Jer. 17:4 - Bhaibheri Rakachena muChindau

⁴ Ngendaa yokuita kwako unozotorerwa nhaka yako yendakakupa; ndinozoita kuti ushandire magaa ako munyika yousikazii; ngokuti muushungu hwangu wakabaka muriro uwo unozobaka mhera nariini.

Jer. 17:4 Iomraidhean Croise

1 Madzi. 9:7

zvino ndinozodzinga Isuraeri kubva munyika yendakapa kwevari, nemhatso yendakachenesera zina rangu, ndinozoirasha kubva pamberi pehope yangu; naIsuraeri unozoitwa chisana nechinai pakati pevanhu veshe.

2 Madzi. 25:21

Mambo weBhabhuroni wakavabaya, akavauraya muRibra munyika yeHamathi. Ndizvo vaJudha vakatorwa kubva munyika yavo.

Neh. 9:28

Asi apo vaiya vazorodzwa, vakaitazve zvakashata pamberi pako, newe wakavasiya munyara dzemagaa avo, kuti atonge padera pavo; asi apo pevakatenderuka, vakachema kwouri, iwewe ukazwa uri mudenga; wakavasunhura mikuwo yakawanda kudai ngenyasha dzako.

Isa. 14:3

Naapo Mambo Mwari amupa kuzorora kubva mukusvipa mwoyo kwenyu, nokubva mukutya kwenyu, nokubva mukushanda kwakakonza kwemwakamanikidzwa kuita,

Isa. 30:33

Ngokuti Tofethi yakanasirirwa kare; ngegwinyiso yakanasirirwa mambo; wakaita ndau yakadzama nokupamhama; muriro nehuni dzakawanda; femero raMambo Mwari rakadai ngerwizi rwesorufa rinobaka kuita muriro.

Isa. 5:25

Ndizvo ushungu hwaMambo Mwari hunobaswa kuvanhu vake, naye unotambanudza nyara yake kwevari kuvachaya; mitunhu inozungunyika, nemiiri yaavo yakafa inoita kudai ngemarara mukati mwemapato. Ngeizvi zveshe ushungu hwake ahuzi kupera, nenyara yake ichakatambanudzwa nazvino.

Isa. 50:11

Ringirai, imwimwi mweshe murivabasi vomuriro, munodzitendenedza ngetsatsi. Hambai mukujeka kwomuriro wenyu, nomukati mwetsatsi dzemwakabasa. Ichi ndicho chomunozoashira kubva kunyara yangu: munozoata pashi mukutambudzika.

Isa. 66:24

“Navo vanozobuda kuringira padera pemiiri yevanhu vakafa, avo vakandimukira; ngokuti honye yavo aizofi, nomuriro wavo auzodzimwi; navo vanozoita chinyangadzo kuvanhu veshe.”

Jer. 12:7

Ndasiya mhatso yangu, ndarasha nhaka yangu; ndakapa mudikani womwoyo wangu munyara dzemagaa ake.

Jer. 15:14

Ndinozokuita kuti ushandire magaa ako kunyika yousikazii, ngokuti muushungu hwangu muriro wabaswa, unozopisha mhera nariini.”

Jer. 16:13

Ndizvo ndinozomubvisa kuneiyi nyika kuenda kunyika yomusikazi kuizia, imwimwi nokuti madzibaba enyu; iyoyo munozodira zvimwari zvimweni masikati nousiku, apo pendisikazomuitiri nyasha.’

Jer. 18:23

Asi iwewe, O Mambo Mwari, unozia bangano ravo reshe rokuda kundiuraya. Usakungurira kushata kwavo, usadzima zvishaishi zvavo kubva kuhope yako. Ngavarigwe pashi pamberi pako; ita izvi kwevari ngomukuwo wokunyangadzwa kwako.”

Jer. 2:14

Isuraeri ihloko here? Wakabarwa ngehloko here? Unopambwa ngenyi zvino?

Jer. 21:12

O mhatso yaDhavhidha. Izvi ndizvo zvinoronza Mambo Mwari: Tongai kutonga kwakanaka mangwanani, mumusunhure kubva kunyara yomutambudzi weshe wakabirwa, kuti ushungu hwangu husabuda kudai ngomuriro nokupisha, pasina naumwe ungaudzima, ngendaa yokushata kwezviito zvenyu.

Jer. 22:28

Uyu munhu Khonia hari yakaputsika inoshoorwa here, chidziyo chisikadikanwi ngomunhu weshe? Vanorashwa ngenyi, iye nomubarirwana wake, navo vanorashirwa munyika yevasikazii?

Jer. 5:19

“Naapo vanhu vako vanozoti, ‘Ngenyi Mambo Mwari, Mwari wedu, echiita zviro zveshe izvi kwetiri?’ Ngouwo mukuwo unozoti kwevari, ‘Kudai ngezvemwakandisiya nokudira zvimwari zvipara munyika yenyu, ngokudaro munozoshandira vapara munyika isiri yenyu akadi.’ ”

Jer. 5:29

“Andizovaorori ngeizvi here?” Unoronza Mambo Mwari. “Mweya wangu auzoshunguriri here dzinza rakadai?

Jer. 7:20

Ndizvo izvi zvinoronza Mambo Mwari, Mwari kuti, “Ringirirai, kunyangadzwa kwangu noushungu hwangu zvinozodururwa padera peiyi ndau, padera pevanhu nepadera pemhuka, padera pemiti yomushango napadera pemichero yemavhu; hunozobaka, auzodzimwi.”

Chi. 1:12

Azvironzi chiro kwomuri here, imwimwi mweshe munopinda ngenjira? Ringirai, muone kuti kuripo here kutambudzika kukuru kwakadai ngokutambudzika kwangu, ukwo kwakaitwa kwendiri, kwaakanditambudza ndikwo Mambo Mwari ngezuva roushungu hwake hukuru.

Chi. 5:2

Nhaka yedu yapuwa kuvapara, nemhatso dzedu kuvanhutu.

Ezek. 21:31

Ndinozodurura padera pako ushungu hwangu nomuriro woushungu hwangu ndinozofuridzira padera pako. Ndinozokuisa munyara dzevanhu vakashata, ngwazi dzokuuraya.

Ezek. 7:24

Ndinozounza madzinza akapinda kushata kuti vatore nhaka yemhatso dzavo. Ndinozogumisa manyau evakagwinya, nendau dzavo dzakachena dzinozosvipiswa.

Dhuto. 28:25

Mambo Mwari unozoita kuti munyiswe pamberi pemagaa enyu; munozobuda kuenda koorwa navo ngenjira imwe, mwechizobva pamberi pavo ngenjira nomwe. Munozoita vanonyenyiwa ngemadzinza enyika dzeshe.