ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:39 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

³⁹ ᓇᒪ ᑎᑯᓇ ᓱᒐᔨᑕᑯᓱᐅᓇ ᐊᓐᑕ ᐃᔅᐱᒥᒡ ᑭᔭ ᒪᒃ ᐅᑕ ᓂᑕᒡ ᒐᒋ ᐃᒐᑕᐃᑯᔭᐧᒄ ᐅᓴᒋᐃᐛᐅᓂᒡ ᐅᒋ᙮ ᑭᔭ ᓇᒪ ᑎᑯᓂᔪᐤ ᒐᒂᔪᐤ ᐊᒋ ᐅᓯᑕᑦ ᒋᓴᒪᓂᑐᐤ ᒐᒋ ᐃᒐᑕᐃᑯᔭᐧᒄ ᙭ ᐅᓴᒋᐃᐛᐅᓂᒡ ᐅᒋ᙮ ᐊᓂᔭ ᑕᓐ ᑲ ᐃᓯ ᐃᑐᑎᒪᑕᐧᒄ ᒋᓴᔅ ᙭ᑕ ᒋᑎᐸᔨᒋᒐᓯᒥᓄᐛ ᐊᑯᑕ ᑲ ᐛᐸᑎᔨᑕᐧᒄ ᑕᓐ ᐊᔅᐱᔅ ᓴᒋᐃᑕᐧᒄ ᒋᓴᒪᓂᑐᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:39 Iomraidhean Croise

ᑎᐱᑦ ᐅᓂᑭᒧᐅᓇ 64:6

ᓇᓂᑐᐛᐸᑎᒧᒡ ᒥᒐᑎᓯᐅᓇ; ᐛᓂᔅᒐ ᓇᓂᑐᐛᔨᒋᒐᐅᒡ ᒪᒧᐤ ᐱᒋᔪᐤ ᐅᒥᑐᓇᐃᒋᑭᓄᐛᒡ ᒥᓯᐛ ᐊ ᐃᑕᓯᒡ ᑭᔭ ᐅᑕᐃᐛᒡ ᑕᒥᔪᐤ᙮

ᒪᑎᔪᐤ 24:24

ᒋᑭ ᑕᐅᒡ ᐊᐛᓐᒋ ᐊ ᐎᔭᓯᐃᐛᒡ ᐊ ᐃᔅᒋᔄᒡ ᓂᔾ ᙭᙮ ᒋᑭ ᑕᐅᒡ ᑭᔭ ᒥᒋ ᐅᒋᔅᒋᐛᐃᒐᓱᒡ᙮ ᐊᐅᑯᓐᒡ ᒪᒃ ᐅᒡ ᓂᓇᐧᑯᐤ ᒪᒥᔅᑲᒡ ᐛᐸᑎᔨᐛᐅᓇ ᒐ ᐛᐸᑎᔨᐛᒡ ᑭᔭ ᒋᑭ ᐃᑐᑎᒧᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ᙮ ᐊᑯᑕ ᒪᒃ ᒐ ᐅᒋ ᐎᔭᓯᐊᒡ ᐊᐛᔪᐛ ᓂᑎᒥᒄ ᒐᒋ ᐃᓯ ᑕᑈᑎᒥᔨᒋ᙮ ᐊᓂᔭᔪᐛ ᒪᒃ ᒋᓴᒪᓂᑐᐛ ᑲ ᐅᑎᓇᔨᒋ ᐊᐛᔪᐛ ᐊᐅᑯᓂ ᐊᓂᔭᔪᐛ ᒐ ᐎ ᐎᔭᓯᐊᒡ᙮

ᒠᓐ 16:27

ᐛᔅ ᒋᓴᒋᐃᑯᐛᐤ ᐅᑕᐎᒪᐤ ᐊᒋ ᓴᒋᐃᔭᒄ ᑭᔭ ᐊᒋ ᑕᑈᑎᒪᒄ ᐅᑕᐎᒪᐤ ᐊ ᑕᑦ ᐊᒋ ᐅᑐᑕᔭᓐ᙮

ᒠᓐ 17:26

ᓂᒋ ᐃᑐᑐᐛᐅᒡ ᒐᒋ ᒋᔅᒐᔨᒥᔅᒡ ᑭᔭ ᓇᒪ ᓂᑭ ᐅᒋ ᐳᓂᐛᓐ ᐊᓂᔭ ᐊ ᐃᑐᑐᐅᒂᐤ᙮ ᐊᑯ ᐊᓐ ᑕᓐ ᐊᔅᐱᔅ ᓴᒋᐃᔨᓐ ᑭᔭ ᐎᔨᐛᐤ ᒐᒋ ᐱᒋᔅᑲᑯᒡ᙮ ᐊᑯ ᒪᒃ ᑭᔭ ᓂᔾ ᒐ ᐱᒋᔅᑯᐅᒂᐤ᙮”

ᒠᓐ 3:16

ᐛᔅ ᒋᓴᒪᓂᑐᐤ ᐊ ᐃᔅᐱᔅ ᒋ ᓴᒋᐊᑦ ᒥᓯᐛ ᐊᐛᔪᐛ ᐅᑕ ᐊᔅᒋᒡ ᒋ ᒥᔨᐛᐤ ᑲ ᐸᐃᑯᓯᔨᒋ ᐅᑯᓴ, ᒥᓯᐛ ᐊᐛᔪᐛ ᑲ ᑕᑈᔭᔨᒪᔨᒋ ᒐ ᐊᑲ ᒋ ᓂᓱᐅᓇᑎᓯᔨᒋ ᒪᒃ ᒐᒋ ᐊᔭᔨᒋ ᑲᒋᒡ ᐱᒪᑎᓯᐅᓂᔪᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 1:7

ᐊᐅᑯᓐ ᒪᒃ ᐛᒋ ᒥᓯᓇᐊᒪᑎᑯᒡ ᒥᓯᐛ ᒋᔨᐛᐤ ᕈᒻ ᐊ ᑕᔭᒄ, ᒋᔨᐛᐤ ᒋᓴᒪᓂᑐᐤ ᑲ ᓴᒋᐃᑕᒄ ᑭᔭ ᑲ ᐎᔭᐱᒥᑕᒄ ᒐᒋ ᑎᐱᔨᐛᐅᓯᑐᑕᑕᒄ᙮ ᒋᓴᒪᓂᑐᐤ ᒍᑕᐎᓄᐤ ᑭᔭ ᒋᑎᐸᔨᒋᒐᓯᒥᓄᐤ ᒋᓴᔅ ᙭ ᒋᑭ ᓱᐛᔨᒥᑯᐛᐅᒡ ᑭᔭ ᒋᑭ ᒥᔨᑯᐛᐅᒡ ᒋᔭᒪᔨᑎᒧᐅᓂᔪᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 11:33

ᓇᔅᒡ ᑕᑈ ᒥᔽᔨᑕᑯᓱᐤ ᒋᓴᒪᓂᑐᐤ᙮ ᑕᑈ ᑭᒐᑕᐛᔨᑎᒻ ᑭᔭ ᒥᓯᐛ ᒐᒂᔪᐤ ᒋᔅᒐᔨᑎᒻ᙮ ᐃᔅᐱ ᐎᔭᔨᑕᐧᒃ ᒐᒂᔪᐤ ᓇᒪ ᓇᔅᒡ ᐊᐛᔪᐛ ᒋ ᐎᑎᒥᔪᐛ ᒐᒂᔪᐤ ᐊᓐᑕ ᐛᒋ ᐃᓯ ᐎᔭᔨᑕᐧᒃ ᐊᓂᔭ ᒐᒂᔪᐤ᙮ ᓇᒪ ᐊᐛᔪᐛ ᒋ ᒥᔪ ᒋᔅᒐᔨᑎᒥᔪᐛ ᑕᓐ ᐊ ᐃᑎᑦ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 5:8

ᒋᓴᒪᓂᑐᐤ ᒪᒃ ᐎᔾ ᓇᔅᒡ ᔅᒋ ᐛᐸᑎᔨᑯᓄᐤ ᑕᓐ ᐊᔅᐱᔅ ᓴᒋᐃᑕᐧᒄ, ᒋ ᐱᔅᑎᓇᐤ ᙭ᑕ ᒐᒋ ᓂᐱᔅᑎᒪᑎᔨᑕᐧᑯ ᐊᔅᒄ ᒪᒂᒡ ᒥᒋᑥᐅᓂᒡ ᐊᒋ ᐃᑕᐛᐧᒄ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 6:23

ᐛᔅ ᓂᐳᐅᓂᒡ ᐃᑐᑕᐃᑯᐤ ᐊᐛᓐ ᒥᒋᑥᐅᓂᔪᐤ᙮ ᐊᑯ ᐊᓐ ᐊᐛᓐ ᑲ ᐎᒐᐛᑦ ᒋᓴᔅ ᙭ᑕ ᒋᑎᐸᔨᒋᒐᓯᒥᓄᐛ ᒋᓴᒪᓂᑐᐛ ᓴᒐᔾ ᒥᔨᑯᐤ ᑲᒋᒡ ᐱᒪᑎᓯᐅᓂᔪᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:1

ᓇᒪ ᐊᑯ ᓂᓱᐅᓇᒋᒥᑯᐅᒡ ᒋᓴᒪᓂᑐᐛ ᐊᓐᒡ ᐊᐛᓐᒋ ᒋᓴᔅ ᙭ᑕ ᑲ ᐎᒐᐛᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 8:35

ᐊᐛᓐ ᒪᒃ ᒐᒋ ᐃᒐᓂᑕᐧᒄ ᙭ᑕ ᐅᓴᒋᐃᐛᐅᓂᔨᒡ ᐅᒋ᙮ ᐊᑎ ᓇᔅᒡ ᓂᓇᐧᑲᑕᔨᒧᔭᒂ ᒪᒃ ᓇᔅᒡ ᐊᔨᒥᐅᔭᒂ, ᑭᔭ ᐊᑎ ᐛᐎᓯᒐᔨᑎᒥᐃᑯᐅᔭᒂ, ᐊᑎ ᐃᓯᓇᒂᒐ ᒐᒋ ᑯᐅᐧᑭᑕᔭᐧᒄ, ᑭᔭ ᐊᑎ ᓇᔅᒡ ᒋᔅᑎᒪᑎᓯᔭᒂ, ᐊᑎ ᓇᔅᒡ ᑯᔅᑕᑎᒂᒐ ᑕᓐᑕ ᐊ ᑕᐛᐧᒄ ᑭᔭ ᒪᒃ ᐊᑎ ᓂᐸᐃᑯᐅᔭᒂ ᓇᒪ ᐃᔭᐱᒡ ᒋᑭ ᒋ ᐃᒐᑕᐃᑯᓇᓄᐤ ᒋᓴᔅ ᐅᓴᒋᐃᐛᐅᓂᒡ ᐅᒋ᙮

2 ᑯᕆᓐᑎᔭᓇ 11:3

ᓂ ᑯᔅᐱᓇᑕᔨᑕᓐ ᒐᒋ ᐎᔭᓯᐃᑯᐅᔭᒄ, ᒧᔭᒻ ᑕᓐ ᑲ ᐃᓯ ᐎᔭᓯᐃᑯᑦ ᐃᑉ ᒋᓇᐱᒂ ᐊᒋ ᑭᑭᒋᔭᒥᑯᑦ, ᓂ ᑯᔅᐱᓇᑕᔨᑕᓐ ᒐᒃ ᒐ ᐊᑲ ᒋ ᐃᑕᔨᒪᒄ ᙭ ᑕᓐ ᐊ ᐃᑕᔨᒪᒄ ᐊᓄᒡ, ᓇᔅᒡ ᒋ ᐊᑎ ᐃᓯ ᓇᓴᐛᐛᐤ ᑭᔭ ᒥᒄ ᐎᔾ ᒋ ᓂᓇᑭᑐᐛᔨᒪᐛᐤ᙮

2 ᑯᕆᓐᑎᔭᓇ 2:11

ᐅ ᒪᒃ ᒋᑦ ᐃᑎᓇᓄᐤ ᒐ ᐊᑲ ᒋ ᐎᔭᓯᐃᑕᐧᒄ ᒥᒋᒥᓂᑐᐤ᙮ ᐛᔅ ᒋ ᒋᔅᒐᔨᒪᓄᐤ ᑕᓐ ᐛ ᐃᑎᑦ᙮

ᐃᐱᓯᔭᓇ 1:4

ᐊᔅᒄ ᐊᑲ ᐛᐛᒡ ᐅᒋ ᐅᓯᑕᑭᓄᐅᒡ ᐅ ᐊᔅᒋᔾ, ᓴᔅ ᔅᒋ ᐅᑎᓂᑯᓄᐤ ᒋᓴᒪᓂᑐᐤ ᐎᔾ ᒐ ᐊᔭᐅᑕᐧᒄ ᐊᓂᔭ ᐅᒋ ᙭ᑕ ᐊ ᐎᒐᐅᒪᐧᑯ᙮ ᔅᒋ ᐅᑎᓂᑯᓄᐤ ᒐᒋ ᐸᔭᒋᓯᐛᐧᒄ ᑭᔭ ᐊᑲ ᓇᔅᒡ ᒐᒂᓐ ᒐᒋ ᑎᒂᒡ ᒐ ᐃᓯ ᐊᑕᒪᔨᑕᑯᓯᔭᐧᒄ ᒋᓴᒪᓂᑐᐤ ᐃᔅ ᐊ ᑕᑦ᙮

ᐱᓕᐱᔭᓇ 3:12

ᓇᒪᐎᔾ ᐊᓐ ᐛ ᐃᔅᒋᔄᔭᓐ ᓴᔅ ᓇᔅᒡ ᐊ ᐃᑕᔨᑕᑯᓯᔭᓐ ᐅ ᑲ ᐃᓯ ᐱᑯᓴᔨᒧᔭᓐ ᒪᒃ ᓇᔅᒡ ᒐᒋ ᐃᑕᔨᑕᑯᓱᐅᒡ ᐊᓂᔭᔪᐤ ᑲ ᐃᓯ ᓂᑐᐛᔨᒥᑦ ᒋᓴᒪᓂᑐᐤ ᒐᒋ ᐃᑕᔨᑕᑯᓱᐅᒡ᙮ ᒥᒄ ᒪᒃ ᓱᒃ ᓂᑭ ᑯᒋᑕᓐ ᐊᓐ ᒐᒋ ᐃᑕᔨᑕᑯᓯᔭᓐ, ᐛᔅ ᓴᔅ ᓂᑎᐸᔨᒥᒄ ᙭ ᒋᓴᔅ᙮

ᐱᓕᐱᔭᓇ 3:3

ᒋᔭᓄᐤ, ᐊᐅᒄ ᑕᑈ ᐛ ᐅᑦ ᐃᔨᒥᑐᑕᑕᐧᒄ ᒋᓴᒪᓂᑐᐤ, ᒋᔭᓄᐤ ᐅᑦ ᐊᒐᒂ ᑲ ᐎᒋᐃᑎᑕᐧᑯ ᐊ ᐊᔭᒥᐊᔅᑐᐛᐧᒄ ᑭᔭ ᒋ ᒋᔅᑕᔨᑕᑯᐊᓄᐤ ᙭ ᒋᓴᔅ ᐎᔾ ᐊᒋ ᐃᑐᑕᑕᐧᒄ ᒐᒋ ᐅᑦ ᐃᔨᒥᑐᑕᑕᐧᒄ ᒋᓴᒪᓂᑐᐤ᙮ ᓇᒪᐎᔾ ᐅᔅᒋᒡ ᒥᔭᒡ ᑕᓐ ᐊ ᐃᑐᑕᓱᔭᐧᒄ ᒋᑭ ᒋ ᐅᒋ ᒪᒥᒋᒧᓇᓄᐤ᙮

ᐱᓕᐱᔭᓇ 3:8

ᓇᒪ ᒪᒃ ᒥᒄ ᐊᓂᔭᔪᐛ ᒐᒂᔪᐛ ᑲ ᐊᔨᒧᑎᒪᓐ ᓂ ᐅᒋ ᐛᐱᓇᓐ᙮ ᒥᓯᐛ ᑯᑎᒡ ᒐᒂᓐ ᓇᒪ ᓇᔅᒡ ᓂᑦ ᐊᐱᑕᔨᑎᒥᐃᑯᓐ ᐊᔅᐱᔅ ᐊᑐᐎᔅ ᐃᑕᔨᑕᒂᒡ ᐊ ᒋᔅᒐᔨᒥᒃ ᙭ ᒋᓴᔅ ᑕᑈ ᐊ ᐅᑎᐸᔨᒋᒐᒥᔭᓐ᙮ ᐎᔾ ᐅᒋ ᐊᐅᒄ ᐛᒋ ᐊᑲ ᐊᐱᑕᔨᑎᒥᐃᑯᔭᓐ ᒥᓯᐛ ᐅᔭ ᒐᒂᔪᐛ, ᐛᐱᓇᓱᐅᓐ ᓂᑦ ᐃᑕᔨᑎᒥᐃᑯᓐ ᐅᔭ ᒐᒂᔪᐛ, ᐎᔾ ᒐᒋ ᐎᒐᐅᒃ,

2 ᑕᓴᓗᓂᔭᓇ 2:4

ᒥᓯᐛ ᒐᒂᔪᐤ ᑲ ᐃᑐᑕᑯᔨᒋ ᐊᐛᔪᐛ ᒐᒋ ᐊᔭᒥᐊᔅᑐᐛᔨᒋ ᒋᓴᒪᓂᑐᐛ ᒪᒃ ᒋᓴᒪᓂᑐᐛ ᐊ ᑕᔨᒋ ᐊ ᐅᒋᐱᔨᒡ ᐊ ᐃᑕᔨᑕᑯᓂᔨᒡ ᒋᑭ ᒪᓯᑕᐤ᙮ ᐊᔪᐅᒄ ᐅᔭ ᒐ ᐃᑎᑦ ᐊ ᓂᑐᐛᔨᑕᐧᒃ ᐎᔾ ᓇᔅᒡ ᒐᒋ ᒋᔅᑕᔨᑕᑯᐊᑭᓄᐅᑦ᙮ ᐛᐛᒡ ᒋᑭ ᐱᒐᐤ ᐊᓐᑕ ᒋᓴᒪᓂᑐᐛ ᐅᒋᓴᐊᔭᒥᐊᐅᒋᐛᐱᒡ ᐊᑯ ᒐ ᐃᔅᒋᔄᑦ ᐎᔾ ᐊ ᒋᓴᒪᓂᑐᐅᑦ᙮

1 ᒠᓐ 4:16

ᐊᑯ ᒪᒃ ᒋᔅᒐᔨᑕᓇᓄᐤ ᑭᔭ ᒋ ᑕᑈᑕᓇᓄᐤ ᑕᑈ ᐊ ᓴᒋᐃᑕᐧᒄ ᒋᓴᒪᓂᑐᐤ᙮ ᒋᓴᒪᓂᑐᐤ ᐊᐅᒄ ᓴᒋᐃᐛᐅᓐ᙮ ᐊᓐ ᒪᒃ ᑲ ᑕᑦ ᓴᒋᐃᐛᐅᓂᒡ, ᐱᒋᔅᑯᐛᐤ ᒋᓴᒪᓂᑐᐛ ᑭᔭ ᐱᒋᔅᑲᑯᐤ ᒋᓴᒪᓂᑐᐛ᙮

1 ᒠᓐ 4:19

ᒋ ᓴᒋᐃᐛᓇᓄᐤ ᐎᔾ ᓂᔅᑎᒻ ᐊᒋ ᓴᒋᐃᑕᐧᒄ᙮

ᒋᔅᒐᔨᑕᑯᑕᒐᐅᓐ 12:9

ᐊᑯ ᒂ ᓂᒋᐛᐱᓇᑭᓄᐅᑦ ᐊᓐ ᒥᔅᑎ ᒥᓐᑐᔅ ᒋᒋᒋᓯᑯᒡ ᐅᒡ᙮ ᐊᐅᒄ ᒪᒃ ᐊᓐ ᒋᓇᐱᒄ ᐛᔅᑭᒡ ᐊᓐᑕ ᑲ ᑕᑦ, ᒥᒋᒥᓂᑐᐤ ᒪᒃ ᓴᑎᓐ ᑲ ᐃᓯᓂᐧᑲᑕᑭᓄᐅᑦ᙮ ᐊᐅᒄ ᐅ ᑲᒋ ᐎᔭᓯᐊᑦ ᒥᓯᐛ ᐊᐛᔪᐛ ᐅᑕ ᐊᔅᒋᒡ᙮ ᐊᓐᑕ ᒪᒃ ᐊᔅᒋᒡ ᒋ ᐃᓯ ᐛᐱᓇᑭᓄᐤ ᑭᔭ ᒥᓯᐛ ᐊᓂᔭ ᐅᑦ ᐊᓐᒋᓂᒪ᙮

ᒋᔅᒐᔨᑕᑯᑕᒐᐅᓐ 13:14

ᐊᓐᒡ ᒪᒃ ᐊᐛᓐᒋ ᐊᓐᑕ ᐊᔅᒋᒡ ᐊ ᑕᒡ ᒋ ᐎᔭᓯᐃᑯᐅᒡ ᐅᔭ ᑲ ᐃᓯ ᐱᔅᑎᓇᑭᓄᔨᒋ ᐅᔭ ᒥᒋ ᐊᐛᓯᓴ ᒐᒋ ᒪᒥᔅᑲᒡ ᑎᔨᒋ ᐊ ᑭᓄᐛᐱᒥᑯᔨᒋ ᐊᓂᔭ ᑯᑎᑲ ᒥᒋ ᐊᐛᓯᓴ᙮ ᐊᓐᒡ ᐊᐛᓐᒋ ᐊᔅᒋᒡ ᑲ ᑕᒡ ᒋ ᐃᑎᑯᐅᒡ ᐊᓂᔭ ᓂᓱ ᐊ ᑕᔨᒋ ᒥᒋ ᐊᐛᓯᓴ ᒐᒋ ᐅᓯᐊᒡ ᒥᓂᑐᐧᑲᓇ ᐊ ᒋᔅᑕᔨᑕᑯᐊᒡ ᐊᓂᔭ ᒥᒋ ᐊᐛᓯᓴ ᒋᒋᐛ ᑲ ᒥᓱᐛᑭᓂᐧᑲᑎᑯᔨᒋ ᓂᑐᐱᔪᐅ-ᒧᐧᑯᒪᓂᔪᐤ ᒥᒄ ᒪᒃ ᐃᔭᐱᒡ ᐊᒋ ᐱᒪᑎᓯᔨᒋ᙮

ᒋᔅᒐᔨᑕᑯᑕᒐᐅᓐ 19:20

ᐊᑯ ᒂ ᒪᑯᓇᑭᓄᐅᑦ ᐊᓐ ᒥᒋ ᐊᐛᓯᔅ ᑭᔭ ᐊᓐ ᒥᒋ ᐅᒋᔅᒋᐛᐃᒐᓱᐤ᙮ ᐊᐅᒄ ᐅ ᒥᒋ ᐅᒋᔅᒋᐛᐃᒐᓱᐤ ᑲ ᒪᒥᔅᑲᒡ ᐃᑎᑦ ᐅᑎᔅᑯᐤ ᐊᓂᔭᔪᐛ ᒥᒋ ᐊᐛᓯᓴ ᐊ ᑕᔨᒋ᙮ ᐊᑯᑕ ᑲ ᐅᒋ ᐎᔭᓯᐊᑦ ᐊᓂᔭᔪᐛ ᐊᐛᔪᐛ ᑲ ᐅᑎᓂᒥᔨᒋ ᐊᓂᔭᔪᐛ ᒥᒋ ᐊᐛᓯᓴ ᐅᒋᔅᒋᓄᐛᒋᐃᐛᐅᓂᔪᐤ ᑭᔭ ᑲ ᐊᔭᒥᐊᔅᑐᐛᔨᒋ ᐊᓂᔭ ᒥᓂᑐᐧᑲᓇ ᒧᔭᒻ ᐊᓂᔭᔪᐛ ᒥᒋ ᐊᐛᓯᓴ ᐊ ᐃᓯᓇᑯᓯᔨᒋ ᑲ ᐃᓯᐊᑭᓄᔨᒋ᙮ ᑕᐱᔅᑯᓐ ᐊᓐ ᒥᒋ ᐊᐛᓯᔅ ᑭᔭ ᐊᓐ ᒥᒋ ᐅᒋᔅᒋᐛᐃᒐᓱᐤ ᐊᐱᒪᑎᓯᒡ ᒋ ᐃᓯ ᐛᐱᓇᑭᓄᐎᒡ ᐊᓐᑕ ᒥᒋ ᐃᔅᑯᑕᐤ ᓴᑲᐃᑭᓂᒡ ᐊᓐᑕ ᐊ ᐃᔎᑕᔨᒡ ᐊ ᐎᔄᐛᐸᑕᔨᒡ ᒐᒂᔪᐤ ᓇᔅᒡ ᐊ ᐎᓂᒪᔅᑕᔨᒡ᙮

ᒋᔅᒐᔨᑕᑯᑕᒐᐅᓐ 2:24

ᒥᓯᐛ ᒪᒃ ᒋᔨᐛᐤ ᑕᔭᑕᐃᕋ ᐊ ᑕᔭᒄ ᐊᑲ ᐊᐱᑕᔨᑎᒪᒄ ᐅ ᑲ ᐃᓯ ᒥᒋ ᒋᔅᑯᑎᒪᒐᓄᒡ, ᒋᔨᐛᐤ ᐊᑲ ᒋᔅᒐᔨᑎᒺᒄ ᒥᒋᒥᓂᑐᐤ ᐅᒋᒧᒡ ᐃᑐᐅᓇ, ᓇᒪ ᒋ ᓂᑐᐛᔨᑎᒪᑎᓇᐛᐤ ᑯᑎᒡ ᒐᒂᓐ ᒐᒋ ᐃᑐᑎᒪᒄ,

ᒋᔅᒐᔨᑕᑯᑕᒐᐅᓐ 20:3

ᐃᔅᐱ ᒪᒃ ᑲ ᒪᑯᐱᑕᑦ ᐊᓂᔭᔪᐛ ᒥᔅᑎ ᒥᓐᑐᓴ, ᐊᑯ ᒂ ᐳᒐᐛᐱᓇᑦ ᐊᓐᑕ ᐊᓂᔭ ᑲ ᒥᔅᑎ ᐱᑯᓇᔭᔨᒡ᙮ ᒂ ᐊᑎ ᐊᑎᓴᑲᐛᑦ ᐊᓐᑕ ᑭᔭ ᒋ ᒋᔅᒋᓄᐛᒋᑕᐤ ᐊᓐᑕ ᐊ ᑕᔨᒋ ᒐ ᐊᑲ ᒋ ᐊᐸᐛᑭᓄᔨᒋ ᐸᑐᔅ ᒋ ᒥᔭᐅᐱᔨᒂᐛ ᐊᓂᔭᔪᐛ ᐸᐃᒂᐤ ᒐᓯᐱᔪᐛ ᐱᐳᓇ᙮ ᐊᐅᒄ ᐅᔭ ᑲ ᐃᑐᑐᐛᑦ ᐊᑲ ᒥᓐ ᒐᒋ ᐎᔭᓯᒪᔨᒋ ᒥᓯᐛ ᐊ ᐃᑎᔅᑲᓇᓯᔨᒋ ᐊᐛᔪᐛ᙮ ᐃᔅᐱ ᒪᒃ ᐸᐃᒂᐤ ᒐᓯᐱᔪᐛ ᐱᐳᓇ ᐅᑎᒋᐱᔨᒐ, ᐊᑯ ᐛᐃᐱᔅᒋᔅ ᒐ ᐊᐱᐧᑯᓇᑭᓄᐅᑦ᙮

ᒋᔅᒐᔨᑕᑯᑕᒐᐅᓐ 20:7

ᐃᔅᐱ ᒪᒃ ᒋ ᐅᑎᒋᐱᔨᒂᐛ ᐊᓂᔭᔪᐛ ᐸᐃᒂᐤ ᒐᓯᐱᔪᐛ ᐱᐳᓇ, ᐊᑯ ᒐ ᓴᓇᑭᓄᐅᑦ ᒥᒋᒥᓂᑐᐤ ᐊᓐᑕ ᐊᓂᔭ ᑲ ᒋᐸᐛᑭᓄᐅᑦ᙮