Joel 2:16 - Nobonob Baibel

¹⁶ Ge, heppeg, danab ah ag qagmena, Yawenu tituana mettak dayeg! Ag heppeg, ikki danab ag uɗieg! Ge, heppeg, nid naunau, nid yuɗ ele oh uɗin dayeg! Danab nug ah aokkun daatte amu, nug laug oo nuhig uua, qagmakppa uɗiaɗ! Ao, ah nug danab aokkun daatte amu, nug dayak aben nuhig uua, nug ele qagmakppa uɗiaɗ!

Joel 2:16 Iomraidhean Croise

2 Stori 20:13

Jehosapat nug anam unuqittette, Juda danab oh, ag waalkad, nid yuɗ ahilkad, nid naunau ahilkad ele, ag oh Yawe noobppa aakku hippaidna daappig.

2 Stori 29:5

Ag appa qagmeeg, nug ag amelagppa aum. “O Lewi buɗub, ag dahil nai doyeg! Ag Yawenu tituana mettak daaglagnu hena daan, ag Yawe, ag mamelkad aɗi dilag Kayak, ag nuhig mana mettak lag imu ele nuhignu tituana mettak daakkunu heppeg dayaɗ! Ag keeke oh Yawenu mettid lag, amuppa dayaya, Kayaknu neekkakppa lag amu dubuttid medatte ele, ag keeke amu oh maon ukkeg!

2 Stori 30:17

Danab ah uɗippig ele dilagnu amu, kuɗum ag Yawenu tituana mettak daaglagnu ii heppig amunu, ag Pasowanu sipsip ahilkad anen anen aqappeg, Yawenu tituanna mettaglagnu elele iitta. Anam amunu, Lewi buɗubppan mana mettak danab iitta, ag sipsip amu aqadkkulagnu sipsip mamelkad oulag daan, sipsip aqappig.

2 Stori 35:6

Ag Pasowanu sipsip nalkad otaɗadkkulag amunu, ag amu hekkulagnu, ag Yawenu tituana mettak daaglagnu hena dayeg! Ag sipsip nalkad amu ɗoppa aqana, ag Israel danab ah ag Pasowanu Hobul hekkulagnu, ag attem attem hekkulagnu daatte amu, ag amu heig! Ag Yawe, Moses oɗeppa ag hekkulagnunab ippuanattom amu, ag anamib heig!” Josaia nug Lewi buɗubppan mana mettak danab iitta, nug ag amelagppa anam aum.

Job 1:5

Amu nug bekkod ag anam heegeg ukke ukke, eblaih aɗit ele amu oh ag ag laulkad anen anenppa hobul hena malaeg, Job nug ag Kayak ele ouqa dayaknu elele daaglagnu ag beɗulag oolag ele bappaidkkulagnu nai ahilagppa me ukkom. Job anam he, deɗ amu uue, wagɗe buttua Job nug aha, ahilag anen anennu manaknu ofa hattom. Nug, “Nid dahilad ag Kayak uuidna, hipunin heppigtai,” ana dabmeum amunu, nug anam hettom. Job nug hanhan anamib hettom.

Sam 19:5

Buttua aam nug baaba, nug danab ah aokkunu hette bia daatte. Yo, aam nug laa nug qaiedatta, danab laa oh eɗadtte, nug gemu qaiettak amubia laa hekkunu gamag ahak dootte amu, aam am amubia daatte.

Eksodas 19:10

Mattia male, Yawe Nug Moses amegppa inam aum. “Na gona heppe, gemu butti ele danab ah imu ag hena, ag dahilnu tituana mettak dayeg! Amu na appe, ag lamen ahilag ihadna,

Eksodas 19:15

Moses nug inam amelagppa aum. “Ag laatu babaittaknab daaglagnu, ag amu henan dayeg! Ag beɗuppa wanak ele aib heppig,” awa aum.

Eksodas 19:22

Genab! Mana mettak danab ag maɗi ahilag hekkulagnu, ag da gumiɗna uɗiglagnu daatteb, amge ag ele tatam dahilnu tituana mettak daaglagnu ag hena, ag gemu dahilppa uɗiglag. Iitta dayeb amu, da eheɗ nau madakkul,” awa aum.

Joel 1:14

Ag danab ah oh ag Yawe noobppa ee ohnu kud mena daaglagnu appeg doyeg! Ao, ag oh Yawe noobppa qagmena dup nona Nug binag mekkulagnu deɗ metteg! Ag ikki danab uɗiglagnu eig! Ao, ag wan imuppan danab ah laa oh ele onilagppa eig! Ag Yawe, ahilag Kayak, ag Nug laugppa uɗippeg, ag oh Nug unuqitteg!

Matyu 21:16

Nug oɗ medappig. “Na nid naunau aɗitai atteb umu doottemte?” aon appig. Aeg amu Jesus Nug amelagppa aum. “Da doottem, amge ag nai laa daatte ele amu ag iite ebqeppig. Nai amuam inam. ‘Na he, nid naunau amu nid yuɗ huhppanu ele ag na binan humaglagnu dootteb.’ ”

Matyu 9:15

Ag Jesus amegppa anam appig amu, Jesus Nug aum. “Da am danab nug ah aotte bia. Aria, dahil ippunittak awak danab, ag am da lailad. Amu ig doottem, ewau matulak haen am oo gamag ahak ele amunu, danab nug ah aotte, nug daatte haenppa, nug laikkud ag uug doonna, ee ohnu kud mena daaglagnu am iitta. Ag oolag gamag ahak ele amunu, ag ee ii uumna, ag lakkulag. Anam aakku daatte, amge deɗ laa dimppa ag lailag, ah awom ele amu, nug laih ukkeb, haen amuppa ag oolag uug ele amunu, haen amuppa ag ee ohnu kud mena daaglag. Amu da ami, amubia. Da am danab ah aotte bia. Dahil ippunittak awak danab ag am da lailad bia. Da gemu ag ele daattem amunu, ag ee ohnu kud mena daaglagnu elele iitta. Dimppa da goppi, ag anam hekkulag,” awa aum.

1 Korint 7:5

Ag ewau matulak aoppig ele amu, ewau laa ooppa laa nug aib laa guhuɗitta, wagai ma nug beɗu hagakka awom. Amge aa Kayak unuqidkkulahnu heya, oolah laippu meya, haen tutu tituankkulah dayeb, haen amuppa aa nug ii aomya, amuam elele. Amge haen tutu amu maleb, aya aa ahilah oiyak pehettak atognoak kobol dim lamidkkulahnu elele iitta daamyanu, amuppa Satan aa gappai kobol hekkulahnu eeɗatmanu, aa eɗui, nug aoglah.

Josua 7:13

Ahan gona heppe, Israel danab ah ag dahilnu tituana meɗak dayeg! Na ag amelagppa inam appe doyeg! ‘Ag buttinu elele daaglagnu, ag Yawenu tituana mettak daaglagnu hena dayeg! Aɗinu? Yawe, Israel dilag Kayak, Nug inam atte. “Keeke dahilnuib pelemppa daatte amu, keeke amu ag oolagppa aakku daatte. Keeke amu ag oolagppa daatte haenppa amu, ag kekeɗ ahilkad eɗadkkulagnu elele iitta daaglag. Ag heppeg, iitta meeb amu, ag eɗun, kekeɗ eɗadkkulag.

Josua 8:35

Keeke haknunab, Moses nug mattom ele amu, nug amu oh danab, ah, nid naunau, amu wan laihnu danab ah, ag uɗin Israel oolagppa daappig amu, nug ag oh dooglagnu ebqeum. Nug maha nakok laa ii tippalom.

1 Samuel 16:5

Betlehem ikki danab ag Samuel anam oɗ mettaeg, Samuel amelagppa aum. “Ao, da ool maɗoɗ ele uɗimi. Da doɗ laa mane, Yawe medakkulnu uɗimi amunu, ag Yawenu tituana mettak daaglagnu hena daan, ag da ele mana mettak amuppa gota daagnig,” awa aum. Samuel nug nai amu mattia mala, nug Jesi, bekkod ele ag Kayaknu tituana mettak daaglagnu ha, Samuel nug ag ele mana mettak amuppa daaglagnu oɗ mattom.