Vafiripi 3:1 - Bhaibheri Rakachena muChindau

¹ Pakugumisira, hama dzangu, dakarai munaMambo. Kunyorazve kwomuri zviro izvo azvindinesi inini, asi kwomuri kungwaririka.

NOVO TESTAMENTO EM NDAU

¹ Pakugumisira, hama jangu, dakaranyi kuna Mambo. Kutara kudaro kwomuri akunesi kwendiri, asi kwomuri kuri kungwaririka.

Vafiripi 3:1 Iomraidhean Croise

1 MaKro. 15:28

Ndizvo vaIsuraeri veshe vakakwidza bhokisi rechitenderano chaMambo Mwari ngokudaidzira, nokuridzwa kwepayapaya, kwemagwama, kwengoma dzesimbi, nokuridzwa kwegitari, nokuridzwa kwezvidangari.

1 MaKro. 16:10

Dakarai imwimwi ngezina rake rakachena; ngaidakare mwoyo yaavo vanotsvaka Mambo Mwari.

1 MaKro. 29:22

navo vakadya nokumwa pamberi paMambo Mwari ngeiro zuva vanokudakara kukurutu. Navo ngokwechipiri vakaita Soromoni mambo mukororo waDhavhidha; vakamudzodza pamberi paMambo Mwari kuita mutongi waMambo Mwari, naZadhoki kuita mupristi.

Neh. 8:10

Zvino wakati kwevari, “Endai, mudye zvakakora, nokumwa vhini rinotapira, mutumire zvikoaniswa kwevari vasina zvakanasirirwa, ngokuti zuva iri rakachena kunaMambo Mwari wedu; musatambudzika, ngokuti kudakara kwaMambo Mwari ndiro simba renyu.”

Jobe 22:26

zvino unozodzidakadza pachako munoUwo Une-simba-reshe, nokumirudza hope yako kunaMwari.

Nduyo 149:2

Isuraeri ngaadakare ngowakamusika; vana veZioni ngavadakare munaMambo wavo.

Nduyo 32:11

Dakarai munaMambo Mwari, mudakadzwe, imwimwi mwakarurama; mudaidzire ngokudakara, mweshe imwimwi mwakarurama mumwoyo.

Nduyo 33:1

Dakarai munaMambo Mwari, imwimwi mwakarurama; kukudza kunosisira vanhu vakarurama.

Nduyo 37:4

Dakara munaMambo Mwari, naye unozokupa zvidisiso zvomwoyo wako.

Nduyo 42:4

Ndinokarakadza izvi zviro, ndechidurura mweya wangu mukati mwangu: ngenjira yendakaenda ndiyo nembungano, ndikaitungamirira kumhatso yaMwari, ngeizwi rokudakara nenduyo dzokubonga, mbungano yechingwarira dhiri.

Nduyo 5:11

Asi ngavadakare veshe vanogonda mweuri; ngavagare vechiemba ngokudakara. Tambanudza kungwarira kwako padera pavo, kuti avo vanoda zina rako vadakare mweuri.

Nduyo 97:1

Mambo Mwari ndimambo! Nyika ngaidakare. Zviwi zvizhinji ngazvidakare.

Isa. 41:16

Munozozvipepeta, nedutu rinozozvitora, nechipupuri chinozozviparadza. Zvino munozodakara munaMambo Mwari; mune Wakachena waIsuraeri munozokudza.

Isa. 61:10

Ndinozodakara kakurutu munaMambo Mwari, mweya wangu unozodakara ndiMwari wangu; ngokuti wandifukidza ngejira roruponeso, wandifukidza ngejira rokururama, kudai ngomukwambo unodzinemesa ngezvinemeso, kudai ndimakhoti unonema zvinemeso zvake.

Isa. 65:14

Ringira, varanda vangu vanozoemba ngokudakara kwomwoyo, asi imwimwi munozochema ngokurwadziwa kwomwoyo, nokugwimba ngokutambudzika kwomweya.

Joeri 2:23

O vana veZioni, dakarai, mudakadzwe munaMambo Mwari, Mwari wenyu; ngokuti wapa mvura yokutanga ngendaa yenyu, wadurura pashi mvura yakawandisa ngendaa yenyu, mvura yokutanga nemvura yokuteera, kudai ngekaretu.

Zef. 3:14

Emba kakurutu, O mwanasikana weZioni; daidzira, O Isuraeri! Dakara nokudakadzwa ngomwoyo wako weshe, O mwanasikana weJerusarema!

Zef. 3:17

Mambo Mwari, Mwari wako, uri pakati pako, ngwazi inopa kunyisa; unozodakara padera pako ngokudakadzwa; unozozorora murudo rwake, unozodakara ndiwe ngokuemba,

Zek. 10:7

Zvino vanhu vaEfuremu vanozoita kudai ngengwazi, nomwoyo yavo inozodakara kudai ngevamwa vhini. Vana vavo vanozozviona nokudakara; mwoyo yavo inozodakara munaMambo Mwari.

Mateu 5:12

Dakarai, mwechidakara kakurutu; ngokuti musharo wenyu mukuru mudenga; ngokuti ngokudaro vakatambudza vaprofeti avo vaiya pamberi penyu.

Ruka 1:47

nomweya wangu unodakara kukurutu kuna Mwari, Muponesi wangu,

Varoma 5:11

Andizvopi zvega, asi tinoganzazve kunaMwari kubudikidza ndiye Mambo wedu Jesu Kristu, zvino kubudikidza ndiye takaashira kuiyaniswa.

2 VaK. 13:11

Pakupedzisira, hama, chisarai. Itai vakaperera, purutanai kupanga kwangu; itai vano mupinimidzo umwewo, mugare mukunyarara; naMwari worudo nowokunyarara unozogara nemwi.

Vaefesu 6:10

Pakugumisira, itai vakagwinya munaMambo nomukugwinya kwesimba rake.

Dhuto. 12:18

Asi munozozvidyira pamberi paMambo Mwari, Mwari wenyu mundau yaanozotsanangura Mambo Mwari, Mwari wenyu, imwimwi nevakororo venyu, nevanasikana venyu, nehloko dzenyu dzevamuna nedzevakadzi venyu, nevaRevhi vari mumadhorobha enyu; munozodakara pamberi paMambo Mwari, Mwari wenyu kuneizvo zveshe zvomunoshanda ngenyara dzenyu.

Dhuto. 16:11

Unozodakara pamberi paMambo Mwari, Mwari wako, newe nevakororo nevanasikana vako, nehloko yako yomwamuna neyomukadzi, vaRevhi vari mukati mwemadhorobha ako, nomupara, nousina baba, neshirikadzi, vari pakati penyu, mundau yaanozotsanangura Mambo Mwari, Mwari wako kuti aise zina rake apo.

Vafiripi 3:3

Ngokuti tisu tiri vakachekwa, avo vanodira Mwari muMweya nokuganza munaKristu Jesu, tisikagondi munyama,

Vafiripi 4:4

Dakarai munaMambo ngenguva dzeshe; zve, ndinozoti, Dakarai.

Vafiripi 4:8

Pakugumisira, hama, zveshe zviri zvegwinyiso, zveshe zvinoremeredzeka, zveshe zviro zvakarurama, zveshe zviri zvakachena, zveshe zvinodikanwa, zveshe zvine mbiri yakanaka, kudai kuripo kunaka, kudai kuripo kukudzwa, pinimidzai ngeizvi zviro.

1 VaTes. 4:1

Ndizvo pakugumisira, hama, tinomukumbira nokumupota munaMambo Jesu kuti, kudai ngezvemwakaashira kwetiri njira inosisira yokuhamba ndiyo nokumudakadza Mwari, kudai ngezvomunohamba, kuti muwanze kudaro.

1 VaTes. 5:16

Dakarai nguva dzeshe,

Jakobe 1:2

Hama dzangu, naapo mwogumirwa ngokuedzwa kwembeu zhinji, musakuerenga kuita chiro asi kudakara,

1 Pet. 3:8

Pakupedzisira, imwimwi mweshe itai vano mwoyo umwewo, vanozwirana urombo, dananai kudai ngehama umwe kunoumweni, mune mwoyo inenyasha nemipinimidzo yakapfaa.

1 Pet. 4:13

Asi dakarai, kudai ngezvomunoashira chikoaniswa chokutambudzwa kwaKristu, kuti imwimwi mudakare nokudaidzira ngokudakara kukurutu apo uthende hwake pounooniswa.

2 Pet. 3:1

Vanodikanwa, zvino iyi iri tsamba yechipiri yendinonyora kwomuri; mwedziri ndinoda kumusirira mipinimidzo yenyu inegwinyiso ngokumukarakadzisa

1 Sam. 2:1

Hana wakakumbira echiti, “Mwoyo wangu unodakara munaMambo Mwari, simba rangu rinokudzwa munaMwari wangu. Muromo wangu unozokuriswa padera pemagaa angu, ngokuti ndinodakara ngokunyisa kwako.