Jeremaia 4:14 - Nobonob Baibel

¹⁴ O Jerusalem danab ah, Juda danab ah ele, ag oolag dubuttid ele amunu, ag padal ii memananu, ag ehanittak aoglagnu, ag dubuttid amu oppieg! Ag nau hekkulagnu dabmak aɗan daatteb; amu haen gane laa ele ukkeb, ag dabmak amu uuglag.

Jeremaia 4:14 Iomraidhean Croise

Sam 119:113

Danab ag na dim lamidkkulagnu dabmak laippu iitta amu, da amu dilagnu nau ninig ele doottem, amge nahip ɗonu da ool mauhtte.

Sam 51:2

Na heppe, da oolppa aab iitta daakkunu oɗ medattem. Yo, na dahil hipunin uhuqna meɗan heppe, da oppiaawak bekkulnu unuqidttem.

Sam 66:18

Da dabmak dahilppa hipunin qekkulnu dabmelom amu, Naɗi Nug unuqittak dahil ii doolo.

Prowerb 1:22

Nug atte. “Ag danab ah ag doyak ii awak ele, haen gane laa ele ukkeb, ag doyak ii awak kobol ahilag uun oiglag? Ao, ag danab ah ag awa awa qettak nai mattiglagnu enanagnab dootteb ele amu, haen gane laa ele ukkeb, ag kobol amu uuglag? Ge, ag danab ah ag Kayaknu ii dabmena, ii dim lamidtteb ele, ag doyaknu nau ninig ele dootteb amu; haen gane laa ele ukkeb, ag kobol amu uuglag?

Aisaia 55:7

Nau hak danab nug hak nau nuhig uuaɗ! Ao, eheɗ hak danab nug dabmak dubuttid ele nuhig uuaɗ! Nug eɗua, Kayak waappa daakkunu anam hekku amu, Yawe Nug nuhignu oo gai-iitta doya oo metta ehanidkku. Ao, danab anam hekku, ihinig Kayak Nug nuhig hipunin genab uhuqa medakku amunu, nau hak danab nug eɗua, Kayak waappa daakkunu anam haɗ!

Jeremaia 13:27

Ag Juda ⌊ag kayak hambuppuak dim lamadnana, ag noolagppa dup nona binalag meegeg uɗie, gemu ele hetteb amu, haen ag amu henana, kayak hambuppuak amu dilag kobolppa ag⌋ danab ah ewau matulak ii awak ele, ag laa ele mauhnoak niiglagnu duttunak eheɗ doon, hos hetteb bia uɗa nak iitta ele henana, ag ib baag ah hetteb bia aakku heegeg uɗie, gemu ele hetteb. Ag amu heegeg, uɗie gemu ele hetteb amunu, da heppi, laa ag amu anidna dooppeg, ag Juda, ag uɗalag eheɗ nekku. Laa ag haen amuppa anadkkulag, amge da ahilag eheɗ hak nau, da hak amunu oolppa uuaknab doottem, da hak ahilag amu aakku antten malami. Ag qauko nakok igippa, dadppa ele ⌊kayak hambuppuak noolagppa dup nona binalag menana,⌋ eheɗ hak amu oh heppig, gemu ele hetteb. O gadon, Juda danab ah, ahilagnu gadonnab gadon. Ag heegeg, oolagppa dubuttid daatte; amu haen gane laa ele ukkeb, ag anamib daaglagnu uuglag.” Yawe Nug anam atte.

Jeremaia 17:1

Amu Yawe Nug atte. “Danab nug aen maha laa, o men ɠagattag laa awa, amuppa nai laa men laappa otaɗtte, laa nai amu hamu obikkunu elele iitta daatte. Nai anam daatte, amubia Juda dilag hipunin am ag oolagppa yaak daatte. Ao, nai amuam doɗ mana mettaknu qaɗab ahilag anen anen qeqeɗi daug waɗeleppa daatteb, qeqeɗi amuppa yaak daatte.

Jeremaia 18:11

Anam amunu, Jeremaia, na danab ah Jerusalem daatteb, Juda danab ah laa oh ele inam amelagppa appe doyeg! ‘Yawe Nug inam atte. Antteg! Da uug naunab ahilagppa bekkunu babaittette daattem, da ag nau aoglagnu ib aakku ooɗttem amunu, ag anen anen ag nau tuɗidna hemananu ag oolag eɗueb, ag ahilag kobol, ahilag hak ele tutukku dayaɗ!’

Jeremaia 2:22

Anam amu, da, Naɗi Yawe, da inam iikku attem. ‘Ag Israel ag beɗulagppa aab ele. Danabnu lamen gau laittak daatte, nug sop, blis eleppa huana ihatte, amge gau amu iitta ii mette, amubia ahilag aab iitta ii mette. Da noolppa aakku daatte.

Jeremaia 6:19

Wan atu ohppan danab ah, ag doyeg! Dahilad danab ah ag dahil nai doyaknu uun, ii doyegeg uɗie, gemu ele ii dootteb; ag dahil ɗo dim lamidkkulagnu ele dimettan, ɗo dahil waappa ii daaegeg uɗie, gemu ele waappa ii daatteb amunu, da heppi, ag bu eheɗ aon, ag nauhna autna aoglag. Ag eheɗ hekkulagnu lokkumakppa dabmenana maittak eheɗ aon heppig amunu, kobol amunu meu nau ahilagppa bekku.

Esekiel 18:31

Ag eheɗ hak heppig amu, ag tuɗidna aib heppig. Ag dabmak bau aona, oolag bau ele aon dayeg! Israel danab ah, ag aɗinu mauhkulag hetteb?

Sekaraia 8:17

Ag anen anen lailkad guittak mattaglagnu maittak aib aoppig. Ag keeke laa, keeke amuam genab iitta amu, ag keeke amunu anana, da dahil nai ɠagattag qetten, amuam genab attem, aib appig. Ag amu hekkulagnu oolag aib mauhom. Aɗinu? Kobol amu ohnu amu da nau ninig ele doottem.” Yawe Nug anam atte.

Matyu 12:33

Ana amu Nug baula aum. “Ad ena nug meu ena otte, amu ad nau nug meu nau otte. Danab ag nuhig meuppa ad anidna dootteb.

Luk 11:39

Anam heum amge Jesus Nug amegppa aum. “Ag ɗo gumak danab-Parasia ag kap, tappiɗ ele gaɗaib ihatteb, amge ooppa baubau awaknu hik qak, nau hak kobol ele ambak daattep.

Jon 13:9

Anam a amu Saimon Pita aum. “Naɗi, anam dayeb amu, na da baelib aib ihame. Na eppel, ikkil ele oh ihe!” awa aum.

Aposel 8:22

Am na kobol nau nahip amunu oot eɗueb, na Naɗi ⌊Nug nahip hipunin uhuqa medakkunu⌋ unuqitte! Na anam hekkut amu, Nug dabmak nau nahip dabmakppa beum uhuqa medakku.

Rom 1:21

Amu ag Kayak dooppig, amge ag Nug am genab Kayak oolagppa genab ii doonna, ag Nug binag amahlak oppiaawak ii mettana, ag nug amegppa, “Ena heme,” aon ii appig. Iitta. Dabmak ahilag eɗua, dabmak tutukku iitta be, ag oolag ootot aqe, gatatu manom.

1 Korint 3:20

Amu Kayak nai aben laappa amunu ele inam daatte. “Naɗi Nug danab wanppan doyak dabmak ena ele, Nug amu dilag doyak dabmak ena ele am keeke hamunab dootte.”

Jems 4:8

Ag Kayak gumidna wappeg amu, Nug ele ag gumatta dokku. Danab nug eppeg leppa ihe, dubuttid iitta daatte bia amu, ag hipunin danab ag heppeg, ag ahilag oiyak am dubuttid iitta ele dayaɗ! Ag danab ag dabmak laippu iitta, ag heppeg, ag oolag oppiak dayaɗ!