8 ᒪᒃ ᒋᔾ, ᑎᐸᔨᒋᒐᓱᐤ, ᒋ ᒪᐅᒡ ᒋ ᒋᔅᑎᓯᓐ ᑲᒋᒡ᙮
ᒪᒃ ᐊᓐᒡ ᑲ ᐱᔅᒐᒡ ᒥᒐᑎᓯᐤ ᐃᓯᑥᐅᓂᔪᐤ, ᑎᐸᔨᒋᒐᓱᐤ ᒋᑭ ᒋᔅᒋᓄᑕᐊᐤ ᒐᒋ ᐎᒐᐛᔨᒋ ᑲ ᒥᒐᑎᓯᐤ ᐃᑐᑎᒥᔨᒋ᙮ ᒪᒃ ᒋᔭᒪᔨᑎᒧᐅᓂᔪᐤ ᒋᑭ ᑥᐅᑕᑯᐤ ᐃᔅᕋᐃᓪ᙮
ᐛᔅ ᐎᐱᒡ ᒋᑭ ᒥᓂᔄᑭᓄᐅᒡ ᒧᔭᒻ ᒥᔅᑯᓱᐛ, ᑭᔭ ᒋᑭ ᓂᐳᓇᑯᓯᐅᒡ ᒧᔭᒻ ᑲ ᐎᔄᐛᔨᒡ ᓂᑕᐅᒋᑕᑭᓂᓯᔪᐤ᙮
ᑲ ᐛᐧᑲᓯᒡ ᒧᓯᓇᐤ ᓂ ᐎ ᐅᓂᐱᔨᐃᑯᒡ: ᐛᔅ ᒥᒐᑐᐅᒡ ᑲ ᒪᓯᐃᒡ, ᐅ ᒋᔾ ᒪᐅᒡ ᒋᔅᑎᓯᔨᓐ᙮
ᐸᑎᒪ ᑲ ᐱᒐᐅᒡ ᐅᐸᔭᒋ-ᒥᒋᐛᐱᒡ ᒋᓴᒪᓂᑐᐤ; ᐊᑯ ᓇᔅᑐᑎᒪᓐ ᐊᓯ ᐳᓂᐸᔨᒡ᙮
ᒐᔅᑎᓇᔅ ᔅᒋ ᐊᔭᐛᒡ ᐊᓯ ᒋᔭᔨᒡ: ᓂᓱᐅᓇᑎᓯᐅᓂᒡ ᔅᒋ ᐃᓯ ᓂᒋᐛᐱᓇᐅᒡ᙮
ᐃᔪᒡ ᒐᒋ ᒋᔅᒐᔨᑕᒡ ᒋᔾ ᒥᒄ ᒋᓴᒪᓂᑐᐤ ᐊ ᐃᓯᓂᐧᑲᓱᔨᓐ, ᐊ ᒪᐅᒡ ᒋᔅᑎᓯᔨᓐ ᐊ ᑎᐸᔨᑎᒥᓐ ᒥᓯᐛ ᐊᔅᒋᔾ᙮
ᑎᐸᔨᒋᒐᓱᐤ ᐃᔅᐱᒥᒡ ᐊ ᑕᑦ ᐃᔨᐛᒄ ᓱᐧᑲᑎᓯᐤ ᐃᔅᐱᔅ ᐊ ᐸᑕᒂᒋ ᒥᒐᑦ ᓂᐱᔭ, ᓂᐦᐃ, ᐃᔅᐱᔅ ᒋᒋ ᑭᔅᑭᓐᒡ ᐎᓂᐸᑯᒡ᙮
ᓴᔅ ᓂᒋ ᒋᔅᒐᔨᑕᓐ ᑎᐸᔨᒋᒐᓱᐤ ᐊᑐᐎᔅ ᐎᔾ ᐊᓱᐧᑲᑎᓯᑦ ᐃᔅᐱᔅ ᑯᑎᑭᒡ ᒥᓂᑐᐅᒡ᙮ ᒋ ᐃᑐᑎᒻ ᐅᔭ ᐃᔅᐱ ᐃᒋᑉᑦ ᐃᔪᒡ ᑲ ᐱᐛᔨᒪᒡ ᐃᔅᕋᐃᓪ ᐃᔪᐛ᙮”
ᐊᑯᑕ ᒪᒃ ᐊᓐᑕ ᓴᓯᑲᓐ ᒋᓴᐅᒋᒪᐤ ᐊᕈᑦ ᑲ ᒋᒋ ᓂᓇᐧᑲᒋᐊᑦ ᐱᔅᒐ ᐊᓂᔭ ᐅᒪᒧᐊᔭᒥᐊᐤ᙮
