Jer. 32:23 - Bhaibheri Rakachena muChindau

²³ navo vakapotera, vakaigara nhaka. Asi avazi kupurutana izwi rako, nokuti kuteera mipango yako; pane zveshe zvewakavapanga kuti vaite apana nachimwe chevakaita. Ndizvo wakaita uku kushata kweshe kuti kuuye padera pavo.

Jer. 32:23 Iomraidhean Croise

Ezura 9:7

Kubvira kumazuva emadzibaba edu metsa nyamashi tanyanya kudzaka mukushaisha; ngendaa yezvinyangadzo zvedu isusu, madzimambo edu nevapristi vedu, takapirwa munyara dzemadzimambo enyika, koourawa ngeshoti, kuitwa hloko, kuchakatwa, nokutsverudzwa kudai ngezvezvakaita nyamashi.

Neh. 9:15

Wakavapa chingwa chinobva mudenga kuvagutisa panzara yavo, wakavabudisira mvura kubva pabuwe kupedza nyota yavo, newe wakavaronzera kuti vanozopotera kuti vagare nhaka yenyika iyo yewakagondisa kuvapa.

Nduyo 78:10

Avazi kungwarira chitenderano chaMwari, asi vakaramba kuhamba mumipango yake.

Jer. 2:7

Ndakamuunza kunyika yezvakawanda, kuti mudye michero yayo nezviro zvayo zvakanaka. Asi apo mwapindamwo, mwakasvipisa nyika yangu, nokuita kuti nhaka yangu iite chinyangadzo.

Jer. 26:4

Unozoti kwevari, ‘Izvi ndizvo zvinoronza Mambo Mwari: Kudai musikazopurutani kwendiri, nokuhamba mumipango yangu yendakaisa pamberi penyu,

Jer. 44:10

Avazi kuonisa kupfaiswa nokuti kutya metsa nanyamashi, nokuti kupurutana mipango yangu nokuti zviemeso zvangu, zvendakaisa pamberi penyu nepamberi pemadzibaba enyu.’

Jer. 7:26

asi avazi kupurutana nokuti kukotamisa nzee kwendiri, asi vakakonzisa mitsipa yavo. Vakaita zvakashata kupinda madzibaba avo.

Chi. 1:18

Mambo Mwari wakarurama; ngokuti ndamukira mipango yake. Asi izwai, imwimwi vanhu mweshe, muringire kutambudzika kwangu; mhandwe dzangu nemajaha angu vapinda muuhloko.

Chi. 1:8

Jerusarema rakashaisha kakurutu, ndizvo raita chishekedzo; avo veshe vairiremeredza vorishoora, ngokuti vaona utitinini hwaro; iro pacharo rinogwimba nokufuratira.

Ezek. 20:18

Ndakati kunevana vavo mushango, ‘Musateera muzviemeso zvevabereki venyu, nokuti kungwarira zvitongero zvavo, nokuti kudzisvipisa pachenyu ngemiedzaniso yavo yokudira.

Ezek. 20:21

Asi vana vakamukira kurwa neni; avazi kuteera muzviemeso zvangu, navo avazi kunasa kungwarira zvitongero zvangu, kudai munhu echizviita, unozopona ndizvo; vakasvipisa maSabatha angu. Zvino ndakapinimidza kuti ndaizodurura ushungu hwangu padera pavo, kurwa navo kuti ndipedze ushungu hwangu kwevari mushango.

Ezek. 20:8

Asi vakamukira kurwa neni, nokusikapurutana kwendiri; haiwa naumwe wavo wakarasha zvinyangadzo zvinodakadza madziso ake, nokuti kurekera miedzaniso yokudira yeEgipite. Zvino ndakapinimidza kuti ndaizodurura ushungu hwangu padera pavo, kuti ndipedze ushungu hwangu kwevari mukati mwenyika yeEgipite.

Ruka 17:10

Ngokudaro imwimwi nemwiwo, apo mwazopedza kuita zveshe izvo zvemwakapangwa mwechiti, ‘Tiri varanda vasikadetseri chiro; takaita izvo zvaiya bingo redu.’ ”

Johani 15:14

Imwimwi muri shamwari dzangu kudai mwechiita izvo zvendinomupanga.

Vagaratiya 3:10

Ngokuti veshe avo vanogonda mishando yeMupango vari pashi pechituko, ngokuti kwakanyorwa kuti, “Wakatukwa weshe usikangwariri zveshe zvakanyorwa mubhuku reMupango kuti azviite.”

Jakobe 2:10

Ngokuti kunyazwi ndiani unozongwarira Mipango yeshe, asi echipumhunwa ngorupande rumwe, iye waita unendaa kweiri yeshe.

Josh. 21:43

NaMambo Mwari wakapa vaIsuraeri nyika yeshe yaakapika ndiyo kuvapa kumadzinza avo; navo vakaita nhaka, vakagara mukati mwayo.

Josh. 23:16

Kudai mwechizopauka kubva kuchitenderano chaMambo Mwari, Mwari wenyu, chaakamupanga, nokushandira zvimwari, nokudzikotamisa kwezviri, ushungu hwaMambo Mwari hunozobaka kwomuri, nemwi munozokasira kupera kubva padera penyika iyi yakanaka yaakamupa.”