Amuse 8:11 - Ngudradreadrekadhane Ka Sisiu 魯凱語聖經

¹¹ “Wakelanga kudra vai, lri tukalasilravane kai swa Iseraylri palraelre. Kudra kasilrau lini kaika kadrwa ku akaneane ku pange; ku kakadhame lini kaika kadrwa ku awngulane ku acilai. Ku kasilrau lini amani sa kai maka kilalra ku vaga ki Tamatama. Ki kikai yai amaniaku ka abebeelengenga ka Tamatama ka amia.

Amuse 8:11 Iomraidhean Croise

2 Lacaili 15:3

Maulainga turamuru kakadrwa ku katwaumasane ikai ki swa Iseraylri, kadrwa ku barakalai ku wabulrubulru, kadrwa ku hulrice.

Lasenai 74:9

Kudra lasaniange ka sapatuthingalane maulrawnga patuelre; kadrwanga ku yuginsia; kadrwa ku umawmase ku wathingale kikai matikurwane lu lri pacungulu tarathainu.

Kavagavagane 29:18

Lu kakadrwa ku taarakane ki Twaumase, ku laumawmase lri ngilralraingi kanganga ka kadrwa ku waruthuku; ku paluludu ku hulrice ki Twaumase ka umawmase lri kaesai turamuru!

Isaiya 5:6

Lri pacebeaku kai ki kadaengane pasuete ku laubulu; kainaku lri kaciane pudriadringai ki cebe ki budu, lai kainaku mamelre ki dae; lri pacebeaku kai ki dae ku bala ka ubulu si cecenekane ka angatu. Lri pakeelaku ku payadrengere ki ememe ku apaudalane.”

Izikile 7:26

Ku amatikurwane lri edede kela; ku malisi ku wakela ku vaga lri kai telrai kela. Lri silape numi ki yuginsia si payugingi; ku labarakalai kadrwa ku manemane ku abulrwane ki laumawmase; ku laciwru laka kadrwa ku manemane ku apakipapawlringavane.

Husia 2:3

Alaiyasi kai kilalra, lri mulaimadhaku patuelre kwi laimaini, si pavilralrakane, mia ki taukitulalalake ka daini. Lri pangimiaku iniane ki calragulragu, ki enaenai, lai kakadhame si pacai.

Mika 3:6

“Yuginsia, yalebenga ka vai, lri padaalrunga la ngilribate kwi takatharirane ki vai numi. Watavuvulrucu numi ki kawkawluli, lai kai numi maka drelenga ku maburusi, lai kai numi maka yuginginga.”

Matai 9:36

Kwi lasu sa drele ku twaredededele ku laumawmase, kiriimu kainganai ku kalithane ki kidremedreme; asi lwiyane kwini lalasu kwalrialrialri ka kadrwa ku paralubu liniane, mia kudra ki kadrwa ku taraagwagu ka lakiu.

1 Samuile 28:15

Ku Samuile la kivaga ki Saule, “Asu kirimu vangavange upungu nakwane? Asu dawlu nakwane?” Ku Saule la kawriva, “Madrau turamuru kai amatikurwaneli! Lri kela kikaruburu nakwane ku swa Pelisitine, la miaka wacilringa nakwane ku Twaumase. Kai pangwakainga ki yuginsia, la kai pangukainga ki sipi tubalre nakwane. Lakamani kwidra dawluli muswane kainganai mubelenge, kiatubiaku muswane pelaelaili ku apangimiane.”

1 Samuile 28:6

la kivaga ki Tamatama ku apangimiane. Ai ku Tamatama kai pangwakai ki sipi, la kai pangukai ki Urime, la mialri kai pangukai ki yuginsia tubalre iniane.

1 Samuile 3:1

Ku vavalake ka Samuile kiabulrubulru ki Ilri marasiakaikai ki Tamatama. Walreeva ala kela ku vaga ki Tamatama, laka kingibebekele ku tadrelane ku maburusi.