Jeremaia 48:1 - Nobonob Baibel

¹ Moapnu amu, Yawe Nukka Ɠagattag Oh Ele, Israel dilag Kayak, Nug inam atte. “Kekeɗ ag aab Nebo heppeg nauhkku amunu, Nebonu am gadonnab gadon. Kekeɗ aab Kiriataim heppeg nauheb, appan danab ah ag uɗa nak nau guittak ele doon, kekeɗ eppelagppa daaglag. Kekeɗ ag aab Misgab ele heppeg nauheb, appan danab ah ag uɗa nak nau guittak ele dooglag.

Jeremaia 48:1 Iomraidhean Croise

Genesis 14:5

Tappaeg neum amunu, maɗ 14ppa Kedolaomer, amu nug laikkud king ewam ele ag king tanig ele, ag ag ele ban hekkulagnu goppig. Gonana, ag tatam Repaim danab, Asterot Karnaim daappig amu, ag ag ele ban henana eɗadppig. Eɗadna gona, Susim danab, Ham daappig, amu Em danab, Sawe Kiriataim daappig ele, ag ag ele ban henana eɗadppig.

Genesis 19:37

Oolah ele daayya, aɗeg tatamnu nug nid danab menua, onig Moap ataɗom. Nug buɗub amu, ag Moap danab.

2 Stori 20:10

Ag anam appig amu, gemu Amon, Moap, Edom danab ele ag banenig uɗin, iqaglagnu daatteb. Anukka ig memetankad anukkanu ag Isipnu uɗiegeg, na ag danab amu ele ban hekkulagnu aib ame amunu, ig memetankad ag ag ele ban ii heppig. Ag ag aqaeg ii iitta meppig. Danab amunab, ag buɗulkad gemu banenig uɗin, iqaglagnu daatteb.

Aisaia 25:10

⌊Aɗinu ag anam akkulag?⌋ Yawe Nug geha Sion qauko anam ena atognokku, amge Moap aɗi, ag eheɗ naunab aoglag. Makau ag gikkiɗah qaɗaiettak tappan oinna biieg, gikkiɗah biiak ele kaboliak daatteb, kekeɗ ag Moap dilagnu amubia hekkulag.

Aisaia 25:12

Kayak Nug geha aab okkai ahilagnu aɗ attan, ɠagattag ele, Nug amu oh loppaɗeb gappudppa nekku. Gemu aɗ amu attan, ɠagattag ele daatte, amge Nug geha heeb, ag nena qena, wanppa nokkulag.

Aisaia 27:3

Da Yawe, da grep dad amu gumattem. Da hanhan le medette, laa appa uɗia eheɗ laa hemanu amu, da haen oh amun tuqan ele gume daattem.” Nug anam akku.

Jeremaia 25:21

Amu dimppa da ⌊tuleglegppa⌋ Edom danab ah, Moap danab ah, Amon danab ah ele mattami.

Jeremaia 27:3

Aria gemu amu, danab laala ag Edomnu, Moapnu, Amonnu, Tairnu, amu Saidonnu ele ag ahilkad king ag Juda dilag king Sedekaia ele nai mattiglagnu maatteg Jerusalem uɗippig daan, amu hetteb ele amu, na amu gumadna gona, dahil nai ag eɗun aon gona, ahilkad king amelagppa nai amu akkulagnu ag eppelagppa mekkut.

Namba 24:17

Da laa anidttem, amge gemu iitta. Ao, da nug anidttem, amge umanab daatte. King naɗi laa hoɗoppai bia, geha Jakop buɗubppanu uɗikku. Yo, king naɗi laa geha Israel danab ah dilagppanu uɗikku. Nug geha Moap danab uɗalkad aoɗadkku. Yo, nug geha Set buɗubppan danab ⌊am Moap danab, nug ag⌋ ikkilkad oh aoɗadkku.

Namba 32:3

“Yawe, danab ah wan imuppa daappig ele amu eɗadkkunignu ig Israel ehanikkom. Aab okkai wan imuppa daappig ele onilkad amu inam; Atarot, Dibon, Jaser, Nimra, Hesbon, Eleale, Sebam, Nebo amu Beon ele. Wan aab okkai amu taliliattak amu makau, sipsip ele ag gikkiɗah lakkulagnu enanag ele. Ig, nahip maɗi nid, ihinkad makau, sipsip am doɗ laala kuɗum ele daattem,

Namba 33:47

Ag Almon Diplataim uun, ahan gona, Nebo guguittak, Abarim qaukoppa daatte, appa haen tutu dayaknu aab kalan daappig.

Josua 13:19

Kiriataim, Sibma, Seretsahar ele. Seretsahar amu qauko nakok, oolnu noak daugppa, qauko nakok amuppa dayom.