Jer. 6:23 - Bhaibheri Rakachena muChindau

²³ Vakabata uta nomukhondo; vanorunya, avana nyasha; bope ravo rinotinhira kudai ngoruandhle; vanogadha mahachi, vakapfeka kudai ngevanhu vokurwa hondo kurwisana newe, O mwanasikana weZioni.”

Jer. 6:23 Iomraidhean Croise

Isa. 10:32

Nyamashi unoema muNobhi; unozomirudza chibhakera chake kumutunhu wemwanasikana weZioni, chimutunhu cheJerusarema.

Isa. 13:18

Misee yavo inozofura majaha; avazoitiri nyasha vanoberekwa; madziso avo aazokunguriri vana.

Isa. 17:12

A, kutinhira kwevanhu vakawanda, vanotinhira kudai ngokutinhira kunoita ruandhle! A, kurira kwemadzinza, anorira kudai ngokurira kwemvura inesimba!

Isa. 19:4

Ndinozopira vaEgipite munyara yamambo unoushungu; mambo unotyisa unozotonga padera pavo,” unoronza Mambo Mwari wehondo.

Jer. 25:32

Izvi ndizvo zvinoronza Mambo Mwari wehondo: “Ringira, kushata kunopararira kubva kudzinza kuenda kudzinza, nechapupuri chikuru chinomirudzwa kubva kumiganu yenyika.”

Jer. 25:9

ringira, ndinozotumira kumadzinza eshe edera, kunyazwi naNebhukhadhineza mambo weBhabhuroni, muranda wangu, neni ndinozovaunza kuti varwise iyi nyika, nevagari vayo, nemadzinza eshe aya akaitendenedza; ndinozovaparadza yaamho nokuvaita chishamiso chinotyisa, chinoridzirwa murudzi nokuita matongo mhera nariini,” unoronza Mambo Mwari.

Jer. 30:14

Vadikani vako veshe vakuriyarwa; avakutsvaki; ngokuti ndakakuremadza ngebonje regaa, kuororwa kwouwo usina nyasha, ngendaa youwandu hwokushata kwako, ngokuti zvishaishi zvako zvakawandisa.

Jer. 4:13

Ringira, unouya kudai ngemakore, nengoro dzake dzinodai ngechipupuri; mahachi ake anorumbisa kupinda madorambudzi. Ihehe kwetiri, ngokuti taparadzwa.

Jer. 4:16

“Ronzerai madzinza, ‘Aya ari pano!’ Ringirai, daidzirai kuneJerusarema kuti magaa anouya anobva munyika irikuretu, anoridza mhere kurwisana nemadhorobha aJudha.

Jer. 4:29

Pakuzwa ngebope revagadhi vemahachi nevaposhi vemisee dhorobha reshe rinotiza; vanopotera mumakwasha, nokukwira padera pemapuwe; madhorobha eshe anosiiwa, asina munhu unogaramwo.

Jer. 5:16

Chikomwe chavo chakadai ngeiba rakabeuka; veshe ingwazi dzehondo.

Jer. 50:41

Ringira, dzinza revanhu rinouya kubva dera, dzinza guru, nemadzimambo akawanda anomuswa kubva kumarupande enyika ari kuretu.

Jer. 50:42

Vanofura ngeuta nemikhondo, vanoushungu, avana nyasha. Bope ravo rinoungumira kudai ngoruandhle, vanogadha mahachi, veshe vakadzinasirira umwe ngaumwe, kudai ngengwazi dzinoenda koorwa, kurwa newe, O mwanasikana weBhabhuroni.

Jer. 6:4

“Nasirirai kurwa hondo naye; mirukai ngatikwireyo masikati. Ihehe kwetiri! Ngokuti zuva rinobira, mabvute emadeekoni anoreba.

Jer. 8:16

Kupheza kwemahachi kunozwika kubva Dhani; nyika yeshe inozungunyika ngebope rokupheza kwemikono yemahachi awo anesimba. Anouya kooparadza nyika nezveshe zviri mukati mwayo, dhorobha naavo vanogaramwo.”

Ezek. 21:31

Ndinozodurura padera pako ushungu hwangu nomuriro woushungu hwangu ndinozofuridzira padera pako. Ndinozokuisa munyara dzevanhu vakashata, ngwazi dzokuuraya.

Dhuto. 28:49

Mambo Mwari unozounza dzinza rinobva kuretu kurwisana nemwi, rinobva kumagumo enyika, rinokasira kudai ngokumbururuka kwegodzi, iro dzinza ndimi yaro amuzoizwi;