EFƐZƐ 1:11 - WE NU GALE 1995

¹¹ Nɛ́ kɛ lɛ mba kpo do Kristo ni, Gale ia lɛ do owinɔ 'da a. A dɛa ni, we kɛ a 'bili zɛ́ do kɔ sila a belee we dɛ ma, nɛ a dɛ mɛnɔ vɛ́ nɛ́ kɛ a kɔ̃a ni.

EFƐZƐ 1:11 Iomraidhean Croise

YƆBƆ 12:13

Nɛ nde hã zã do ĩ ti mɔ, wi a Gale, nɛ a do ngawi do hã zã we dɛ mɛnɔ.

YƆBƆ 33:29

Na mɛ ni, Gale kpasa Owele fala dɛlɛ wena, ɔ nɛ kɛ ma wia li a ni.

Zumanɔ 37:18

NWA zɔ mɔ tɛ Owi dɛ de mɛnɔ, nɛ nùi kɛ a hã ma hã wa ni, ma 'bana sɛ do mɔ́ wa fai.

GBA WENƆ 8:14

Toe 'da mi a mbo wele, do be dia wala hã owinɔ. Mi be hã wele na a ĩ ti mɔ, nɛ a kpa ngawi we dɛ ma.

Ezai 25:1

Aa NWA, mɔ a Gale 'da mi. E kɔ mi dɔnggɔ mɔ, nɛ mi tɔ̃ de sako li mɔ, we ɔngbamɛnɔ vɛ̃ kɛ mɔ dɛa ni. Zi dati belee, mɔ lingga zi we dɛ de mɛnɔ ni, nɛ mɔ dɛa ma ɔ nɛ kɛ mɔ lingga ni.

Ezai 28:29

Wi bia hã zã dɛ na mɛ ni, wi 'bɔ a NWA ngɔ mɔ nyanga nza vɛ̃. Nɛ mɛnɔ kɛ a 'dafa ma, nɛ ma dɛ tɛ̃ ɛ ni, ma de wena, nɛ ma be hã lɛ na, hã zã 'da a ma gã wena.

Ezai 5:19

Wa tɔ̃ na: “NWA wɛ́lɛ́ tɛ̃ a wɛla, hã a dɛ mɛnɔ kɛ a kɔ̃a we dɛ ma ni, hã lɛ zɔ. Lɛ kɔ̃a na, mɛ kɛ Gale santo 'da obe Israɛlɛ 'dafa ni, ma dɛ tɛ̃ ɛ, hã lɛ ĩ ti nɛ.”

Yeremi 23:18

“'Da fala kɛ mi mba zi li Owi olo li mi, nɛ mi 'dafa mɛnɔ mi dɛ sɛ ni, nɛ nde fo zi wele kpo kɔ Owi gba olo nu mi bina. Mi wèlè mbe we hã wele kpo kɔ wa ni gɔ. Nɛ wele kpo gɛ̃ zala ɛ we zele gulu nɛ gɔ.”

Yeremi 32:19

Mɔ do osaka linggamɔ wena, nɛ mɔ e ma fala dɛa to do kɔ̃a zã 'da mɔ. Mɔ soko mɛnɔ owinɔ wa dɛ ni do sɔ̃a li; nɛ mɔ si olo dɛa mɔ tɛ wele do wele hã a.

ZAKARIA 6:13

Do gbãlã we, a sɛ a a nɛ dɛ tɔa Tɛmpɛloe dɛ olo nɛ. A he'de sɛ tulu nwa, nɛ a dungu ngɔ kpongbo nwa, nɛ a sɛ a nwa ngɔ owinɔ. Nɛ nganga kpo a yolo sɛ dɛ kɛ zã a. Nɛ sanga tɛ ngba wa bɔa ni ma lɔ sɛ wena.

Owi Nɛ Tonɔ 13:48

Kɔ owinɔ kɛ wa a Oyuda gɔ ni, wa nɛa we zele ni, nɛ wa dɛa yangga, nɛ wa dɔnggɔ we nu Gale. Nɛ owanɔ kɛ Gale saka wa na, we kpa kpasi kɛ ma é sɛ gɔ ni, wa kɔ̃a zi zu li Yezu.

Owi Nɛ Tonɔ 2:23

Nɛ nɛ 'dɔlɔ zi Yezu hã o'dã winɔ, nɛ wa bɛ̃lɛ̃ a ngɔ finda te, nɛ wa gbɛ a, ɔ nɛ kɛ Gale 'dafa zɛ́ na, ma dɛ sɛ tɛ̃ ɛ ni.

Owi Nɛ Tonɔ 20:27

We kɛ mi ùsù zi we do nɛ gɔ. Mi bia mɛnɔ kɛ Gale 'dafa we dɛ nɛ ni hã nɛ̃ vɛ.

Owi Nɛ Tonɔ 20:32

“Kɔ di dɔ̃ ni, mi la nɛ dɛ tambala kɔ̃ Gale. We nu a kɛ ma be dia zã 'da a ni, ma fɔmɔ sɛ nɛ. We kɛ a wia we hã ngawi hã nɛ, nɛ a wia 'bɔ we hã dia mɛnɔ kɛ a usu we winɔ 'da a ni hã nɛ.

Owi Nɛ Tonɔ 26:18

Mi tombo mɔ, takɔ mɔ hũi li winɔ na, wa hɔ nza kɔ tũ fala, kɔ wa le kɔ sa fala. Mɔ fo sɛ winɔ kɔ ngawi 'da Satana, nɛ mɔ kã wa dɛ 'da Gale, nɛ wa kɔ̃ zu li mi Yezu. Nɛ Gale a fo sɛ ku'da 'dã mɛnɔ zu wa, nɛ a a wa sanga owinɔ 'da a.’

Owi Nɛ Tonɔ 4:28

Na mɛ ni, wa dɛa vɛ̃ a kɛ mɔ 'dafa zɛ́ do kɔ sila mɔ, do ngawi 'da mɔ ia ni.

ROMA 11:34

Ma ɔ nɛ kɛ wa kɔma kɔ 'Buki 'da Gale na: “Wi ĩ ti linggamɛ 'da Nwa Gale a wio nde? Wi wia tɛ tɔ̃ mbula hã a wi a wio nde?

ROMA 8:17

Hã fala kɛ lɛ a benɔ 'da Gale, nɛ lɛ kpa sɛ 'bɔ dia mɛnɔ kɛ a usu ma hã obenɔ 'da a ni. Lɛ kpa sɛ ma fala nɛ kpo do Kristo. Mba gɔ, fala kɛ lɛ kpa zɛlɛ tɛ fala nɛ kpo do Kristo, nɛ lɛ sɛ tɛ mɛ 'bɔ do a kpo kɔ dɔ̃lɔ̃ fi 'da a.

ROMA 8:28

Lɛ ĩ na, Gale dɛ na, omɛnɔ vɛ ma sɔkpɔ do dia nɛ we owinɔ kɛ wa kɔ̃a gɛnɛ a, nɛ a saka wa ɔ nɛ kɛ a 'dafa zɛ́ do kɔ sila a ni.

ROMA 8:29

Mba gɔ, a ĩ ti wa zɛ́ belee, nɛ a saka zɛ́ wa na, wa we kɔ̃ do Be 'da a Kristo, nɛ Be 'da a ni, a ɔ kuti be sanga ogba dɛlɛ nya a.

ROMA 8:30

Nɛ winɔ kɛ Gale saka zɛ́ wa ni, a sa zi 'bɔ mɔ hã wa na, wa hɔ owinɔ 'da a. Nɛ owinɔ kɛ a sa mɔ hã wa ni, a dɛ na, wa hɔ Owi bɔlɔ zu fi a, nɛ owinɔ kɛ a dɛa na, wa hɔ wi bɔlɔ zu ni, a hã 'bɔ dɔ̃lɔ̃ fi hã wa.

ROMA 9:11

Nɛ gɛnɛ kɔ benɔ bɔa ni wa 'bana zi dɛ kɔ zã naa wa i, nɛ nde Gale saka zɛ́ mbe sanga wa bɔa ni ia. Nɛ dati kɛ Rebɛka tɛ kò wa, kɔ wa ĩ ti dia mɔ do 'dã mɔ gɔ ni, nɛ nde Gale tɔ̃a zɛ́ hã Rebɛka na: “Kuti be a dɛ sɛ to hã be 'do.” Kɔ Gale dɛa zɛ́ na mɛ ni we be na, a saka winɔ 'da a ɔ nɛ kɛ zã a kɔ̃a ni, nɛ nde mɛ a we duzu dɛa mɔ tɛ wi kɛ a saka a ni gɔ.

GALATI 3:18

Ɔ do kɛ Gale hã sɔ de mɔ hã Owele, we kɛ wa dɛ mbula, nɛ nde wa kpá sɔ ma we duzu mbuli kɛ a kpua zɛ́ ma ni gɔ. Nɛ nde nɛ ĩ́ na, Gale bia zɛ́ dia zã 'da a hã Abrahama do wala 'da mbuli ni.

EFƐZƐ 1:14

Gale hã Hi Wi Santo hã lɛ ɔ nɛ mbe nu dia mɛnɔ kɛ a kpua zɛ́ mbulu hã ma hã winɔ 'da a ni. Kɛ a dɛa ni ma be hã lɛ na, ngba soe nɛ we, nɛ lɛ kpasa sɛ, nɛ lɛ hɔ sɛ owinɔ 'da a ngboo. Kɔ lɛ dɔ́nggɔ́ Gale we gã dia zã 'da a.

EFƐZƐ 1:18

Mi aka 'bɔ Gale na, a hũi hã zã 'da nɛ, takɔ nɛ ĩ ti de mɛ kɛ a sa zi mɔ hã nɛ we nɛ, nɛ nɛ gbini zã nɛ do ma ni. Nɛ nɛ ĩ 'bɔ ti gã kpamɛnɔ kɛ a kpua mbulu nɛ hã owinɔ 'da a ni.

EFƐZƐ 1:5

Gale kɔ̃a gɛnɛ lɛ, ma kɛ a 'bili zɛ́ do kɔ sila a belee na, lɛ sɛ a benɔ 'da a do wala 'da Yezu Kristo. A dɛa zi na mɛ ni do kɔ̃a zã 'da a.

EFƐZƐ 1:8

ma gã la li ngele. A hã gã hã zã do ĩ ti mɔ hã lɛ,

EFƐZƐ 1:9

nɛ a bia usu mɛnɔ kɛ a 'dafa ni hã lɛ na, lɛ ĩ ti nɛ. A 'dafa zɛ́ belee na, a dɛ sɛ linggamɛ 'da a do wala 'da Kristo.

EFƐZƐ 3:11

Gale 'dafa zɛ́ linggamɛ ni belee dati a ndo nyanga dɛ mɛnɔ, nɛ a dɛa ma do wala 'da Yezu Kristo, Nwa 'da lɛ.

Mbulanɔ 4:20

Nɛ nde kɛ 'da nɛ, nɛ a owinɔ 'da a. A nɛa zi ngɔ nù Ezipeto i, nɛ a fo nɛ kɔ ngamɛnɔ kɛ ma bɛlɛ zi nɛ ɔ nɛ we ni. A fua nɛ ni na, nɛ hɔ owinɔ 'da a, ɔ nɛ kɛ nɛ do ma sɔɛ gɛ ni.

KƆLƆSƐ 1:12

Nɛ dɛ́ yangga, nɛ nɛ hã iɔ̃nae hã Baa lɛ Gale, we duzu kɛ a 'dafa nɛ na, nɛ we wi kpa de mɛnɔ kɛ a a ma kɔ sa fala 'da a ngɔ i, we 'bɔ do 'da winɔ 'da a ni.

KƆLƆSƐ 3:24

Nɛ nɛ ĩ́ na, Nwa Yezu a hã sɛ si olo nɛ, kɛ a 'dafa we owinɔ 'da a ni hã nɛ. Mba gɔ, Nwa kɛ nɛ dɛ toe hã a ni, wi a Kristo.

TITO 2:14

A hã zi kili tɛ̃ a we duzu lɛ, takɔ a gɔnɔ zu lɛ kɔ 'dã mɛnɔ vɛ̃. Nɛ a fɔlɔ 'bɔ ndi kɔ sila lɛ do'do na, lɛ ɔ winɔ 'da a ngboo, nɛ lɛ hã tɛ lɛ we dɛ de mɔ.

TITO 3:7

Na mɛ ni, a dɛa na, lɛ hɔ wi bɔlɔ zu li a we duzu dia zã 'da a, nɛ lɛ kpa kpasi kɛ ma é sɛ gɔ, kɛ lɛ a sila lɛ ngɔ nɛ ni.

OHEBRE 6:17

Na mɛ ni, 'da fala kɛ Gale kpua zi do mbuli 'da a ni, nɛ a zungga zi tɛ̃ a zungga we be hã winɔ kɛ wa nɛ kpa sɛ mɔ olo mbuli ni dɛ wila fala na, a kpóló sɛ linggamɛ 'da a ngɔ ma gɔ.

ZAKE 2:5

Aa onyae ngɔ sila mi gɛ, nɛ zélé mi sɛ: Gale saka owinɔ kɛ wa zɔ wa nɛ́ Owi sã ngɔ nù gɛ ni na, wa hɔ Owi kɔ̃a we, nɛ kɔ̃a we ni a kpamɛ 'da wa, nɛ wa le sɛ kɔ le nwa 'da a, kɛ a kpua zɛ́ mbulu nɛ hã owinɔ wa kɔ̃a gɛnɛ a ni.

1 PETRO 1:4

Nɛ lɛ gbini zã lɛ do Gale na, a hã sɛ 'bɔ dia mɛ kɛ a usu ma ngɔ i we duzu winɔ 'da a ni hã lɛ. Mɛ a dia mɛ kɛ ma wè tɛ mbulu nɛ gɔ, nɛ ma bá ndi gɔ, nɛ ma 'dángá sɛ 'bɔ gɔ ni.

1 PETRO 3:9

Wele dɛ 'dã mɔ dɛ 'da nɛ, nɛ nɛ tɛ gèsè 'dã mɔ do nɛ hã a gɔ. Tabi a dã nɛ nde, nɛ nɛ tɛ dã̀ a gɔ, nɛ nde nɛ wélé nu nɛ tɛ a. Mba gɔ, 'da fala kɛ Gale sa zi mɔ hã nɛ ni, nɛ a kpua zi mbulu na, ɛ wele sɛ nu ɛ tɛ nɛ.