Jer. 48:7 - Bhaibheri Rakachena muChindau

⁷ Ngegwinyiso ngokuti mwakagonda kumishando yenyu nokupfuma yenyu, nemwi muchabatwa; Khemoshi unozoenda muubatwa, nevapristi vake, pamwepo nevatongi vake.

Jer. 48:7 Iomraidhean Croise

2 Sam. 5:21

VaFiristia vakasiyapo miedzaniso yavo yokudira, naDhavhidha navanhu vake vakaitora.

1 Madzi. 11:33

Ngokuti wakandisiya, akadira Ashithorethi chimwari chevaSidhoni, neKhemoshi, chimwari chevaMoabhi, naMirikhomu, chimwari chevana vaAmoni, aazi kuhamba ngenjira dzangu, echiita izvo zvakarurama mukuona kwangu, nokungwarira zviemeso zvangu nemipango yangu, kudai ngezvaakaita Dhavhidha baba ake.

1 Madzi. 11:7

Zvino Soromoni wakaaka ndau yakakwirira yokudira Khemoshi, chinyangadzo cheMoabhi, neyaMorekhi chinyangadzo chevana vaAmoni, pamutunhu uri ngokumabvazuva kweJerusarema.

Nduyo 40:4

Unomuchena munhuwo unoita kuti Mwari aite gonda rake, usikakunukukiri kunevanodzikudza, avo vanopaukira kuzvimwari zvemanyepo.

Nduyo 52:7

“Ringirai uyu ndiye munhu usikazi kuita Mwari bako rake, asi wakagonda muuwandu hwepfuma yake. Wakatsvaka kuhwara muupfumi mukushata kwake.”

Jer. 13:25

Ichi ndicho chikoaniswa chako, chewakapimirwa ndini, unoronza Mambo Mwari, ngokuti wandiriyarwa, ukagonda manyepo.

Jer. 43:12

Ndinozobasira muriro mumhatso dzezvimwari zveEgipite; naye unozozvipisha nokuzvitora muubatwa; naye unozochenesa nyika yeEgipite, kudai ngomuushi unotora bhachi rake rakachena risina inda, unozobvapo zvakanaka.

Jer. 48:13

Zvino Moabhi rinozotsveruka ngendaa yeKhemoshi, kudai ngevemhatso yaIsuraeri vakatsveruka ngendaa yeBhetheri gonda ravo.

Jer. 48:46

Hezvo kwouri, O Moabhi! Vanhu veKhemoshi vapera, ngokuti vakororo vako vabatwa muuhloko nevanasikana vako vaizwa hloko.

Jer. 49:3

“Boorera, O Heshibhoni, ngokuti Ai raparadzwa. Chemai yaamho, O maguta aRabha! Pfekai machira emasaka; chemai, nokudzichaya ngemboma pachenyu! Ngokuti Mirikhomu unozopinda muubatwa, pamwepo nevapristi navatongi vake.

Jer. 49:4

Ngenyi wechiganza mukugwinya kwako? Kugwinya kwako kunokorera, O mwanasikana usina gonda. Iwewe wakagonda upfumi hwako wechiti, ‘Ndiani unozondirwisa?’

Jer. 9:23

Izvi ndizvo zvinoronza Mambo Mwari, “Munhu wakangwara asadziganzisa ngoungwaru hwake, munhu unesimba asadziganzisa ngesimba rake, munhu mupfumi asadziganzisa ngoupfumi hwake.

Hos. 10:13

Mwakarima kushata, mwakacheka zvinonyangadza, mwadya michero yemanyepo. Ngokuti mwagonda simba renyu, nouwandu hwengwazi dzenyu,

Zvi. 21:29

Ihehe kwouri Moabhi! Iwewe waparadzwa, vanhu vaKhemoshi! Wakaita kuti vakororo vake vapepesheke nevanasikana vake vaite vasungwa, kunaSihoni mambo wevaAmori.

1 Tim. 6:17

Panga avo vari makurudza munyika muno kuti vasadzikudza nokuti kuemesa kugonda kwavo paupfumi husikagari, asi kunaMwari, uwo unotipa kakurutu zveshe kuti tidakare ndizvo;

Chakapangijihwa 18:7

Ndizvo mupenyi kutambudzika nokusvipa mwoyo kukurutu, kudai ngouwandu hwaakadzikudza ndihwo nokupona mukudzidakadzisa pachake, ngokuti unoti mumwoyo mwake, ‘Inini ndakagara pano, ndini mambokadzi, andiri shirikadzi akadi, andizombooni dambudziko.’

Vato. 11:24

Auzogari here nhaka yenyika younopuwa ngechimwari chako Khemoshi kuti uigare nhaka? Isusu atisisiriwo here kugara nhaka yeizvo zveshe zvaakanyisa Mambo Mwari, Mwari wedu, kuita zvedu?