 14:5

Ayuda na azi mɛ ta Ayuda ma, nga na agbia tɛ la alɛkɛ ndo tɛrɛ la ya, ani sɔ Polo na Barnabasi, ani boroka la na tɛ́nɛ, ko ani ho la.

Awa Pangɔ Kwa 16:12

E ti e lo so ndo ko, e gwe ka kɔdɔrɔ mɛ ili ni la Filipɛ. Ko e la so ndo ko bi gba. Adu kɔdɔrɔ mɛ ndo na gbe ti awa Roma. Kɔdɔrɔ ni ndo kota kɔdɔrɔ kɔi ka sese ti Masedoanɛ.

Awa Pangɔ Kwa 16:19

Ato gbia lo ĩ hũ ya, siɔ tɔrɔ alo ka ya tɛrɛ lo asi wɛ, ko ta se mɛ ya, ani ti lua na faranga da ma ko, ala gbɔ̃nɔ Polo na Silasi, agiɔ la, agwe na ni ka bɛ kɔdɔrɔ, ka gbɛlɛ awa Roma mɛ agbia ti kɔdɔrɔ ni.

Awa Pangɔ Kwa 16:37

La Polo apa hɛ̃ lo ya: “E awa Roma. Ta ala dɛ ndo afa ngbanga tɛ e ma, ko ala hɛ̃ nyɔ, asɔ̃ e na gbɛlɛ azi zu. So pɛni, ala sa e bɔlɔkɔ. Ko na olo mɛ ko, ala ti ye ya, asi na e na gbɛ mbingo? Ipɔ, oko ta alengbi ma! Ale ala nvɛni aga azi e!”

Awa Pangɔ Kwa 17:1

Ala lo ka kɔdɔrɔ ti Filipɛ, aɔ ti lɛ sese mɛ ili ni la Amfipolisi, na ti lɛ sese mɛ ili ni la Apolonia, la ala si ka Tɛsalɔnikɛ, kɔdɔrɔ mɛ ndo Ayuda awa na da sambela tɛ la da.

Awa Pangɔ Kwa 17:17

Polo na Ayuda, nga na azi mɛ ta Ayuda ma ndo la ndovɔrɔ Nzapa, ndobimbi nga tɛnɛ ka ya da sambela. Ko lá kwɛ lá kwɛ ko, lo na azi mɛ ndo lo ndotã la na be kɔdɔrɔ ndobimbi nga tɛnɛ.

Awa Pangɔ Kwa 19:8

Polo ali ndo kai nzɛ̃ ta, lo ndonɔ ndo ka ya da sambela, ko lo ndotɛnɛ ndo tɛnɛ hɛ̃ azi na kpengba bɛ. Lo ndopa ndo lo ti lo Lɛngɔ Gbia tɛ Nzapa. Lo ndogi ndo kɔdɛ ya, ni wa azi mɛ ndoma ni, wa ala ye lo tɛ Yezo.

Awa Pangɔ Kwa 4:13

Awa fangɔ ngbanga ĩ hũ kpengba be tɛ Petro na Yoanɛ ko, ala bema sĩ, ala hĩnga ndo ya, Petro na Yoanɛ adu agɛgɛrɛ azi, azi mɛ ta amanda mbɛti gba ma. Ko ala hĩnga nga ya, Petro na Yoanɛ na Yezo ndoɔ ndo ndoni kɔi.

Awa Pangɔ Kwa 4:20

Kanda ye mɛ e hũ na lɛ e, nga na tɛnɛ mɛ e ma na ma e ko, ta e lengbi ti ziangɔ pangɔ tɛnɛ ni ma.”

Awa Pangɔ Kwa 4:31

Ngoi mɛ sambela tɛ la ĩ we ko, ndo mɛ ala bombi tɛrɛ la da ayingi kpu kpu kpu! Tɔrɔ Santo asa nguru tɛrɛ la zu, la ala to nda pangɔ tɛnɛ tɛ Nzapa na kpengba bɛ.

Awa Pangɔ Kwa 5:41

Awa pangɔ kwa tɛ Yezo azia awa fangɔ ngbanga agwe na dengɔ bɛ, ta sanga ma, Nzapa aye ndo ya, ale ali la siɔni na lo tɛ Yezo.

Roma 1:1

Mbi Polo, wa kwa tɛ Yezo Kristo la mbi to mbɛti olo hɛ̃ ĩ awa Kristo ti Roma. Nzapa aili mbi ya, mbi du wa pangɔ kwa tɛ ni, lo sara nga mbi lo kpa ya, mbi pa Nzɔ̃ Pa tɛ ni hɛ̃ azi.

2 Kɔrinto 3:12

E ndotɛnɛ tɛnɛ na kpengba bɛ, na lo mɛ ya, e ndokpã bɛ e na ndo alo ni.

Kɔlɔsɛ 2:1

Ĩ awa Kristo ti Kɔlɔsɛ, na ĩ azi ti kɔdɔrɔ ti Laodisea, nga na ĩ azi zu mɛ ta ĩ dɛ ĩ hĩnga mbi ma ko, mbi ye ya ale ĩ zu ĩ hĩnga ya, kwa mɛ mbi ndoli na lo tɛ ĩ ko, adu kpengbani nvɛni.

1 Tɛsalɔnikɛ 1:5

Ta sanga ma, ta e pa ndo Nzɔ̃ Pa hɛ̃ ĩ bo na nyɔ e gɛgɛrɛ ma, kanda e pa ndo nga ni na nguru tɛ Tɔrɔ Santo. E hĩnga ndo nzɔ̃ni ya, Nzɔ̃ Pa mɛ ndo e pa ko, adu bɛtani buai. Ngoi mɛ ndo e dɛ ka popo tɛ ĩ ko, ĩ hĩnga ndo se du tɛ e, ko e ndoli ndo so ya, e za ĩ.

2 Timɔte 1:12

Ko na lo ni la mbi ndohũ apenɔ olo mɛ. Kanda mbi ndodu bo na kpengba bɛ, ta sanga ma, mbi hĩnga zo mɛ mbi ndokpã bɛ mbi ndo lo. Mbi hĩnga nga nzɔ̃ni ya, lo na nguru ti batangɔ Nzɔ̃ Pa mɛ ndo lo zia na ti mbi, ngbĩi nga ka ngoi mɛ gbanda lá ti fangɔ ngbanga alengbi.

Yudɛ 1:3

Aya bua, mbi ndoli ndo kpengbani ya, mbi su hɛ̃ ĩ mbɛti, na lo ti songɔ mɛ Nzapa aso na mbi, aso nga na ĩ. Ko ngoi mɛ mbi ndoda bɛ mbi nga so ko, mbi hũ ya, nzɔ̃ni ale mbi su hɛ̃ ĩ mbɛti, mbi sa nguru bɛ ĩ, wa ĩ li kpengbani, ĩ bata tɛnɛ tɛ Nzapa mɛ ndo ĩ ye lo ni. Adu tɛnɛ mɛ ndo lo hɛ̃ azi tɛ lo fani kɔi ti buai.