1 Peterus 2:5 - ALA WENE HIVIS DIRUP WATUGWA

⁵ Hit ogo andi, helep iluk menda ovagak, At Ala en At awi valek hit vaga valhedaliga. Andi en hit Yesus Keretus hinim hunik dugwit, it ap imam-imam en Ala awi valekma Ala ake warogo belagwi hak, hit ap imam-imam At ake enek menda ovagak dugwit, Ala endawi hogop ombasiga menda At ake ogagu dogones o.

1 Peterus 2:5 Iomraidhean Croise

Oroma 12:1

Andi halok, ai, nowa-nasin. At Nenasin Ala aigwak aberen ombok erogo okbininggigi. Anderogo atma, Ala ake warogo belagwi hak, hit heneyave hiniluk dugwit, Ala ake adigat ogarit nagu dogoguluk, heneyave ovok erogo Ala ake denogo betavovok yiluk, an nendawi “Ai,” imbita dugwit, yukheraliga. Andi ogarusogom vaga Ala en, “It yi avyarat ninis siyabanunggu hinigis,” yiluk, adenggen hinimbita dogosogon.

1 Korindus 3:16

Hit Ala aburi andi, Ala awi valek atma, Ala Averiniki henanggelekma hinim agarik ako hinunggut a?

1 Korindus 3:9

Niperen andi, Ala ninim hunik dugwit, At eyavup ogasagwi menda. Eke, hit andi, Ala eyavup ogarek inim, At awi valek inim, andi hirat agipik o.

1 Korindus 6:19

Hit heneyave andi, Ala Averiniki awi valek agarik ako hinunggut? At Ala en onggo ombok vaga henonggo mbanggya lagagirik, Ala Averiniki wokheragagi henendawima werekma, hit heneyave andi, hit henangge dek. Ata, At Ala angge atma, At inis ombok arupwak yiluk, heneyave vaga sek adigat ogagu dogones.

2 Korindus 6:16

Ala awi valekma en ogasagwi inim, madis awi valekma en ogasagwi inim, andi iperen wane-wane ogasagwi atma yiluk yagalagwi? Nit neneyave andi, Ala iluk agarik awi valek agurik. At Ala en iri dugwit: “An enendawima dugwit, enanggelekma nagu dogosogon. It An naburi-at agwi, eke, Anen it Enasin-at agya, ogarisogon,” yiluk, yagagi.

Nggalatia 6:10

It yi avakwa ndi avakwa ovogat sek okbisaup, “Nanonggal agarikmu,” yiluk, sek okbigik lagu dugwit ovara, it nenasweimuni wane-wane avyarat ombasagwi halok andi, mondok sek okbugu dogones.

Pilipi 1:11

Yo enggen eve mondok sek yilin landiga andi hak, Yesus Keretus okbigigu hegek henovavut sek adigat ogarit lendagwi ako vaga avakwa en inil hinugu dogomundik, Ala inis adup ogagwi, wogobagwi, ogagu dogosogom o.

Pilipi 2:17

Hit avyarat umbutu dugwit heneyave ovok Ala wogokluk, At ake ogarit lendagwi ako andi, Ala ake warogo wogisagwi hak atma, segat. Eke, an ogo Ala ake inim, hit henake inim, ogagya neyagek, an vage narup imbita dugwit, anggur agas Ala ake yiluk ndilhelagwi hak atma, andi ogo segat ombasiga. Andi halok, hit hinim nenendawi adenggen wisane agurik.

Pilipi 4:18

Hit wokniri wagagup ako, ovok erogo wogogis atma, dek agetek agarik. Hit an nake bago ap Epavoroditus en woknirupwak yiluk lakbani wagagup ako, wokniri wagya lagagimu, wigya lagagirik, agako higirogo bagetek ao dek agetek agarik. Ala ake bago hali hunggusigik amben sek halok Ala en, “Sek woknigao,” yiluk, endawi adenggen ombasiga hak, hit woknogogup ako anderogoat Ala endawi sek ombasiga.

Kolose 3:17

Keretus henabwa en henake ogasiga atma, Henasin Ala, “Wa,” yiluk, hai watu dugwit, henane yagalagwi inim, ogarit lendagwi inim, ovok erogo Nenowa Yesus inis ombok arupwak yiluk, adigat ogarit lagu dogones.

Iberani 3:6

Keretus andi, Asin Ala awi valek andok Abut atma, des erogo anderogoat ogasiga. Eke, nit andi, nenape wenggelek nenendawi adenggen ombasagwi ako, hekbagetek nenanye erogo mondok wadokdek vagago-at agurik halok, Ala awi valek andi, nit neneyave-at umbutu dogosogom.

1 Peterus 2:9

hit andi, o hwiserekma welagagup ako hekbaluk, At Ala en At o awiya eve mondok iya-at agarikmu akoma dogovovok yiluk, henayonggo bigigu lagagirik, At mondok sek ogasiga menda sigam erogo yugurugu dogovovok yiluk, enogo bigigi. Aren “Hit An menda aro,” yiluk, enogo bigigu, imam-imam ovagak dugwit, At Nenasin Inis Ombok ake ogagu dogovovok yiluk mendek okbigigu, “Hit An naburi nake sek adik enek dogogup o,” yiluk, enogo bigigu, eke, hit hininis unggul At inis unggul menda salogo bigigu, ogagagi.

1 Peterus 4:11

Yi ogagek ndi ogagek ogagu dugwit, Yesus Keretus inim hunik dugwit, At Ala inis ombok arupwak yiluk, hit ambien wene yugeraup ombasagwi halok, Ala weneat yugurugwi, eke, ambien avakwa yonggar-inipu dogop ombasagwi halok andi, Ala anye okbigigu hegek yonggar-inipwis, ogagu dogones. At Ala andi, anye wisane atma, mondok-mondok siyalek dogopwak o. Amin!

1 Peterus 4:17

At Ala en nit yi ap ndi ap ovok erogo nenowak dilnenavup vage amor ari wagarikmu, nit Ala aburi endak nenowak dinggu dugwit, At ane yugup wane-wane ogagetek dogosogom halok, onggo nenovaga bininayogon atma, it Ala wene Sek Wene ako mondok wegetek iniselok andi, enowak dinggitek hekbisayogon ombasagwi? Dek o. Enowak dilogo baluk, onggo anggin mondok iya erogo okbisayogon.

Wahyu 1:6

Eke, nit avakwa At avema dugwit, imam-imam hak At Asin Ala ake ogagu dogoguluk, denogo bininggigi. Anderogo okbininggigirikmu, At anye wisane atma, nit yi ovok erogo At inis adigat siyabagwi, At ane adigat hunggwis, mondok-mondok ogagu dogosogom o, yiluk, amin!

Wahyu 20:6

It enendak iniluk erogo mondok okbisaup ako, Ala ake denek dugwit, enendawi adenggen ombogat dogosogom. It andi, ndugwis mberen vaga hambusogombuk. It imam-imam ovagak dugwit, Keretus Ala iperen enake ogarit nagwis, eke, Keretus inim ininis ombok dugwit, avakwa wene yugurugwi, ogagusigik, 1.000 tahun-at agya higi.

Wahyu 3:12

It sanien An nane mbobagetek mondok enendawi wadokdek vagago dugwit, des erogo musek laguselok, An wagya dogomindik, o anye dogopwak yiluk, sirup ilim ngguvulisagwi hak, it avakwa andi, An Nasin Ala awi valekma anderogoat mondok okbisayogon. Okbisiluk, it Ala aburi yedok inisapwak yiluk, An Nasin Ala inis inim, An Nasin Ala awi valek o kota Yerusalem swi menda Nasin Ala mbogot vaga en wombaba wasogon ako inis inim, eke, An ninis swi salek ako inim, enadik-enadik enovaga dirup warogo bisayogon. Bisamindikmu, it hivis andoma en mondok wulusogombuk.

Wahyu 5:10

It avakwa ininis unggul adik-adik enanggelekma en hat hamuya vaga enonggo bagagin ako, Nenasin Ala avema bisiluk, imam hak At ake ogagu dogopwak yiluk denogo mondok okbigigindikmu, ininis ombok dugwit, avakwa wen vaga yagamu agarwik ako enavema bisiluk, ‘Yi ogares, ndi ogares,’ yugurugu dogosogom o,” yiluk, ndawi swi menda watao ako naruk hunggis.