Nipadrelane 20:13 - Ngudradreadrekadhane Ka Sisiu 魯凱語聖經

¹³ Ala, ku laveke pwataluvaivai baai kudra wapacai ku umawmase; ku apacadhane si swa swadriadringi la mialri putaluvaivai si baai ku ruthuku lini ku wapacai ku umawmase. Kilakikai umawmase lri singikai ku kakwakudhane lini kisaibange.

Nipadrelane 20:13 Iomraidhean Croise

Isaiya 26:19

Ai kudra wapacainga ku sakacekele nai lri sielane panianiake; ku kinawmasane lini lri ikaiyana ku niake. Kudra wapece ikai tadralredralrekane ku umawmase lri pacunu, si senai akwadradradrau; mia ki lamu ki kadaengane mailuku ku apanianiakane, ku Tamatama lri pasiwlriwlriane papanianiake ki wapacainga ka umawmase.

Husia 13:14

Kainaku lri palribulu ki swa Iseraylri patwalai ka swadriadringi; kainaku lri patwalai ki puku ki apacadhane pulatadre liniane. Apacadhane, sabula kwi la apamatikurwanesu! Swadriadringi, putaluvaivadha kwi amudanesu! Kainaku lri kakurunga kai ki laumawmase.

Matai 11:23

Ala kusu, ka swa Kaperenawme, lri ngitatwabelengesu keela subelebelenge? Lri kipatubakebakesu pulebe mwa swadriadringi! Ku taikaiyaneli numiane kwini pia ku pinangu Twaumasane ku puku, ana piane ikai Sudume, nai tara ikaiyana kaikameane!

Matai 16:27

Ku Lalake ki Umawmase lubibilrili lri ikai ki lrigu ki Tamaini, si karededele ki sasiakawluini subelebelenge kainganai. Lu kamani kwidra, kwi lasu lri singikai ki kakwakudhane ki tangeea pangibilri iniane.

1 Kurintu 15:26

Ku bibiilrilinga ku lrika apakamudaneini ku badha amani kai apacadhane.

Nipadrelane 1:18

Palralrawthaku ikai! Nawapacainga naku, ai panianianiakenga naku kaiasasane, si ka palralrawthunga panianiake. Wagemegemaku kai sawsi ki apacadhane si swa swadriadringi.

Nipadrelane 2:23

Lai lri papacadhaku ku twapapapalra iniane ku umawmase, ku la swa kiwkai lai lri thingale, ala ka wadrelaku pakela ki kidremedreme si tagathimane ki umawmase. Lri singikaiyaku ku tapiane ki tangeea, si bilri numiane ka tangeea.

Nipadrelane 20:12

La dreelenga naku kudra ki wapacainga ka umawmase, adravane ka tabebelenge ka talelebe, acegecege makanaelre icucubungu ki taetalane. Ku sakukuswane ka pacase ka nibalrulane la mubalrulunga si paipai; ku taingeane laka vaeva ka niake ka mibu mialri paipainga. Ku wapacainga ku umawmase lri singikai ki kakwakudhane lini, si patwalai kilakikai sakukuswane ka pacase ka nibalrulane ku tapacasane, si kisaibange.

Nipadrelane 20:14

Ku apacadhane si swadriadringi la mialri kiverevere pwadringi ki apwi ka baiyu. (Kikai apwi ka baiyu amani ku saka kingipusale pacai.)

Nipadrelane 21:4

Lri sakidri pakameale sanaka asese ku lrese lini; kadrwanga ku apacadhane, laka kadrwanga ku adirivane, atubiane, si akwalriane. Ku siaswalane ku manemanenga ngialribatenga patuelre.”

Nipadrelane 6:8

Sadrelaku, laka vaeva ka ngilrawlrawlrapungu ka rigi; kudra ngwarigirigi ku nagane sia Wapacai, kai swadriadringi twapapalra iniane. Kwi lalasu wamalra ku puku, si la marasikai erece ki taingeane ki nipau supatane ki kadaengane, lri arakai ku amakakaruburane, silravane, swalrubu, si waudriwdripi ikai lebe papacai ki umawmase.