1 Korint 5:8 - Nobonob Baibel

⁸ Amunu ig Pasowanu Hobulppa bret yis alag eleppa aib lamut. Yis amuam oo aeg bak kobol, am hipunin laa oh hak kobol ele. Ig Pasowanu Hobulppa bret yis iitta ele latu! Bret amuam kobol tutukku, kobol doyak diig genabibppanu ele ippunigtte.

1 Korint 5:8 Iomraidhean Croise

Duteronomi 16:3

Ag teppu amuppanu lanana amu, ag bret yis ele aib lappig. Deɗ eblaih aɗit ele oh amu, ag bret yis iitta lakkulag. ⌊Yawe Nug ag ehanatte,⌋ ag bret amubia lanana, ag Isip pahanab uuppig amunu, ag amubia bret amu lakkulag. Ag hanhan Isipnu ahan uɗin bau daatteb dabmekkulagnu, ag hanhan Isip appa guittak aonna daappig ele dabmekkulagnu amu, ag bret amu lakkulag.

Eksodas 12:15

Da ag hekkulagnu attem, amuam inam. Ag deɗ eblaih aɗit ele amu, ag bret yis iitta lakkulag. Danab auntai laa nug deɗ eblaih aɗit ele amuppa keeke laa yis eleppa hak lakku amu, nug Israel oolagppanu geɗittak daakkuoitte amunu, hobul amunu digmakppanu deɗ, ag deɗ amuppa yis oh, ag laulkadppa daatte ele amu, ag agappeg ukkaɗ!

Luk 12:1

Haen danab ah ameg tausen kuɗum ag qagmena qataiettan, laala ag akka akka nug baeg tappan daaegeg amu, Jesus Nug tatam nuhikkud ippunittak awak danab amelagppa aum. “Ag ɗo gumak danab-Parasia dilag yisnu dabmeig! Da ahilag hambuppuak kobolnu attem.

Mak 8:15

Amu Jesus Nug ag amelagppa nau aomanu nai imu aum. “Ag ɗo gumak danab-Parasia amu Herot ele dilag yisnu dabmeig!” awa aum.

Matyu 16:6

Ag anam gona tewona amu, Jesus Nug ag amelagppa aum. “Ag ɗo gumak danab-Parasia amu ɗo gumak danab-Sadyusi ele dilag yisnu dabmeig!” awa aum.

1 Pita 4:2

Amunu amu dimppa, haen danab amu nug bau dayaya wanppa oitte amu, nug kobol nau baula ii dim lamidtte, danab laa hetteb bia. Iitta! Nug Kayaknu dabmaknab dim lamidtte.

Epesus 6:24

Amu Kayaknu ehanittak okkai Nug hamu megatte amu, amuam danab oh ag ihinig Naɗi Jesus Kristusnu ii daye daye oolag mauhtte ele, am ahilagppa dayaɗ!

1 Korint 5:6

Ag akka ag binalag metteb am ena iitta. Yis nakokib uɗat he, plaua oh titiɗtte, ag amu iite dootteb? Aria, kobol nau am yis bia daatteb.

Jon 1:47

Pilip nug anam a, Nataniel nug Jesus anidkkunu uɗieye, Jesus Nug antta, Nug aum. “Antteg! Umu am Israel ted genab. Nug ooppa am hambuppuak laa iitta,” awa aum.

Matyu 16:12

Jesus anam a amu ippunittak awak danab ag dooppig, Nug yisnu ii aum. Iitta. Nug ɗo gumak danab-Parasia amu ɗo gumak danab-Sadyusi ele dilag nainu aum.

Aisaia 30:29

Kekeɗ dilagppa anam bekku, amge ag Yawenu danab ah ag danab ag qagmak gamag ahak ele Yawenu tituanak daatte, ag amu henana, ahi edatteb, amubia ag ahi ettaglag. Ao, danab ag dumuttum iwalnana, Yawenu qaukoppa tenana, oo gamag ahak dootteb, amubia ag oo gamag ahak dooglag. Ag Israel dilag ehanittak, Nug laugppa tenana, gamag ahak dootteb bia dooglag.

Aisaia 25:6

Sion qaukoppa, Yawe Nukka Ɠagattag Oh Ele, Nug geha ee lanak hobul okkai okkai, ee enanag digdig appa bappaidkku. Hobul amuppa amu, doɗ digdig teppulag ena ena, am wain digdig enanag lanak baag ubuhinab ele, amu ele daakku. Nug danab ah wan ohppanu ag uɗin, hobul amuppa qagmekkulagnu bappaidkku.

Sam 42:4

Da anukka attemnab dayomnu amelppa doowo, ool huana dootte. Aɗinu? Haen amuppa da danab ah kuɗum oh ele, ig Kayak noobppa dup nota, Nug binag mekkunignu gottamut. Ag gamag ahak ahi ettenna, Kayak amegppa, “Ena heme,” aegeg, da anuqen ugekke, ag omalatti, Kayak laugppa gottamut.

Sam 32:2

Danab laa Yawe Nug nuhig hipunin uhuqa mettom daatte, bu laa aokkunu ii daatte amu, danab amu nug itittak ena awom daatte. Ao, danab laa nug ooppa hambuppuak laa ii daatte amu, nug itittak ena awom daatte.

Lewitikas 23:6

Amu Pasowanu Hobul dayak malak amu, Bret Yis Iitta Lanaknu Hobul Nakok haen aakku kalam amunu deɗ 15ppa digmette. Yawe dabmettaknu hobul dayak haen amu, deɗ tuɗid ele dayeb ukkeb, deɗ eblaih aɗit ele aokku, haen amu ohppa ag bret yis iitta lakkulagoitte.

2 Korint 8:8

Da ami amuppa amu, da ag ɗo ii madattem. Iitta. Amge da danab laala ag uɗat pehettak hetteb ele andette, ag Korint ag aɗi heppeg ele anttena, da ahilag oo mauhak am keeke hamutai o iitta keeke genab eletai dookkul.

2 Korint 1:12

Aria, ig keeke laanu maɗoɗppan gamag ahak doottem. Ihinig ooppan oiyak ippunittaknu ulum am keeke amuam genab ippunigtte. Keeke amuam inam. Ig wanppa oimut, gemu ele oittem amu, ig Kayaknu oppiaawak kobol amu nuhig hambuppuak iitta kobol ele aot oimut. Ig danab dabmakppa ii hemut. Iitta. Ig Kayaknu ehanittak okkai hamu megatte, ig amuppa hetata amu, ig ag Korint daatteb oolagppa huana hemut.

1 Korint 5:1

Aria, laa ag nai laa aeg doomi amu, ag Korint ag oolagppa gappai kobol nau daatte mattieg doomi. Gappai kobol ag hetteb ele am naunab nau! Genab, iitta aɗi danab ag gappai kobol nau amubia ii hetteb. Kobol amuam danab laa nug mameg wau ele gappai aɗattep.

1 Korint 3:3

Aɗinu? Ag dabmak alagppa daatteb. Kristen kobol amu ag beɗulagppa ii beum. Ag lailkad dilagnu, ihinigppa anam daalon dabmak aɗan daatteb, ag nug mehqak henan daatteb ele amunu, ig ag kobol alagppa, Kristen kobol iittappa daatteb anidkkunignu elele. Kobol amuam dabmak alagnu, wanppan danab dilag kobol.

Josua 24:14

Amu Josua nug nai amu mattiowa, nug tuɗitta aum. “Gemu amu, ag Yawenu ebehilag oh bodoetta le meeb, ag Nug waappa daan, Nug oɗe dim lamidkkulagnu oo metta ii uuak kobol tutukkuppa heig! Ag mamelkad aɗi Yupretis le laih appa, Isip wanppa ele kayak hambuppuak noolagppa dup nona binalag meppig ele amu, ag kayak hambuppuak amu oh agappeg goppeg, ag Yawe, Nugib waappa daan, Nug oɗe dim lamitteg!

Duteronomi 16:16

Maɗ anen anenppa haen ewam ag Israel danab oh, ag Yawe, ahilag Kayak, ag aben Nug epeɗikkuppa Nug noobppa dup nona binag mekkulagnu, ag Nug amegppa uɗieg! Ag amu hobul gamag ahak ele ewamppa hekkulagoitte. Hobul dayak ewam amuam Bret Yis Iitta Lanaknu Hobul Nakok, Ee Tatam Oɗue Digma Awaknu Hobul, amu Pehppa Dayaknu Hobul ele. Ag Yawe, ahilag Kayak, ag Nug aben epeɗikku, amuppa haen anen anen amu ohppa Nug noobppa miag atiglag, ag ɗo hamu mettak Yawenu aon wakkulagoitte. Ag hamu aib goppig.

Eksodas 13:6

Ag amu hekkulagnu amu, ag deɗ eblaih aɗit ele daanna, ag deɗ amu ohppa bret yis iitta lakkulag. Aria, deɗ eblaih aɗitppa amu, deɗ amuppa ag Yawe dabmenana, ag qagmak gamag ahak ele heig!

Eksodas 12:8

Tuqan amuppa amu, ag sipsip teppu, o meeme teppu amu, ag aab aɗuppa managlag. Manona amu, ag teppu amu, bret yis iitta ele, amu ele lanana, keh mua ele lakkulag.

Eksodas 12:19

Hobul amunu deɗ eblaih aɗit ele amu, deɗ amu ohppa yis ag laulagppa aib dayom! Aɗinu? ⌊Hobul amunu deɗ amu ohppa,⌋ mudippan danab lailag laatai, o wan laihnu danab laatai, nug bret yis ele lab amu, aria nug Israel oolagppanu geɗittak daakkuoitte.

Eksodas 13:7

Deɗ eblaih aɗit ele amuppa amu, ag bret yis iitta aakkuib lakkulag! Ag yis, aria bret yis ele amu, ag amu aib uuppeg, ahilag aabppa, o wanppa dayom.

2 Korint 2:17

Danab kuɗum laa ag oinna, Kayak naippa men doɗonu uɗat hetteb ele amu, ig amubia ii hettem. Iitta. Ig Kristusnu daatta, maɗi nid Kayak maatte gotteb bia, ig oonig oppiaawak eleppa Kayak noobppa nai amu mehuqttem.