यर्मिया 15:2 - नेवाः बाइबल

² अले ‘जिपिं गन वनेगु?’ धकाः इमिसं छन्‍त न्‍यन धाःसा छं इमित थथे धा, ‘परमप्रभुं थथे धयादी- “‘सीगु लागि च्‍वयातःगु दुसा सीत वनेमा, तरवारं सीगु च्‍वयातःगु दुसा तरवारं सीत वनेमा अले अनिकालं सीगु च्‍वयातःगु दुसा अनिकालं सीत व ज्‍वनाः यंकिगु च्‍वयातःगु दुसा ज्‍वंकाः वनेमा।’”

यर्मिया 15:2 Iomraidhean Croise

यशैया 10:4

छिपिं कैदीत जुयाः लुफिं हानाः क्‍वःदइ वा सीपिनिगु दथुइ लानाच्‍वनी। अज्‍ज नं वय्‌कःया तं क्‍वलाःगु मदुनि, अले वय्‌कःया ल्‍हाः ल्‍ह्वनातःगु हे दनि।

यशैया 24:18

सु ग्‍यानाः बिस्‍युं वनी, व गालय् लाइ। सु गालं थाहां वइ व स्‍वःतिपाँय्‌लय् तक्‍यनी। स्‍वर्गया झ्‍याः चाइ अले पृथ्‍वीया जग तसकं सनी।

यर्मिया 14:12

इपिं अपसं च्‍वंसां जिं इमिगु सः न्‍यने मखु। इमिसं होमबलि व अन्‍नबलि छाःसां जिं व नालाकाये मखु। उकिया पलेसा जिं इमित तरवार, अनिकाल व महामारीं नाश याये।”

यर्मिया 14:16

अले अगमवाणी ल्‍हानाच्‍वंपिं मनूतय्‌त अनिकाल व तरवारं सीधुंकाः यरूशलेमया लँय् वांछ्वइ। इमित व इमि कलाःपिन्‍त वा काय् म्‍ह्याय्‌पिन्‍त थुनीपिं सुं दइ मखु। जिं इमिके इमित ल्‍वःगु विपत्तित प्‍वंकाबी।

यर्मिया 16:4

“इपिं ग्‍यानापुगु ल्‍वचं सी। इमिगु लागिं सुं नं ख्‍वइ मखु वा सुनानं इमित थुनी मखु। इपिं बँय् फोहर थें लानाच्‍वनी। इपिं तरवार व अनिकालं नाश जुइ, इमिगु सीम्‍ह आकाशयापिं झंगःपन्छित व पृथ्‍वीयापिं पशुतय्‌गु नयेगु नसा जुइ।”

यर्मिया 19:7

“‘थ्‍व हे थासय् जिं यहूदा व यरूशलेमया योजनात स्‍यंकाबी। इमित थः शत्रुतय् न्‍ह्यःने तरवारं व इमित स्‍यायेत स्‍वयाच्‍वंपिनिगु ल्‍हातं स्‍याके बी। अले इमिगु सीम्‍ह धाःसा आकाशयापिं झंगःत व पृथ्‍वीयापिं पशुतय्‌त नयेत बी।

यर्मिया 43:11

व वयाः मिश्र देशयात हमला याइ, अले सीगु लागि च्‍वयातःगु दुसा सित, कैदी जुयेगु च्‍वयातःगु दुसा कैदय् वनेत व तरवारं सीगु च्‍वयातःगु दुसा तरवारयात लःल्‍हाइ।

इजकिएल 12:11

इमित धा, ‘जि छिमिगु निंतिं छगू चिं खः।’ “जिं गथे याना, अथे हे इमित याइ। इमित देशं कैदीतय्‌त थें ज्‍वना यंकी।

इजकिएल 14:21

“परमप्रभु परमेश्‍वरं थथे धयादी – जिं यरूशलेमय् अन च्‍वंपिं मनूत व पशुत स्‍यायेत जिगु प्‍यंगू सजाँय– तरवार, अनिकाल, गुँपशुत व महामारी छ्वयेबलय् झन गुलि बांमलाइगु जुइ!

इजकिएल 33:27

“इमित धा, ‘परमप्रभु परमेश्‍वरं थथे धयादी – गथे जि धात्‍थें म्‍वाःम्‍ह खः, नाश जूगु शहरय् च्‍वनाच्‍वंपिं मनूत तरवारं सी। ख्‍यलय् दुपिन्‍त जिं गुँपशुतय्‌त नयेत बी। किल्‍लाय् व गुफाय् दुपिं महामारीं सी।

इजकिएल 5:12

छिमि स्‍वब्‍वय् छब्‍व मनूत महामारी वा अनिकालं सी, अले स्‍वब्‍वय् छब्‍व छंगु पःखाःया पिने तरवारं सी, अले स्‍वब्‍वय् छब्‍वयात जिं प्‍यखेरं छ्यालब्‍याल यानाबी। अले नांगा तरवार ज्‍वनाः जिं इमित ली।

इजकिएल 5:2

शहरयात घेरय् याःगु दिं सिधइबलय् सँयागु स्‍वब्‍वय् छब्‍वयात शहरया दुने मिइ छ्वय्‌काब्‍यु! मेगु स्‍वब्‍वय् छब्‍व सँयात शहरया प्‍यखेरं तरवारं कुचा कुचा यानाब्‍यु, ल्‍यं दुगु स्‍वब्‍वय् छब्‍वयात धाःसा फसय् ब्‍वय्‌काब्‍यु। छाय्‌धाःसा उमित जिं तरवार ज्‍वनाः लिनाछ्वये।

दानिएल 9:12

जिमिथाय् तःधंगु विपत्ति हयाः जिमिगु व जिमि शासकतय्‌गु बारे न्‍ववानादीगु बचं छिं पूवंकादीगु दु। यरूशलेमय् वःगु विपत्ति थें ज्‍याःगु विपत्ति संसारय् गन नं मवःनि।

आमोस 5:19

सिंहपाखें बिस्‍युं वनाः सुं मनूया भालूयात नापलाःगु थें वा छेँ दुहां वनाः अंगलय् ल्‍हाः तःबलय् सर्पं वयात न्‍या थें व दिं जुइ।

जकरिया 11:9

“आवंलि जि छिमि फैजवाः जुइ मखुत। छिपिं सीसां थजु, स्‍यासां थजु। ल्‍यंदनिपिन्‍त नं थवंथवय् स्‍यानाः ला नयेमा।”

प्रकाश 13:10

ज्‍वना यंके माःपिन्‍त ज्‍वना हे यंकी। तरवारं सीमाःपिं तरवारं हे सी। थुबलय् हे खः सकल विश्‍वासीतय्‌सं विश्‍वास मत्‍वःतुसे सह यानाच्‍वनेमाःगु।