Jer. 21:7 - Bhaibheri Rakachena muChindau

⁷ Mambo Mwari unoti, ‘Ngesure kwazvo ndinozopa Zedhekia mambo waJudha, nevaranda vake, nevanhu vedhorobha iri, avo vakapona nhenda, kushoti nenzara, munyara yaNebhukhadhineza mambo weBhabhuroni, munyara yemagaa avo, munyara yaavo vanotsvaka kuvauraya. Unozovabaya ngokupinza kweshoti; aazovakunguriri, nokuti kuvaponesa, nokuti kuvaitira nyasha.’ ”

Jer. 21:7 Iomraidhean Croise

Isa. 27:11

Naapo matai aoma, anogurwa; vakadzi vanouya nokubasa muriro ndiwo. Ngokuti ava vanhu vasina kuzwisisa; ndizvo uwo wakavaita aazovazwiri urombo, nouwo wakavasika aazovaitiri nyasha.

Isa. 47:6

Ndakatsenekera vanhu vangu, ndakasvipisa nhaka yangu; ndakavapira munyara yako, auzi kuvaitira nyasha; wakaisa joka rako rinorema padera pevasharuka.

Jer. 13:14

Ndinozovadhumanisa umwe neumweni, vabereki nevana pamwepo,’ unoronza Mambo Mwari. ‘Andizokunguriri nokuti kuponesa nokuti kuitira nyasha asi kuvaparadza.’ ”

Jer. 14:12

Kunyazwi vanoera kudya, andizwi kuchema kwavo; kunyazwi vanopira mudiro wokupisha nomunikero, andizviashiri; asi ndinovapedza ngeshoti, ngenzara nenhenda.”

Jer. 15:5

Ndiani unozokuitira nyasha, O Jerusarema? “Nokuti ndiani unozokuchemera? Nokuti ndiani unozokupaukira kubvunza kuti wakadini?”

Jer. 15:9

Iye wakabereka vana vanomwe wapera simba; wabudisa mweya wake; zuva rake rapota achimasikati; wakatsverudzwa nokukangaidzwa. Nevasara vavo ndinozovapira kushoti pamberi pemagaa avo,” unoronza Mambo Mwari.

Jer. 19:7

Nomundau iyi ndinozoita kuti bangano raJudha nereJerusarema riite risina shwiro; ndinozoita kuti vawe ngeshoti pamberi pemagaa avo, ngenyara dzaavo vanotsvaka kuvauraya. Ndinozopa miiri yavo yakafa kuita kudya kweshiri dzomudenga nokwezvikara zvomunyika.

Jer. 20:4

Ngokuti izvi ndizvo zvinoronza Mambo Mwari: ‘Ringira, ndinozokuita unodzityisa iwewe pachako nokuvangani vako veshe; navo vanozourawa ngeshoti yemagaa avo, iwewe wakaringira. Neni ndinozopa Judha weshe munyara yamambo weBhabhuroni; unozovatora vari vabatwa kuenda Bhabhuroni, unozovauraya ngeshoti.

Jer. 22:25

nokukupira munyara yaavo vanotsvaka kukuuraya, nomunyara yaavo vaunotya, kunyazwi munyara yaNebhukhadhineza, mambo weBhabhuroni, nomunyara yavaKharadhea.

Jer. 27:6

Zvino ndapa nyika idzi dzeshe munyara yaNebhukhadhineza mambo weBhabhuroni, muranda wangu; kunyazwi nemhuka dzomushango ndakamupa kuti dzimushandire.

Jer. 32:4

Zedhekia mambo waJudha aazopokonyoki kubva kunyara yevaKharadhea, asi ngegwinyiso unozopirwa munyara yamambo weBhabhuroni, echizoereketa naye hope kuhope, nokumuona dziso kudziso;

Jer. 34:3

Newe pachako auzopokonyoki kubva munyara yake, asi ngegwinyiso unozobatwa nokupirwa munyara yake; unozoona mambo weBhabhuroni dziso kudziso, nokuereketa naye hope kuhope; newe unozoenda Bhabhuroni.

Jer. 36:29

Newe unozoti kunaJehoiakimu, ‘Mambo Mwari unoronza izvi: Washinga kupisha bhuku iri wechiti, wainyora ngenyi, kuti mambo weBhabhuroni ngegwinyiso unozouya nokuparadza nyika iyi, unozoita kuti iteme munhu nemhuka?’

Jer. 37:17

Zvino Zedhekia mambo wakatumira izwi kuti abudiswe nokumuashira. Mambo wakamubvunza ngokufishika mumhatso echiti, “Riripo here izwi rabva kunaMambo Mwari?” Jeremia wakati, “Riripo.” Zvino wakati, “Unozopirwa munyara yamambo weBhabhuroni.”

Jer. 50:17

“VaIsuraeri vakadai ngegwai rinovhimwa rinorumbirirwa ngemhondoro. Pakutanga mambo weAsiria wakavadya, nepakugumisira Nebhukhadhineza mambo weBhabhuroni wakatsenga magodo avo.”

Chi. 2:20

Ringira, O Mambo Mwari, ukarakadze. Ngokunaani kwewaita izvi? Madzimai vangadya mibarirwana yavo here, vana vevabara? Mupristi nomuprofeti vangaurawa here mundau yakacheneswa yaMambo Mwari?

Chi. 2:22

Wadaidza magaa angu kubva kweshe kwakanditendenedza kudai ngezuva redhiri; ngezuva roushungu hwaMambo Mwari akuna wakapokonyoka nokuti kusara; avo vendakatengura nokurera, gaa rangu ravapedza.

Ezek. 23:28

Ngokuti izvi ndizvo zvinoronza Mambo Mwari, Mwari: “Ringira, ndinozokupira munyara dzaavo vounozonda, munyara dzaavo vakarambwa ngomweya wako;

Ezek. 7:9

Dziso rangu arizokukunguriri, andizokusvipiri mwoyo. Ndinozokuorora kudai ngenjira dzako, naapo zvinyangadzo zvako zvichagara mukati mwako. Zvino munozozia kuti inini ndini Mambo Mwari uwo unochaya.

Ezek. 8:18

Ndizvo ininiwo ndinozovaitira ngoushungu; dziso rangu arizokunguriri, andizovasvipiri mwoyo; kunyazwi vanozochema munzee dzangu ngeizwi gurutu, andizovapurutani.”

Ezek. 9:10

Asi inini dziso rangu arizokunguriri, nokuti kusvipira mwoyo, asi ndinozounza zviito zvavo padera pemasoro avo.”

Dhuto. 28:50

dzinza rinehope dzinotyisa, risikaremeredzi munhu waa musharuka, nokuti kuitira nyasha munhu mudoko.