1 Peterus 3:9 - ALA WENE HIVIS DIRUP WATUGWA

⁹ At Ala en adenggen henovaga bigigagiluk, heneyanggup yukheragagi atma, avakwa en weyak okhinipuselok, hiren weyak onggo enovaga bisabuk. Eke iren wiyiknom-weyaknom erogo yukhiruguselok, hiren onggo wiyiknom-weyaknom erogo yugerabuk. Ata, it weyak okbigigelagwi ako sek okbugu dogones.

1 Peterus 3:9 Iomraidhean Croise

Matius 19:29

An ninis ombok arupwak yiluk, henawi valek inim, henowa-henaot inim, hinisa-henasin inim, henabut-henogwa inim, heneyavup ogarek inim, ovok erogo hekbaluk wagu hiniselok, avoloma heda nggeralogo 100 hudi wokhirigya dogomindik, mondok-mondok hiniluk dogovovok yiluk, okhinivisogon o.

Matius 25:34

“Ogagya dogogurik, An neve ninis ombok akoen, it avakwa ninggis amotkan bisagwis ako yugirigya dugwit, ‘An Nasin adenggen henovaga bigigirikmu agipik o. An erom uvup werekma, hiren erom woknugwis, is uvup werekma, is woknugwis, ap huru werekma, woknitwis, nasum yirikdek werekma, yum yikbanunggwi, aup warek werekma, bikneya wagwi, An heda mago werekma, hit nadoma wagwi, ogagu lagagup. Anderogo atma, An Nasin en o mbogot wen ao wakhegetek hegek, hit hininis werek ombok dogovovok yiluk, mavorangge hak bigigis ako wane-wane, hit mondok siyalek dogovovok yiluk, omanes.’

Matius 5:39

Anen andi, yerogo yukheraliga: Weyak okbuguguselok, onggo enarup moga. Henelagandin venak amot vikit hinituselok, venak inim henarupwak yiluk, enakbetaup.

Matius 5:44

Anen andi, yerogo yukheraliga: Henasin mbogot vaga menda akoen mo il andok dugwit, it avakwa mondok weyak menda inim, sek menda inim, enovavut hwalek inim, enovavut hwalekdek menda inim, ovok erogo enabwa en sek okbugu dugwit, enagarom sek arupwak yiluk hivi wogirigya, musu wogirigya, ogasiga atma, Henasin mbogot vaga menda aburi arovovok en, it hinim ogorek agipik ako henendawi hunik oginipwis, eke, it anggin-mbanggin okhinivisagwi menda ako, enake samban ogagwi, ogagu dogones o, yiluk, yukheraliga.

Markus 10:17

Enovaga bugu lagagirik, sup ambi inim lagiluk ogagya lagagimu, ap ambi At adema vupuk wagya lagagirik, erambo yunggubaluk Yesus yugugu dugwit, “Ngguru. Hat sek adigat agindik yi, Hat sek adigat agindik yi, an mondok-mondok niluk dogogiluk, nggarogo ogarik?” yiluk, yugogogi.

Lukas 10:25

Andien, hivis ndugwis ambi vaga ap Ala wene vagago welagagi menda ambien Yesus avut mbaligiluk, wagya lagagirik, yugugu dugwit, “Ngguru wai. An mondok-mondok niluk dogogiluk, nggarogo ogarik?”

Lukas 18:18

It ap Yakuri enasin ambien Yesus yugugu dugwit, “Ngguru wai! Hat sek adigat agindik yi, an mondok-mondok niluk dogogiluk, nggarogo ogarik?”

Oroma 12:14

Avakwa nin en anggin-mbanggin okhinipuselok, homan enovaga bisabuk. Ata, Ala en adenggen enovaga bisapwak yiluk, yugugu dogones.

Oroma 12:17

Weyak onggo-onggo ogagu dogobuk. Ata, avakwa en sek ogarup ombasagwi ako adigat ogagu dogones.

Oroma 8:28

Nit Ala endawi ombasiga wane-wane ogagu dogoguluk, neneyanggup yukneragagi ako, At ninim nenendawi hunik niniselok, yi menda ndi menda ogasagwi inim, okbininelagwi inim, andi ovok erogo Ala en nit sek ogarup ambi haguluk, okbininggya helagwi.

Oroma 8:30

Nit endaklagatek ninigik mikninipu lagagirik, denogo bininggigi ako At neneyanggup yukneragagi. Eke, neneyanggup yukneragagi ako Aren, “Hit mondok sek,” yiluk, wokninipigi. Eke, wokninipigi ako At ninim siyabininggigi.

Nggalatia 3:14

At Yesus Keretus ogagagi ako andi, Ala en Averakam adenggen ovaga bagagi ako, it avakwa weram Yakuri dek menda inim enendawi adenggen ombarupwak yiluk, ogagagi higyo. Eke, At nenavoloma hombagagi ako andi, At Ala en “Ala Averiniki wokherayogon,” avok yukneragagi ako, nit At ovaga vanggabaluk avyarat ombasagwi vaga, wokneraliga.

Evesus 4:32

Hekbaluk, hinim nabwa-habwa ogagu dugwit, henendawi sagain vaga at ambien at ambi sek okbagek ogagu dogones. Keretus ogagagi ako vaga Ala en hit henomaduk degerogo bagagi ako wane-wane, hikirat weyak okhedelagwi ako, hinunggut erogo hekbagu dogones.

1 Tesalonika 5:15

Weyak onggo-onggo ogagu hinisaoen, dibatugu dogones. Hikit inim, it avakwa ovok erogo inim, sek adigat ogagu dogopwak yiluk, dibatugu dogones.

Iberani 12:17

Ninggya lagagirik, andien hivis, endawima asam higya dugwit, “Nasin amunggat woknirup nanggon yigi ako, woknirupwak ai,” yiluk, yup yagya dugwit, hivis ambi hedagiluk, wal okhagagi ovara, “Waup nanggon,” imbitigirikmu, asin en Esau hekbagagi-at helagwi.

1 Peterus 5:10

At endawi hunik en okbininaliga adem andok Nenasin Ala akoen, Keretus ninim hunik agurik vaga, At winimen siyalek agarik ako ninim wane-wane mondok-mondok winimen siyalek-at dogoguluk, nenayonggo bagagi. Eke, hit sidogat yagan watu hiniselok, Nenasin Ala en henovavut ap-at okbigigu, henendawi modo okhinipu, henanye erogo bigigu, henendawi wadokdek dogovovok yiluk okbigigu, ogagya dogosogon.