1 SAMUƐLƐ 7:1 - WE NU GALE 1995

¹ Owi Kiriatɛ-Yearimɛ wa kpa toe ni, nɛ wa nɛa, nɛ wa ba Sanduku Gba Tɔkɛ. Nɛ wa si do nɛ dɛ kɔ tɔa 'da Abinadabɛ, kɛ ma zi tɛ ngɔ kala. Dɛ 'do nɛ, nɛ wa ia kɔ̃ wa zu Elazarɛ, be 'da Abinadabɛ na, a ɔ wi zɔ mɔ tɛ Sanduku Gba Tɔkɛ 'da NWA.

1 SAMUƐLƐ 7:1 Iomraidhean Croise

1 Sakonɔ 13:3

takɔ lɛ nɛ, hã lɛ ba Sanduku Gba Tɔkɛ 'da Gale 'da lɛ si do ma. Tua kɛ lɛ lènggè zi do ma do ngba soe dɛa to nwa 'da Saulo gɔ.”

Zumanɔ 132:6

Lɛ zila we Sanduku Gba Tɔkɛ tɛ Efrata, nɛ lɛ kpa ma dɔ̃ɔ do le Yarɛ.

Ezai 52:11

Aa nɛ, owinɔ kɛ nɛ ba tole mɛnɔ kɛ wa dɛ do to hã NWA kɔ Tɛmpɛlo 'da a ni, nɛ kúlú ngɔ kɔ le Babilɔnɛ hã nɛ si. Hã fala kɛ nɛ kulu ngɔ we si ma nde, nɛ nɛ tɛ 'bè tɛ mɔ kpo, kɛ mɛ a mɔ ndi li NWA Gale ni gɔ. Nɛ fá na, nɛ 'báná sa li a.

Yozue 18:14

Yolo dɛ ngɔ kala ni, tɛ si 'biti gɛ̃a wese, nɛ li ngbala yapa, nɛ ma la si ba gɔtɔ, we Sɔkpɔ tɛ Kiriatɛ-Bala, kɛ wa sa 'bɔ li nɛ na Kiriatɛ-Yearimɛ. Kiriatɛ-Yearimɛ zi a nùi 'da nu kpala Yuda. Tɛlɛ tɛ kɛ li ngbala si 'biti gɛ̃a wese la nɛ gɛ a ni.

Yozue 9:17

Wa zila ní, nɛ wa kulu ngɔ, nɛ wa le wala. Wa nɛa fai, nɛ ma hɔa tɛ kɔ̃ tũ kɛ talɛ, nɛ wa hɔ kɔ olenɔ 'da owinɔ ni. Li lenɔ ni ma kɛ: Gabaoni, Kɛfira, Bɛerɔtɛ, do Kiriatɛ-Yearimɛ.

1 SAMUƐLƐ 6:21

Wa tɔ̃a ni do'do, nɛ wa tombo Owele we tɔ̃ hã owinɔ tɛ kɔ le Kiriatɛ-Yearimɛ na: “Ofilisti wa gisa Sanduku Gba Tɔkɛ 'da NWA dɛ 'da lɛ gɛ. Kɔ nɛ tɛ́, nɛ bá ma, nɛ nɛ si do ma dɛ 'da nɛ i.”

1 SAMUƐLƐ 7:2

Olo kɛ wa ia Sanduku Gba Tɔkɛ 'da NWA tɛ kɔ le Kiriatɛ-Yearimɛ la sabɛlɛ dɔ wena. Ma zɔ́lɔ́ la mbe nɛ́ sabɛlɛ 'bu nɛ bɔa gɔ. Nɛ sila obe Israɛlɛ ma ngɔ tombo wa na, wa kpolo tɛ wa dɛ 'da NWA.