1 Peterus 2:7 - ALA WENE HIVIS DIRUP WATUGWA

⁷ Hit avyarat ombasagwi menda akoen, “Helep andi, nit nenake-at okbagagirikmu, mondok idi-at agarik,” yiluk, dibelagwi. Ovara, it avakwa enendawi avyarat ombasagwidek menda akoen, Ala wene ambi yi, it vaga atma asiga: “Hit o valisagwi menda akoen helep vaga vanggu dugwit, helep ambi mbobagagwa ako, mondok-mondok helep owak ndalaga o,” yiluk, dirup warek andiat agarik.

1 Peterus 2:7 Iomraidhean Croise

Matius 21:42

Yugugu lagagwama, Yesus en, “Ala wene dirup warek ambi yi: ‘It helep vaga o valisagwi menda akoen o vanggu dugwit, helep ambi mbobagagwa ako, mondok-mondok helep owak ndalaga o. At Nenasin Inis Ombok en ogagagi atma, mondok iya adigat hugu lagurik, vok yagalagwi o,’ yiluk, yagagi dirup warek ako hit bikhegetek agipik yi?”

Lukas 2:34

Vok yugusigik, at Simeon akoen adenggen isa-asin enovaga bisapwak yiluk, Ala yugogogi. Yugugu lagagirik, At isa Maria ako yugugu dugwit, “Avyak yi, it avakwa Iserali menda wisane mondok okbugu-sovabugu, ogagya dogopwak yiluk, At Ala en denogo bagagi. Avakwa inilup arupwak yiluk, denogo bagagi hegek, avakwa wisane, ‘Nenanggon o,’ yiluk, yugwi ako vaga

Lukas 20:17

Yugugu lagagwama, At Yesus en it biginigu lagagirik, wene yugirigya dugwit: “‘It helep o valisagwi menda akoen, o vanggu dugwit, helep ambi mbobagagwa ako, mondok-mondok helep owak ndalaga o,’ yiluk, yagagi Ala wene dirup warek ako andi, nggarogo yiluk dirup warek agarik ombasagwi?”

Yohanes 4:42

Avyarat umbutu lagagwarik, iren hwa ako yugugu dugwit, “Yogak nit nenendawi At ovaga vanggabaluk avyarat ombasagwi ako, hat yukneregen andi vaga adigat dek. Ata, niren At ane nenaruk hunggu lagurik, ap yi avakwa wema menda enagap wendarisiga menda avyarat ninilup agyo. Andi vaga nenendawi At ovaga vanggabaluk, avyarat ombasagwi o,” yiluk, yugogogwa.

Lakbogogi Wene 26:19

Yugirigya lagagirik, Paulus en ambi inim yugirigya dugwit, “Nasin Agiripa. Mbogot vaga en an nogo heda nabi heda sigam yuknugu hagagis ako, an ogagetek agirikbuk.

Oroma 10:21

Anderogo ovara, it Iserali menda halok andi, Ala en yugirigya dugwit, “It avakwa enendawi helep ovagak dugwit, nane ogarup enanggon ombasagwi yi, nadoma warupwak yiluk, o hutun en mbikit, o hup, ‘Omanes o,’ yiluk, An ninggis yamok yukheraliga ovara, mondok dek aro,” yiluk, yugeragagirikmu, Yesaya en yugeragagi.

Oroma 15:31

It avakwa Yudea menda enendawi avyarat embetetek menda akoen an natu saoen, sup hurikmu laigen yiluk, nake samban ogagu dogones. Eke, it Ala aburi adik denek o Yerusalem agarwik enake wonggalek wogonombolok landiga ako, enendawi adenggen vaga hedapwak yiluk, enake samban ogagu dogones.

2 Korindus 2:16

It avakwa enelokwe degerogo bisaliga akoen amben ako hugu lagarwik, “Amben yi ap vidis amben ovagak,” yugu dugwit, hekbaluk hambit lendagwi. Eke, it enagap wendarek akoen andi, amben hugu lagarwik, “Niniluk okbininaup menda yiat higyo,” yiluk, welagwi atma, iniluk-at dogosogom. Ala en nit avakwa enanggelekma dugwit amben sek menda anderogo dogop imbitigi ovara, nirenen ogarup mondok meyan okninivisiga o, avyak!

Kolose 2:10

Eke, hit Keretus hinim hunik agipik atma, hit ogo henendawi ovok dikduk okbigigirikmu, adik ambi inim okbigigaup mondok dek aro. Yi madis ndi madis mbogot avema o ilim yenam agarwik menda inim, malaikat enagayuk werek winimen menda inim, ovok erogo Keretus avema inigik, At adigat winimen siyalek agarik.

Titus 3:3

Nit ogo, muk anderogo ndatak, wes ovagak werekma, wene yuknirugwi ako hunggitek, sup adikmu nomalogo lagwi, ap ambi ayeloman yugugu halok, “E o,” yiluk, ogasiga andi hak, nit nenendawi ninggya halok ogarup nenendawi hogop ombasagwi ako adigat ogagwi, ogagu lagagup. Yi menda ndi menda ogarit lagu dugwit, weyak adigat ogagwi, naburuk-haburuk yugwi, naninis-haninis yugwi, andi menda adigat ogagu lagagup ovara,

Iberani 11:31

Hwa yanenggek Rahap ogo, endawi Ala ovaga vanggabaluk, avyarat imbita dugwit, it ap o bikhaguluk wagagwa ako, at endawi sek vaga woginipu lagagirik hwilak bogogi atma, hivis it ap Ala wene sovalogo bagagwa ako initu dugwit, at hwa ako adigat hekbagagwa.

Iberani 4:11

Anderogo atma, it Iserali menda endak Ala wene weyak erogo hekbagu lagagwama, sat yanggal hedelagwima nonggegetek ako hak, nit nin wane-wane nunggup dek agya haoen, nungguguluk, nenanye erogo walokhugu dogosogom.

1 Peterus 1:8

Hit Yesus hinil hegetek ovara, hegek, henendawi hunik ogagwi, eke, yogak At eyave hinil hegetek ovara, henendawi At ovaga vanggabaluk, avyarat umbutwi, ogagu dugwit, “Nit nenendawi avyarat ombasagwi vaga, nenagap wendarup ako atma asiga,” umbutu dugwit, henendawi adenggen ombasagwi ako andi, mondok eve iya erogo agarik atma, nggarogo yubuk erek aga.

1 Peterus 2:4

At Yesus eve helep iluk agarik menda ovagak andi, adema omanes. Helep ako segat hegek avakwa en “Helep andi weyak,” yiluk, hekbagagwa ovara, At Ala en andi, “Mondok segat hegek mbobagagwa,” yiluk, enogo bagagi.

1 Peterus 2:8

Eke, Ala wene ambi iri dugwit: “Helep andi vaga it avakwa inisogavit denggwes erogo yakhidugu dogosogom o,” yiluk, yagagi dirup warek ako andi, it avakwa enendawi avyarat embetetek menda akoen, Ala wene wokbaluk ogarit lagetek iniselok, inisogavit denggwes erogo yakhedelagwi ako At Yesus-at, yiluk, helagwi. It anderogo ogagu dogopwak yiluk, Ala enat imbitigi ovara,