Jer. 32:5 - Bhaibheri Rakachena muChindau

⁵ naye unozotora Zedhekia kuenda Bhabhuroni, unozogara apo metsa ndamuhambira, unoronza Mambo Mwari. Kunyazwi wechirwisana nevaKharadhea amuzobudiriri?’ ”

Jer. 32:5 Iomraidhean Croise

2 MaKro. 13:12

Ringirai, Mwari unesu kuti atitungamirire, nevapristi vakabata magwama kuti varidzire nyandayeyo yehondo kurwa nemwi. A vaIsuraeri, musarwa naMambo Mwari, Mwari wemadzibaba enyu; ngokuti amuzobudiriri akadi.”

2 MaKro. 24:20

Zvino Mweya waMwari wakabata Zekharia mukororo waJehoiadha mupristi, naye wakaema pakaturama pamberi pevanhu, wakati kwevari, “Unoronza izvi Mwari, ‘Munopauka ngenyi kubva mumipango yaMambo Mwari, kuti musabudirira? Ngokuti imwimwi mwasiya Mambo Mwari, wamusiyawo imwimwi.’ ”

Mazwi 21:30

Apana ungwaru, apana kuzwisisa, apana kupanga kwakwo kunomukira Mambo Mwari.

Jer. 2:37

Kubvira apo unozobudawo nenyara dzako wakadziisa padera pesoro rako, ngokuti Mambo Mwari waramba avo vounogonda, newe auzobudiriri kubudikidza ndivo.”

Jer. 27:22

‘Zvinozotwarwa kuenda Bhabhuroni, zvinozogara apo metsa zuva rendinozovahambira,’ unoronza Mambo Mwari. ‘Zvino ndinozozviunza ndechizvihwirinza kundau iyi.’ ”

Jer. 32:24

Ringira, mirwi yamavhu yakandirwa kutendenedza kurwisa dhorobha, kuti varinyise; nedhorobha raringirana neshoti, nzara nenhenda, naro rapirwa kunyara yevaKharadhea, avo vanorwa naro. Izvo zvowakaereketa zvaitika kudai ngezveungaona iwewe pachako.

Jer. 32:6

NaJeremia wakati, “Izwi raMambo Mwari rakauya kwendiri rechiti:

Jer. 33:5

VaKharadhea vanouya koorwa nokuazadza ngemiiri yakafa, yeavo vendichauraya mukutseneka kwangu nomuushungu hwangu, ngokuti ndafisha hope yangu kubva kudhorobha iri, ngendaa yokushata kwavo kweshe.

Jer. 37:10

Kunyazwi mukanyisa hondo yeshe yevaKharadhea, iyo inorwa nemwi, apo panozosara vamweni vavo vakaremadzwa mumatende avo, vanozomiruka umwe ngaumwe kubva kutende rake, nokupisha dhorobha iri ngomuriro.”

Jer. 39:4

Naapo Zedhekia mambo waJudha nevarwi veshe vakavaona, vakatiza kubuda kubanze kwedhorobha usiku ngenjira yomumunda wamambo, ngepamusiwo waiya pakati pemarukumbati mairi; navo vakaenda ngenjira yeArabha.

Jer. 39:5

Asi hondo yevaKharadhea yakavarumbirira, ikabata Zedhekia murubaya rweJerikho; naapo vamubata vakamuunza kunaNebhukhadhineza mambo weBhabhuroni paRibra, munyika yeHamathi, naye wakamutonga.

Jer. 39:7

Wakatumbura madziso aZedhekia, akamusunga ngemanguri, akamutwara kuenda naye Bhabhuroni.

Chi. 1:14

Zvishaishi zvangu zvakasungirwa mujoka; ngenyara yake zvaiya zvakasungirwa pamwepo, zvikaiswa pamutsipa wangu, zvechimwa simba rangu; Mambo Mwari wakandipira munyara dzaavo vendisikakoni kurwa navo.

Ezek. 12:12

Nomutongi uri pakati pavo unozotwara mutwaro pamapfudzi ake kwootitsvaa, unozobuda kuenda; unozotsa kupotya rukumbati kuti autware kubuda ndipo, unozofukidza hope yake kuti asazoona pashi ngamadziso ake.

Ezek. 12:13

Ndinozotambanudza padera pake mumbure wangu, naye unozobatwa mumurau wangu; ndinozomuunza Bhabhuroni, nyika yevaKharadhea; asi aazoioni, naye unozofireyo.

Ezek. 17:15

Asi wakamumukira ngokutumira vaemereri vake kunyika yeEgipite, kuitira kuti vamupe mahachi nevanhu vehondo vakawanda. Unozobudirira here? Unozopokonyoka here, uwo unoita zviro zvakadai? Unozopokonyoka here apo echigura chitenderano?

Zvi. 14:41

Asi Mosi wakati, “Zvino munoangira ngenyi kugura mupango waMambo Mwari? Izvi azvizobudiriri.