ᒪᑎᔪᐤ 1:18 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹⁸ ᒪᐅ ᒪᒃ ᑲ ᐃᔅᐱᔨᒡ ᐃᔅᐱ ᒐ ᐱᒪᑎᓯᑦ ᒋᓴᔅ ᙭᙮ ᒪᕆ, ᐊᓂᔭᔪᐛ ᒋᓴᔅ ᒐ ᐅᑲᐎᑦ ᒋᐸ ᓂᐳᐅᒡ ᐊᓂᔭᔪᐛ ᒍᓯᐸ, ᒥᒄ ᒪᒃ ᐊᔅᒄ ᐊᑲ ᐅᒋ ᓂᐳᐅᒡ ᒋᔅᒐᔨᑎᒻ ᒪᕆ ᐊ ᑭᓄᐛᔨᒪᐅᓱᑦ᙮ ᐊᓂᔭ ᒪᒃ ᐊᐛᓴ ᑲ ᐊᔭᐛᑦ ᑲ ᐸᔭᒋᓯᔨᒋ ᐊᒐᒂ ᒋ ᐃᑐᑕᑯᐤ ᒐᒋ ᐊᔭᐛᑦ᙮

ᒪᑎᔪᐤ 1:18 Iomraidhean Croise

ᒐᓂᓯᔅ 3:15

ᓂᑭ ᑐᑕᓐ ᒋᔾ ᑭᔭ ᐃᔎᐤ ᒐᒋ ᐛᐧᑲᑎᑐᔭᒄ, ᑭᔭ ᒋᑦ ᐊᐛᓯᒥᒡ ᑭᔭ ᐎᔾ ᐅᑦ ᐊᐛᓯᒪ ᒋᑭ ᐛᐧᑲᑎᑐᐅᒡ᙮ ᒥᔅᑲᔎᐛ ᒋᑭ ᐅᑕᒥᔅᑎᒂᓇᐅᑯᒡ᙮ ᑭᔭ ᒋᔾ ᒥᔅᑯᐅᑥᐛ ᒋᑭ ᒪᒂᑎᒺᓐ ᐅᑐᑎᓄᐛᐛ᙮”

ᒪᑎᔪᐤ 1:1

ᒋᓴᔅ ᙭ ᓂᑭ ᐊᔨᒧᒪᐤ᙮ ᓂᔅᑎᒻ ᐅᑦ ᐊᓂᔅᒐᓯᒪ ᐊ ᑕᔨᒋ ᓂᑭ ᐅᒋ ᒋᒋᐱᔨᓐ ᐊ ᐊᔨᒧᒥᒃ᙮ ᐊᓂᔭᐧᑲ ᒋᓴᐅᒋᒪᐛ ᑎᐱᑕ ᑭᔭ ᐊᓂᔭᐧᑲ ᐊᑉᕋᐊᒪ ᐊ ᑕᔨᒋ ᒋ ᐅᒋ ᐊᓂᔅᒐ ᐱᒪᑎᓯᐤ᙮

ᒪᑎᔪᐤ 12:46

ᐊᔅᒄ ᒪᒂᒡ ᒋᓴᔅ ᒋ ᐃᔨᒪᐊᐤ ᐊᓂᔭ ᐃᔪᐛ, ᒂ ᐅᒋ ᑎᑯᓯᓂᔨᒋ ᐅᑲᐎᔭ ᑭᔭ ᐎᐧᑲᓂᓴ᙮ ᐎᐎᑎᒥᒡ ᐊᓐᑕ ᒋ ᓂᐳᐅᔪᐛ ᐊ ᐎ ᐃᔨᒥᐃᑯᑦ᙮

ᒪᑎᔪᐤ 2:11

ᐊᑯ ᒂ ᐱᒐᒡ ᐊᓂᔭᔪᐤ ᒥᒋᐛᐱᔪᐤ ᐊᓐᑕ ᑲ ᑕᔨᒋ ᐊᐛᓴ ᐊᓯᒡ ᐅᑲᐎᔪᐛ ᒪᕆᔨᒋ᙮ ᐃᔅᐱ ᒪᒃ ᐎᔭᐱᒪᒡ ᐊᓂᔭᔪᐛ ᐊᐛᓴ ᒋ ᐅᒋᒋᐧᑯᓂᐱᔪᐅᒡ ᐊ ᐊᔭᒥᐊᔅᑐᐛᒡ᙮ ᐊᑯ ᒂ ᑯᐃᑯᓇᒡ ᐊᓂᔭ ᒥᔨᐛᐅᓇ ᑲ ᐎ ᒥᔭᒡ ᐊᓂᔭᔪᐛ ᐊᐛᓴ, ᐎᔄᐅᓱᓇᔭᐱᔎ ᒋ ᒥᔭᐅᒡ, ᑭᔭ ᑲᒋ ᐃᔎᓯᑭᓄᔨᒋ ᑲᐎᒋᒪᑯᓯᔨᒋ ᑭᔭ ᑲ ᓱᓇᔭᐎᒡ ᑐᒥᓂᑭᓂᔪᐤ ᑲᐎᒋᒪᑯᑉᓴᓯᔨᒡ᙮

ᓗᒃ 1:25

ᐊᑯ ᐃᓕᓴᐸᑦ ᒂ ᐃᔅᒋᔄᑦ, “ᓂᒋ ᓴᒂᔨᒧᓐ ᐊᑲ ᐅᒋ ᐊᔪᐛᒃ ᐊᐛᔅ, ᒥᒄ ᒪᒃ ᓂᒋ ᐃᑐᑎᒪᒄ ᐅᑎᐸᔨᒋᒐᐤ ᒐᒋ ᐊᔭᐅᒥᒋ ᐊᐛᓴ, ᑭᔭ ᓇᒪ ᓂᑭ ᐅᒋ ᓴᒂᔨᒧᓐ᙮”

ᓗᒃ 2:5

ᒍᓯᑉ ᒪᒃ ᒋ ᐎᒐᐅᑯᐤ ᒪᕆᔨᒋ ᐊᓂᔭ ᒐ ᐎᐅᑦ, ᒐᒋ ᒥᓯᓇᐛᑭᓄᐎᒡ᙮ ᒪᒂᒡ ᒪᒃ ᒋ ᑭᓄᐛᔨᒪᐅᓱᐤ ᒪᕆ᙮

ᐃᑉᕈᐛ 10:5

ᐊᐅᒄ ᒪᒃ ᐛᒋ ᐃᔅᒋᔄᑦ ᒋᓴᔅ ᐃᔅᐱ ᒐ ᑎᑯᓯᐧᒃ ᐅᑕ ᐊᔅᒋᒡ, “ᒋᓴᒪᓂᑐᐤ, ᓇᒪ ᒋ ᓂᑐᐛᔨᑕᓐ ᒥᑐᔅᑕᐊᒪᒐᐅᓐ ᑭᔭ ᐱᔅᑎᓂᒐᐅᓐ᙮ ᐊᐅᒄ ᐅ ᐛᒋ ᒥᔨᓐ ᐅ ᒥᔪᐤ ᑲ ᐊᔭᔭᓐ ᑕᐱᔅᑯᓐ ᓇᐸᐤ ᒐᒋ ᐃᓯᓇᑯᓯᔭᓐ᙮

ᐃᑉᕈᐛ 7:26

ᒋᓴᔅ ᐊᐅᒄ ᒋᓴᐊᔭᒥᐊᐅᒋᒪᐤ ᒋᒋᐛ ᒐᒋ ᐎᒋᐃᑕᐧᒄ᙮ ᓇᒪ ᓂᑕ ᒥᒋᑐᑎᒻ᙮ ᓇᔅᒡ ᑯᐃᔅᑯᑕᑎᓯᐤ ᑭᔭ ᐸᔭᒋᓯᐤ᙮ ᓇᒪ ᓇᔅᒡ ᐃᑕᔨᑕᑯᓱᐤ ᑕᓐ ᐊ ᐃᑕᔨᑕᑯᓱᐛᐧᒄ ᒋᔭᓄᐤ ᐊ ᒥᒐᑎᓯᔭᐧᒄ᙮ ᓇᒪ ᓇᔅᒡ ᑎᑯᓂᔪᐤ ᒐᒂᔪᐤ ᒐᒋ ᐃᓯ ᐊᑕᒪᔨᑕᑯᓯᑦ᙮ ᒋᓴᒪᓂᑐᐛ ᒋ ᐅᑎᓂᑯᐤ ᑭᔭ ᒋ ᐊᐃᑯᐤ ᐊᓐᑕ ᒪᐅᒡ ᐊ ᐃᔅᐸᔨᑕᑯᓂᔨᒡ ᐊᓐᑕ ᒋᒋᒋᓯᑯᒡ᙮