Jer. 16:12 - Bhaibheri Rakachena muChindau

¹² nendaa yokuti mwakaita kushata kukuru kwakapinda kwemadzibaba enyu; ngokuti, ringira, munohamba umwe ngaumwe, kuteera kukonza kwomwoyo wake wakashata, nokuramba kupurutana kwendiri.

Jer. 16:12 Iomraidhean Croise

Gen. 6:5

Mambo Mwari wakaona kuti kushata kwevanhu kwaiya kwakura munyika, nokuti kukarakadza kweshe kwemipinimidzo yomwoyo yavo kwaiya kwakashata nguva dzeshe.

Gen. 8:21

Naapo Mambo Mwari wakafemba gwema rakanaka; naMambo Mwari wakati mumwoyo mwake, “Andichazotukizve mavhu ngendaa yomunhu, ngokuti kupinimidza kwomwoyo womunhu kwakandoshata kubvira muudoko hwake; zve, andichazoparadzizve zveshe zvinopona kudai ngezvendaita.

Muchu. 8:12

Kunyazwi mushaishi unoshaisha mikuwo iri zana, nokurebesa mazuva ake okupona asi ndinozia kuti zvinozonakira avo vanomutya Mwari, ngokuti vanoema mukutya pamberi pake.

Muchu. 9:3

Uku ndikwo kushata kuri pakati pezviro zveshe zvinoitwa pashi pezuva, kuti chipo chakatodzana chinoitika kwevari veshe! Zvakanyadaro, mwoyo yevanhu yakazara ngokushata; upengo huri mumwoyo mwavo apo vachapona, ngesure kweizvo vanoenda kunevakafa.

Jer. 13:10

Ava vanhu vakashata vanoramba kuzwa mazwi angu, vanohamba ngemisikazwa mumipinimidzo yomwoyo yavo, vechiteera zvimwari zvimweni kuzvishandira nokuzvidira, ndivo vanozodai ngebhande iri risikachadetseri chiro.

Jer. 17:9

Mwoyo unochengedza kupinda zveshe, wakashata yaamho; ndiani ungauzia?

Jer. 18:12

Asi vanoti, ‘Azvidetseri chiro! Isusu tinozoteera urongwa hwedu, nesu umwe ngaumwe wedu unozoita kudai ngokukonza kwomwoyo wake wakashata.’ ”

Jer. 22:28

Uyu munhu Khonia hari yakaputsika inoshoorwa here, chidziyo chisikadikanwi ngomunhu weshe? Vanorashwa ngenyi, iye nomubarirwana wake, navo vanorashirwa munyika yevasikazii?

Jer. 7:24

Asi avazi kupurutana nokuti kukotamisa nzee dzavo, asi vakahamba mukuona kwemipinimidzo yemwoyo yavo yakashata, vakahwirira sure, avazi kuenda mberi.

Jer. 7:26

asi avazi kupurutana nokuti kukotamisa nzee kwendiri, asi vakakonzisa mitsipa yavo. Vakaita zvakashata kupinda madzibaba avo.

Jer. 9:14

Asi vakateera kukonza kwomwoyo yavo; vakateera vanaBhaari, izvo zvevakadzidziswa ngemadzibaba avo.”

Chi. 5:7

Madzibaba edu akashaisha, apachina; nesu tatwara zvishaishi zvavo.

Ezek. 20:30

Ndizvo ronza kumhatso yaIsuraeri kuti, ‘Izvi ndizvo zvinoronza Mambo Mwari, Mwari: Munozodzisvipisa kudai ngemiitiro yemadzibaba enyu here? Nokupauka kuteera zviro zvavo zvinonyangadza here?

Amo. 2:4

Izvi ndizvo zvinoronza Mambo Mwari: “Ngezvipauko zvitatu zvaJudha nezvirongomuna, andizopetudzi kuororwa; ngokuti vakaramba mipango yaMambo Mwari, navo avazi kungwarira zviemeso zvake, asi vakapauswa ngemanyepo amwewo, awo akateerwa ngemadzibaba avo.

Mar. 3:7

Kubvira kumazuva emadzibaba enyu mwakapauka kubva kuzviemeso zvangu, amuzi kuzvingwarira. Petukai kwendiri, neni ndinozopetuka kwomuri,” unoronza Mambo Mwari wehondo. “Asi munoti, ‘Toita mapetukirenyi?’

Marku 7:21

Ngokuti mukati mumwoyo yevanhu kunobuda mikarakadzo yakashata, kuhura, kuba, kuuraya,

Dhuto. 29:19

Avo veshe vanozwa aya mazwi emhiko iyi, vechidzifumisa pachavo, vechipinimidza mumwoyo yavo, “Takangwaririka kunyazwi techihamba munjira dzedu dzemisikanzwa” (ndizvo vechiunza madambudziko panezveshe zvakaoma nezvakapfaa.)

Dhuto. 9:27

Karakadza varanda vako, Abrahama, Isaka naJakobe; usaringira munzinini waava vanhu, nokuti kushata kwavo, nokuti kushaisha kwavo,

2 Tim. 3:13

Asi vanhu vakashata nevanochengedzera vanozoangira kupinda kushata, vechichengedzera nokuchengedzerwa.

Vahebheru 3:12

Ngwarai, hama, kuti kusazoapo naumwe wenyu unemwoyo wakashata usikatendi, unofuratira kubva kuna Mwari unopona.

Vato. 2:19

Asi apo mutongi afa, vaihwirira sure, nokudzishaishira kupinda madzibaba avo, ngokuteera zvimwari zvimweni nokuzvidira nokuzvigwadamira. Avazi kurekera kubva kunezviito zvavo, nokuti kubva kunjira dzavo dzomutinini.

1 Sam. 15:23

Ngokuti kumukira kwakadai ngechishaishi chouroyi, nokusikazwa kwakadai ngokushaisha kwokudira miedzaniso. Ngokuti iwewe wakaramba izwi raMambo Mwari, iye wakakurambawo kuti usachaita mambo.”