ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 12:3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

³ ᒋᓴᒪᓂᑐᐤ ᓂᒋ ᒋᓴᐛᑐᑕᒄ ᐊᒋ ᒥᔨᑦ ᒐᒋ ᐊᑐᔅᑯᐅᒄ᙮ ᐊᐅᒄ ᒪᒃ ᐛᒋ ᐃᑎᑎᑯᒡ ᒥᓯᐛ ᐊ ᑎᓯᔭᒄ ᐊᑲ ᐅᔅᑕ ᒐᒋ ᐃᑕᔨᒥᓱᔭᒄ ᑕᓐ ᒋᐸ ᐃᑕᔨᒥᓱᓇᐛᐤ᙮ ᑯᐃᔅᒄ ᐎᓯ ᒪᒥᑐᓇᔨᒥᓱᒄ᙮ ᒥᓯᐛ ᐊ ᑎᓯᔭᒄ ᒋᑭ ᐎᔭᔨᑕᓇᐛᐤ ᑕᓐ ᑕᑈ ᒐᒋ ᐃᑐᑎᒪᒄ᙮ ᐅ ᒪᒃ ᐊ ᐛᑕᔨᑎᒪᒄ ᒋᑭ ᐎ ᓂᓇᑭᑐᐛᔨᑕᓇᐛᐤ ᑕᓐ ᑲ ᐃᔅᐱᔅ ᒥᔨᑕᒄ ᒋᓴᒪᓂᑐᐤ ᑕᑈᑎᒧᐅᓂᔪᐤ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 12:3 Iomraidhean Croise

ᓗᒃ 18:11

ᐊᑯ ᐊᓐ ᐸᕆᓯ ᒋ ᐸᐃᑯᑲᐳᐤ ᐊ ᐃᓯ ᐊᔭᒥᐊᑦ, ‘ᒋᓴᒪᓂᑐᐤ, ᒋ ᓂᓇᔅᑯᒥᑎᓐ ᐊᑲ ᐃᓯᓇᑯᓯᔭᓐ ᑯᑎᑭᒡ ᐊ ᐃᓯᓇᑯᓯᒡ ᐊᐛᓐᒋ ᑭᔭ ᐊᑲ ᒥᔅᑎᒪᐅᒋᑎᒪᓱᔭᓐ ᓱᓇᔭᐤ ᑭᔭ ᐊᑲ ᓂᑎᒥᒄ ᐃᑐᑐᐅᒂᐤ ᐊᐛᓐᒋ ᑭᔭ ᐊᑲ ᐱᓯᒂᑎᓯᔭᓐ᙮ ᒋ ᓂᓇᔅᑯᒥᑎᓐ ᐊᑲ ᐃᓯᓇᑯᓯᔭᓐ ᑕᓐ ᐊ ᐃᓯᓇᑯᓯᑦ ᐊᓇ ᑲ ᒪᒧᓴᒋᓇᐧᒃ ᒋᓴᐅᒋᒪᐤ ᓱᓇᔭᔪᐤ ᑲ ᐃᑕᐱᑎᓯᑦ᙮

ᒠᓐ 3:34

ᐊᓐ ᑲ ᐸᒋ ᐃᑎᓴᐅᑯᑦ ᒋᓴᒪᓂᑐᐛ ᐃᔅᒋᔄᐤ ᑕᓐ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᒐᒋ ᐃᔅᒋᔄᑦ ᑭᔭ ᓇᔅᒡ ᐱᒋᔅᑲᑯᐤ ᒋᓴᒪᓂᑐᐛ ᐅᑦ ᐊᒐᐧᑯᔪᐛ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 1:5

᙭ ᐅᒋ ᒋᓴᒪᓂᑐᐤ ᓂᒋ ᐅᑎᓂᑯᓇᓐ ᐊ ᒥᔽᔨᑕᑯᓂᔨᒡ ᒐᒋ ᐃᓯ ᐊᑐᔅᑯᐅᒋᒡ, ᐊᐅᒄ ᐅᔭ ᐊᑈᔅᑕᓐ ᒐᒋ ᐃᑕᐱᑎᓯᐅᒋᒡ, ᒐᒋ ᐎᒋᐃᒥᒋᒋ ᒥᓯᐛ ᓂᓇᐧᑯᐤ ᐊ ᐃᑎᔅᑲᓇᓯᔨᒋ ᐊᐛᔪᐛ ᒐᒋ ᐊᑎ ᑕᑈᔭᔨᒥᑯᑦ ᑭᔭ ᒐᒋ ᐊᑎ ᓂᓇᐃᑕᑯᑦ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 11:20

ᑕᑈ ᑭᑈ᙮ ᒥᒄ ᒪᒃ, ᒋᓴᒪᓂᑐᐤ ᒋ ᐃᒐᓇᐤ ᐊᓂᔭᔪᐛ ᒍᐤ ᐃᔪᐛ ᐛᓴ ᐊᒋ ᐊᓏᑕᑯᑦ᙮ ᒋᔾ ᒪᒃ ᐎ, ᒋ ᒥᔪ ᓂᑕᐅᒋᓐ ᐊᓐᑕ ᐊᓐ ᒥᔅᑎᒄ ᐛᔅ ᔅᒋ ᑕᑈᔭᔨᒪᐤ ᒋᓴᒪᓂᑐᐤ᙮ ᐊᑲᐎᔾ ᒋᑭ ᐅᒋ ᓂᓇᐸᐅᒧᓐ᙮ ᑎᑯᓐ ᐃᔭᐱᒡ ᒐᒋ ᐃᔭᒂᒥᔨᓐ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 11:25

ᓂᐧᑲᓂᓯᑐᒄ, ᒋ ᓂᑐᐛᔨᒥᑎᓇᐛᐤ ᒐᒋ ᓂᔅᑐᑎᒪᒄ ᐅᔭ ᑲ ᐃᓯ ᒋᔅᒐᔨᑕᑯᑕᑦ ᒋᓴᒪᓂᑐᐤ ᑭᔭ ᓇᒪ ᒋᑭ ᐅᒋ ᐃᑕᔨᑕᓇᐛᐤ ᓇᔅᒡ ᐊ ᐃᑈᐧᑲᔭᒄ᙮ ᐊᓄᒡ ᒪᒂᒡ ᒥᒐᑦ ᐊᓐᒡ ᒍᐤ ᑲ ᐃᑎᔅᑲᓇᓯᒡ ᐎ ᓯᐱᑎᒧᒡ᙮ ᓇᒪ ᐎ ᑕᑈᐅᒐᔨᒪᐅᒡ ᒋᓴᒪᓂᑐᐛ᙮ ᒥᒄ ᒪᒃ ᒋᑭ ᐅᑎᒋᐱᔪᐤ ᒐ ᑕᑈᑕᒡ᙮ ᐊᔅᒄ ᒪᒃ ᐊᑲ ᐅᑎᒋᐱᔨᒡ ᐅ ᒥᓯᐛ ᐊᓐᒡ ᐊᑲ ᒍᐤ ᐃᑎᔅᑲᓇᓯᒡ ᑕᑐᐤ ᒥᒄ ᒐ ᐅᑎᓂᑯᐛᒂ ᒋᓴᒪᓂᑐᐛ ᒐᒋ ᐱᒪᒋᐅᒡ, ᒋᑭ ᐱᒪᒋᐅᒡ᙮

ᕈᒪᓇ ᑈᓪ ᑲ~ᒥᓯᓇᐊᒧᐛᑦ ᐅᒪᒧᐊᔭᒥᐊᐛ ᕈᒥᒡ ᑲ~ᑕᔨᒋ 12:16

ᒥᓯᐛ ᐊ ᑎᓯᔭᒄ ᓱᒃ ᐎ ᒥᔪ ᐎᒐᐅᑐᒄ᙮ ᐊᑲᐎᔾ ᒋᑭ ᐅᒋ ᒋᔅᑕᔨᒥᑎᓱᓇᐛᐤ᙮ ᐊᑲᐎᔾ ᓇᑲᐎᒄ ᒐᒋ ᐎᒐᐛᑯᒡ ᐊᓐᒡ ᓇᔅᒡ ᐊᑲ ᐊᐱᑕᔨᒥᑯᒡ ᐊᐛᔪᐛ᙮ ᐊᑲᐎᔾ ᒋᑭ ᐅᒋ ᐃᑕᔨᒥᓱᓇᐛᐤ ᓇᔅᒡ ᐊ ᐃᑈᐧᑲᔭᒄ᙮

1 ᑯᕆᓐᑎᔭᓇ 15:10

ᒥᒄ ᒪᒃ ᒋᓴᒪᓂᑐᐤ ᓴᒐᔾ ᐊ ᒥᔪᑐᑎᒧᐛᑦ ᐊᐛᔪᐛ ᐊᑯᑕ ᐛᒋ ᐃᓯᓇᑯᓯᔭᓐ ᑕᓐ ᐊ ᐃᓯᓇᑯᓯᔭᓐ ᐊᓄᒡ᙮ ᓇᒪ ᒪᒃ ᒐᔅᑲ ᐊᓂᔭ ᑲ ᐃᓯ ᓴᒐᔾ ᒥᔪᑐᑎᒧᐅᑦ᙮ ᓂᔾ ᒪᒃ ᐎ, ᐊᑐᐎᔅ ᓱᒃ ᓂᒋ ᐊᑐᔅᒐᓐ ᐃᔅᐱᔅ ᒥᓯᐛ ᐊ ᑕᑎᓯᒡ ᐊᓐᒡ ᑯᑎᑭᒡ ᐊᑈᔅᑕᓇᒡ᙮ ᓇᒪᐎᔾ ᒪᒃ ᓂᔾ ᑎᐱᔨᐛ ᑲ ᐃᑎᔭᓐ᙮ ᒋᓴᒪᓂᑐᐤ ᐎᔾ ᓴᒐᔾ ᐊᒋ ᒥᔪᑐᑎᒧᐅᑦ ᐛᒋ ᐃᑐᑎᒪᓐ ᐅ ᑲ ᐃᓯ ᐊᔨᒧᑎᒪᓐ᙮

1 ᑯᕆᓐᑎᔭᓇ 3:10

ᒋᓴᒪᓂᑐᐤ ᑲ ᐃᓯ ᒐᓱᐛᑦ ᒥᔪᑐᑎᒧᐅᑦ ᓂᒋ ᐃᑎᒄ ᒐᒋ ᐊᑐᔅᑯᐅᒃ᙮ ᓂᒋ ᐃᓯ ᐊᑐᔅᒐᓐ ᒪᒃ ᒧᔭᒻ ᐊᓐ ᐊᐛᓐ ᓇᔅᒡ ᑲ ᑭᔅᒋᐅᑦ ᐊ ᐅᓯᑕᑦ ᑕᓐᑕ ᒐ ᑕᒋᑲᐳᐎᔨᒡ ᒥᒋᐛᐱᔪᐤ᙮ ᐊᑯ ᒪᒃ ᑯᑎᑭᒡ ᐊ ᐊᑎ ᒋᔅᑕᒡ ᐊᓂᔭ ᑲ ᐃᓯ ᒋᒋ ᐎᔨᑲᐳᐅᑕᐅᒡ᙮ ᒥᒄ ᒪᒃ ᒥᓯᐛ ᐊᓐᒡ ᑲ ᐊᑎ ᐊᑐᔅᒐᔅᑕᒡ ᐊᓂᔭ ᑲ ᐃᓯ ᒋᒋ ᐎᔨᑲᐳᐅᑕᐅᒡ ᔭᐃᑕᔾ ᑯᐃᔅᒄ ᒋᑭ ᐎ ᐃᓯ ᐎᔨᑲᐳᐅᑕᐅᒡ ᐊᓂᔭ ᒥᒋᐛᐱᔪᐤ᙮

1 ᑯᕆᓐᑎᔭᓇ 7:17

ᒥᓯᐛ ᐊᐛᓐ ᒋᐸ ᐃᓯ ᐱᒪᑎᓯᐤ ᑕᓐ ᑲ ᐃᓯ ᒥᔭᑭᓄᐅᑦ ᒐᒋ ᐃᓯ ᐱᒪᑎᓯᑦ, ᐊᓂᔭ ᑭᑈ ᑲ ᐃᓯ ᐅᑎᓂᑯᑦ ᒋᓴᒪᓂᑐᐛ ᒐ ᐃᓯ ᐱᒪᑎᓯᑯᐱᓇ᙮ ᐊᐅᒄ ᐅᔭ ᐊ ᐃᓯ ᓯᒋᒥᒂᐤ ᒐᒋ ᐃᓯ ᓂᓇᑭᑐᐛᔨᑕᒡ ᒥᓯᐛ ᒪᒧᐤ ᑲ ᐊᔭᒥᐊᐛᑎᓯᒡ᙮

2 ᑯᕆᓐᑎᔭᓇ 10:13

ᓂᔭᓐ ᒪᒃ ᐎ, ᓇᒪ ᐊᑐᐎᔅ ᓂᑭ ᐅᒋ ᐃᓯ ᒪᒥᔽᒋᒥᓱᓇᓐ᙮ ᒥᒄ ᐊᓂᔭ ᐊᑐᔅᒐᐅᓂᔪᐤ ᒋᓴᒪᓂᑐᐤ ᑲ ᒥᔨᒥᑦ ᒐ ᐊᑐᔅᒐᔅᑎᒧᒋᒡ ᐊᐅᒄ ᒥᒄ ᐊᓐ ᒐ ᒪᒥᔽᑐᑎᒪᒡ᙮ ᐊᑯᑕ ᒪᒃ ᐊ ᐊᔅᒋᐱᔭᒄ ᒋᔨᐛᐤ ᐛᔅ ᒋᑦ ᐊᑐᔅᑲᑎᓇᓐ᙮

2 ᑯᕆᓐᑎᔭᓇ 12:13

ᑕᓐ ᑲ ᐃᓯ ᐊᑲ ᒧᔭᒻ ᐃᑐᑕᑎᑯᒡ ᒋᔨᐛᐤ ᑕᓐ ᐊ ᐃᑐᑐᐅᒂᐤ ᑯᑎᑭᒡ ᒪᒧᐤ ᑲ ᐊᔭᒥᐊᐛᑎᓯᒡ᙮ ᐊᓐ ᐊ ᐊᑲ ᐅᒋ ᐊᔨᒧᑎᒪᑎᑯᒡ ᒐᒋ ᐛᐎᒋᐃᔭᒄ᙮ ᐛᐸᔨᑎᒧᒄ ᑲ ᐅᓂᑐᑕᑎᑯᒐ ᐊᑲ ᐅᒋ ᓂᑐᑎᒪᑎᑯᒡ ᒐᒋ ᐛᐎᒋᐃᔭᒄ᙮

2 ᑯᕆᓐᑎᔭᓇ 12:7

ᓇᔅᒡ ᑕᑈ ᒋ ᒥᔅᑲᑕᔨᑕᑯᓂᔪᐤ ᑕᓐ ᑲ ᐃᓯ ᐛᐸᑎᔨᑦ ᐅᑎᐸᔨᒋᒐᐤ᙮ ᐊᑲ ᒪᒃ ᒐᒋ ᒋᔅᑕᔨᒧᔭᓐ ᑕᓐ ᑲ ᐃᓯ ᒪᒥᔅᑲᒡ ᐛᐸᑎᔨᑦ ᐅᑎᐸᔨᒋᒐᐤ ᓂᒋ ᐸᒋ ᒥᔨᒄ ᒐᒂᔪᐤ ᐊ ᐅᔅᑐᔅᑲᑯᐅᒡ ᓂᔭᒡ ᒧᔭᒻ ᑲ ᑲᐛᒡ ᓂᐱᓯᔭᑎᒄ ᐊ ᐃᓯ ᑲᐅᔅᑲᑯᑦ ᐊᐛᓐ ᐎᔭᒡ᙮ ᒥᒋᒥᓂᑐᐤ ᒋ ᐱᔅᑎᓇᑭᓄᐤ ᒐᒋ ᐸᒋ ᒥᑯᔅᑲᑎᔅᑯᐅᑦ ᐊᑲ ᒥᔅᑎ ᒐᒋ ᐃᑕᔨᒥᓱᔭᓐ᙮

ᑲᓚᓯᔭᓇ 6:3

ᒧᔭᒻ ᐊᐛᓐ ᒋᒋᐛ ᐊ ᐃᑕᔨᒥᓱᑦ ᐊᑎ ᒪᒃ ᐊᑲ ᒐᒂᔪᐤ ᐃᑕᔨᑕᑯᓯᑦ ᐎᔾ ᓇᔅᒡ ᐎᔭᓯᒥᑎᓱᐤ᙮

ᐃᐱᓯᔭᓇ 3:2

ᒐᔅᑎᓇᔅ ᔅᒋ ᐸᑕᓇᐛᒐ ᑕᓐ ᑲ ᐃᓯ ᐸᒋ ᒥᔪᑐᑎᒧᐅᑦ ᒋᓴᒪᓂᑐᐤ ᐊᒋ ᐅᑎᓂᑦ ᑕᓐ ᒐᒋ ᐃᓯ ᐊᑐᔅᒐᐅᒡ ᐊᓐᑕ ᒐᒋ ᐅᒋ ᐎᒋᐃᑎᑯᒡ ᒋᔨᐛᐤ ᐊᑲ ᒍᐤ ᐃᑎᔅᑲᓇᓯᔭᒄ᙮

ᐃᐱᓯᔭᓇ 3:4

ᐃᔨᒥᑕᔭᒂ ᒪᒃ ᐅ ᓂᒥᓯᓇᐃᑭᓐ ᐊᑯᑕ ᒐ ᐅᒋ ᒋᔅᒐᔨᑎᒪᒄ ᐊ ᒥᔪ ᓂᔅᑐᑎᒧᒡ ᒐᒂᔪᐤ ᐊᓂᔭ ᑲ ᐎ ᐃᑐᑕᐧᒃ ᒋᓴᒪᓂᑐᐤ ᙭ᑕ ᐅᒡ᙮

ᐃᐱᓯᔭᓇ 4:16

ᐎᔾ ᐃᑐᑐᐛᐤ ᒐᒋ ᒥᔪ ᐎᒐᐅᑐᔨᒋ ᐅᒪᒧᐊᔭᒥᐊᐛ ᑭᔭ ᒥᓯᐛ ᒐᒋ ᐃᓯ ᒥᔪᐱᔨᒋ ᐊᓂᔭ ᐊ ᐊᑎ ᓂᑕᐅᒋᔨᒋ ᑭᔭ ᐊ ᐊᑎ ᓱᒋᑲᐳᔨᒋ ᐊ ᓴᒋᐃᑐᔨᒋ ᐅᒡ᙮

ᐱᓕᐱᔭᓇ 2:13

ᐛᔅ ᒋᓴᒪᓂᑐᐤ ᒧᔅ ᐊᑐᔅᒐᔅᑎᒻ ᒋᐱᒪᑎᓯᐅᓄᐛᐛ᙮ ᒋ ᐃᑐᑕᑯᐛᐤ ᒐᒋ ᓂᓇᐊᔨᑎᒺᒄ ᑭᔭ ᒋ ᐎᒋᐃᑯᐛᐤ ᒐᒋ ᐃᑐᑎᒺᒄ ᐊᓂᔭᔪᐤ ᐊ ᐃᓯ ᓇᐊᔨᑕᐧᒃ᙮

ᑯᓚᓯᔭᓇ 1:29

ᒐᒋ ᐃᑐᑎᒪᓐ ᒪᒃ ᐅ ᓂ ᐅᔅᑯᐎᓐ ᑕᓐ ᐊᔅᐱᔅ ᓱᒃ ᐊᑐᔅᒐᔭᓐ᙮ ᐊᓂᔭ ᓱᒐᔨᑕᑯᓱᐅᓂᔪᐤ ᐊ ᐃᓯ ᒥᔨᑦ ᙭ ᓄᑕᐱᒋᐅᓐ᙮ ᓇᔅᒡ ᒪᒃ ᐛᔅ ᓄᑯᓂᔪᐤ ᐊᓂᔭ ᓱᒐᔨᑕᑯᓱᐅᓂᔪᐤ ᒪᒂᒡ ᐊᓐᑕ ᐊ ᐊᑐᔅᒐᐅᒡ᙮

ᑯᓚᓯᔭᓇ 2:13

ᒋᒥᒋᑥᐅᓄᐛᐛ ᔅᒋ ᐃᑐᑕᑯᓇᐛᐤ ᒧᔭᒻ ᐊ ᓂᐱᔭᒄ ᒐᒋ ᐃᓯᓇᑯᓯᔭᒄ ᒋᓴᒪᓂᑐᐤ ᐃᔅ ᐊ ᑕᑦ, ᑭᔭ ᐊᔅᒄ ᓇᒪ ᒋ ᐅᒋ ᐃᑐᑕᑯᐛᐤ ᒋᓴᒪᓂᑐᐤ ᒐᒋ ᐅᑦ ᐊᐛᓯᒥᑐᑕᑕᒄ ᑕᓐ ᑲ ᐃᑐᑎᒪᑕᒄ ᙭ ᐅᒡ᙮ ᐊᓄᒡ ᒪᒃ ᔅᒋ ᒥᔨᑯᐛᐤ ᒋᓴᒪᓂᑐᐤ ᐊ ᐅᔅᑲᔨᒡ ᐱᒪᑎᓯᐅᓂᔪᐤ ᒧᔭᒻ ᑲ ᐃᓯ ᐅᓂᔅᑲᓇᑦ ᙭ᑕ ᓂᐳᐅᓂᒡ ᐅᒡ᙮ ᓇᔅᒡ ᔅᒋ ᐛᐸᔨᑎᒪᑭᓄᐤ ᒋᓴᒪᓂᑐᐤ ᒋᒥᒋᑥᐅᓄᐛ᙮

1 ᑎᒧᑎ 1:14

ᓇᔅᒡ ᓂᒋ ᐛᔪᐅᒡ ᓄᑯᑥᒄ ᐅᑎᐸᔨᒋᒐᐤ ᑕᓐ ᐊᔅᐱᔅ ᒋᓴᐛᑐᑐᐅᑦ ᒐᒋ ᐅᒋ ᐊᑎ ᑕᑈᔭᔨᒥᒃ ᑭᔭ ᒐᒋ ᐅᒋ ᐊᑎ ᓴᒋᐃᒃ ᙭᙮

1 ᑎᒧᑎ 2:15

ᐃᔭᐱᒡ ᒪᒃ ᒋᑭ ᐱᒪᒋᐊᑭᓄᐤ ᐃᔎᐤ ᐊᓂᔭ ᐅᒋ ᐊ ᐛᐱᒪᐅᓱᑦ ᐃᔭᐱᒡ ᒪᒃ ᒧᔅ ᓇᔅᒡ ᐃᓯ ᓂᓇᑭᑐᐛᔨᒥᓱᑦ ᑕᑈᑎᒧᐅᓂᒡ ᑭᔭ ᓴᒋᐃᐛᐅᓂᒡ ᑭᔭ ᐸᔭᒋ ᐱᒪᑎᓯᐅᓂᒡ ᒐᒋ ᐃᓯ ᐱᒧᑕᑦ᙮

1 ᑎᒧᑎ 2:9

ᓂ ᐱᑯᓴᔨᒪᐅᒡ ᑭᔭ ᐃᔎᐅᒡ ᐃᔭᒂ ᒐᒋ ᐃᑕᔅᐱᓱᒡ᙮ ᓇᒪ ᒋᐸ ᐅᒋ ᒥᔅᑎ ᐛᐛᑐᐛᐊᒪᓱᐅᒡ ᑭᔭ ᓇᒪ ᐊ ᒥᔅᑎ ᓱᓇᔭᐎᔨᒋ ᒐᒂᔪᐛ ᒋᐸ ᐅᒋ ᑭᒋᔅᑭᒧᒡ᙮

ᑕᐃᑕᔅ 2:12

ᐅᒋᓴᐛᑎᓯᐅᓂᒡ ᒋ ᐅᒋ ᒋᔅᑯᑎᒪᑭᓄᐤ ᒐᒋ ᓂᑭᑎᒪᐧᒄ ᒥᒐᑎᓯᐅᓐ ᑭᔭ ᒐ ᐊᑲ ᒋ ᒥᒋ ᒧᔅᑕᓇᔨᑎᒪᐧᒄ ᒐᒂᓐ ᐅᑕ ᐊᔅᒋᒡ᙮ ᑭᔭ ᐅᒋᓴᐛᑎᓯᐅᓂᒡ ᒋ ᐅᒋ ᒋᔅᑯᑎᒪᑭᓄᐤ ᒐᒋ ᐃᔭᒂᒥᔭᐧᒄ ᑕᓐ ᐊ ᐃᑕᑎᓯᔭᐧᒄ, ᑭᔭ ᒐᒋ ᑯᐃᔅᑯᑕᑎᓯᔭᐧᒄ ᑭᔭ ᒐᒋ ᒋᓴᒪᓂᑐᐛᑎᓯᔭᐧᒄ ᐅᑕ ᐊᔅᒋᒡ ᐊ ᑕᐛᐧᒄ,

ᑕᐃᑕᔅ 2:2

ᐎᑎᒧᐅᒡ ᐊᓐᒡ ᑲ ᒋᓴᐃᔪᐅᒡ ᒐᒋ ᓂᓇᑭᑐᐛᔨᑕᒡ ᑕᓐ ᐊ ᐃᑎᒡ, ᑭᔭ ᒐᒋ ᐃᑈᐧᑲᒡ, ᑭᔭ ᒐᒋ ᐃᓯ ᐱᒪᑎᓯᒡ ᒐᒋ ᐅᒋ ᒋᔅᑕᔨᒪᑭᓄᐎᒡ᙮ ᒋᐸ ᐎ ᓱᒋᑲᐳᐎᒡ ᑕᑈᑎᒧᐅᓂᒡ, ᑭᔭ ᓴᒋᐃᐛᐅᓂᒡ ᑭᔭ ᓯᐱᔪᐛᓯᐅᓂᒡ ᐃᔅ᙮

ᑕᐃᑕᔅ 2:4

ᐃᔭᐱᒡ ᒋᐸ ᒋᔅᒋᓄᐊᒧᐛᐅᒡ ᐅᔅᒋᓂᒋᔎᐛ ᒐᒋ ᓴᒋᐊᔨᒋ ᐅᓇᐸᒥᔪᐛ ᑭᔭ ᐅᑦ ᐊᐛᓯᒥᔪᐛ᙮

ᑕᐃᑕᔅ 2:6

ᑭᔭ ᓯᒋᒥᒡ ᐅᔅᒋᓂᒋᓱᐅᒡ ᒐᒋ ᐃᔭᒂᒥᒡ ᒥᓯᐛ ᑕᓐ ᐊ ᐃᑎᒡ᙮

ᒋᒥᔅ ᐅᒥᓯᓇᐊᒪᒐᐅᓐ 4:6

ᒥᒄ ᒪᒃ ᒋᓴᒪᓂᑐᐤ ᐊᑐᐎᔅ ᒥᔅᑎ ᒥᔭᐤ ᓱᐛᔨᒋᒐᐅᓂᔪᐤ ᐊᓂᔭ ᐊᐛᔪᐛ ᐎᔾ ᐊ ᑕᑦ ᑲ ᐃᓯ ᐱᒪᑎᓯᔨᒋ᙮ ᐛᔅ ᐃᑎᔅᑕᐤ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, ᒋᓴᒪᓂᑐᐤ ᓂᔅᑯᔅᑐᐛᐤ ᐊᓂᔭᔪᐛ ᑲ ᒋᔅᑕᔨᒥᓱᔨᒋ ᒥᒄ ᒪᒃ ᓱᐛᔨᒋᒐᐅᓂᔪᐤ ᒥᔭᐤ ᐊᓂᔭ ᑲ ᑎᐱᑕᔨᒥᓱᔨᒋ᙮

1 ᐱᑕᕐ 1:13

ᓱᒃ ᒪᒃ ᒧᔅ ᐎ ᐊᔭᔅᑯᐛᔨᑎᒧᒄ ᑕᓐ ᒥᒄ ᒐ ᐊᑎ ᐃᔅᐱᔨᒂ ᒐᒂᓐ ᑭᔭ ᓱᒃ ᓂᓇᑭᑐᐛᔨᒥᓱᒄ ᑕᓐ ᐊ ᐃᑎᔭᒄ᙮ ᓇᔅᒡ ᐊᔅᐸᔨᒧᑐᑎᒧᒄ ᐊᓐ ᒋᓴᐛᑎᓯᐅᓐ ᒐ ᒥᔨᑯᐅᔭᒄ ᐃᔅᐱᔅ ᒥᓐ ᑎᑯᓯᒐ ᒋᓴᔅ ᙭᙮

1 ᐱᑕᕐ 4:11

ᐊᐛᓐ ᐊᒋ ᒥᔨᑯᑦ ᒋᓴᒪᓂᑐᐛ ᒐᒋ ᐃᔨᒪᐊᑦ, ᒋᐸ ᐃᔨᒧᐤ ᑕᓐ ᐊᓂᔭᔪᐛ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᒐᒋ ᐃᓯ ᐃᔨᒥᑦ᙮ ᐊᓐ ᐊᐛᓐ ᑲ ᒥᔭᑭᓄᐅᑦ ᑭᔅᒋᐅᓂᔪᐤ ᒐᒋ ᐎᒋᐊᑦ ᑯᑎᑲ ᐊᐛᔪᐛ, ᑭᑈ ᒋᐸ ᐎᒋᐊᐤ ᑕᓐ ᐊ ᐃᓯ ᒥᔨᑯᑦ ᒋᓴᒪᓂᑐᐛ ᑭᔅᒋᐅᓂᔪᐤ᙮ ᐊᑯ ᒪᒃ ᐎᔾ ᒋᓴᒪᓂᑐᐤ ᒐ ᒋᔅᑕᔨᑕᑯᐊᑭᓄᐅᑦ ᒥᓯᐛ ᒐᒂᔪᐤ ᑕᓐ ᐊ ᐃᓯ ᐃᑐᑕᐧᒃ ᐊᓐᑕ ᒋᓴᔅ ᙭ᑕ ᐊ ᑕᔨᒋ ᐃᔅ, ᐎᔾ ᒋᓴᒪᓂᑐᐤ ᒐ ᐊᑲ ᓂᑕ ᐃᔎᐱᔨᒡ ᐅᒋᔅᑕᔨᑕᑯᓱᐅᓐ ᑭᔭ ᐅᒥᔅᑯᓯᐅᓐ᙮ ᐊᒥᓐ᙮

1 ᐱᑕᕐ 4:7

ᓴᔅ ᐸᓱᓇᑯᓐ ᒥᓯᐛ ᒐᒂᓐ ᒐ ᐃᔎᐱᔨᒡ᙮ ᒋ ᓂᑐᐛᔨᑕᑯᓯᓇᐛᐤ ᒐᒋ ᐃᓯ ᓂᓇᑭᑐᐛᔨᑎᒪᒄ ᑕᓐ ᐊ ᐃᑎᔭᒄ ᑭᔭ ᐊᓱᐛᐱᒄ ᐊ ᐊᔭᒥᐊᔭᒄ᙮

1 ᐱᑕᕐ 5:5

ᐊᑯ ᒪᒃ ᒋᔨᐛᐤ ᑲ ᐅᔅᒋᐱᒪᑎᓯᔭᒄ ᒋᐸ ᓂᓇᐃᑐᐛᐛᐅᒡ ᐊᓐᒡ ᑲ ᐎᒋᐃᐛᒡ ᐊ ᐱᒥᐱᔨᑕᑭᓄᐎᒡ ᐊᔭᒥᐊᐅᒋᐛᐱᔪᐤ᙮ ᒥᓯᐛ ᒪᒃ ᐊ ᑎᓯᔭᒄ, ᒋᐸ ᐊᑐᔅᑲᑐᓇᐛᐤ ᐊ ᑎᐱᑕᔨᒥᑎᓱᔭᒄ ᐛᔅ ᐃᑎᔅᑕᔪᐤ ᒋᓴᒪᓂᑐᐤ ᐅᑦ ᐃᔨᒧᐅᓐ, ᒋᓴᒪᓂᑐᐤ ᓇᒪ ᓇᐃᐱᒪᐤ ᐊᓂᔭ ᒋᒋᐛ ᑲ ᐃᑕᔨᒥᓱᔨᒋ, ᐊᑯ ᐊᓂᔭ ᑲ ᑎᐱᑕᔨᒥᓱᔨᒋ ᒋᓴᐛᑐᑐᐛᐤ᙮

1 ᐱᑕᕐ 5:8

ᒧᔅ ᐃᔭᒂᒥᔅᑐᐛᐧᒄ ᒥᒋᒥᓂᑐᐤ, ᐊᓐ ᒧᔅ ᑲ ᐎ ᓇᓂᑐ ᒥᒋᐱᔨᑕᒄ, ᐛᔅ ᒧᔭᒻ ᒥᓯᐱᓱᐤ ᒧᔅ ᑲ ᐱᐸᒧᑕᑦ ᐊ ᐱᐸᓇᒧᑦ ᐊ ᓇᓂᑐᐤ ᒥᒋᓱᑦ ᐊᐅᑯᓐ ᐊ ᐃᓯᓇᑯᓯᑦ᙮ ᒥᒋᒥᓂᑐᐤ ᒧᔅ ᓇᓂᑐᐛᔨᒪᐤ ᐊᐛᔪᐛ ᒐᒋ ᓂᓱᐅᓇᒋᐊᑦ᙮

3 ᒠᓐ 1:9

ᓴᔅ ᓂᒋ ᒥᓯᓇᐊᒧᐛᐅᒡ ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ, ᒥᒄ ᒪᒃ ᐊᓐ ᓇᐸᐤ ᑎᐅᑦᕆᐸᔅ ᑲ ᐃᓯᓂᐧᑲᓱᑦ ᐊᐅᒄ ᐊᓐ ᓇᔅᒡ ᐛ ᐅᒋᒪᐅᑦ, ᓇᒪ ᐊᐱᓯᑎᒻ ᑕᓐ ᐊ ᐃᔅᒋᔄᐅᒡ᙮