Jeremaia 3:14 - Nobonob Baibel

¹⁴ O Israel danab ah, ag da dimeɗona kayak hambuppuak laala dim lamadppig ele, da Yawe, da ag amelagppa attem. Ag eɗun, dahilppa uɗieg! Aɗinu? Ah nug gamunu daatte, amubia ag am dahilad daatteb. ⌊Ag eɗun, dahilppa uɗiglag dayeb,⌋ ag oolagppan aab anen anennu laippu da nug tituane, omalen, Sion uɗikkul. O ag oolagppanu aab ikki anen anennu aɗit laa da tituanate, da omalatten, Sion uɗikkul.

Jeremaia 3:14 Iomraidhean Croise

2 Stori 30:6

King nug nai awa ukkak danab ag pas aon gokkulagnunab a, ag aakku kingnu pas amu aɗualadna, ahan Juda wan ohppa, Israel wan ohppa ele goppig. King, nuhikkud ehanittak anuqak danab ele ag pas amuppa inam yaappig. “O Israel danab ah, ag Yawe, Nug eɗua ahilagppa dokkunu, ag eɗun, Yawe, Nug Abraham, Aisak, Israel ele dilag Kayak, ag eɗun, Nug waappa dayeg! Ag gemu ihinig wanppa daatteb, Asiria dilag king diin ii goppig ele amu, ag uɗieg!

Aisaia 1:9

Anam amu, Yawe Nukka Ɠagattag Oh Ele, Nug ihinkad danab ah laib laib he daatteb. Nug anam ii helo amu, geha ig oh Sodom danab nauhppig bia nauhlom. Ao, Nug anam ii helo amu, ig Gomora danab padal meppig bia padal melom.

Aisaia 10:22

Amu O Israel danab ah, danab ah oɗo yaak daaglag, agib eɗun uɗiglagnu diig am, Yawe, Nug haen oh kobol genab tutukku ele dim lamidtte amu, Nug amu dim lamittatta, ag bu eheɗ matteb nauhkkulagnu aum daatte amunu, ag gemu huanaknab yu ihippa abuɗ niitte, ag amubia daatteb. Amge geha laippu laippuib, ag oɗo yaak daaglag. Daanna, ag eɗun Yawe gumidna uɗiglag.

Aisaia 17:6

Kobol bekku am danab ag ee aeg aotteb, amge ag ii doonna, ee aeg ikki laippu laippu tippalna, ii aotteb; laib laib uueg daatteb, am amubia ⌊Israel huu ag geha ebqak laib laib daaglag⌋. Ele amu, amuam danab ag ad olip uɗaleg, meu neeg, olip meu laib laib ewam, aɗit keeke attan daatteb, amubia ⌊Israel anam laib laib daaglag⌋. O iitta, ad olip eppeg laippu meu huan niieye, danab nug olip eppeg amu uɗale nena qeegeg, olip meu waɗele, tanig ele keeke, olip eppeg amuppa daatteb bia, ⌊Israel huu ag anam laib laib daaglag⌋.” Yawe, Nug Israel dilag Kayak, Nug anam atte.

Aisaia 27:12

Amu haen amuppa am inam bekku. Yawe Nug le Yupretis appanu uɗia uɗia, le onig Isip Le, le amuppa batak Nug danab nug ee aeg, dappunkkeg ele oh laippu daamanu, nug danab ee aeg mumuɗe, piɗe piɗe daattep, amubia Nug Israel danab ah epeɗia, otiatta heeb, laippu ippanu, laippu appanu amu, ag eɗun, ahilag wanppa daaglag.

Aisaia 31:6

Amu ag Israel danab ah ag Yawe dimettan autna aoppig, amge ag eɗun, nuhigppa uɗieg!

Aisaia 44:22

Ag hipunin heppig, amge da hei, ulah lombig ye ukka ii daatte, amubia da ahilag hipunin oppii ii daatteb. Ao, ag hipunin heppig, amge aam he, buttuanu buttuɗai iitta mette, amubia da uhuqen mattai, hipunin ahilag ii daatteb. Da ag hipuninnu qagaiettakppanu eɗua uhuqak hein mattami amunu, ag dahilppa eɗun uɗieg!” Yawe Nug anam atte.

Aisaia 54:5

Aɗinu ag amu hekkulagnu elele daaglag? Laa Nug ag hattom ele, Nug ag gamulag daatte. Nug onig am Yawe Nukka Ɠagattag Oh Ele. Ao, aɗinu ag amu hekkulagnu elele daaglag? Am, Israel dilag Kayak Oppiaawak Ele, Nug ag Juda, ag laa eppelagppa dayaknu qagaiettakppanu eɗua uhuqak ha madatte. Nug wan oh dilag Kayak daatte.

Aisaia 55:7

Nau hak danab nug hak nau nuhig uuaɗ! Ao, eheɗ hak danab nug dabmak dubuttid ele nuhig uuaɗ! Nug eɗua, Kayak waappa daakkunu anam hekku amu, Yawe Nug nuhignu oo gai-iitta doya oo metta ehanidkku. Ao, danab anam hekku, ihinig Kayak Nug nuhig hipunin genab uhuqa medakku amunu, nau hak danab nug eɗua, Kayak waappa daakkunu anam haɗ!

Aisaia 57:17

Da dahilad danab ag baubau awaknu hik aqeeqe eheɗ heppig amunu, da oppoɗil eheɗ beum. Da amu antten, da oo nauhak doyeye, da bu matten, dimattami. Da amu hemi, amge ag doonna, tuɗidna eheɗ heppig.

Aisaia 6:13

Am danab ah laib laib laa wan imuppa daaglag, amge da baula heppi, wan imu eɗua baula nauhaknab daakku. Amge amu dimugppa danab ah dahilad oppiaawak ele laippu laippunab, ag ad laa oeg qiiom, diig daatte, ag amubia daaglag. Ag ad terebint laa, o ad ok laa ele oeg, diig dayaya, ita bette amu, danab ah dahilad ag amubia hekkulag,” awa aum.

Jeremaia 2:19

Ag nau hetteb amunu, nau hak ahilag am ag bu madakku. Ao, ag da dimeɗona kayak hambuppuak laala dim lamattegeg uɗie, gemu ele hetteb amunu, ahilag kobol amu, am ag daulag batakku. Anam amunu, ag da, Yawe, ahilag Kayak, ag da uuiɗna, ib laa oiyegeg, ag ebehilag oh dahilnu bodoetta le ii mette, diig amunu uug okkai ahilagppa anam bette, amu kobol amuppa ag nob eheɗ aona, mua naunab nau dootteb dabmenan oiyeg!” Naɗi, Yawe Nukka Ɠagattag Oh Ele, Nug anam aakku atte.

Jeremaia 2:2

“Na ahan, Juda danab ah oh ag nai dahil imu dooglagnu appe doyeg! ‘Ag Israel, ag dahil ah bia daatteb. Amu da Yawe, da anukka ag dahilnu oo mauhaknab dooppig daulppa dotte. Ag ah bau nug gamunu oo mauhtte, amubia ag dahilnu oo mauhak dooppig. Ag anam doon, ag atu taɗak, appa ag dim lamiɗna uɗippig. Ao, wan danab ah keeke ii ebattebppa, appa ag da dim lamiɗppig.

Jeremaia 23:3

Am da hei, danab ah dahilad ag wan laalappa gona, danab ah amu oolagppa oɗo yaak daatteb amu, geha da dakka danab ah dahilad amu ag huu ameg nakok daatteb, da ag qagmaadkkul. Da geha ag diie, omaladppi, ag eɗun wan ahilagppa uɗin daanna, am geha ag kuɗum menuadna, ag appatna, ag kuɗumnab daaglag.

Jeremaia 29:14

Ge, ag da anam mattiɗnana, ag da aniɗkkulag. Ag da anam aniɗppeg, da omaladppi, ag wan laa, appan danab ag aɗualatteg, ag ag eppelagppa daatteb amu, da appanu omaladppi, ag eɗun uɗin, wan imuppa daaglag. Da ag wanppan wan oh, da hei, ag gona appa daatteb, da appanu qagmaatten omaladppi, ag wan atu oh, da hei, ag gona diia ukka laih me dayak danab ah daatteb amu, ag appanu eɗun uɗin, iguppa daaglag,” awa atte.

Jeremaia 3:1

Amu Yawe Nug atte. “Danab ah aa ewau daattep, ah nug ⌊gappai heeb,⌋ danab nug nuhig ah amu lamitteb, ah nug ukka, danab laa awa, ⌊baula gappai heeb,⌋ danab amu ele nug ah amu lamitteb, danab nug tatam ah amu awa lamittom amu, nug eɗua, ah amu baula aokku am enate? Kobol augigiak amuppa wan am Kayaknu neekkakppa dubuttid tak ele iite daama. Anam, amge ag Juda, ag kayak hambuppuak kuɗum noolagppa dup nona binalag meegeg uɗie, gemu ele hetteb. Ag ib baag ah nug danab kuɗum ele niiglagnu hette, ag amubia hetteb. Ag anam hetteb, amge da tuɗitten, ag eɗue diiadkkulnu onilagppa ettem.

Jeremaia 3:12

Amunu, Jeremaia, na yawalti uɗitteppanu neegna, dahil nai imu Israel dilagppa appe doyeg! Yawe Nug inam atte. ‘Israel, ag da dimeɗona kayak hambuppuak laala dim lamattegeg uɗie, gemu ele hetteb amu, ag eɗun, da Yawe, ag dahilppa uɗieg! Aɗinu? Da laa dilagnu oo gai-iitta doya, oo metta ehanattaknu diig daattem amunu, da tuɗitten, ahilagnu oo nauhak ii doopa. Da hanhan ahilagnu oo nauhak ii doopa.’ Da Yawe, da anam aakku attem.

Jeremaia 3:8

Juda ag Israel da dimeɗona kayak hambuppuak laala dim lamadppig anidna, ag da danab nug ah nuhig ewau pakkua gappai hette, diig amunu lamidtte bia, da Israel danab ah ahilag eheɗ haknu nob nau matten lamadmi anidppig, amge Juda danab ah, ag da ippunadmi bia, da dim lamiɗkkulagnu uun henana, ii baɗappig. Iitta. Ag ele ah gamu uuitta ukke, danab laa ele oittep bia, ag da uuiɗna, kayak hambuppuak kuɗum noolagppa dup nona binalag meppig.

Jeremaia 31:12

Israel danab ah ag oolag huana gamag ahakku amunu, ag Sion qaukoppa tena, ag qalan ahi ettaglag. Yo, Yawe Nug ag keeke ohnu madakku amunu, ag oolag huananab gamag ahakku. Nug ag ee aeg, wain bau, amu olip goɗen ele madakku. Nug heeb, sipsip, makau ele nalkad kuɗumnab menuadkkulag. Dad, gu ele awawa, meu huana otte, amubia ag elele daaglag.

Jeremaia 31:32

Nug tituana nai qakkak bau amu, da tatam ag mamelkad aɗi anukka haen da eppelag aɗen omalatti, Isip wan uun, ahan goppig ele, haen amuppa da ag ele nug tituanta nai qakkamut, am amubia iitta. Haen amuppa amu, da danab nug ah nuhig atognotte, amubia da ag gumadmi, amge ag nug tituana nai qakkak amu tippalppig,” awa atte.

Jeremaia 31:6

Aɗinu? Amu haen laa dimppa haen laa bekku, amu haen amuppa aɗi uɗitte anittak danab Epraim wanppa, qauko nakok daattebppa daatteb ag, ‘Ahappeg, ig Sion tetu! Ge, ig Yawe, ihinig Kayak, ig Nug gukuidtta gotu!’ aon ekkulag.” Yawe Nug anam atte.

Hosea 5:15

Da dahilad danab ah guittak mattoya, da eɗue ukken, da daattemppa daappi ukkeb, dahilad danab ah ag, ‘Ig eheɗ hemut, ig hipunin ele,’ dooglag. Haen amuppa ag da aniɗna dim lamiɗkkulagnu mattiɗkkulag. Ge, ag uug nau doon, ag oolag unuqagppanu da aniɗna dim lamiɗkkulagnu mattiɗkkulag,” awa aum.

Sekaraia 1:4

Ag mamelkad aɗi heppig bia aib heppig. Haen amuppan propet ag appig. Yawe Nukka Ɠagattag Oh Ele Nug inam atte. ‘Ag ahilag eheɗ hak digdig uun dimettan, aib baula heppig, aon appig, amge ag mamelkad aɗi ag dahil nai amu dooglagnu uuppig; ag ii dabmedappig,’ ” awa atte.

Rom 9:27

Aria, Aisaia nug Israel dilagnu Kayak naippa inam yom daatte. “Israel danab ag yu ihippa, abuɗ niitte bia, ebqak ahilag anam daaglagtai, amge Kayak Nug geha ebqak honapib, oɗo yaak daaglag, Nug agib eɗua diikku.