ᒋᔅᒐᔨᑕᑯᑕᒐᐅᓐ 14:11 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹¹ ᐊᓂᔭ ᒪᒃ ᐊ ᐊᒂᐸᑕᔨᒡ ᐊᓂᔭ ᐃᔅᑯᑕᔪᐤ, ᒋᑭ ᓂᓇᐧᑲᑕᔨᒧᐃᑯᐅᒡ ᑲᒋᒡ ᒋᑭ ᐅᒋ ᐅᐸᐸᑕᐱᔪᐤ᙮ ᓇᒪ ᒪᒃ ᓂᑕ ᒋᑭ ᐅᒋ ᑎᑯᓂᔪᐤ ᑕᓐᑕ ᒐ ᐃᔅᑕᐱᔨᒡ ᐊᓂᔭ ᐊ ᓂᓇᐧᑲᑕᔨᒧᒡ ᐅᒡ ᑲ ᐊᔭᒥᐊᔅᑐᐛᒡ ᐅᔭ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᒋ ᐊᐛᓯᔅ ᒥᓂᑐᐧᑲᓇ᙮ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᒋᑭ ᓂᓇᐧᑲᑕᔨᒧᐅᒡ᙮”

ᒋᔅᒐᔨᑕᑯᑕᒐᐅᓐ 14:11 Iomraidhean Croise

ᒐᓂᓯᔅ 19:28

ᐃᔅᐱ ᑲᒋ ᑕᐸᑕᐧᒃ ᓱᑕᒻ ᑭᔭ ᑯᒧᕋ ᐅᑕᓇᐛ ᑭᔭ ᐊᓐᑕ ᒥᓯᐛ ᑲ ᐱᓴᔨᒡ ᐊᔅᒋᔪᐤ᙮ ᒋ ᐛᐸᑎᒻ ᐊ ᒧᔅᑲᐸᑕᔨᒡ᙮ ᒧᔭᒻ ᐊ ᑕᐸᑕᒋ ᒪᔅᑎ ᐃᔎᑕᒋ᙮

ᑎᐱᑦ ᐅᓂᑭᒧᐅᓇ 10:16

ᑎᐸᔨᒋᒐᓱᐤ ᒋᓴᐅᒋᒪᐅᐤ ᑲᒋᒡ ᑭᔭ ᑲᒋᒡ: ᐊᑲ ᐊᔭᒥᐊᒡ ᓂᓱᐅᓂᑎᓯᐅᒡ ᐅᑦ ᐊᔅᒋᔨᒡ ᐅᒡ᙮

ᑎᐱᑦ ᐅᓂᑭᒧᐅᓇ 145:1

ᒋᑭ ᒋᔅᑕᒋᒥᑎᓐ, ᓂᒋᓴᒪᓂᑐᒻ, ᐅ ᒋᓴᐅᒋᒪᐤ; ᑭᔭ ᓂᑭ ᒥᔽᒋᑕᓐ ᒋᑦ ᐃᓯᓂᐧᑲᓱᐅᓐ ᒧᔅ ᑲᒋᒡ᙮

ᐊᒃᓱᑕᔅ 15:18

ᒋᔾ, ᓂᑎᐸᔨᒋᒐᓯᒥᓇᓐ, ᒧᔅ ᑲᒋᒡ ᒋᑭ ᑎᐸᔨᒋᒐᓯᐅᓐ !”

ᒪᑎᔪᐤ 11:28

“ᐸᒋ ᓇᓯᒄ ᒥᓯᐛ ᒋᔨᐛᐤ ᑲ ᐊᑐᔅᒐᔭᒄ ᑭᔭ ᑲ ᑈᒧᐅᑕᔭᒄ, ᒋᑭ ᒥᔨᑎᓇᐛᐤ ᒐᒋ ᐊᔽᓯᔭᒄ᙮

ᒪᑎᔪᐤ 25:41

ᐊᑯ ᒐ ᐃᑕᑦ ᐊᓂᔭᔪᐛ ᐅᓂᔅᐸᒋᐅᓂᒡ ᑲ ᑕᔨᒋ ᐊᓂᔭ ᑲ ᒥᒐᑎᓯᔨᒋ, ‘ᐊᐅᓯᒄ ᓇᑕ ᒋᔨᐛᐤ ᒋᓴᒪᓂᑐᐤ ᒐ ᐛᐛᓯᐃᑕᒄ ᐊᓐᑕ ᐃᔅ ᑲᒋᒡ ᒥᒋ ᐃᔅᑯᑕᒡ ᐊᓂᔭᔪᐤ ᑲ ᐃᓯ ᐊᔭᔅᑯᔅᑎᒧᐛᑭᓄᔨᒋ ᒥᒋᒥᓂᑐᐛ ᑭᔭ ᐅᑦ ᐊᐱᒋᐊᑭᓂᔪᐛ᙮

ᒪᑎᔪᐤ 25:46

ᐊᐅᒄ ᒪᒃ ᐅᒡ ᑲ ᒥᒐᑎᓯᒡ ᒐ ᐃᑎᓴᐛᑭᓄᐎᒡ ᐊᓐᑕ ᑲᒋᒡ ᒐ ᐃᓯ ᓂᓇᐧᑲᑕᔨᒧᒡ, ᐊᑯ ᐊᓐᒡ ᑲ ᑯᐃᔅᑯᑕᑎᓯᒡ ᐊᓐᑕ ᑲᒋᒡ ᐱᒪᑎᓯᐅᓂᒡ ᒐ ᐃᑎᓴᐛᑭᓄᐎᒡ᙮”

ᐃᑉᕈᐛ 1:8

ᐅᑯᓯᓯᒪᐛ ᒪᒃ ᐊ ᐊᔨᒧᒪᑦ ᒋ ᐃᔅᒋᔄᐤ, “ᒋᔾ ᒋᓴᒪᓂᑐᐤ, ᒋᐅᒋᒪᐅᓐ ᑲᒋᒡ ᒋᑭ ᑎᑯᓐ, ᑯᐃᔅᒄ ᒋᑦ ᐃᑎᓐ ᐊ ᐅᒋᒪᐎᔨᓐ ᐊᓐᑕ ᒋᐅᒋᒪᐅᓂᒡ᙮

ᒋᔅᒐᔨᑕᑯᑕᒐᐅᓐ 11:15

ᐊᑯ ᒥᓐ ᑯᑎᒃ ᐊᓐᒋᓐ ᒂ ᐳᑕᑕᐧᒃ ᐅᐳᑕᒋᑭᓐ᙮ ᐊᐅᒄ ᐅ ᓂᔄᐅᑕᒡ ᐊ ᑕᑦ ᐊᓐᒋᓐ᙮ ᓂᒋ ᐸᑐᐛᐅᒡ ᒪᒃ ᐊᐛᓐᒋ ᐊ ᒋᔄᐛᒡ, ᐊᓐᑕ ᒋᒋᒋᓯᑯᒡ ᐊ ᐃᔨᒥᒡ ᐊ ᐃᔅᒋᔄᒡ, “ᐊᐅᑯᐤ ᐛᑎᓂᒪᓱᑦ ᒋᑎᐸᔨᒋᒐᓯᒥᓄᐤ ᑭᔭ ᐊᓂᔭᔪᐛ ᑲ ᐸᒋ ᐃᑎᓴᐛᑦ ᒐᒋ ᐅᒋᒪᐅᔨᒋ ᐅᑕ ᐊᔅᒋᒡ᙮ ᐎᔾ ᒪᒃ ᐅᑎᐸᔨᒋᒐᐤ ᒋᑭ ᐅᒋᒪᐤ ᑲᒋᒡ ᑭᔭ ᑲᒋᒡ᙮”

ᒋᔅᒐᔨᑕᑯᑕᒐᐅᓐ 13:12

ᐅ ᒪᒃ ᑯᑎᒃ ᒥᒋ ᐊᐛᓯᔅ ᒥᔅᑎ ᒋ ᒥᔨᑯᐤ ᑎᐸᔨᒋᒐᐅᓂᔪᐤ ᐊᓂᔭᔪᐛ ᓂᔅᑎᒻ ᒥᒋ ᐊᐛᓯᓴ, ᐊ ᐅᒋᒪᐅᑦ ᒐᒋ ᐃᑕᐱᒋᐃᑯᑦ ᐊᓐᑕ ᐊ ᑕᔨᒋ᙮ ᐊᑯ ᒂ ᐊᔨᐧᑭᒥᐊᑦ ᒥᓯᐛ ᐊᐛᔪᐛ ᐊᓐᑕ ᐊᔅᒋᒡ ᑲ ᐱᒪᑎᓯᔨᒋ ᒐᒋ ᐊᔭᒥᐊᔅᑐᐛᔨᒋ ᐊᓂᔭ ᓂᔅᑎᒻ ᑲ ᑕᔨᒋ ᒥᒋ ᐊᐛᓯᓴ, ᐊᓂᔭᔪᐛ ᒥᒋ ᐊᐛᓯᓴ ᒋᒋᐛ ᑲ ᒥᓱᐛᑭᓂᐧᑲᑕᑭᓄᐎᒂᓂ ᐅᔅᑎᒂᓂᔨᒡ ᑭᔭ ᑲ ᒥᓏᒋᑕᑭᓄᔨᒋ᙮

ᒋᔅᒐᔨᑕᑯᑕᒐᐅᓐ 13:15

ᒋ ᐱᔅᑎᓇᑭᓄᐤ ᒪᒃ ᐅ ᒥᒋ ᐊᐛᓯᔅ ᒐᒋ ᐃᑐᑐᐛᑦ ᐊᓂᔭ ᒥᓂᑐᐧᑲᓐ ᒐᒋ ᐃᔪᐎᔨᒋ᙮ ᐊᑯ ᒪᒃ ᒂ ᐃᔨᒥᔨᒋ ᑭᔭ ᒋ ᐃᑐᑐᐛᔪᐛ ᐊᐛᔪᐛ ᐊᑲ ᐎ ᐊᔭᒥᐊᔅᑐᐛᔨᒋ ᐊᓂᔭᔪᐛ ᒥᓂᑐᐧᑲᓇ ᒐᒋ ᓂᐸᐊᑭᓄᔨᒋ᙮

ᒋᔅᒐᔨᑕᑯᑕᒐᐅᓐ 13:17

ᓇᒪ ᒪᒃ ᐊᐛᓐ ᐅᒋ ᐊᑕᐛᐤ ᑭᔭ ᓇᒪ ᐊᐛᓐ ᐅᒋ ᐅᑎᓇᓱᐤ ᒧᔭᒻ ᐊᑲ ᐅᒋ ᒋᔅᒋᓄᐛᒋᓯᓇᐛᑭᓄᒂ᙮ ᐊᓂᔭ ᒪᒃ ᐊᓐᑕ ᑲ ᒋᔅᒋᓄᐛᒋᓯᓇᐛᑭᓄᐎᒡ, ᐊᓂᔭ ᐊ ᐃᓯᓂᐧᑲᓱᔨᒋ ᐊᓂᔭ ᒥᒋ ᐊᐛᓯᓴ ᑭᔭ ᒪᒃ ᐊᓂᔭ ᐅᑦ ᐊᒋᑕᓱᐅᓂᔪᐛ ᒋ ᒥᓯᓇᑕᔪᐤ ᐊᓐᑕ᙮

ᒋᔅᒐᔨᑕᑯᑕᒐᐅᓐ 14:9

ᒥᓐ ᑯᑎᒃ ᐊᓐᒋᓐ ᒋ ᐅᒋ ᐱᒥᔭᐤ ᓇᔅᒡ ᐊ ᐃᔅᐸᐅᑦ ᐃᔅᐱᒥᒡ ᐊᓐᑕ ᐊ ᐃᓯ ᐱᒥᔭᑦ᙮ ᐊᑯ ᒪᒧᐤ ᓂᔅᑐ ᐊᓐᒋᓐᒡ ᒂ ᓄᑯᓯᒡ᙮ ᐊᑯ ᐅ ᓂᔅᑐ ᐊ ᑕᑦ ᐊᓐᒋᓐ ᒂ ᐃᔅᒋᔄᑦ ᐊ ᒋᔄᐛᑦ, “ᐊᓐ ᐊᐛᓐ ᒐ ᐊᔭᒥᐊᔅᑐᐛᒂ ᐊᓂᔭᔪᐛ ᒥᒋ ᐊᐛᓯᓴ ᑭᔭ ᐊᓂᔭᔪᐛ ᒥᓂᑐᐧᑲᓇ, ᒧᔭᒻ ᐊᓐ ᒥᒋ ᐊᐛᓯᔅ ᐊ ᐃᓯᓇᑯᓯᑦ ᑲ ᐃᓯᐊᑭᓄᔨᒋ ᑭᔭ ᒐ ᐱᔅᑎᓂᓱᒂ ᒐᒋ ᒋᔅᒋᓄᐛᒋᐊᑭᓄᐅᑦ ᐅᔅᑲᑎᑯᒡ ᒪᒃ ᐅᑎᒋᒡ,

ᒋᔅᒐᔨᑕᑯᑕᒐᐅᓐ 18:18

ᐃᔅᐱ ᒪᒃ ᐎᔭᐸᑕᒡ ᐊᓂᔭ ᐊ ᐊᒂᐸᑕᔨᒡ ᐊ ᐃᔎᑕᔨᒡ ᐊᓂᔭ ᐅᑕᓇᔪᐤ ᒋ ᒪᐅᒡ ᐊ ᐃᔅᒋᔄᒡ, ‘ᓇᒪ ᓂᑕ ᐅᒋ ᑎᑯᓐ ᐅᑕᓇᐤ ᐊ ᐃᔅᐱᔅ ᒋᔅᑕᔨᑕᒂᒡ ᑲ ᐃᔅᐱᔅ ᒋᔅᑕᔨᑕᒂᒡ ᐅ ᐅᑕᓇᐤ᙮’

ᒋᔅᒐᔨᑕᑯᑕᒐᐅᓐ 18:9

“ᐊᓐᒡ ᒪᒃ ᒋᓴᐅᒋᒪᐅᒡ ᒥᓯᐛ ᐊ ᐃᔅᐱᑎᔅᑭᒥᑲᔨᒡ ᐅᔭ ᐊᔅᒋᔪᐤ ᐊ ᑕᒡ ᑲ ᐎᒋ ᐎᓂᓱᐤ ᐱᒪᑎᓯᒪᒡ ᐊᓂᔭᔪᐛ ᐊᐛᔪᐛ ᐊᓐᑕ ᐊ ᑕᔨᒋ ᑭᔭ ᓇᔅᒡ ᒥᓯᐛ ᑲ ᐃᓯ ᒪᒥᔽᔨᑎᒥᐃᓱᒡ ᓂᓇᐧᑯᐤ ᐊ ᐎ ᐃᓯ ᐛᐛᒋᐃᓱᒡ ᒧᔭᒻ ᐊᓂᔭ ᐊᐛᔪᐛ ᐊᓐᑕ ᐊ ᑕᔨᒋ ᐊ ᐃᑎᔨᒋ, ᒋᑭ ᒪᐅᒡ ᑭᔭ ᒋᑭ ᓂᓇᐧᑲᑥᐅᑎᒧᒡ ᐛᐸᑕᒂᐛ ᐊ ᐃᔎᑕᔨᒡ ᐊᓂᔭ ᐅᑕᓇᔪᐤ᙮

ᒋᔅᒐᔨᑕᑯᑕᒐᐅᓐ 19:3

ᐊᑯ ᒥᓐ ᒂ ᐃᔅᒋᔄᒡ ᐊ ᒋᔄᐛᒡ, “ᒪᒥᒋᒪᐧᒄ ᒋᓴᒪᓂᑐᐤ᙮ ᐊ ᐊᒂᐸᑕᒡ ᐊᓐ ᑲ ᒋᔅᑕᔨᑕᒂᒡ ᐅᑕᓇᐤ ᑲ ᐃᔎᑕᒡ, ᑲᒋᒡ ᒋᑭ ᐃᑕᐸᑕᐱᔪᐤ ᐃᔅᐱᒥᒡ᙮”

ᒋᔅᒐᔨᑕᑯᑕᒐᐅᓐ 20:10

ᐊᑯ ᒪᒃ ᒥᒋᒥᓂᑐᐤ, ᐊᓐ ᑲ ᐎᔭᓯᒪᑦ ᐅᔭ ᐊᐛᔪᐛ, ᑲ ᑲᔅᑎᓇᑭᓄᐅᑦ, ᐊᑯ ᐊᓐᑕ ᒥᒋ ᐃᔅᑯᑕᐤ ᓴᑲᐃᑭᓂᒡ ᑲ ᐃᓯ ᐛᐱᓇᑭᓄᐅᑦ ᐊᓐᑕ ᐊ ᐃᔎᑕᔨᒡ ᒐᒂᔪᐤ ᐊ ᐎᔄᐛᐸᑕᔨᒡ ᓇᔅᒡ ᐊ ᐎᓂᒪᔅᑕᔨᒡ᙮ ᐊᑯᑕ ᓴᔅ ᑲ ᐃᓯ ᐛᐱᓇᑭᓄᔨᒋ ᐊᓂᔭ ᒥᒋ ᐊᐛᓯᓴ ᑭᔭ ᐊᓂᔭ ᒥᒋ ᐅᒋᔅᒋᐛᐃᒐᓱᐛ᙮ ᑲᒋᒡ ᒪᒃ ᒋᑭ ᐎᓯᒐᔨᑎᒧᒡ ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ᙮

ᒋᔅᒐᔨᑕᑯᑕᒐᐅᓐ 22:5

ᓇᒪ ᓂᑕ ᒋᑭ ᐅᒋ ᑎᐱᔅᑲᐤ ᐊᓐᑕ᙮ ᓇᒪ ᑭᔭ ᒋᑭ ᐅᒋ ᓂᑐᐛᔨᒪᐅᒡ ᐛᔅᑕᓂᐱᒪᑭᓇ ᑭᔭ ᓇᒪ ᒋᑭ ᐅᒋ ᓂᑐᐛᔨᒪᐅᒡ ᐱᓯᒺ ᒐᒋ ᐛᔅᑕᓂᐱᒪᑯᒡ᙮ ᐛᔅ ᐊᓂᔭ ᐊ ᐃᔅᐱᔅ ᒋᐧᑲᔭᔅᑐᐛᔨᒋ ᒋᓴᒪᓂᑐᐛ, ᐊᐅᒄ ᐅᔭ ᒐ ᐅᐛᔅᑕᓂᐱᒪᑭᓂᒡ᙮ ᑲᒋᒡ ᒪᒃ ᒋᑭ ᒋᓴᐅᒋᒪᐅᒡ᙮

ᒋᔅᒐᔨᑕᑯᑕᒐᐅᓐ 7:12

ᐊ ᐃᔅᒋᔄᒡ, “ᑕᑈ ᐊᐅᑯᓐ ᐊ ᐃᓯᓇᒂᒡ᙮ ᐊᔭᐤ ᒋᓴᒪᓂᑐᐤ ᓱᐛᔨᒋᒐᐅᓂᔪᐤ, ᑭᒐᑕᐛᔨᑎᒧᐅᓂᔪᐤ, ᒋᔅᑕᔨᑕᑯᓱᐅᓂᔪᐤ ᑭᔭ ᒥᔅᑯᓯᐅᓂᔪᐤ᙮ ᐊᐅᒄ ᒪᒃ ᐛᒋ ᒪᒥᒋᒥᑯᑦ ᐊᐛᔪᐛ, ᑭᔭ ᐊᐅᒄ ᐅᔭ ᐛᒋ ᓂᓇᔅᑯᒥᑯᑦ ᑭᔭ ᒋᔅᑕᒋᒥᑯᑦ ᑲᒋᒡ ᑭᔭ ᑲᒋᒡ᙮ ᐊᒥᓐ᙮”