1 PETER 2:5 - Ngawm Bible

⁵ Nangmuhte vang hung bok unna, a nungmi suang bangin Hawvang biakinn saknak tuk Pathian i manmi suang hi un. Mahlai ah thiampi thiangtho nadeh dek tuk uh ci; co takmi Hawvang biakpiaknak khi Jesuh Khrih hangin Pathian nelah pia tuk uh ci.

1 PETER 2:5 Iomraidhean Croise

1 KUMPI 7:11

Mah suang ngengpi humah a neulam le a ngenglam tehin ahmi suang le Sidar thing tuah tiang haw hi.

SAAM LABU 141:2

Ka thungetnak cu biakpiaknak ai-in sang inna, ka khut ka zakmi cu taaklam biakpiaknak ai-in, na sansak zalin hi.

SAAM LABU 50:14

Na lungdamnak uh hi Pathian lak a na piak uhmi biakpiaknak hi saw hen. Mahten piak tuk tin na tepsa uhmi hempoh cu Cungnungbel lakah pia un.

SAAM LABU 50:23

Ka lak a lungdamnak na langtik uhmi hi Ka min phatiktu biakpiaknak hi. Ka thu a zuitu hempoh cu pan hihim tung,” ti hi.

SUAHTULNAK 19:6

Noh cu keima thiampi nadeh ka dehtikmi miphun le miphun thiangtho hi tuk uh ci. Israel tei lakah hilhin,” ti hi.

THUPAUCAP 9:1

Cihnakin inn sa a, khuam salih phut hi.

ISAIAH 61:6

Nohte cu Topa i thiampi tihmi hi tuk uh ci. Miphun dang tei hauhnak cu ei tuk uh ci a, mite ultunnakin mang tuk uh ci.

ISAIAH 66:21

Amu sung pen mi khenkhatte cu thiampi le Levi mi in bawl tung hi.

HOSEA 14:2

Topa lakah kikleh unna, hi bangin thungen un: “Ka sualnak uh hempoh ngaidam zal inna; ka thungetnak uh sansakin, ka thutiamsa uh bangin pahcawi tuk ung hi.

MALAKHI 1:11

Leihum miphun hempoh ten keimah upat haw hi. Mun hempoh ah namtui haal haw a, co a takmi biakpiaknak pia in, keimah upat khawng haw hi.

ROM Khua Khristian Tei Lakah Paul i Laikuat (Paul’s Letter to the Romans) 12:1

Mahti bang a hih hangin ka u le naute aw, Pathian i hehpihnak hangin Pathian nelah na pumpi uh cu a nungin apmi biakpiaknak bangin pia un tin ngen ing. A nadehnakah pum a pia mi le a lungdamtiktu hi tukin sawm ing. Mahmi cu Pathian nelah na piak tuk uhmi biaknak tatak hi.

ROM Khua Khristian Tei Lakah Paul i Laikuat (Paul’s Letter to the Romans) 15:16

Gentail mite cu Pathian nelah cosan takmi biakpiaknak bang a hihnak haw tukin le Hawvang Thiangtho i thawmin Pathian lakah apmi a hihnak haw tukin Pathian lak pen a hengmi Thuthangpha ka phuan ten thiampi bangin dek ing.

1 KORIN 3:16

Nohte cu Pathian biakinn hi uh ci a, hawvang na sung uhah a um khi thei ma uh cim? Pathian Hawvang i umnak inn hi uh ci.

1 KORIN 3:9

Itahim titale ohte cu Pathian ca in nadek khawmte hung a, nohte cu Pathian nadehnak lo ngam hi uh ci.

1 KORIN 6:19

Na taksa pumpi uh cu Pathian i piakmi le na sung uh a nungmi Hawvang Thiangtho i biakinn a hihlam thei ma uh cim? Nohte cu nangmuta hi ma uh ci, Pathian ta uh ci.

2 KORIN 6:16

Pathian i biakinn le umngawltu tei milimte itang kaw a lemdun theih haw tuk? Itahim titale oh cu a nungmi Pathian i biakinn hung hi. Pathian amah loli in: “Ka mihing tei lakah ka umnak inn sa tung a, amu lakah um tung. A Pathian haw hi tung a, amuhte cu ka mihing hi haw tuk,” ti hi.

GALATI 6:10

Mah hangin hun pha a tawh uh hempoh ah kuakua i humah hei hihen a phami cu bawl nung inna, Khristian a upnak uh lam pen a innkua tei lakah a cuangin bawl tuk hung hi.

DAAN PIAKLEHNAK 18:2

Hinnam dangte bangin leingam co mi nei haw tukma hi. Topa i a tep bangin a covo haw cu thiampi nadeh hi.”

FILIPI 1:11

Jesuh Khrih bek i piak theihmi ngamtat pha ngangai cu na nunnak uhah dim tuk a, mahmi cu Pathian thangphatnak le sunloihnak tukin hi.

FILIPI 2:17

Na upnak uh cu Pathian nelah biakpiaknak bangin na piak uhmi humah, thah tawkin ka nunnak thisan cu leih ahi tale mahmi cu ka lungdamnak hi tuk a, na venghawng uhin ka lungdamnak cu kawmbok nuam ing.

FILIPI 4:18

Atu na piak uhmi hempoh cu ngah ing hi tin ngan ing. Na piak uhmi cu a kulmi sangin a val tianin pia uh ci. Na laksawng uh hempoh cu Epafroditas in puakin, atu-in ka kincak hempoh cu ting khawng hi. Hi na laksawng uhte cu Pathian i lungdammi le a cosanmi biakpiaknak, a namtui mi pak namtui bang haw hi.

KOLOSE 3:17

A Pa uh Pathian cu Khrih i hangin thang na phat uh tak, ihempoh na bawl uhten le na hilh uhten Topa Jesuh i minin bawl unna, hilh un hi.

1 TIMOTE 3:15

Mahnaven ngei ka um kha sual tale Pathian i innkua a pawlpi sung uhah iti bangin kaw a umdan tuk uh, hi ka laikuatmi in hilh tuk hi. Pathian i innkua cu kumkhua in, a nungmi Pathian i pawlpi hi a, mah pawlpi cu thutak i zungmutnak le a dingkhotiktu khuam hi.

HEBRU 3:6

Mahnaven Jesuh cu Pathian i innkua ah muantak, Pathian i Capa hi. Oh ten a ngaihsut san uhmi khi khohkhahzet le ngalpha zetin, a lenkhim uh tale, a innkua hi hung hi.

1 PETER 2:9

Mahnaven nohte cu tensa miphun, Kumpipa i thiampi, miphun thiangtho, Pathian i miphun hi uh ci. Khuathim sung pen thasiahhuai vaknak sungah a samtu Pathian in nalamdang a bawlmite tangau pih tukin a tenmi hi uh ci.

1 PETER 4:11

Ihempoh humah Pathian in Jesuh Khrih hangin thangphatnak a ngah theihnak tukin thusontu ten Pathian i thu son unna, nadektu ten Pathian piakmi thazaang tuah dek un hi. Sunloihnak le huham hempoh cu kumkhua in amata hi. Amen.

1 PETER 4:17

Thukhennak a pat hun heng zo hi. Pathian i mihing ten thukhennak tawk masa haw tuk hi. Mahti bangin eimu humah a heng masa tale Pathian Thuthangpha a umngawltu cu itin tawpleh haw tuk him?

MANGMUHNAK 1:6

A Pathian le a pa i nadektu hi tukin ohte cu kumpi le thiampi phunin, a bawlsaktu Jesuh Khrih lakah sunloihnak le huham cu kumkhua in um tahen! Amen.

MANGMUHNAK 20:6

Hi bangin mithi thawhkiknak masabelin, a teltu cu mi lungdam le thupha co mite haw hi. Vei nih thihnakin, a hum hawah thu neileh ma toh hi. Pathian le Khrih tei thiampi dekin amuhte tuah kum thawng khat sung uk haw tuk hi.

MANGMUHNAK 3:12

Nehtu cu ka Pathian i Biakinn sungah sutpi khuamin bawl tung a, mah Biakinn cu taisan awng tukma hi. Ka Pathian i min vang a humah ngan tung. Mah khuapi cu vancung ka Pathian lak pen a heng tukmi hi. Mahten ka min thak vang a humah ngan tung hi.

MANGMUHNAK 5:10

Ka Pathian uh i nadektu tukin thiampi, kumpi hin le namah, amuh cu bawl zo ci, amuh ten leihumah uk haw tuk hi,” tin sa haw hi.