Jeremaia 7:11 - Nobonob Baibel

¹¹ Ag amu hetteb amunu, lag imu, da onil lag imuppa daatte amu, lag imu ag heeg, yab danab naunab dilag lokkumak aben bia beum daatte. Anam daatte, amge da keeke ohnab ag hetteb, da aakku neekkadmi daattem.” ’ ” Yawe Nug anam aakku atte.

Jeremaia 7:11 Iomraidhean Croise

2 Stori 6:33

amu Yawe, geha wan laihnu danab ah ag ig nahipad danab ah Israel, ig na dooittutut, amu ig nahipnu ebehinig oh bodoetta le mette, amubia ag na dooidkkulagnu, ag nahipnu ebehilag oh bodoetta, le mekkunu, geha wan laihnu danab ag lag imu, da hemi amu, lag amuam na laut, na onin aguppa daatte ele dooglagnu, na dayak aben nahip, amuam hab aab, na appa daanna, na wan laihnu danabnu unuqittak doon, nug na aɗi hekkutnu oɗ medatte amu, na amu hekkutnu oɗ medattem.

Aisaia 1:12

Ag uɗin, da noolppa mettid hekkulagnu da laul ooppa notteb, ⌊amge⌋ aun aum amunu, ag appa talilin, laih gona laih uɗinna, muttub qenana oitteb?

Aisaia 56:7

“Da geha danab ah aben laalappanu diie, qauko dahilnu tituanak daatte, da ag qauko dahil amuppa, ⌊Jerusalem aabppa,⌋ daaglagnu omalatten uɗien heppi, ag dahil unuqittak lag ooppa, ag oo gamag ahak naɗi aoglag. Danab ah amu ⌊ag da oɗel doon dim lamidkkulag,⌋ ag manaknu ofa, mana mettak laala ele meɗaglag amu, da ahilagnu ool enaib dookkul. Aɗinu? Danab ag da laul am wanppan wan ohppanu danab ah dilag unuqiɗak lag daatte dooglag,” awa atte.

Jeremaia 2:34

Laa amu, ag Israel ag danab ahilag keeke ii aoppig, ag eheɗ laa ii heppig ele, ag amu aqaeg mauhppig. Ag amu heppig, amge ag, ‘Ig hipunin hemut,’ ii appig. Iitta. Ag, ‘Ig beɗunigppa aab iitta. Yawe Nug ihinignu oo nauhak laa ii dootte,’ atteb. Ag anam atteb, amge iitta! Ag hipunin henana daanna, ‘Ig hipunin ii hemut,’ atteb amunu, da naippa yaalatten, bu madakkul.

Jeremaia 23:24

Da aben ohppa daattem amunu, danab laa da nug anidpanu aben lokkumakppa nug nugakka appa lokkumidkkunu elele iitta. Da hab attan, wanppa ele, da appa ana aben ohppa daattem.

Jeremaia 7:10

Ag kobol amu oh henana, ag da, Yawe, ag lag dahil, da onil lag amuppa daatte, ag da laul amuppa uɗin, da noolppa daanna, ag atteb. ‘Yawe Nug ehanikkeb, ig padal ii memata,’ aon atteb. Ag anam anana, ag kobol nau amu oh, da, Yawe, da kobol amunu oolppa uuaknab doottem, ag kobol amu oh tuɗidna hekkulag dayeb amu, da genab ehanadppi, ag padal iite memana?

Esekiel 35:13

Ag dada danab daan, dada danab nug layagnu nai nau maditte, amubia ag wan da Israel, Juda ele mattami aoglagnu mattinna, dahilnu nai nau huanak appig, amge da nai amu oh ele doomi,” awa atte.

Daniel 9:18

O Kayak dahil, na daut human, dahil unuqittak dookkutnu oɗ medattem. O Kayak, na neegppe ukkeb, aab okkai na onin amuppa daatte amu, na aab amu nauhakib daatte anidkkutnu oɗ medattem. Ig genab tutukku hak danab ah amunu, ig oɗmak imu ii hettem. Iitta. Ig danab ah tutukku iitta, amge na danab ah dilagnu oot gai-iitta doon, oot mattan ehanadttem amunu, ig oɗmak hettem.

Matyu 21:13

Jesus Nug anam hewowa, Nug aum. “Kayak naippa yaak inam daatte. ‘Danab ag da laul am danab ah dilag unuqiɗak lag daatte dooglag,’ amge ag heeg, nug yab danab naunab dilag lokkumak aben bia daatte!” awa aum.

Mak 11:17

Jesus Nug anam hewowa amu, Nug ag amelagppa aum. “Kayak naippa yaak inam daatte. ‘Danab ag da laul am wanppan wan ohppanu danab ah dilag unuqiɗak lag dooglag,’ amge ag heeg, nug yab danab naunab dilag lokkumak aben bia daatte!” awa aum.

Jon 2:16

Nena qena, danab uppuɗil beɗulag nakok ele dadennu maatteg daden maadppig ele amelagppa aum. “Keeke amu akkan ukkeg! Ag da Mamel laug amu aib heppeg, ee oɗiak aben bia dayom!” awa aum.

Hibru 4:13

Amu keeke laippu laa Kayak Nug amegppa lokkumak iinab daatte. Iitta. Keeke oh am Nug amegppa miagib amahlakppa daatteb. Amu dimppa ig Nug noobppa daata, ihinig haknu Nug amegppa mattignig.