Namba 18:12 - Nobonob Baibel

¹² Am Israel ag olip goɗen enanag, aria wain bau tatamnu enanag, ee aeg tatam oɗutte enanag, ag da Yawe, ag da meɗatteb amu, da amu oh na, na begapad ele madattem.

Namba 18:12 Iomraidhean Croise

Genesis 27:28

Kayak Nug na gu, wan ittag ele medakkunu ool daatte. Ao, Kayak Nug heeb, na ee kuɗum, iɗu iɗu ele daakkutnu ool hette.

2 King 4:42

Dimppa haen laappa, danab laa Balsalisa appanu Kayaknu danab Elisa gumitta uɗiom. Nug bali bret 20, bali tatam oɗuomppanu hak amu, nug amu Elisanu awa uɗiom. Amu awa uɗia, nug ee aeg bau awak ele bek laippuppa inak, nug amu ele awa uɗia mettom. Awa uɗia mette, aria Elisa nug nuhig maɗi nid amegppa aum. “Ee amu aon, propet danab umu madappe lakkulag,” awa aum.

2 Stori 31:5

Hesekaia nug anam a, pahanab Israel buɗub ag ee tatam oɗuom, amuam ee aeg, wain bau, goɗen, uppuh leppu, am aɗi keeke laa dattanu aoppig amu, ag amu aon uɗin, Lewi buɗubppan mana mettak danab, Lewi buɗubppan mana mettak danab iitta amu, ag ag ele madappig. Ag huanak madappig. Keeke ahilkad amu ohnu ag obatak eblaih tanig ele ooppanu obatak laippu ag Lewi buɗubppan mana mettak danab, Lewi buɗubppan mana mettak danab iitta, ag ag ele madappig.

Sam 147:14

Amu ele, Nug he, ag Israel wanppa daatteb, ag maɗoɗ ele daaegeg, Nug ag bret kunum ena ena witppa heppig amu matte latteb.

Sam 81:16

Amge da ag Israel danab ah, da ag ee ena ag mattalom. Ao, da ag ee ena ubuhi ele amu, da ag lakkulagnu mattalom.”

Eksodas 22:29

Ag keeke ebappeg, da heppi, meu okku amu, ag keeke ebappignu meu, wain, olip goɗen ele amu, ag amunu maha ofa daakkunu da meɗaglagnu aib uuppig. Ag uug doon, oolag uug ele da nakok nakokib meɗaglagnu am aib. Ag oo gamag ahak ele, elele meɗaglagnu meɗeg! ⌊Pasowa ebqak 1 haenppa da ag amelagppa amibia amu,⌋ buɗub buɗub doobob, ag ahilkad nid danab tatamnu da meɗeg!

Eksodas 23:19

Ag ee tatam oɗutte ele, ag ee amunu laih enanag aon, da Yawe, ahilag Kayak, ag ee amu aon, da laulppa uɗieg! Ag meeme nag, anignu huhppa aib badippig.

Eksodas 34:26

Ag ee tatam oɗutte ele, ag ee amunu laih enanag aon, da Yawe, ahilag Kayak, ag ee amu aon, da laulppa uɗieg! Ag meeme nag, anignu huhppa aib badippig,” awa aum.

Esekiel 44:30

Ag Israel ag ahilag ee tatam oɗutte amu, amuppanu enanag daatte, ee amuam mana mettak danab dilag daakku, amu ag aɗi keeke ag aon, da Kayak, dahil daakkunu hamu meɗatteb amu, keeke amu oh ele mana mettak danab dilag daakku. Aria, ag ee aeg ganuɗaknu menppa metteb ele, ag meppeg ganuɗebeb, plaua neebeb, ag plaua tatam nette aon, mana mettak danab matteg! Ag amu hekkulagnu diig am, ag aun aɗi ag amu hekkulag amu, da anttena, da itittak ena ag, am ag baelkadppa ele madakkul.

Lewitikas 2:12

Ag ee tatam oɗutte haenppa amu, ag yis, uppuh leppu ele aon dona, Yawe mettaglagnu oolag heeb am mettaglag, amge ag mana mettak laa, Yawe Nug mana mettak amunu muttuɗignu ooppa ena dookkunu, ag ee aegnu ofa manan, Yawe mettaglag amu, ag yis, o uppuh leppu amuppa iinab memana; ag qaɗabppa yis, o uppuh leppu iinab maiglagoitte.

Lewitikas 2:14

Ag ee tatam oɗutte, ag amunu ee aegnu ofa henana, ag maha laa Yawenu manan medatteb amu, ag ee aeg amu aab aɗuppa manana, ganuɗaknu keekeppa heppeg ganuɗeb, huppu huppu neeb, akkan anamib dokkulagoitte!

Lewitikas 23:17

Amu hekkulagnu amu, ag daattebppanu bret kunum aɗit diiatna, mana mettak danab toppa wappeg, nug awa, Yawe noobppa huma epponitta mettaknu ofa hekku. Amuam mana mettak Yawenu hak daakku. Bret kunum aɗit anen anen, amuam 2 kilogram plaua enanag, yis ele kabolia manak daakkuoitte. Bret amuam maɗ anen anenppa, ahilag ee tatam oɗutte manan, Yawe mettaglagnu ofa aakku.

Lewitikas 23:20

Mana mettak danab nug sipsip gaiɗ aɗit, am bret kunum, amuam ee tatam oɗutteppanu hak amu, nug amu ele awa, Yawe noobppa huma epponitta mettaknu ofa hekku. Amuam ofa Kayaknu tituanak daatte, amu mana mettak danab dilag daakku.

Duteronomi 18:3

Danab ag mana mettak aon dotteb, amuam makau dawai laate, o sipsip laate amu, ag aɗi doɗ aon uɗitteb ele, mana mettak amunu maha laala am mana mettak danab, ag ahilagnu aɗaglag; maha amuam gukka naɗiap, akkabɗu, amu doɗ amu oo ele.

Duteronomi 18:4

Ag ee tatam oɗuttenu, keeke laala tatamnu ele amu, ag mana mettak danab ahilag daakkunu mattaglag. Amuam ee aeg, wain bau, olip goɗen bau, amu sipsip tatamnu uɗig otaɗak ele.

Duteronomi 26:2

na aun, na ee tatam oɗuttenu laala, ee amuam wan Yawe, ahilag Kayak, madakkunu hette, amuppan awak amu, na ee amu aon, kalegppa inan aon, Yawe, ahilag Kayak, Nug aben Nug onig aguppa daakkunu epeɗikku amu, na amuppa ukke!

Duteronomi 32:14

Nug he, makau, meeme ele ag lanaknu huh huanak ele daappig. Ao, Nug he, sipsip nakkud ittag ele, amu meeme ele ag ena meegeg, lanaknu teppulkad ena ele daappig. Yawe Nug Israel danab ah sipsip dawai enanagnab Basannu, Nug amu ele mattom. Ge, Nug ag wit ena ele mattom. Nug ag amu matte, Nug he, grep ahilkad meu ena oegeg, ag wain enanag lappig.