21 ᓂᒋ ᒥᔨᑯᒡ ᐎᓴᐳᔪᐤ ᒐᒋ ᒥᒍᐅᒡ; ᑭᔭ ᐊ ᓄᐅᑕᔭᐸᒂᐅᒡ ᓂᒋ ᒥᓇᐃᑯᒡ ᓯᐅᑲᐳᔪᐤ᙮
ᐃᔅᐱ ᒪᒃ ᐛᑎᑕᒡ ᐊᓂᔭ ᑯᓪᑯᑕ ᑲ ᐃᓯᓂᐧᑲᑕᔨᒡ ᐊᑯᑕ ᑲ ᐎ ᒥᓂᐊᑭᓄᐅᑦ ᒋᓴᔅ ᓱᒥᓇᐳᔪᐤ ᐊ ᒪᒧᐱᔨᒡ ᒐᒂᔪᐤ ᐊ ᐎᓯᑭᓂᔨᒡ ᐊᒋ ᐱᔅᑎᓇᑭᓄᐎᒡ ᐊᓐᑕ᙮ ᒥᒄ ᒪᒃ ᐃᔅᐱ ᑲ ᑯᒋᔅᑕᐧᒃ ᐊᓂᔭ ᒋᓴᔅ ᓇᒪ ᐅᒋ ᐎ ᒥᓄᐤ᙮
ᑎᐛᒡ ᒪᒃ ᐸᐃᒄ ᐊᓐᑕ ᐊ ᑎᓯᒡ ᒋ ᐅᒋ ᐅᑎᓂᒻ ᒐᒂᔪᐤ ᐅᐱᓂᒡ ᐊ ᐃᑕᔨᑕᑯᓂᔨᒡ ᒂ ᒋᑕᓇᐧᒃ ᐊᓐᑕ ᐊᒋ ᐎᓯᑲᐧᑭᒥᑎᓂᔨᒡ ᓱᒥᓇᐳᔪᐤ᙮ ᐊᑯ ᐊ ᐅᓂᔎᔅᑯᓂᔨᒡ ᒥᔅᑎᑯᒡ ᒂ ᒋᑭᒧᑕᑦ᙮ ᐊᑯ ᐊᓐᑕ ᒋᓴᓴ ᐅᑐᓂᔨᒡ ᒂ ᐃᑎᓇᐧᒃ ᐊ ᐎ ᒥᓇᐊᑦ᙮
ᒋ ᐎ ᒥᓇᐊᐅᒡ ᒪᒃ ᓱᒥᓇᐳᔪᐤ ᑐᒥᓂᑭᓂᔪᐤ ᑲᐎᒋᒪᑯᓯᔨᒡ ᐊᒋ ᒪᒧᐱᑕᑭᓄᐎᒡ ᐊᓐᑕ᙮ ᒥᒄ ᒪᒃ ᓇᒪ ᐅᒋ ᐎ ᒥᓄᐤ ᒋᓴᔅ ᐅᔭ᙮
ᐊᑯ ᐸᐃᒄ ᐊᓐ ᒋ ᐃᔅᐸᑕᐤ ᒐᒋ ᐊᑯᑕᑦ ᐅᐱᓂᓯᔪᐤ ᓯᐎᐧᑲᐳᒡ, ᐊᑯ ᒥᔅᑎᑯᒡ ᒂ ᐊᒂᐱᐧᑲᑕᐧᒃ, ᐊᑯ ᒪᔭᑦ ᒐᒋ ᒥᓂᔨᒋ᙮ ᒋ ᐃᑕᐤ ᒪᒃ, “ᐊᓱᐛᐸᑕᑕᐤ, ᓂᓇᑭᑐᐛᔨᒪᑕᐤ ᐊᓐ ᑕᑈ ᒐ ᐸᒋ ᓂᑎᓂᑯᒂ ᐃᓚᐃᒐᔨᒋ᙮”
ᐊᓯᒪᑭᓂᓯᒡ ᑭᔭ ᒋ ᒪᔭᔨᒪᐅᒡ ᒋᓴᓴ, ᐊᑯ ᒂ ᓇᑕᒡ ᒥᒋᒪ ᒂ ᐎ ᒥᓇᐊᒡ ᐊ ᐎᓯᑲᐧᑭᒥᔨᒡ ᓱᒥᓇᐳᔪᐤ᙮