Wahyu 2:3 - ALA WENE HIVIS DIRUP WATUGWA

³ Eke, An ninis adigat yi awi ndi awi wigak yupwak yiluk, ogarit lendagwi andi vaga anggin-mbanggin okbigigik lagusigik, henendawi wadokdek hora yiluk wugu dugwit, sakdida okhinipu hegek mondok hunik adigat ogarit lendagwi ako andi, An nilup.

Wahyu 2:3 Iomraidhean Croise

Markus 15:21

Wolok wulu wagu lagagwarik, ap ambi inis Simon awi Kirene menda Alesander Uruvus enasin ako andi, weram en endawi ugun o kota akoma nunggu wagyama, avuk agu lagagwarik, enane anye vaga, “Yo winik yi wolok lau,” yiluk, vanggorogo yugugu lagagwarik,

Lukas 14:27

Henagyo winik hedelok An ninim warup embetetek hiniselok andi, An nane welagwi menda arusogom mondok dek o.”

Lukas 18:1

Anderogo yugirigya lagagirik, avakwa anggon-mbanggon okbigitek samban adigat ogagu dogopwak yiluk, Yesus en wene wakhegek yi At ane welagwi menda ako yugirigya dugwit,

Lukas 21:19

henendawi wadokdek dogomwi vaga Ala en henagap wendarisogon,” yiluk, yugeragagi.

Lukas 5:5

Wombabalales yugirigya lagagimu, Simon en, “Ai, Nasin. O hup en wombanggusat ninigik o yanggo yagas ambiat ogo mondok watitek-at, ovara, yuknirigindikmu, wombaba lasogom o.”

Lukas 8:15

“Eke, awi wen mudis vaga wombagagi ako andi, it avakwa wene hobaluk enendawi eve sek vaga wugu lagarwik, hunik adigat ogagu dugwit, enggen yiliga ako aro,” yiluk, yugeragagi.

Yohanes 15:21

At lakbani wagagi ako it inunggutmu, weyak okhinivusogom ako andi, adem An vaga-at okhinipu dogosogom.”

Oroma 12:12

“Ala sek ogarisogon,” henape wenggelek dugwit, adenggen umbutwi, anggin-mbanggin henovaga agya hegek henendawi wadokdek dugwit wugwi, samban ogarup hekbagetek ndugurek-ndagarek ogagwi, ogagu dogones.

Oroma 16:12

It akwa Seripena Seriposa iperen Nenowa Inis Ombok inim hunik dugwit, eyavup ogasagwi ako inim, narup Perisis ogo Nenowa inim hunik dugwit, ake musek-hasek ogasiga ako inim, wa yugeraliga.

Oroma 2:7

It avakwa ninen sek umbutu dugwit, “Ala en At abinak menda woknirigya, nenagayuk wutu, iniluk mondok dogop menda woknirigya, ogarupwak ai,” yiluk, enendawi sagain vaga hora yiluk, mbup yegetek sek adigat ogarit lendagwi. It avakwa anderogo ogasagwi ako, Ala en iniluk mondok dogop menda wogerayogon.

Oroma 8:25

Ovara, ninil hegetek menda hasogom yiluk, nenape wenggelek agurik halok, nenendawi mondok hora yiluk, sok helagwi.

1 Korindus 13:7

It avakwa enendawi hunik okbiselagwi ako andi, weyak okbugusigik ovara, enendawi wadokdek dugwit wugwi, enendawi Ala ovaga vanggabaluk, avyarat umbutwi, yi menda ndi menda Ala yagagi ako vaga enendawi vanggabaluk wenggenggwis, yi menda ndi menda okligya halok, enendawi wadokdek dugwit wugwi, ogasagwi ako andi, dek agetek mondok hunik adigat ogasagwi.

2 Korindus 10:15

At Ala en, “O andoma yugeregek elales,” yiluk yukneregetek halok, ap adik en yugurugusigik Sek Wene wuguselok, “Nit nenaburi aro,” yiluk, yusogombuk. Andi ovara, hit avyarat ombasagwi ako mondok musek lendagwi vaga, henendawi hoda arit lagu hiniselok, nit yugeregek nagu dogop Ala en imbitigi ako andi, ambi inim ombok erogo mbigaliluk laup, “Ai,” ombasagwi.

2 Korindus 11:23

Iren “Keretus ayeloman dugwit, ake ogasagwi,” ombasagwi atma, an ogo, Keretus ayeloman mondok iya erogo ogasiga. Wene yi, ap nenek en yagalagwi ovagak yagaliga ovara, avyarat yagaliga atma, hunggu dogones. Keretus ayeloman dugwit, ake ogarit lagya neyagek, anggin novaga agya, heda marogo lembaga mabiselagwima mabanunggwis, narisagwi andi ininggis dinggilup meyan, hambup-at oknitya lagagi ovara, niluk agya, it nin andi madugat okbugu dugwit, an ako andi, mondok iya erogo okbanunggu lagagwa.

2 Korindus 4:1

Anderogo atma, At Ala aigwak aberen, nit At eyavup yi ogagu dogoguluk andok okbininggigirikmu, nit nenendawi uwa betaluk, mbuverek dogosogombuk.

2 Korindus 4:16

Anderogo halok, anggin nenovaga asiga ovara, nit nenendawi uwa betaluk, mbuverek dogosogombuk. Ogarit lagu dugwit, nenagamut ndaik arit nunggwisiga vaga hambup ovara, nenendawi ako andi, hutun-howam niniluk swi menda okbinilin nunggwisiga.

2 Korindus 5:9

Anderogo atma, neneyave yi, hambegetek dugwit, sek-weyak ogagu lagagup ako, Keretus en hivis nenowak dilogo onggo wane-wane wokneragiluk, nit ovok erogo At adema wonggalogo bininayogon. Anderogo atma, neneyave yi, niniluk dugwit halok, hambugu dugwit halok, Keretus endawi sek ombarupwak yiluk adigat ogarit laup ombasagwi.

2 Korindus 6:5

Avakwa en yo yawi vaga ninitwis, heda marogo lembaga mabinunggwis, it ap ovok en enane wonggalogo ninitwis, ogasagwi. Okninipusigik, sakdida okninipu, nogo sek erogo yup ako dek agya, erom nenendawima uvup okninipu, okninivisiga.

Nggalatia 6:2

Anggin ombok ambi henovaga agya halok, yonggat-yonggat ogagu dogones. Andi ogasagwi vaga Keretus en yukneragagi wene ako ndatak-at ogagu dogosogom.

Nggalatia 6:9

Anderogo atma, nit yi sek ndi sek ogarit lagu dugwit, sakdida okninipu hegek, hekbagetek ogarit lagu dogosogom. Hekbagatek mondok segerogo ogarit lagu niniselok, enggen yugup sek menda mbalhedelagwi ako wane-wane, nit onggo woknerayogon ako ninilup aro.

Pilipi 2:16

At Keretus warup amor ari wagya andi vaga, “An vupuk lagya, an nova dambi-dambe oknitya hegek ogarit lagya, ogagya lagagis ako andi, enam warogo ogagya lagagibuk, segat ogagagis ai,” imbita dugwit, nadenggen hagiluk, wene niniluk okninivisiga wene ako, hit des erogo vagago dogones.

Pilipi 4:3

Eke, hat naswe Sundugos ogo, niperen Ala eyavup ndatak ogasagwi menda atma, it akwa mberen andi, yonggar-inipu dogwen. It akwa andi, ap Kelemen ogo, it an naswei nin Ala eyavup ninim ogasagwi ako ogo, Sek Wene wigalarupwak yiluk, ninim musek-hasek ogarit nagu lagagwa atma, Ala ambuku it avakwa mondok-mondok iniluk okbisaup ininis dirup warek agarik ako, it ogo ininis ovok dirup warek agarik.

Kolose 1:11

It Ala aburi ake enek ako, Ala avema abinak adigat agarikmu dugwit, nano menda vipuk erogo bogogogi hedapwak yiluk, imbitigi ako, ninim wane-wane hedaguluk, endawi hologo bininggigirikmu, anggin-mbanggin henovaga agya halok, henendawi horaik wadokdek dugwit, henadenggen vaga, “Nenasin Ala wa,” yiluk, wugu dogovovok yiluk, samban ogasagwi. Hit henendawi horaik dugwit, wugu hinigik, At mondok winimen siyalek agarik anye vaga yi menda ndi menda ogasiga akoen, hit wane-wane anye okbugugu dogopwak yiluk, henake samban ogasagwi.

1 Tesalonika 1:3

Hit Yesus ovaga vanggabaluk avyarat umbutu dugwit ogarit lagwi, avakwa henendawi hunik en sek okbigik lagwi, eke, Nenowa Inis Ombok Yesus Keretus Ala en denogo lakba wagagi ako vaga vonggabaluk wenggelek werekma, anggin henovaga agya hegek henendawi wadokdek dugwit wugwi, ogasagwi ako andi, o ndugurek-ndagarek nenape wenggelek dugwit, Nenasin Ala yugisagwi.

1 Tesalonika 2:9

Ai, nowa-nasin. Nit ogarit adigat lagu dugwit, nenanyedek erogo bininggigi ako andi, henape wenggeles. Sek wene Ala en yukneragagi ako yukhirugu dugwit, “Hit ambi anggin henovaga bugugu saoen,” umbutu dugwit, niren hit henadema ambi nggino yukheregetek, ata, o hup-dingga nenadik neneyavup okhedegek nagu lagagup.

1 Tesalonika 5:12

Ai nowa-nasin. It ap Ala aburi enasini henanggelekma enanyedek erogo okbugugwis, Nenowa Inis Ombok inim hunik dugwit vakhenombogo welagwi, eke, mbilape yukhirugwi, ogasagwi ako enagayuk wutu dogovovok yiluk, yukherelagwi.

2 Tesalonika 3:13

Ai nowa-nasin wa. Hit andi, sek okbigik lendagwi ako henanggon okhinipu halok, “Nenanggon,” ombarubuk.

2 Tesalonika 3:5

At Ala en yi avakwa ndi avakwa endawi hunik oginivisiga ako hinilup okbugugu, eke, Keretus anggin-mbanggin ovaga agya hegek, endawi wadokdek dugwit wogogi ako ndatak, hit ogo anderogoat henendawi wadokdek dugwit wugu dogovovok yiluk, okbugugu, Nenowa Inis Ombok en ogagya dogopwak o.

2 Tesalonika 3:8

Nit hit hinim dugwit, henagarom onggodek un nunggu lagetek. Nit andoma wagu lagagurik, hit anggin ambi inim henovaga bugugu ninisaoen, nenagarom namunda nggino yukheregetek hutun-howam nininggis vaga adigat okhedegek nagu dugwit, nenanyedek erogo bininggigi ako hinilup aro.

1 Timotius 4:10

At Ala mondok iluk itok agarik ako, yi avakwa ndi avakwa ovok erogo enagap wendarup yiluk ombasiga ovara, nit nenendawi Yesus ovaga vanggabaluk avyarat ombasagwi andi nenagap wendarisiga. Andi vaga nenendawi vonggabaluk wenggelek agurik atma, dilwatu dugwit, hunik adigat ogarit lendagwi.

1 Timotius 5:17

Ala aburi enasini enavok ambi yisogon. It ap Ala aburi enasini enagayuk werek ovara, sek erogo vagenombogo iniselok, ambi inim onggo enagayuk wurup andi sek aro. It Ala wene ombok vaga yugurugwi, wene mamulirugwi, mondok hunik adigat ogaguselok andi, evenuk ambi inim onggo enagayuk wutu dogopwak.

Iberani 10:36

Ala wene vaga dirup ambi yerogo warek agarik: “At warup ako andi, aburuk erogo dukluk warisogonbuk. At mbikirat warisogon atma, it An naburi enendawi eve sek adigat akoen enendawi novaga vanggabaluk avyarat numbutuselok andi, iniluk-at dogosogom o. Eke, it avyarat nombasagwi ako hekbanungguselok andi, An sek enombarisogonbuk,” yiluk, dirup warek agarik atma, Ala en hit ogagu dogop hinimbitigi ako, mondok ogagu hiniselok, wokheraup yagagi ako wokherapwak yiluk, weyak okhinipusigik ovara, henendawi wadokdek dugwit, wugu dogones.

Iberani 12:1

It avakwa enendawi Ala ovaga vanggabaluk, avyarat umbutu dugwit ogagu lagagwa yigyo akoen, “Nit ogagu lagagup ako wane-wane ogagu sami a, dek a?” yiluk, eneyave apik homago walinek inil vurek agarwik ovagak atma, nit sup hupuk lagu dugwit, nenanyedek agya haoen, yi menda ndi menda nenovaga durik agarik ako inim, weyak ogarup nenendawi hunik umbutu dugwit yidilogo bininaliga ako inim, ovok erogo nggolalogo mbobagu dogosogom. Mbobaluk, “Hupuk andi hudi mendek yilales,” yiluk, yukneragagi ako, nenendawi mondok wadokdek dugwit, hupuk mendek yilagu dogosogom.

Iberani 13:13

Anderogo atma, At o kota werama nenake hambigiluk lagya hegek wiyiknom-weyaknom erogo bagu lagagwa ako hak, nit ogo anderogo wane-wane wiyiknom-weyaknom erogo bininggusigik, At adema o kota werama-at wulusogom.

Iberani 6:10

Hit Henasin Ala andi, atma nggedok ogasiga menda atma, hit henendawi hunik en At eyavup ogarit lagu dugwit, henaswei Ala aburi yonggar-inipu lagagup inim, yogak ao yonggar-inivisagwi inim, At inggut arisogonbuk.

Iberani 6:12

Ala wene musek laup henovaredam okhinivisiga andi, nit nenanggon. Ata, Ala en it avakwa, “Anderogo okbigigayogon o,” yiluk, wene avok yugeragagi ako, avyarat umbutu dugwit, enendawi sek mondok hora yiluk welagagwa vaga, ndatak okbogogi ako hak, hit anderogo wane-wane dogop henombasagwi.

Iberani 6:15

Yugugu lagagimu, Averakam en, “Avyarat woknisogon o,” yiluk, endawi mondok hora yiluk, abyam welagagimu, avok yugogogi akoat wogogi.

2 Peterus 1:6

Eke, yi wene ndi wene hinilup okhidugu dugwit, henendawi werek okhidugu dogones. Eke, henendawi werek okhidugu dugwit, anggin henovaga agya hegek, henendawi wadokdek dogop okhidugu dogones. Eke, henendawi wadokdek dogop okhidugu dugwit, Ala endawi ombasiga menda ogaruguluk, okhidugu dogones.

Wahyu 1:9

Hit anggin-mbanggin henovaga bugugusigik ovara, “Ala avema bininggigi atma, sek aro,” yiluk, Yesus hinim hunik henendawi wadokdek dugwit, welagwi. An henaswe Yohanes ogo, anderogo wane-wane anggin-mbanggin okbanunggusigik, wigya lagagis. Andi, anen Ala wene yukhirigya, eke, Yesus wene iri lagagi ako vagalogo yukhirigya, ogasiga ako vaga, ilim is enggema o inis Vatmos bani wagagwa andoma welagagis.

Wahyu 3:10

Eke, ‘Hit henendawi wadokdek horaik dugwit ogagu dogones,’ yiluk, yukheragagis ako, hobaluk des erogoat ogasagwi atma, hivis yi avakwa ndi avakwa wen vaga agarwik ovok erogo enavut mbaligen yiluk, anggin-mbanggin enovaga bisa warup ako vaga, hit An naburi andi, henovaga arugwi en yiluk, Anen hinim dogosogon.