Tɔlɔ Mɔ 5:7 - WE NU GALE 1995

⁷ Nɛ ma wia na, a gbala 'dã mɛ a dɛa ni, nɛ a gese mɛ a 'danga ni hã wele nɛ, nɛ a e kpo mbee mɔlɔ gole mɛ ni ngɔ nɛ.

Tɔlɔ Mɔ 5:7 Iomraidhean Croise

Zumanɔ 32:5

Mi zɔa ni, nɛ mi ùsù 'bɔ 'dã mɛ 'da mi gɔ, nɛ mi gbala ma vɛ̃ hã mɔ nwa, nɛ mɔ fua ku'da nɛ zu mi.

GBA WENƆ 28:13

Mɔ usu 'dã mɛnɔ 'da mɔ, nɛ tonɔ 'da mɔ ma lá sɛ do dia nɛ gɔ. Nɛ nde mɔ gbala ma dɛ nza, kɔ mɔ la fala nɛ, nɛ Gale a ĩ sɛ 'bako hã mɔ.

Levitɛnɔ 26:40

“Nɛ do ndɔti nɛ vɛ̃, nɛ tala wanɔ wa 'bana nza ni, wa gbala sɛ 'dã mɛnɔ 'da wa, do kɛ 'da oyaa wa, kɛ wa bɛ̃a zi we nu mi, nɛ wa dɛa nga zu hã mi ni.

Levitɛnɔ 26:41

Wa ĩ sɛ na, mi bɛ̃a gɛnɛ wa, nɛ mi tombo wa kɔlɔ 'duli dɛ ngɔ nùi 'da owi sɛnɛ wa. Wa ba sɛ tɛ wa dɛ nù, nɛ wa kɔ̃ sɛ gɛnɛ etumbu olo 'dã mɛnɔ 'da wa.

Levitɛnɔ 5:15

“Fala kɛ wele zɔlɔ tɛ do dɔnggamɛ kɛ ma wia ni hã NWA, kɔ gɛnɛ kɔ a dɛ̃ do mbana gɔ, nɛ nde a dɛa 'dã mɔ dɛ 'da NWA. Nɛ ma wia na, a tɛ do wili bata, tabi wili dua kɛ fo kunda tɛ̃ a bina ni hã NWA. A tɛ sɛ nɛ, we si olo ku'da 'dã mɛ zu a. Wa we sɛ gole sa'de ni do 'da mɔ we do mbili kɔ tɔa Tande. Nɛ sa'de ni sɛ we hã do dɔnggamɔ si olo ku'da 'dã mɔ.

Levitɛnɔ 5:16

Nɛ ma wia na, wi ni futa olo mɛnɔ 'da NWA kɛ ma 'bana kɔ̃ a i ni, nɛ a e kpo mbee mɔlɔ gole mɛ ni ngɔ nɛ. Nɛ a hã ma vɛ̃ hã nganga. 'Do nɛ, nɛ nganga a gbɛ sɛ sa'de ni, we dɔnggɔ do NWA. Nganga a dɛ sɛ na mɛ ni, nɛ dɔnggamɛ ni ma dɛ sɛ na, Gale fo ku'da 'dã mɛ zu wi ni.

Levitɛnɔ 5:5

“Fala kɛ wele te do mbe kpo kɔ ngbangganɔ gɛ, nɛ ma wia na, a gbala 'dã mɛ ni,

Levitɛnɔ 7:7

Mbulanɔ gɛ ma 'bɔ kpasaa we duzu dɔnggamɔ fo ku'da 'dã mɔ. Nɛ nganga kɛ a dɔ sa'de we si olo ku'da 'dã mɛ ni, a wia sɛ we nyɔngɔ tala sa'de ni.

Tɔlɔ Mɔ 5:8

Fala kɛ wele mɛ ni fe do'do, kɔ fo wi na mɔ́ a na, wa futa olo nɛ hã a ni bina nde, nɛ wa hã sɛ ma hã NWA, nɛ ma wia tɛ gala onganganɔ. Nɛ wi dɛ 'dã mɛ a hã sɛ 'bɔ wili ngɔmbɔ, nɛ nganga gbɛ ma hã NWA, we si olo ku'da 'dã mɛ zu wi ni.

LUKA 19:8

Wa hɔa i mɔ ni, nɛ Zakayo kulu ngɔ, nɛ a tɔ̃ hã Nwa Yezu na: “Aa Nwa, mi kɔ̃a we gɔnɔ sanga kpamɛnɔ 'da mi dɛ gbogbo, nɛ mi hã mbee nɛ hã Owi sãnɔ. Kɔ fala kɛ mi ɔlɔ zi wele, kɔ mi kala mbili kɔ̃ a nde, nɛ mi gese sɛ olo nɛ hã a fala nalɛ.”

Yozue 7:19

Nɛ Yozue tɔ̃ hã Akanɛ na: “Be 'daa, ma wia na mɔ dɛ kili NWA Gale 'da lɛ obe Israɛlɛ. Mɔ tɛ kàfà gɔ, kɔ mɔ tɔ̃ kɛ vɛ̃ mɔ dɛa ni. Mɔ tɛ ùsù mɔ kpo gɔ.”